Au Uianga a te Aronga Tatau

Eaa te maata i te au kotinga no runga i te akaipoipo i rotopu i te kopu tangata tei akanooia i roto i te Ture a Mose te piri atura ki te Au Kerititiano i teia tuatau nei?

Te ture tei orongaia e Iehova ki te iti tangata Iseraela e iti ua te tuatua ia ra no runga i te au ravenga akaipoipo e te au ture. Inara, kua akanooia te au ture anga no runga i tetai au piri anga akaipoipo. Ei akatauanga, ia Levitiku 18:​6-20, ka kite tatou i tetai akapapa anga no te au piri anga tureia te kapiti atura ki tetai “kopu-tangata ra.” E maata ta taua au irava e akakite maira e koai ma te kopu tangata kare e o atu ki roto i te au pirianga ainga ma tetai e tetai. Ae, kare te au Kerititiano i raro i te Ture a Mose e kare i tatuaia e tana au akauenga. (Ephesia 2:15; Kolosa 2:14) Noatu rai, kare te aiteanga o teia e ka rauka ngoie ua i te au Kerititiano i te kopae i teia tumu i te ikianga e koai ma oki te ka akaipoipoia atu. Te vaira te au tumu maata e eaa oki i akaperai.

Ei akamata anga, te vaira te au ture te akatikatika ra i te akaipoipo i rotopu i te kopu tangata, e te anoano maataia ra te au Kerititiano kia akarongo atu ki te au ture o te enua te noo ra ratou. (Mataio 22:21; Roma 13:1) Ae, e tuke taua au ture ra i tetai ngai ki tetai ngai. Te maata anga o te au ture i teia tuatau no teianei tu kua akatumu maataia ki runga i te au manakoanga genetic. E mea tika oki e ko te akaipoipo i rotopu i te kopu tangata e akapapu anga maataia i te akatuera anga i tetai uanga ki te au genetic kino e te au maki. No teianei tumu e no to ratou ‘kauraro marie anga i te aronga mana taoonga ra,’ ka aru te au Kerititiano te o atura ki roto i te akaipoipo anga i te au ture akaipoipo o taua ngai.

Te vaira te tumu eaa te arikiia ra e eaa tei kore i arikiia i roto i te ngai tangata te noo ra tetai. I te au ngai katoa vaitata rai e te vaira te au ture e te au peu te arai ra i te akaipoipo i rotopu i te au tangata e piri anga toto to ratou, i te akara putuputu anga i taua au pirianga ra ei piri anga kopu tangata e no reira kare e akatikaia. Noatu rai e kua akakiteia mai te au piri anga tikai penei e maata te tuke anga i roto i te au ngai tukeke, “ko te akauenga matauia, te vaitata anga o te piri anga genetic i rotopu i nga tangata ra, e ketaketa atu e e maata atu te manako i te arai anga tapu me kare te akamaroiroi kore anga i te au piri anga ainga i rotopu ia raua,” i karangai The Encyclopædia Britannica. No reira, noatu e kare e piri mai te au piri anga kopu tangata, kare te au Kerititiano e inangaro i te rave ma te manako kore tikai i te au peu tei akatumuia me kare te au manako o te au tangata, e ma te kore e apai mai i te akakino anga ki runga i te putuputuanga Kerititiano me kare ki runga i te ingoa o te Atua ra.​—2 Korinetia 6:3.

To tatou akava ngakau tei orongaia mai e te Atua kare oki e akara koreia. Kua anau pouroaia te au tangata ma te manako no te tika e te tarevake, te meitaki e te kino. (Roma 2:15) Te akakite ra to ratou akava ngakau kia ratou e eaa te mea matauia e te mea tau e eaa te mea kare i matauia e te kino tikai, mari ua me kua taruri ke ia me kore kua akamarokiakiaia e te au ravenga viivii ra. Kua taiku atu a Iehova i teia tika anga i te oronga anga aia ki te ngati Iseraela i tana ture auraka e akaipoipo i rotopu i te kopu tangata piri vaitata ra. Ka tatau tatou: “Auraka kotou e rave i te au peu o te enua ra o Aiphiti, i ta kotou i noo ra: e auraka kotou e rave i te au peu o te enua nei o Kanaana, taku e arataki ia kotou nei; auraka katoa kotou e aaere i ta ratou au akonoanga.” (Levitiku 18:3) Te akaperepere ra te au Kerititiano i to ratou akava ngakau akatumuia e te Pipiria e kare roa e akatika i te reira kia takinoia e te manako taruri ke no te tika e te tarevake o te au pa enua.​—Ephesia 4:​17-19.

No reira, eaa ta tatou ka taopenga? I te mea e kare te au Kerititiano i raro i te Ture a Mose, te akakite meitaki ra to ratou akava ngakau e ko te akaipoipo i rotopu i te kopu tangata piri vaitata tikai​—mei te metua tane e te tamaine, te metua vaine e te tamaiti, te tungane e te tuaine​—kare takiri e akatikaia i roto i te au tangata Kerititiano. *I te kopu tangata e maata atura, te kite ra te au Kerititiano e te vaira te au ture e te au akonoanga te akatere ra i te akaipoipo tikai e te vaira te au turanga te arikiia ra e te katoatoa e te au tangata. Ka tau kia raveia teia na te akamanako meitaki anga i te reira e raukai ia tatou i te aru i te akauenga a te Tuatua Tapu: “Kia akameitakiia te akaipoipo i te tangata ravarai.”​—Ebera 13:4.

[Tataanga Rikiriki i Raro]