Akapeea te Au Tu Akangoru Anga e Ope Ei

E AKAMANAKO ana i te kiteanga te au mata o te matapo, te akarongoanga te au taringa turi i te au tangi anga katoa, te imeneanga te vaa o te murare ma te mataora, e te vaevae o te pirikoki te aere ketaketa anga! Te tuatua ra tatou, kare e no runga i te au kite anga no te rapakau anga vairakau taineti, mari ra no runga i te au tupu anga te akapiri maira te Atua uaorai no te au tangata. Kua totou mai te Pipiria: “Ei reira e akapueraiaʼi te mata o te matapo ra, e e akapu tataiaʼi te taringa o te turi ra. Ei reira te pirikoki e rererere aere ei mei te aili, e imene mai oki te vaa o te murare.” (Isaia 35:​5, 6) Inara akapeea e papu ei ia tatou e ka kitea tikai teianei totou umere ra?

Te mea mua, ia Iesu Karaiti i te enua nei, kua akaora tikai aia i te au tangata no te au tu ravarai o te maki e te au tu akangoru anga. Pera katoa, te maata anga o tana au temeio kua kiteaia e te au kite mata e manganui​—e pera katoa e tona au enemi. Ko te tika, i tetai atinga, kua akara matatio te aronga patoi i tetai akaoraanga kia rauka i te akakino atu ia Iesu. Inara ki to ratou manamanata maata ra, ta ratou i rave kua akapapu i tana temeio. (Ioane 9:​1, 5-34) I muri ake i te rave anga a Iesu i tetai atu temeio kare i rauka i te akakoreia, kua tuatua ratou na roto i te taitaia: “Te aa ua nei tatou? maata rava ta teianei tangata akairo e rave nei.” (Ioane 11:47) Inara, kare te au tangata noa ua i manako ariki kore ana, no te mea e manganui tei akamata i te tuku i te akarongo ki roto ia Iesu.​—Ioane 2:23; 10:​41, 42; 12:​9-11.

Ta Iesu Au Temeio​—Tetai Akakiteanga no te Akaoraanga i te Ao Katoa

Kua akapapu tikai ta Iesu au temeio e ko Iesu oki te Mesia e te Tamaiti a te Atua. Kua akakite mai ratou i tetai tumuanga no te akarongo i roto i te au totou Pipiria e ka akaoraia te au tangata akarongo i te tuatau ki mua. Kua kapiti mai teia au taputou i te totou i roto ia Isaia pene 35, tei taikuia mai i te akamata anga o te parakarapu. Te akakite maira a Isaia 33:24 no runga i te oraanga kopapa i te tuatau ki mua no te au tangata te mataku ra i te Atua: “Kare oki to reira e karanga e, Kua maki au.” Mei te reira rai, kua taputou mai a Apokalupo 21:4: “[Na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa, no te mea kua kore te au mea taito [te au timata anga e te au mamae o teia tuatau].”

Te pure putuputu ra te au tangata no te akatupuanga i teia au totou te ripitianga ratou i ta Iesu pure, te na ko ra: “Kia tae toou basileia. Kia  akonoia toou anoano i te enua nei, mei tei te ao katoa na.” (Mataio 6:10) Ae, kua kapitiia to te Atua ra anoano ki te enua e ki te au tangata. Te au maki e te au tu akangoru anga, noatu e kua akatikaia no tetai tumu, kare e roaia kare ratou e vai akaou, kare ratou e akakino i to te Atua ra “takainga vaevae” e tuatau ua atu.​—Isaia 66:1. *

Akaora Anga ma te Mamae Kore e Kare e Tutaki Anga

Noatu e eaa te mamae o te maki o te au tangata ra, kua akaora a Iesu ia ratou ma te mamae kore, ma te kore e taroroa, e kare e tutaki anga. No reira, kua akatotoaia teianei tuatua mei te ai e ka viviki ra, e kare e roaia “e manganui te tangata i aere mai kiaia ra, apai katoa maira i te pirikoki, te matapo, te murare, te paruparu, e te au maki ke katoa e manganui, kua tuku iora ki te pae vaevae no Iesu; kua akaora atura aia ia ratou.” Akapeea i te ariu anga atu te au tangata ra? Te na ko ra te papaanga kite mata a Mataio: “Umere anake iora taua aronga maata ra, i te kite anga i te murare i te tuatua anga, te paruparu i te ora anga, te pirikoki i te aere ua anga, e te matapo i te akara anga; akakakā atura ratou i te Atua no Iseraela.”​—Mataio 15:​30, 31.

Ka akara ana e ko te aronga tei akaoraia e Iesu kare i iki takakeia mei te aronga maata​—e peu tei taangaangaia e te aronga pikikaa. Mari ra, te manganui o te kopu tangata e te au oa o te aronga kua makiia tei ‘tuku iora ia ratou ki te pae vaevae o Iesu; kua akaora atura aia ia ratou.’ Ka akara akaou tatou i teianei i etai au akatauanga takake no te tu kite o Iesu i te akaora.

Te matapo: Iaia i Ierusalema, kua oronga a Iesu i te kite ki tetai tangata “matapo mei te anau anga mai.” Kua matau meitakiia teia tangata i roto i te oire ei tangata matapo te pati apinga ra. No reira ka rauka ia koe i te akamanako i te tu oraora e te maniania i te kite anga te au tangata iaia e aere kite ra! Inara, kare te katoatoa i mataora ana. No te riri i te akatuera anga a Iesu i to ratou tu kino i mua atu, kua inangaro tikai etai au mema o tetai pupu akonoanga maata e te rongonui ngati Iuda te kapikiia ra ko te au Pharisea i te kimi i te akapapu anga no te ravenga pikikaa i te tuanga o Iesu ra. (Ioane 8:​13, 42-44; 9:​1, 6-31) No reira, kua uiui ratou i te tangata i akaoraia, e i reira tona nga metua, e ki te tangata akaou. Inara kua akapapu ua te au uianga a te au Pharisea i ta Iesu temeio, tei akariri ra ia ratou. Kua umere no te tu akakino anga a teia aronga pikikaa akonoanga ra, kua tuatua atura te tangata uaorai tei akaoraia: “Kare akerai i kitea te matapo anau nei i te ora anga i te tangata, mei te akamata anga mai o te enua nei. Naringa teianei tangata kare to te Atua ra, kare rava tana ravenga e tika.” (Ioane 9:​32, 33) No taua akakiteanga tika tikai e te kite no te akarongo ra, kua ‘tuaruia aia ki vao’ e te au Pharisea, te akakite maira e kua akaatea ratou i te tangata i matapo ana mei te tunako.​—Ioane 9:​22, 34.

Te taringa turi: Ia Iesu i Dekapoli, e enua i te itinga o te Kauvai Ioridana, kua “arataki maira ratou i tetai tangata taringa turi e te murare iaia ra.” (Mareko 7:​31, 32) Kare a Iesu i akaora ua i teia tangata nei mari ra kua akaari katoa aia i te kite oonu i roto i te au manako anga o te taringa turi, penei e te manako akama ra i roto i te urupu tangata. Kua akakite mai te Pipiria kia tatou e kua arataki atura a Iesu i te tangata taringa turi ra mei “taua urupu tangata ra” e kua akaora iaia. Kua “umere maata” te aronga kite mata, i te na ko anga: “E mea tika rava te au mea katoa tana e rave nei; te akapuata nei aia i te turi, e te tuatua nei te murare.”​—Mareko 7:​33-37.

Te akangoru: Ia Iesu i Kaperenauma, kua aere mai te au tangata kiaia ma tetai tangata akangoru te vai ua ra i runga i te roi. (Mataio 9:2) Kua akataka mai te irava 6 ki te 8 e eaa tei tupu. “(Kua karanga atura [a Iesu] ki taua akangoru ra,) Ka tu, ka rave i to roi, ka aere i to ngutuare. Tu akera aia ki runga, aere atura ki te ngutuare. E kite akera taua aronga maata ra, va anake iora ma te akakakā i te Atua, ko tei oronga mai i te reira tu mana i te tangata nei.” Kua rave katoaia teia temeio ki mua i nga pipi a Iesu e tona au enemi. E akara e ko te au pipi, kare i tamatapoia e te makitakita e te tu akaparau, ko ta ratou i kite ana kua “akakakā i te Atua.”

Te maki: “Kua aere maira tetai lepera ra [kia Iesu], kua tuturi maira ki muao iaia, kua tuatua meitaki maira kiaia, na ko maira, Kia tika ia koe,  e mā au ia koe. Aroa akerā Iesu iaia, akatika atura i te rima, e akatukia atura iaia, na ko atura, Kua tika ïa iaku; kia mā koe. E tei te pera anga atu aia ra, peke atura te lepera nona i reira ra.” (Mareko 1:​40-42) E akara e kare a Iesu i akaora i teia tangata nei ma te reka kore mari ra na roto i te aroa tika tikai. E akamanako ana e ko koe tetai tangata repera. Eaa ra toou manako me kua akaora vivikiia toou maki kino e kare te mamae tei akakino marie ana i toou kopapa e te akaatea anga ia koe mei te taiate ra? Kare e ekoko anga e ka marama koe e eaa tetai atu tangata repera tei akaora temeioia ra i ‘tipapa iora ki raro i te vaevae o Iesu, kua akameitaki maira iaia.’​—Luka 17:​12-16.

Mamae anga: Ta Iesu temeio openga i mua ake ka apainaiai aia ki te akava anga e te patia angaia e akaari anga ia i te akaoraanga. Te apotetoro ko Petero, kua neke viviki i te patoi i te aronga tei aere mai i te apai atu ia Iesu, ‘e koke tana e kua unui akera, ta atura i te tavini o te taunga maata, e motu takiri atura tona taringa katau.’ (Ioane 18:​3-5, 10) Te akakite maira te papa anga aiteite i roto ia Luka kia tatou e kua “akatukia ua atura [Iesu] i tona taringa, ora atura.” (Luka 22:​50, 51) Kua rave akaouia teia tu angaanga meitaki i mua tikai i to Iesu au oa e tona ra au enemi​—i roto i teia akaraanga, ki te aronga tei opu iaia.

Ae, te akara vaitata anga tatou i ta Iesu au temeio, kua tere maata atu to tatou kite i te akatakaanga i te au akairo no te tu tika tikai. (2 Timoteo 3:16) E mei tei taikuia i mua akenei, ka tau taua au apii anga ra ei akamaroiroi i to tatou akarongo i roto i ta te Atua taputou kia akaora i te au tangata akarongo ra. Kua akataka mai te Pipiria i te akarongo Kerititiano ko “te tumu tikai ïa i te au mea i tatariia nei, e te kite ïa i te au mea kare i akaraia nei.” (Ebera 11:1) Te taka meitaki ra, e te akamaroiroi ra te Atua, kare i te irinaki anga matapo me kare te manako ua anga, mari ra te akarongo ketaketa tei patuia ki runga i te akapapu anga. (1 Ioane 4:1) Te rauka anga ia tatou taua akarongo ra, te kite ra tatou ia tatou uaorai i te tupu maroiroi anga, i te oraora, e te mataora i te pae vaerua.​—Mataio 5:3; Roma 10:17.

Na Mua te Akaoraanga i te Pae Vaerua!

E manganui te au tangata oraora i te pae kopapa kare e mataora ana. Kua tauta etai i te rave i te tamate anga no te mea kare o ratou manakonako anga no te tuatau ki mua me kare te manako taitaia ra ratou i te au manamanata. Ko te tika, kua akangoruia ratou i te pae vaerua​—e turanga kino roa atu i roto i nga mata o te Atua i to te akangoru anga i te pae kopapa. (Ioane 9:41) I tetai tua, te manganui tei akangoruia i te pae kopapa, mei ia Christian raua ko Junior tei taikuia i roto i te atikara i mua akenei, te noo ra ma te oraanga mataora e te puapinga tikai. No teaa ra? No te mea te vai oraora ra raua i te pae vaerua e te akamaroiroiia ra ma te manakonako anga papu tei akatumuia ki runga i te Pipiria.

I te taikuanga ki to tatou anoano tikai ei tangata, kua tuatua a Iesu: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4) Ae, kare e mei te anga anga o te animara, e maata atu ta te tangata e anoano ra i te apinga materia. Kua angaia i roto i to te Atua “uaorai tu,” te anoano nei tatou i te kai i te pae vaerua​—te kite o te Atua e akapeea tatou i te o atu anga ki roto i tana akakoro anga e pera katoa i te raveanga i tona ra anoano. (Genese 1:27; Ioane 4:34) Te akaki ra te kite o te Atua i to tatou au oraanga ma te akakoro anga e te maroiroi i te pae vaerua. Kua akanoo katoa te reira i te tumu anga no te oraanga mutu kore i roto i tetai enua parataito. “Teia oki te ora mutu kore,” i na ko ei a Iesu, “kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

E mea meitaki i te akamanako e kare to Iesu au tangata i kapiki iaia ei “Akaora” mari ra ei “Orometua.” (Luka 3:12; 7:40) No teaa ra? No te mea kua apii a Iesu i te au tangata no runga i te rapakau anga tamou ki te au manamanata o te tangata ra​—te Patireia o te Atua. (Luka 4:43; Ioane 6:​26, 27) Ko teia kavamani i te rangi ra i roto i nga rima o Iesu Karaiti ka tutara i te enua katoa e ka akatupu i te au taputou katoatoa o te Pipiria no runga i te akaou mutu kore tikai anga i te au tangata tuatua tika ra e to ratou kainga i te enua nei. (Apokalupo 11:15) No reira a Iesu, i roto i tana pure ra, i kapiti mai ei i te Patireia te aere maira ki to te Atua ra anoano te ka tupu ki runga i te enua nei.​—Mataio 6:10.

 No te au tangata akangoru tataki tai e manganui, i te apii anga no runga i teia manakonako akauruia kua tauiia to ratou au roi mata tei akatupuia e te mii ra ki roto i te au roi mata rekareka. (Luka 6:21) Ko te tika, e maata atu ta te Atua ka rave i te takore anga i te tu maki e te tu akangoruanga; ka takore aia i te au mea tikai te tamamae ra i te au tangata​—te ara uaorai. E tikai, kua kapiti mai a Isaia 33:24 e Mataio 9:​2-7, tei taikuia i mua ana, i te tu maki ki to tatou turanga ara. (Roma 5:12) No reira, te takore angaia te ara, ka rekareka akaou te au tangata i “te rangatira meitaki o te tamariki a te Atua ra,” e rangatira te kapitiia maira te tu apa kore o te manako e te kopapa.​—Roma 8:21.

Ko te aronga te rekareka ra i te oraanga meitaki ua ka rave ngoie ua i te manako kore i to ratou turanga. Inara kare ma te aronga te mamae kino tikai ra i te au tu akangoru anga. Kua kite tikai ratou i te puapinga o te oraanga kopapa e te ora anga e te taui viviki e te tapapa kore anga i te au mea. (Koheleta 9:11) No reira, to tatou manakonako anga e ko te aronga akangoru i roto i ta tatou aronga tatau ra ka oronga atu i te akamanako anga takake ki te au taputou umere ra a te Atua tei tataia i roto i te Pipiria. Kua oronga a Iesu i tona oraanga kia rauka i te akapapu i to ratou tupu anga. Eaa atu te akapapu anga meitaki te ka rauka ia tatou?​—Mataio 8:​16, 17; Ioane 3:16.

[Tataanga Rikiriki i Raro]