Ko Koe Ainei Tetai i Akaperepereia Mai e te Atua?

“Tei iaia taku au akauenga, e kua akono aia i te reira ra, koia tei anoano mai iaku; e tei anoano mai iaku ra, ka akaperepereia mai aia e taku Metua ra.”​—IOANE 14:21.

1, 2. (a) Akapeea a Iehova i te akaari anga i tona aroa no te au tangata? (e) Eaa ta Iesu i oronga mai i te po o Nisana 14, 33 T.N.?

TE AROA ra a Iehova i te au tangata tana i anga maira. Ko te tika, i aroa mai aia i to te ao tangata nei “kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) I te vaitata anga mai te tuatau no te akonoanga i te Akamaara Anga i te matenga o Karaiti, ka tau te au Kerititiano mou kia maata atu te manako ngakau e ko Iehova “tei aroa mai ia tatou nei, e kua tono mai i tana Tamaiti ei tarangaara i ta tatou nei ara.”​—1 Ioane 4:10.

² I te po o Nisana 14, 33 T.N., kua akaputu atura Iesu e tana au apotetoro e 12 ki te pia i runga ra i Ierusalema ra kia akono i te Pasa, te akamaaraanga i to Iseraela akaora anga mei Aiphiti maira. (Mataio 26:​17-20) I muri ake i te kai anga i teianei oroa ngati Iuda, kua akaatea atu a Iesu ia Iuda Ikariota e kua oronga maira i te kaikai anga akamaaraanga te ka riro ei Akamaara Anga Kerititiano i to Karaiti ra matenga. * Na te taangaanga anga i te varaoa akaopue koreia e te uaina muramura ei akatutu anga i tona kopapa e te toto, kua oronga kapiti a Iesu i teianei kai anga atinga au ki te 11 apotetoro tei vai maira. Kua orongaia mai te au akakite anga akapeea aia i te rave anga i teia e te aronga tata Evangeria Aiteite te Manako ko Mataio, Mareko, Luka e te apotetoro ko Paulo, tei taiku ra i te reira ‘te kaikai anga aiai a te Atu.’​—1 Korinetia 11:20; Mataio 26:​26-28; Mareko 14:​22-25; Luka 22:​19, 20.

3. I roto i teea au tu puapinga maata ta te apotetoro ko Ioane ra tataanga i te au ora openga o Iesu ra ma tana au pipi i te pia i runga ra i tuke ei mei ta etai ke ra?

³ E mea kitea ra, kare te apotetoro ko Ioane i taiku i te orongaanga i te varaoa e te uaina, penei no te mea i te tuatau i tatai aia i tana Evangeria (e vaitata i te 98 T.N.), kua matau meitakiia taua akanoonoo anga ra i roto i te au Kerititiano mua ra. (1 Korinetia 11:​23-26) Inara, i raro ake i te akauru angaia, ko Ioane anake ua tei oronga mai kia tatou i etai au akakite anga puapinga no runga i ta Iesu i tuatua e i rave oki i mua ua ake e i muri ua ake i Tana oronga anga i te Akamaara Anga i Tona ra matenga. Ko teianei au akakite anga marekaanga kua akaki mai i raro ake i te pene rima o te Evangeria a Ioane. Kare i akaruke ekoko mai i te tu tangata tataki tai ta te Atua e akaperepere ra. E akara matatio tatou ia Ioane pene 13 ki te 17.

E Apii Mei to Iesu Akaraanga Aroa

4. (a) I akapeea a Ioane i te akaketaketa anga i te tumu maata o ta Iesu uipaanga ma tana au pipi i tona oronga anga i te Akamaara Anga ra? (e) Eaa tetai tumu puapinga maata i aroai a Iehova ia Iesu?

⁴ Ko te aroa te tumu maata i roto i teianei au pene te akakite maira i ta Iesu akoanga openga ki tana au pipi. Ko te tika, te au tu no te tuatua “aroa” ke ke te taikuia ra i reira e 31 taime. To Iesu ra aroa oonu no tona metua, no Iehova, e no tana au pipi kare i maata atu te akakite angaia mai i tetai atu ngai ke i roto i teia nga pene nei. Ka rauka to Iesu aroa no Iehova kia akakiteia mai i te au tataanga Evangeria katoatoa no tona oraanga, inara ko Ioane anake ua tei tata e kua tuatua taka meitaki a Iesu: “Te anoano nei au i te Metua.” (Ioane 14:31) Kua tuatua katoa a Iesu e kua akaperepere a Iehova iaia e kua akataka mai i te tumu. Kua tuatua aia: “Mei taku  Metua i akaperepere mai iaku nei, kua akaperepere katoa atu oki au ia kotou: kia noo kotou ma te akaperepereia atu e au. I akono kotou i taku au akauenga, e vai akaperepereia atu kotou e au; mei iaku i akono i te au akauenga a taku Metua ra, e e vai akaperepereia mai au e ia.” (Ioane 15:​9, 10) Ae, te akaperepere ra a Iehova i tana Tamaiti no tona akarongo papu. Mei teaa ra te apiianga meitaki no te au pipi katoatoa a Iesu Karaiti!

5. I akapeea a Iesu i te akakite anga i tona aroa no tana au pipi?

⁵ Te akaketaketaia ra to Iesu aroa maata no tana au pipi i te akamataanga tikai o ta Ioane tataanga no ta Iesu ra uipaanga openga ma te au apotetoro ra. Kua akakite a Ioane: “Ou te oroa pasa ra, kua kite anā Iesu e kua tae ki tona ora, ka akaruke mai ei i teianei ao, ka aere atu ei ki te Metua ra, i aroa aia i tona tangata i te ao nei, aroa ua atura aia ia ratou e tae ua atura ki te openga ra.” (Ioane 13:1) I taua aiai maaraaraia ra, kua oronga aia kia ratou i tetai apiianga kare e ngaropoinaia i te tavinianga aroa ia etai ke ra. Kua orei aia i to ratou vaevae. Ko tetai apinga teia tei tau ra ratou taki tai kia puareinga i te rave no Iesu e no to ratou au taeake, inara kare ratou i rave. Kua rave a Iesu i teianei angaanga taakaaka e i reira kua tuatua atu ki tana au pipi: “E kua orei na oki au, ko te Atu e te Orometua, i to kotou vaevae, kia orei katoa oki kotou i to kotou uaorai vaevae e tikaʼi. Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou.” (Ioane 13:​14, 15) Ka tau te au Kerititiano mou kia puareinga e kia mataora i te tavini i to ratou au taeake.​—Mataio 20:​26, 27, te tataanga i raro ake; Ioane 13:17.

E Aru i te Akauenga Ou

6, 7. (a) Eaa te tumu puapinga maata ta Ioane i oronga mai no te oronga anga i te Akamaara Anga ra? (e) Eaa te akauenga ou ta Iesu i oronga ki tana au pipi, e eaa ra te mea ou no te reira?

⁶ Ta Ioane tataanga no tei tupu i roto i te pia i runga ra i te po o Nisana 14 ko te taiku anga taka meitaki anake te reira no te akaatea anga atu o Iuda Ikariota. (Ioane 13:​21-30) I te akarotaianga i te au tataanga i te Evangeria te akakite maira e i muri ua mai i te akaruke anga teianei tangata pikikaa i orongai a Iesu i te Akamaara Anga i Tona matenga. Kua tuatua roa atu aia i reira ki tana au apotetoro tiratiratu ra, i te orongaanga kia ratou i te akoanga akataka ke anga e te au apiianga. Ia tatou e teateamamao ra ia tatou uaorai kia aere atu ki te Akamaara Anga, ka tau tatou kia akamanako maata i ta Iesu i tuatua i taua atianga ra, e ma te maata atu oki no te mea te anoano tikai ra tatou kia o atu ki roto i te aronga ta te Atua e aroa ra.

⁷ Te apiianga mua tikai ta Iesu i oronga atu ki tana au pipi i muri ake i te orongaanga i te Akamaara Anga no tona matenga e mea ou ia. Kua akakite aia: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai.” (Ioane 13:​34, 35) Eaa te mea ou no teianei akauenga? I muri poto ake i taua aiai ra, kua akataka atura Iesu i te au tumu, i te na ko anga: “Teia taku akauenga, kia aroa kotou ia kotou uaorai, mei iaku i aroa ia kotou. Kia oronga te tangata i tona uaorai ora no tona au taunga, kare rava e tangata aroa maata atu i te reira.” (Ioane 15:​12, 13) Kua akaue te Ture a Mose i to Iseraela kia ‘aroa i to ratou tangata tupu mei ia ratou uaorai.’ (Levitiku 19:18) Inara kua mamao atu ta Iesu akauenga. Kia aroa te au Kerititiano i tetai e tetai mei ia Karaiti i aroa atura ia ratou, na te puareinga i te tuku atinga anga tikai i to ratou au oraanga no to ratou au taeake.

8. (a) Eaa te o atura ki te aroa tuku atinga iaia uaorai? (e) Akapeea te Au Kite o Iehova i te akakite anga i te aroa tuku atinga ia ratou i teia tuatau?

⁸ Ko te tuatau Akamaara Anga tetai taime tau kia akara matatio ia tatou uaorai, te aronga taki tai e pera katoa ei putuputuanga, kia kite me  tei ia tatou tikai teianei akairo akatakaanga i te akonoanga Kerititiano mou​—te aroa aite ki to Karaiti. Ka riro taua aroa tuku atinga ra iaia uaorai, i etai tuatau, e ka tuku te Kerititiano i tona uaorai oraanga ki roto i te tu kino e kare e pikikaa atu i tona au taeake. Inara, tei matau maataia, te o maira to tatou puareinga anga i te tuku atinga i ta tatou au apinga ei tauturu e kia tavini atu i to tatou au taeake e etai ke atu. Ko te apotetoro ko Paulo tetai akatauanga meitaki i teianei tu. (2 Korinetia 12:15; Philipi 2:17) Kua matauia te Au Kite o Iehova i te ao katoa no to ratou vaerua tuku atinga ia ratou uaorai, i te tauturuanga i to ratou au taeake e to ratou au tangata tupu e te akonoanga a ratou uaorai kia komunikeiti i te tuatua mou Pipiria ki to ratou tangata tupu. *​—Galatia 6:10.

Au Pirianga kia Akaperepereia

9. Kia tamou marie i to tatou pirianga okomaata ma te Atua e tana Tamaiti, eaa ta tatou ka mataora kia rave?

⁹ Kare atu e apinga okomaata kia tatou i te aroaia mai e Iehova e tana Tamaiti, koia Iesu Karaiti. Inara, e raukai te manako ngakau i teianei aroa, ka tika tatou kia rave i tetai apinga. I taua po openga ma tana au pipi ra, kua tuatua a Iesu: “Tei iaia taku au akauenga, e kua akono aia i te reira ra, koia tei anoano mai iaku; e tei anoano mai iaku ra, ka akaperepereia mai aia e taku Metua ra; e ka akaperepere oki au iaia, e ka akakite oki au kiaia iaku uaorai.” (Ioane 14:21) I te mea te akaperepere ra tatou i to tatou pirianga ma te Atua e ma tana Tamaiti, ka akarongo rekareka ua tatou i ta raua au akauenga. Te kapiti ra teia i te akauenga ou kia akaari i te aroa tuku atinga ia tatou uaorai e pera katoa te ikuiku anga ta Karaiti i oronga ra i muri ake i tona tuakaouanga ‘e tuatua aere ki te tangata, e akakite ua atu oki,’ ma te tautaanga kia ‘akariro ei pipi’ i te aronga tei ariki i te tuatua meitaki ra.​—Angaanga 10:42; Mataio 28:​19, 20.

10. Eaa te au pirianga akaperepereia te akatueraia ra ki tei akatainuia e ki te “au mamoe ke atu”?

¹⁰ I te roa anga o taua po ra, i te pauanga i te uianga tei uiia ra kiaia e te apotetoro tiratiratu ko Iuda (Tadaio), kua tuatua atura Iesu: “Kia anoano mai te tangata iaku ra, ka akono ïa i taku tuatua: e ka akaperepere mai oki taku Metua iaia, e aere atu oki maua kiaia ra, ka noo tikai ki ona ra.” (Ioane 14:​22, 23) Noatu rai ia ratou i te enua nei, ko te au Kerititiano akatainuia ra, kua kapikiia kia tutara ma Karaiti i te rangi, e pirianga vaitata takake to ratou ma Iehova e ma tana Tamaiti. (Ioane 15:15; 16:27; 17:22; Ebera 3:1; 1 Ioane 3:​2, 24) Inara to ratou au oa “mamoe ke atu,” e manakonako ra to ratou kia noo i te enua nei e mutu kore ua atu, e pirianga okomaata katoa to ratou ma te “okotai oki tiaki,” koia Iesu Karaiti, e ma to ratou Atua, ko Iehova, me ka akapapu ratou kia akarongo.​—Ioane 10:16; Salamo 15:​1-5; 25:14.

“Kare Kotou i to Teianei Ao”

11. Eaa te akamatakiteanga tau ta Iesu i oronga ki tana au pipi?

¹¹ I te tuatau o tana uipaanga openga ma tana au pipi tiratiratu i mua ake i tona matenga, kua oronga a Iesu i te akamatakiteanga tau: Me te aroaia maira tetai tangata e te Atua, ka makitakitaia mai aia e teianei ao. Kua akakite aia: “Kia  riri mai to te ao ia kotou ra, kua kite kotou e, ko au ta ratou i mainaina mai ana, ou to ratou riri ia kotou. Naringa kotou no teianei ao, e inangaro mai to teianei ao i tona tikai: no te mea ra, kare kotou i to teianei ao, ko au i iki ia kotou no roto i teianei ao, i riri mai ei teianei ao ia kotou. Ka akamanako i taku i karanga atu kia kotou na, Kare te tavini i maata i tona pu. I takinga-kino ana ratou iaku ra, e takinga-kino katoa ratou ia kotou; i akono ana ratou i taku tuatua, e akono katoa ratou i ta kotou.”​—Ioane 15:​18-20.

12. (a) Eaa ra a Iesu i akamatakite ei i tana au pipi e ka makitakita mai teianei ao ia ratou? (e) Eaa te mea meitaki no te katoatoa kia akamanako i te vaitata anga mai te Akamaara Anga?

¹² Kua oronga mai a Iesu i teianei akamatakiteanga kia kore teia 11 apotetoro e te au Kerititiano mou katoatoa i muri ake ia ratou ra e maroiroi kore e ka akamutu ua no te makitakitaia mai e to te ao nei. Kua tuatua aia: “I akakite atu ei au kia kotou i teianei au tuatua, kia kore kotou e maitu. E tuku ratou ia kotou ki vao i to ratou au sunago ra: e kua vaitata oki te ora, e manako ei te tangata e ta ia kotou na e, kua akamori i te Atua. E pera mai ratou ia kotou, no te mea kare ratou i kite i te Metua, e iaku oki.” (Ioane 16:​1-3) Kua akataka mai tetai tikitinari Pipiria e ko tetai tu no te verepa tei uriia i konei e “maitu” te aite anga “kia akariro i tetai tangata kia akamata i te irinaki kore e kia akaruke i tetai tei tau ra aia kia irinaki e kia akarongo oki; kia akariro kia inga ke atu.” I te vaitata mai anga te tuatau kia akono i te Akamaara Anga, ka tau te katoatoa kia akaata ki runga i te tu oraanga o te aronga tiratiratu, tei topa ki muri e to teianei tuatau, e kia aru i to ratou akatauanga ngaueue kore i raro i te au timata anga. Auraka e tuku i te patoianga me kare te takinga kinoanga kia akariro ia koe kia akaruke ia Iehova raua ko Iesu, mari ra kia akatika kia irinaki e kia akarongo oki ia raua.

13. Eaa ta Iesu i pati ki tona Metua no tana au pipi na roto i te pure?

¹³ I tana pure openga i mua ake i te akarukeanga i taua pia i runga i Ieruslema ra, kua tuatua atura Iesu ki tona Metua: “Kua tuku atu au i taau tuatua kia ratou; e te riri nei to te ao nei ia ratou, no te mea kare ratou no teianei ao, mei iaku nei rai oki kare i to teianei ao. Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao.” (Ioane 17:​14-16) Ka papu ia tatou e te tiaki ra a Iehova i rungao i te aronga tana e aroa ra, kia akamaroiroi ia ratou ia ratou e tamou marie ra kia takake mei teianei ao.​—Isaia 40:​29-31.

E Vai Mai i Roto i te Aroa o te Metua e i te Aroa o te Tamaiti Ra

14, 15. (a) Kua akaaite atu a Iesu iaia uaorai ki teaa, ei tukeanga ma ‘te vine tei ngere ra’? (e) Koai ma “te au rara” o “te vine mou”?

¹⁴ I te tuatau o tana tuatua piri vaitata ma tana au pipi tiratiratu i te po o Nisana 14 ra, kua akaaite atu a Iesu iaia uaorai ki “te vine mou,” tei tuke ra ki te ‘vine tei ngere ra’ no to Iseraela tiratiratu kore ra. Kua tuatua aia: “Ko au te vine mou, e ko taku Metua te tanu-kai.” (Ioane 15:1) I te au anere mataiti i mua akera, kua tata te peroveta ko Ieremia i teianei au tuatua a Iehova ki tona au tangata tei akaruke ra iaia: “Kua tanu oki au ia koe ei vine meitaki, . . . eaa io nei  koe i akariroiaʼi iaku nei ei rara kino no tetai vine ke?” (Ieremia 2:21) E kua tata te peroveta ko Hosea: “E vine toro ke Iseraela, te uua maira i tona ua: mei te maata o tona ra ua . . . Kua ekoko rua to ratou ngakau.”​—Hosea 10:​1, 2.

¹⁵ Kare e kia uua mai i te au ua o te akamori mou, kua topa atu to Iseraela ki roto i te apoteiti e kua uua mai i te ua nona uaorai. E toru ra i mua ake i tana uipaanga openga ma tana au pipi tiratiratu ra, kua tuatua atura Iesu ki te au arataki ngati Iuda pikikaa ra: “E karanga atu au kia kotou, E apai keia te basileia o te Atua nei ia kotou, e tukuia atu ki te aronga e akaua mai i te ua ra.” (Mataio 21:43) Taua iti tangata ou ra ko “te Iseraela o te Atua,” no te 144,000 Kerititiano akatainuia ra, e tei akaaiteia ki te “au rara” o “te vine mou” ra, ko Iesu Karaiti.​—Galatia 6:16; Ioane 15:5; Apokalupo 14:​1, 3.

16. Eaa ta Iesu i raurau i te 11 apotetoro tiratiratu ra kia rave, e eaa te ka tuatuaia no te toenga tiratiratu i teia tuatau openga nei?

¹⁶ Kua tuatua atura Iesu ki te 11 apotetoro i ko iaia i te pia i runga ra: “Te au rara ua kore katoa i roto iaku nei, nana ïa e tipu ke atu; e te au rara ua katoa, nana ïa e tope, kia maata ua atu te ua. Ka topiri mai kiaku, e naku e topiri atu kia kotou. Mei te rara kare e ua koia anake ra, kia kore e piri ki te vine ra; kare katoa kotou, kia kore e piri mai kiaku ra.” (Ioane 15:2, 4) Te akakite maira te tuatua enua o te au tangata o Iehova e kua vai taokotai mai te toenga o te au Kerititiano tiratiratu ra ma to ratou Upoko, ko Iesu Karaiti. (Ephesia 5:23) Kua ariki ratou i te tamaanga e te topeanga. (Malaki 3:​2, 3) Mei te 1919 mairai, kua uua maata mai ratou i te au ua Patireia, te aronga mua ko etai atu au Kerititiano akatainuia ra e, mei te 1935 mairai ko tetai “aronga maata” e tupu ua atura ei au oa.​—Apokalupo 7:9; Isaia 60:​4, 8-11.

17, 18. (a) Eaa te au tuatua a Iesu ka tauturu i tei akatainuia e te au mamoe ke kia vai rai i roto i te aroa o Iehova ra? (e) Akapeea te tae anga ki te Akamaara Anga i te tauturu anga ia tatou?

¹⁷ Ki te au Kerititiano akatainuia katoa e to ratou au oa, te piri atura ta Iesu au tuatua: “Ko te mea ïa e akakakāiaʼi taku Metua, kia maata to kotou ua anga; e riro kotou ei pipi naku i reira. Mei taku Metua i akaperepere mai iaku nei, kua akaperepere katoa atu oki au ia kotou: kia noo kotou ma te akaperepereia atu e au. I akono kotou i taku au akauenga, e vai akaperepereia atu kotou e au; mei iaku i akono i te au akauenga a taku Metua ra e e vai akaperepereia mai au e ia.”​—Ioane 15:​8-10.

¹⁸ Te anoano ra tatou katoatoa kia vai ua i roto i to te Atua aroa, e te akakeu ra teia ia tatou kia riro ei au Kerititiano uua mai. Ka rave tatou i teia na te mouanga i te au tuatau ravarai kia tutu aere i te “evangelia o te basileia nei.” (Mataio 24:14) Ka rave katoa tatou i tei maata kia rauka tika ia tatou i te akakite i ‘ta te vaerua e akatupu’ i roto i to tatou uaorai oraanga. (Galatia 5:​22, 23) Na te aereanga ki te Akamaara Anga i te matenga o Karaiti e akamaroiroi ia tatou i ta tatou akatika anga kia rave i teia, no te mea ka akamaaraaraia tatou i to te Atua e to Karaiti aroa maata no tatou.​—2 Korinetia 5:​14, 15.

19. Eaa tetai atu tauturu anga te ka uriuriia i te atikara te ka aru mai?

¹⁹ I muri ake i te orongaanga i te Akamaara Anga, kua taputou mai a Iesu e na tona Metua e tono mai i te ‘akapumaana ra, na te vaerua tapu.’ (Ioane 14:26) Akapeea te tauturu anga a teianei vaerua i tei akatainuia ra e te au mamoe ke atu kia vai mai i to Iehova ra aroa ka akara matatioia i roto i te atikara te aru maira.

[Au Tataanga Rikiriki i Raro]

Au Uianga Akamanako Akaou

• Eaa te apiianga tau i roto i te tavinianga aroa ta Iesu i oronga ki tana au pipi?

• E taime tau te tuatau Akamaara Anga no te akara matatio anga ia koe uaorai no runga i teaa?

• Eaa i tau ei kia kore tatou e maitu i ta Iesu ra akamatakiteanga no te makitakitaia e te takinga kinoanga na te ao nei?

• Koai “te vine mou”? Koai ma “te au rara,” e eaa te manakonakoia atura ia ratou?

[Au Uianga Apii]

[Tutu i te kapi 15]

Oronga a Iesu i te apiianga kare e ngaropoinaia ki tana au apotetoro i roto i te tavini anga aroa

[Au Tutu i te kapi 16, 17]

Akarongo te au pipi a Karaiti i tana akauenga kia akaari i te aroa tuku atinga ia ratou uaorai