Au Uianga a te Aronga Tatau

E mea meitaki ainei no tetai Kerititiano mou kia aere atu ki tetai tanumanga me kare ki tetai akaipoipo i roto i tetai are pure?

Ta tatou pirianga ki roto i tetai ua atu turanga akonoanga pikikaa e mea mareka koreia kia Iehova e e mea tau kia kopaeia. (2 Korinetia 6:​14-17; Apokalupo 18:4) Te tanumanga i roto i te are pure e ravenga akonoanga ia penei te kapiti maira i tetai ako akakitekiteanga no taua au manako kare i roto i te tuatua tapu mei te meta mate kore e tetai tutaki anga i te rangi no te au tangata meitaki katoatoa ra. Penei te kapiti katoa maira taua au ravenga ra mei te akairo anga i te koroti e te pirianga ki roto i te pure a te orometua. Te au pure e tetai atu au angaanga akonoanga te patoi ra i te apii anga Pipiria penei e tuanga katoa ia no tetai ravenga akonoanga akaipoipo te raveia ra i roto i tetai are pure me kare i tetai atu au ngai. Me i roto i tetai pupu te rave ra te katoatoa i te angaanga akono anga pikikaa, penei ka ngata i tetai Kerititiano i te patoi i te taomi anga kia piri atu ki roto. Mei teaa te manako pakari kore me akatuera atu i tetai uaorai ki taua au taomi anga ra!

Akapeea me te manako akaueia ra tetai Kerititiano kia aere atu ki tetai tanumanga me kare ki tetai akaipoipo te raveia ra i roto i tetai are pure? Ei akatauanga, ko tetai tane irinaki kore ra, penei ka maro atu i tana vaine Kerititiano kia aru iaia ki taua atianga. Ka rauka ainei iaia i te piri atu kiaia ei tangata akara muteki ua? Na te ariki anga i te au anoano o tana tane, penei ka iki te vaine kia aru atu iaia, te akamanako anga e kare e o atu ki roto i tetai ua atu au ravenga akonoanga. I tetai tua, penei ka iki aia kia kore e aru, te akamanako anga e ko te taomi anga i te pae manako o te au turanga ra ka akapapu mai e kare te reira e meitaki nona, peneiake te akariro ra iaia kia aati i te au kaveinga tau i te Atua. Nana e rave i te iki anga. Ka inangaro tikai aia kia maroiroi tona ngakau, te rauka anga tetai akava ngakau ma.​—1 Timoteo 1:19.

I tetai ua atu turanga, e mea tau nona kia akataka atu ki tana tane e kare aia e o ma te ngakau tae ki roto i tetai ua atu au ravenga akonoanga me kare e piri atu ki roto i te imeneanga i te au imene me kare e tupou i tona upoko me orongaia mai te pure. No runga i te tumu o tana akataka anga, penei ka akamanako aia e me tei reira tana vaine penei ka akatupu ia tetai turanga te ka akamareka kore mai iaia. Penei ka iki aia i te aere koia ua no te inangaro i tana vaine, te akangateitei anga i tana au irinaki anga, me kare te anoano kia kopae i tetai ua atu taakama anga. Inara me ka maro aia e kia aru aia iaia ra, penei ka aru aia ei tangata akarakara ua.

Kia akamanako katoa oki tetai e eaa te ka tupu me aere tatou ki tetai angaanga i roto i tetai are akonoanga ki te au taeake irinaki ra. Ka akakinoia ainei te akava ngakau o etai ke ra? Ka akaparuparuia ainei ta ratou patoi anga kia kore e piri atu ki roto i te akamori itoro ra? ‘Kia timata oki i te au mea e maata ua atu te meitaki,’ i ako mai ei te apotetoro ko Paulo ra, “kia riro kotou ei aronga tuatua-mou, e te apa kore, e tae ua atu ki te rā o te Mesia ra.”​—Philipi 1:10.

Me te piri ra te atianga ki tetai kopu tangata piri vaitata ra, penei te vaira tetai atu au taomi anga ngutuare. I tetai ua atu turanga, ka tau tetai Kerititiano kia akamanako meitaki i te au tumu katoa te piri maira. I raro ake i tetai au turanga penei ka manako aia e kare e tupu mai te au tu ngata me aere atu ki tetai tanumanga i te are pure me kare ki tetai akaipoipo anga ei tangata akarakara ua. Inara, penei no taua au turanga ra na te aere anga atu, ka akakino tikai i tona uaorai akava ngakau me kare to etai ra e ka akakore atu i te au akameitaki anga tau no te tae anga atu. Noatu eaa te turanga, ka tau te Kerititiano kia papu e kare taua iki anga e arai i tana akonoanga i tetai akava ngakau meitaki i mua i te Atua e te au tangata ra.