Te Ariki ra Ainei Koe i to te Atua Aroa?

KUA akataka mai te tangata ra ko Iobu i te turanga apa o te tangata i roto i teia au tuatua: “Ko te tangata ta te vaine e anau nei, e iti ua ona puke rā, e te ki oki i te pekapeka. Te tupu nei aia mei te tiare, e kua motu iora: te rere nei oki aia mei te ata ra, e kare i mou mai.” (Iobu 14:​1, 2) Te oraanga, ta Iobu e kite ra i reira, kua ki i te taitaia e te mii. Kua manako ana ainei koe mei te reira rai?

Inara, noatu te au tu ngata katoatoa ra e te au manamanata ta tatou ka aro atu, te vai nei tetai manakonako anga tei kitea meitakiia, ko tetai tei akatumuia ki runga i to te Atua ra tangi aroa e te aroa. Ko te mea mua oki, kua oronga mai to tatou Metua takinga aroa i te rangi ra i te atinga oko kia okoia mai te au tangata mei to ratou topa anga ki roto i te turanga ara. Kia tau kia Ioane 3:​16, 17, kua tuatua a Iesu Karaiti: “I aroa mai te Atua i to te ao nei [te au tangata], kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore. Kare oki te Atua i tono mai i tana Tamaiti [ko Iesu] ki te ao nei e akaapa mai i to te ao, kia ora ra to te ao iaia.”

E akamanako katoa i te tu meitaki o te Atua kia tatou ei au tangata ara. Kua akakite mai te apotetoro ko Paulo: “E nana i anga i te tangata i te pa enua katoa nei i te toto okotai ra, ei noo i te pa enua katoatoa nei, e kua akono i te tuatau i akono takereia atu, e te kotinga o to ratou kainga; Kia kimi ratou i te Atu, peneiake ko te aa atu ratou iaia, e kitea atu, kare ra aia i atea ke atu ia tatou katoa nei.” (Angaanga 17:​26, 27) E akamanako ana i te reira! Noatu e au tangata ara tatou, ka rauka rai ia tatou te rekareka anga i tetai pirianga uaorai ma Tei Anga aroa ia tatou, te Atua ra ko Iehova.

Ma te irinaki anga, i reira, ka rauka ia tatou i te aro atu i te tuatau ki mua, i te kiteanga e te manako maira te Atua ia tatou e kua oronga aroa mai i tetai ravenga ei puapinga mutu kore no tatou. (1 Petero 5:7; 2 Petero 3:13) E mea tika, i reira e, tei ia tatou te tumu ravarai kia maata atu te kite anga no runga i to tatou Atua aroa na roto i tetai apii anga i tana Tuatua ra, te Pipiria.