Pakari Anga i Roto i to Ratou Uaorai Manako

“E PAKARI anga to te aronga mamaata, inara e pakari anga to te tamariki i roto i to ratou uaorai manako,” na ko akera tetai materi Nigeria. Kua kiteaia e Edwin, ko tetai tangata pakari i Nigeria, te tika anga o teia.

I tetai ra, kua kiteaia mai e Edwin tetai pia auri i raro ake i tana kaingakai i te kainga.

“Naai oki teia?” i ui atu ei a Edwin ki tana tamariki e toru ra.

“Naku,” i pau maira a Emmanuel e varu mataiti ra. Kua viviki aia i te akakite e ko teia pia tutae auri, 12 teni mita e puta to runga ra no te au akaputuanga ki te angaanga takapini i te ao a te Au Kite o Iehova. “I te mea e kare au e aere ana ki te Are Uipaanga Patireia i te au ra katoatoa,” tana ia i akataka mai, “kua manako au i te maani i tetai pia e me kare au e taangaanga i taku moni no te oko kai, ka rauka iaku i te tuku i te reira ki roto i te pia.”

E pia rai ta te papa o Emmanuel i te kainga no te akaputuputuanga i te moni no te aere anga ki te uruoaanga tapere i te mataiti okotai ra. Inara no te anoano anga o te ngutuare, kua taangaanga aia i te moni i roto i te reira. Kia akapapu e kare tana moni akaputuanga e taangaangaia no tetai atu akakoroanga, kua apai a Emmanuel i tetai tini taito ki tetai tangata welder kia popaniia te reira. Te kiteanga te tangata welder ra, i te akakoro anga no te tini, kua maani i tetai pia na Emmanuel no roto mai i te punu taito. Kua pati katoa a Michael, te teina o Emmanuel e rima mataiti ra, i tetai pia.

Kua poitirere i ta te tamariki i rave, kua ui a Edwin kia ratou e eaa ratou i maani ei i te au pia. Kua pau mai a Michael: “Inangaro au i te oronga!”

Kare to ratou nga metua i kite, e kua akaputu a Emmanuel, Michael, e Uchei, to raua tuaine e iva mataiti ra i te tuanga a ta ratou moni no te oko kai e te tukuanga i te reira ki roto i te au pia. Noea mai to ratou manako? Te pakari mai anga te tamariki i te mou anga i te moni i roto i to ratou nga rima, kua apii to ratou nga metua ia ratou kia tuku i tetai moni ki roto i te pia akaputuanga i te Are Uipaanga Patireia. Te papu ra, e kua kite meitaki te au tamariki i ta ratou apii anga.

Te ki anga te au pia, kua koputaia ratou. Te katoa anga o te akaputu anga e $3.13 (U.S.)​—kare i te aka moni roa i roto i tetai enua te avereti no te moni ka koi e nga mea anere ua rai tara. Ko taua au moni tauturu kua turu i te angaanga tutuanga a te Au Kite o Iehova te raveia nei i roto i te au enua e 235 i te ao katoa.