Au Tu Akangoru Kare e Kotinga Anga

T E NOO ra a Christian, i tetai enua Aperika, kua mouria e te au vaeau tei tauta ra i te maro iaia kia piri ki roto i te vaeau, inara kua patoi aia i te ariki no te mea no tona akava ngakau tereniia e te Pipiria. Kua apai atura te au vaeau iaia ki tetai puakapa vaeau i te ngai, i muri ake i te papaia anga aia e a ra, kua pupui tetai ia ratou i tona vaevae. Kua rauka oki ia Christian i te aere atu ki tetai are maki, inara kua tipuia tona vaevae i raro ake i te turi. I tetai atu enua Aperika, na te au vaeau meameaau i tipu i te au mema kopapa o te tamariki rikiriki ra. E mei Cambodia ki te au Balkan, mei Afghanistan ki Angola, kua rave ua atu te au ngai o te au maina i te takinokino e te akangoru tau kore i te aronga ou e te ruaine.

Te tupu katoa ra te au u anga e te au maki, mei te toto vene. Ka rauka katoa i te au poitini o te reva i te arataki atu ki te tu akangoru anga. I te au ngai i te pae mai i tetai oire i Itinga Europa, ei akatauanga, e maata te au tamariki tei anauia kare o ratou potonga rima. E tumu ua to raro ake i to ratou poro rima. Te tou ra te akapapu anga ki te takino anga genetic tei akatupuia e te taero kemikara. E manganui te au tangata te vaira to ratou au mema kopapa inara kua akangoruia no te mea no te maki akangoru me kare no etai atu maki. E tikai, kare o te au tu akangoru kotinga anga.

Noatu eaa te tupu anga, e kino tikai te au tu akangoru. I te mataiti 20 ra kua tipuia i raro roa te vaevae kaui o Junior. Kua tuatua aia i muri mai: “E manganui toku au tu ngata i te pae manako. Kua aue maata au no te tumu e kare e rauka akaou mai toku vaevae. Kare au i kite e eaa taku ka rave. Kua oripu tikai au.” Inara, kare e roaia, kua taui takiri te tu o Junior. Kua akamata aia i te apii i te Pipiria e kua kite i te au mea kare e tauturu anake ra iaia i te autu inara kua oronga katoaia tetai manakonako anga umere kiaia no tetai tuatau mataora ki runga i te enua nei. Me kua akangoruia koe, ka inangaro ainei koe kia piri atu ki taua manakonako anga ra?

Me koia ia, e tatau i reira i te atikara te aru maira ine. Te pati atu nei matou kia akara koe i te au papaanga Tuatua Tapu i roto i taau uaorai Pipiria e raukai ia koe uaorai i te kite e eaa ta Tei Anga ka rave no te aronga tei kite i tana akakoro anga e te akatano ra i to ratou oraanga ki te reira.