Ripoti a te Aronga Tutu Patireia

Akakite Ua te Aronga Tamateia no te Akarongo i Teia Tuatau i Sweden

TE TUATUA Ereni kia “akakite ua” koia oki e martyr, mei te reira kua rauka mai te tuatua Papaa “tamateia,” te aiteanga “ko tetai tei akakite ua na te tuku anga kia tamateia aia.” E manganui te au Kerititiano o te anere mataiti mua tei akakite ua no runga ia Iehova na te tukuanga kia tamateia ratou no te akarongo ra.

Ma te aiteite, i roto i te 20 anere mataiti, e tauatini ua atu te Au Kite tei mate i roto i nga rima o te aronga turu tiratiratu ia Hitler no te akonoanga i te tu neutara i roto i te au maro anga i te pae poritiki e te pa enua. Te oronga katoa mai nei teia aronga tamateia no te akarongo i teia tuatau i tetai akakite anga ririnui. Ko teia tei tupu i Sweden i ou akenei.

Te kapitianga atu ma te 50 ra akamaaraanga i te openga o te Tamaki II o te Ao, kua akamata te kavamani Sweden i tetai oroanga apiipiianga takapini i te ao no runga i te Orokoti. Kua tapaia taua angaanga e ko te Tuatua Enua Tika Tikai. Kua patiia atu te Au Kite o Iehova kia kapiti mai e kia akakite i to ratou au tupuanga.

Kua ariu atu te Au Kite na te akapapaanga i tetai akaariari anga ki te ngai tangata tei tapaia e ko te Au Tangata tei Akangaropoinaia o te Orokoti. Kua akamata te reira i te Are Uipaanga Akaputuputuanga o te Au Kite o Iehova i Strängnäs. Te papa ra te aronga tei ora mai i te Orokoti i te akakite ua i to ratou au tupuanga ki te au manuiri e maata atu i te 8,400 tei aere mai i te ra mua! I te openga o te 1999, kua kitea atu te au akaariari anga i roto i te au ngai vairanga apinga taito e tere atu i te 100 e te au ngai puka no te papuriki i te au ngai ravarai i Sweden, e kua kitea te reira e etai 150,000 tangata. Ko tetai o te au manuiri tei kapiti mai ko etai o te au opita o te kavamani, tei tuatua meitaki no runga i ta ratou i kite atu.

Kare atu e tupu anga okotai tei kapiti atu ki te au angaanga a te Au Kite o Iehova i Sweden kua rauka te akakitekite anga maata ki te papuriki e kua rauka mai te ariki anga meitaki mei te papuriki. Kua ui te au manuiri e manganui: “Eaa kotou i kore ei i akakite mai kia matou no runga i to kotou au tupuanga Orokoti i mua ana?”

I muri mai i te akaari angaia te au akaariari anga i roto i to ratou ngai, kua ripoti mai tetai putuputuanga e 30 patene te tupu anga o te au apii Pipiria i te kainga! Kua pati atu tetai Kite i tetai taeake angaanga kia akarakara i te akaariari anga. Kua ariki mareka ua te taeake e kua taki mai i tetai oa. I muri akera, kua tuatua atu te oa e kua ngata iaia te marama i te pakari o te akarongo o tetai au tangata e ka tuku au ua ratou kia tamateia i te kore e taina i tetai pepa tuku au i to ratou akarongo. Kua taki atu teia ki tetai au uriuri anga maata, e kua akamataia tetai apii Pipiria kiaia.

Mei to ratou au taeake i te anere mataiti mua, kua akakite mataku kore ua teia aronga tamateia o te 20 anere mataiti tei akarongo tamou e ko Iehova anake te Atua mou, tei tau i to tatou akarongo ngaueue kore e te tiratiratu.​—Apokalupo 4:11.

[Akameitakianga no te Tataanga i te kapi 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives