Te Anoanoia ra Tatou kia Kite e Koai Oki te Atua

KARE ainei koe e rekareka ana i te kite anga i te rangi te ki ra i te au etu i tetai po kare e tiao rangi? Kare ainei i te mea reka te kakara o te au tiare karakara ra? Kare ainei koe e reka ana i te akarongoanga i te au imene a te au manu e te tangitangi anga o te au rau rakau i roto i tetai angiangi matangi maru? E mei teaa te umere anga i te au toora ririnui e etai atu au mea ora te vaira i roto i te moana! Te vaira oki te au tangata ma to ratou manako akava ngakau e ma tetai roro umere tikai. Akapeea koe i te akamarama anga i te vai anga o te au mea umere katoatoa te takapini ra ia tatou?

Te irinaki ra etai e e mea tupu ua ma te kitea koreia teia au apinga katoatoa. Inara me ko te reira ia, eaa ra te au tangata i manako ei i te Atua? Eaa ra te au kemikara tukeke kare i tapapa kapitiia maira i akatupu ei i te au mea ora ma te anoano pae vaerua ra?

“Kua aka oonuia te akonoanga i roto i te tu o te au tangata e kua kiteaia i te au ngai ravarai no te turanga i te pae apinga e te turanga o te apii anga.” Kua taopenga mai teia tuatua i te kimikimi anga ta te Poropeta ko Alister Hardy i oronga mai i roto i tana puka The Spiritual Nature of Man. Te au kimikimi anga i ou akenei no te roro ra kua arataki atu i tetai au taineti vai anga roro kia akakite mai e penei e kua “porokaramuia” te au tangata ma te manako anga akonoanga. Te puka tei karangaia Is God the Only Reality? te karanga ra: “Te anoano maata o te akonoanga . . . ko te kite anga noa ia i roto i te au peu ravarai e te au mataiti ravarai mei te akamata anga mai o te au tangata.”

E akamanako ana i ta tetai tangata kite i tuatua mai i etai 2,000 mataiti i topa. Kua tata aia: “E akatu oki to te au are ravarai nei; ko tei akatu ra i te au mea katoa, ko te Atua ïa.” (Ebera 3:4) Ko te tika, te karanga ra te irava mua tikai o te Pipiria: “I muatangana ra, kua anga iora te Atua i te rangi e te enua.”​—Genese 1:1.

Koai oki, i reira, te Atua? Kua tatakake te au tangata no runga i teia ui anga. Te uiia anga e koai oki te Atua, kua pau mai tetai tamaiti mapu Tiapani ko Yoshi te ingoa: “Kare i papu iaku. E tangata akamori Buda au, kare i te mea puapinga kia kite au e koai oki te Atua.” Noatu rai, kua akatika mai rai a Yoshi, e te ariki ra te manganui ia Buda uaorai ei atua. Ko Nick, e tangata pitiniti i roto i tona 60 mataiti, te irinaki ra ki roto i te Atua e te manako ra iaia ei mana ririnui katoa. I te uiia anga kia akataka mai i tana i kite no runga i te Atua, kua pau mai a Nick i muri ake i tetai tapu anga roa: “E ngata tikai tena ui anga, e taku oa. Te  ka rauka iaku i te akakite atu e Atua tetai. Te vaira te Atua.”

Ko etai au tangata te “akamori ra e te tavini ra i ta te Atua i anga kare i Tei Anga uaorai.” (Roma 1:25, Today’s English Version) E mirioni ua atu te akamori ra i te au ui tupuna tei mate, te irinakianga e e mamao roa te Atua no te aravei atu. I roto i te akonoanga Hindu, e manganui te au atua e te au atua vaine. Kua akamoriia te au atua tukeke, mei ia Dia raua ko Ereme i te au tuatau o te au apotetoro a Iesu Karaiti. (Angaanga 14:​11, 12) E manganui te au ekaretia o Kerititome te apii ra e e Toru Tai te Atua, te kapiti maira i te Atua te Metua, te Atua te Tamaiti, e i te Atua te Vaerua Tapu.

E tika, “e manganui oki te atua, e manganui oki te atu,” i karanga ei te Pipiria. Inara, te kapiti maira te reira: “Kareka ia tatou nei, okotai rava ïa Atua, ko te Metua, no reira mai te au mea katoa nei.” (1 Korinetia 8:​5, 6) Ae, okotai ua Atua mou. Inara koai oki aia? Eaa tona tu? E mea puapinga i reira no tatou kia kite i te au pau anga ki teia au ui anga. Kua karanga a Iesu uaorai i roto i te pure Kiaia ra: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) E tumu anga tetai kia irinaki e te vaira to tatou oraanga mutu kore ki runga i te kiteanga i te tuatua mou no runga i te Atua.

[Tutu i te kapi 3]

Eaa te au akamarama anga no to ratou vai anga?

[Akameitakianga]

Whale: Courtesy of Tourism Queensland