Apiiapii mai i Tetai Apiianga Mei Ia Nikodemo

“KIA inangaro te tangata i te aru mai iaku ra, e akaruke aia iaia uaorai, ka rave ei i tana satauro i tera rā i tera rā, ka aru mai ei iaku.” (Luka 9:23) Kua ariki ua nga tangata ravakai e te tangata koi tero tei akavaavaaia i taua pati anga. Kua vaoo ratou i te au mea ravarai kia aru atu ia Iesu.—​Mataio 4:​18-22; Luka 5:​27, 28.

Te rongoia nei rai ta Iesu pati anga i teia tuatau, e e manganui tei ariu mai. Inara, kua emiemi etai tei mareka ua i te apii i te Pipiria ma te Au Kite o Iehova i te ‘akaruke ia ratou uaorai ka rave ei i ta ratou satauro.’ Te emiemi ra ratou i te ariki i te apainga e te akameitakianga no te riro anga mai ei pipi na Iesu.

Eaa ra etai i tapupu ei mei te ariki anga i ta Iesu pati anga e te akatapuanga ia ratou uaorai ki te Atua ko Iehova? E tika, ko te aronga kare i utuutuia mai ma te apiianga okotai Atua a te Kerititiano  Iuda penei te umuumu maata ra i te tuatau i mua ake ka ariki maata ei i te vai ua anga o te mana katoatoa ko Tei Anga ra. Noatu rai, i muri mai i te irinaki anga ratou e e tika tikai te Atua, kua kape etai mei te aruanga i te au takainga vaevae o Iesu. Penei ka mataku ratou no runga i te ka manakoia e to ratou au kopu tangata e te au oa me riro mai ratou ei Au Kite o Iehova. Ko etai, tei manako kore i te tu rapurapu o te tuatau te noo nei tatou ki roto, kua uri atu i te aruaru anga i te tu rongoia e te manuia. (Mataio 24:​36-42; 1 Timoteo 6:​9, 10) Noatu e eaa te tu, no te aronga te tukutuku ua ra i ta ratou ikianga kia riro mai ei pipi na Iesu, te vaira tetai apiianga kia apiipiiia mai mei te tua o Nikodemo, e akaaere ngati Iuda puapinga i to Iesu tuatau.

Kua Akameitakiia ma te Au Tuatau Meitaki Rava

Penei e ono ua marama i muri mai i te akamata anga a Iesu i tana angaanga i te enua nei, kua kite atu a Nikodemo ia Iesu e e ‘orometua mei ko mai i te Atua ra.’ Kua akakeuia e te au temeio ta Iesu i rave i ou akenei i Ierusalema i te Pasa o te 30 T.N., kua aere mai a Nikodemo, i te po poiri, kia aaki i tana i irinaki i roto ia Iesu e kia apii maata atu no runga i teia puapii. I reira rai, kua akakite atu a Iesu kia Nikodemo i tetai tuatua mou oonu ra no runga i te umuumu anga kia “anau akaou” ia e raukai i te tomo atu ki roto i te Patireia o te Atua. I teia atianga, kua tuatua katoa a Iesu i teia au tuatua: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”​—Ioane 3:​1-16.

Mei teaa te meitaki rava i te manakonakoanga te vaira ki mua ia Nikodemo! Penei ka  riro mai aia ei taeake vaitata no Iesu, te rauka anga te kite mua i te au tu tuke tuke o te oraanga o Iesu i te enua nei. Ei akaaere o te ngati Iuda e ei puapii i roto ia Iseraela, kua kite meitaki tikai a Nikodemo i te Tuatua a te Atua. E tu pakari meitaki katoa tona, tei kiteia mai i tona akataka anga ia Iesu e ko te puapii tei tonoia mai e te Atua. Te inangaro ra a Nikodemo i te au mea pae vaerua, e e tu akaaka tuke ua akerai tona. Mei teaa atu te ngata no tetai mema o tetai akavaanga teitei roa atu o te au ngati Iuda kia akatika i tetai tamaiti a tetai kamuta akaaka ei tangata tei tonoia mai e te Atua! E puapinga tikai taua au tu i roto i te akariroanga i tetai ei pipi na Iesu.

I te akaraanga kare to Nikodemo inangaro i teia tangata i akameangiti ia ana. E rua e te apa mataiti i muri mai, i te Oroa no te Puakapa, kua aere atu a Nikodemo ki tetai uipaanga i te Sunederi. I teianei, kua riro rai a Nikodemo e “no ratou uaorai.” Kua tono atu te au taunga maata e te au Pharisea i te au opita kia opu ia Iesu. Kua oki mai te au opita e kua ripoti atu: “Kare rava e tangata e tau te tuatua i ta tera ra tangata.” Kua akamata te au Pharisea i te akakino ia ratou: “Kua vavare katoa ainei kotou? Kua akarongo ainei tetai o te ui rangatira, e o te au Pharisea, iaia? Kareka teianei au tangata tei kore i kite i te ture nei, kua taumaaia ïa.” Kare e rauka ia Nikodemo i te tapupu. Kua tuatua mai aia: “Ka tika aina i ta tatou nei ture kia akaapa atu tatou i te tangata, kare e timata na i te akarongo atu i tana tuatua, e kia kitea?” I reira kua riro mai aia e ko te takete akaapa anga mei tetai atu au Pharisea: “No Galilea katoa aina koe? ka kimi ana, kia kite koe, kare rava e peroveta i tupu i Galilea.”​—Ioane 7:​1, 10, 32, 45-52.

No etai ono marama i muri mai, i te Ra Pasa o te 33 T.N., kua kite atu a Nikodemo i to Iesu kopapa i te tukuna angaia ki raro mei te rakau tamamae. Kua kapiti atu aia kia Iosepha no Arimatea, e mema o te Sunederi, i te akapapaanga i te kopapa o Iesu no te tanumanga. No taua akakoroanga, kua apai atu a Nikodemo i tetai “manongi, e te aloe” penei paa e 100 paunu Roma te teiaa, te aiteite ra ki te 72 paunu Papaa. Te akaari maira i te okomaata i te reira. Kua umuumu katoaia te tu mataku kore e ia kia akatakaia ma “taua tangata pikikaa,”  tei tapaia a Iesu e tona au taeake Pharisea. Te akapapa viviki anga i to Iesu kopapa no te tanumanga, kua akapapa nga tokorua ia Iesu i roto i tetai vaarua tanumanga i te pae mai. Inara, i teia atianga nei, kare a Nikodemo i akatakaia ei pipi na Iesu!​—Ioane 19:​38-42; Mataio 27:63; Mareko 15:43.

Te Tumu i Tapupu ei Aia i te Rave Angaanga

Te tumu i kore ei a Nikodemo i ‘rave i tana satauro’ e kia aru ia Iesu, kare a Ioane i akakite mai i roto i tana tataanga. Inara, kua akaruke mai aia i te akakite anga penei ka akamarama i te tumu i kore ei teia Pharisea i tuku i te ikianga.

Te mea mua, kua akakite mai a Ioane e kua “aere mai [teia akaaere ngati Iuda] i te po kia Iesu.” (Ioane 3:2) Te akamarama maira tetai tangata kite i te Pipiria: “Kua aere mai a Nikodemo i te po, kare no te tu mataku, mari ra kia kopae i te urupu tangata te ka tamanata i tana uiui anga ma Iesu.” Inara, kua taiku a Ioane ia Nikodemo e ko “tei aere mai kia Iesu i te po i muatangana” i roto i taua aerenga manako i reira kua taiku aia ia Iosepha o Arimatea e ‘e pipi oki na Iesu, i mou poiri ua ra i te mataku i te ngati Iuda ra.’ (Ioane 19:​38, 39) No reira, te papu ra i reira, kua aravei atu a Nikodemo ia Iesu i te po poiri no “te mataku i te ngati Iuda,” mei tetai i roto i tona au tuatau e mataku ra no te rave i tetai apinga ma Iesu.​—Ioane 7:13.

Kua emiemi ainei koe i te tuku i te ikianga kia riro mai e ko tetai o ta Iesu pipi no te ka tuatuaia e toou au kopu tangata, te au oa, me kare te au taeake? “E rokoia e te ii tei mataku i te tangata ra,” i na te materi ei. Akapeea koe i te akono anga i taua tu mataku? Te na ko ra taua materi: “Ko tei irinaki ia Iehova ra, e ora ïa.” (Maseli 29:25) E raukai i te akamatutu i taua irinaki anga i roto ia Iehova, ka anoanoia koe kia kite e ka akapumaana te Atua ia koe me o atu koe ki roto i te au tumatetenga maata. E pure kia Iehova, e kia pati kiaia kia oronga mai i te tu mataku kore kia koe kia rave i te au iki anga rikiriki ua no taau akamori anga. Ma te marie, ka tupu toou irinaki e te akarongo i roto ia Iehova e tae ua atu e ka rauka ia koe te akono i te au iki anga maata ma te rotai ki to te Atua anoano.

Penei kua arai katoa to Nikodemo turanga e te ngateitei ei mema o te pupu maata iaia kia kore e akono i te takainga puapinga no te akaruke anga iaia uaorai. I taua taime rai, penei te inangaro maata ra rai aia i tona taoonga ei mema no te Sunederi. Te emiemi ra ainei koe i te rave angaanga kia riro mai ei tangata aru ia Karaiti no te mea penei ka ngere koe i tetai turanga teitei i roto i te taiate me kore penei ka akaatinga i te au manakonakoanga e tere ei ki mua? Kare etai o teia au mea e akaaiteia atu ma te teitei o te tavini anga i Tei Teitei Rava i te ao katoa e pini ua ake, te puareinga ra i te akamerengo i te au pati anga taau ka rave kia rotai ma tona anoano.​—Salamo 10:17; 83:18; 145:18.

Ko tetai tumu i tapupu ei a Nikodemo penei te piri atura ki tana au apinganui. Ei Pharisea, penei kua akakeuia aia e tetai, “tei noinoi apinga ra.” (Luka 16:14) Te tika e kua rauka iaia i te oko i tetai manongi okomaata e te aroe te akapapu maira i tana au apinganui. Te taroaroa ra etai i teia tuatau i te tuku i te ikianga kia rave atu i te au apainga Kerititiano no te mea te apiapi ra ratou no ta ratou au apinga materia. Inara, kua raurau atu a Iesu i tana au pipi: “Auraka e apiapi i to kotou ora, i ta kotou e kai, e ta kotou e inu, e te kakau no to kotou kopapa. . . . kua kite oki to kotou Metua i te ao ra e, kia rauka taua au mea katoa ra ia kotou e tikaʼi. E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.”​—Mataio 6:​25-33.

E Maata Tana i Ngere Ra

Ma te umere ra, te tataanga no runga ia Nikodemo, te kite uaia ra i roto i ta Ioane Evangeria, kare i akakite mai me kua riro mai rai aia ei pipi na Iesu me kare ra. Kia tau ki tetai tataanga, kua tu a Nikodemo no Iesu, kua papetito ra, kua riro ei takete takinokino anga  na te ngati Iuda, kua akakoreia mei tona turanga, i te openga ra kua tuaruia mei Ierusalema. Noatu e eaa te turanga, te vaira okotai apinga papu: E maata tana i ngere no te tapupuanga ia Iesu i te enua nei.

Naringa a Nikodemo i aru ia Iesu i te taime mua i aravei ei i te Atu, ka riro mai aia ei pipi vaitata na Iesu. Ma te tu kite o Nikodemo, te kite oonu, te akaaka, e te kite i te au mea pae vaerua, ka riro ua mai aia ei pipi meitaki roa. Ae, ka rauka ua iaia te akarongo atu i te au ako anga umere tikai a te Puapii Maata, ka apii i te au apiianga puapinga mei te au akatutu anga a Iesu, ka kite atu i te au temeio umere ra tei raveia e Iesu, e ka akamaroiroiia mei ta Iesu tuatua takake ki tana au apotetoro. Inara kua ngere aia i teia au mea pouroa.

Te aiteanga o te tu papu kore o Nikodemo e maata tana i ngere ra. Kapiti mai ko te pati anga maanaana a Iesu: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.” (Mataio 11:​28-30) Kua ngere ia Nikodemo i te tuatau no te kite atu i teia akaangaroianga tikai mei ia Iesu uaorai!

Akapeea Koe?

Mei te 1914 mai, kua vai ua a Iesu Karaiti i te rangi ra ei Ariki no te Patireia o te Atua i te rangi ra. Te totouanga no te ka tupu i roto i tona tuatau parutia, kua tuatua aia i tetai au mea: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) I mua ake ka tae mai ei te openga, kia akatupuia te angaanga tutuanga i te ao katoa. Te mareka ra a Iesu Karaiti i te au tangata apa ua i te kapitianga mai ki roto i teia. Penei ka anoanoia koe kia kapiti mai ki roto i teia angaanga.

Kua kite oki a Nikodemo e kua aere mai a Iesu mei te Atua. (Ioane 3:2) Mei te apiianga i te Pipiria, penei kua kite mai koe i te reira. Penei kua rave koe i te au taui anga i roto i toou tu oraanga kia akatano ki te au turanga Pipiria. Penei te aere atura koe ki te au uipaanga a te Au Kite o Iehova kia apii maata atu i te kite o te Pipiria. Kia akameitakiia koe no taua au tauta anga. Inara, kua anoanoia a Nikodemo kia rave maata atu i te akaari ua anga i te tu ariki no Iesu e ko tei tonoia mai e te Atua. Kua anoanoia aia kia ‘akaruke iaia uaorai, ka rave ei i tana satauro i tera rā i tera rā, ka aru ei ia Iesu.’​—Luka 9:23.

E akamanako meitaki no runga i ta te apotetoro ko Paulo e akakite maira kia tatou. Kua tata aia: “E teianei, te ako katoa atu nei matou te rave angaanga kapiti nei, ia kotou, e auraka kotou e āriki puapinga kore ua i te aroa ua o te Atua ra: Te karanga ra oki aia e, ‘Kua akarongo au ia koe i te tuatau tau ra, e kua tauturu atu au ia koe i te rā e oraʼi ra:’ i na, teia taua tuatau tau ra, teia taua rā e oraʼi ra.”​—2 Korinetia 6:​1, 2.

Ko teia te tuatau kia akatupu i te akarongo te akakeu ra ia koe kia rave angaanga. No te reira ra, e akamanako i te au mea taau e apii ra i roto i te Pipiria. E pure kia Iehova, e pati kiaia i te tauturu kia akaari i taua akarongo ra. Ia koe e kite ra i tona rima tauturu, ka akakeu toou tu ariki anga e te aroa nona kia inangaro koe i te ‘akaruke ia koe uaorai, ka rave ei i taau satauro i tera rā i tera rā, ka aru ua atu ei ia Iesu Karaiti.’ Ka rave angaanga ainei koe i teianei?

[Tutu i te kapi 9]

Te mea mua, kua tu mataku kore ua a Nikodemo no Iesu

[Tutu i te kapi 9]

Noatu te patoi anga, kua tauturu a Nikodemo i te akapapa i to Iesu kopapa no te tanumanga

[Tutu i te kapi 10]

Ka akaketaketa te apii naau uaorai e te pure ia koe kia rave angaanga

[Tutu i te kapi 10]

Ka ariki ainei koe i te akameitaki anga no te angaanga i raro ake i te arataki anga a Iesu Karaiti?