“E Aere Mai Kotou Kiaku Nei, . . . Naku e Akaanga i to Kotou Roi”

Te Tupu Anga Maata te Umuumuia ra te Akatotoa Anga Viviki

“E AERE mai kotou kiaku nei, . . . naku e akaanga i to kotou roi,” na ko maira a Iesu Karaiti. (Mataio 11:28) Mei teaa te pati anga pumaana no ko mai i te Upoko o te putuputuanga Kerititiano ra! (Ephesia 5:23) Me akamanako tatou i taua au tuatua, kare tatou e ngere i te ariki anga i tetai tumu ririnui o te akaangaroi anga​—te taokotai anga ma to tatou au taeake e te au tuaine i te pae vaerua i te au uipaanga Kerititiano ra. Te akatika tikai ra tatou ki te tangata tata taramo tei imene: “I na oki, te meitaki e te mataora, kia noo katoa te au taeake ma te tau tikai!”​—Salamo 133:1.

E tikai, to tatou au oa i taua au akaputuputuanga no te akamori anga e meitaki tikai, e te reva i te pae vaerua e tinamou e te mareka anga. No te tumu meitaki, i reira, te karanga ra tetai Kerititiano mapu: “Te aere ra au ki te apii i te au ra katoatoa, te tamaromaroa ra te reira iaku. Inara te au uipaanga mei te ngai akapuanga i roto i te metepara ra, e i akaangaroiiai au kia autu atu i tera mai ra i te apii ra.” Te akakite maira tetai mapu no Nigeria e: “Kua kitea e au e ko te piri anga taokotai ma etai ke te inangaro ra ia Iehova te tauturu ra iaku kia akapiri vaitata atu kiaia.”

Te Are Uipaanga Patireia o te Au Kite o Iehova i te reira ngai te akono ra i tetai anoano maata ei ngai no te akamori anga mou i roto i te ngai tangata. I te maata anga o te au ngai, te raveia ra te au uipaanga i te Are Uipaanga Patireia e rua taime i te epetoma, e te akamaroiroiia ra te aronga apii Pipiria kia aere vave atu kia puapingaia mei te taokotai anga akaangaroianga i reira.​—Ebera 10:​24, 25.

 Tetai Anoano Anga Rapurapu

Inara, e meitaki kia akamanako e, kare te katoa anga o te Au Kite o Iehova e taangaanga ana i tetai Are Uipaanga Patireia tau. Te tupu anga maata o te numero o te aronga akakitekite o te Patireia i te ao katoa ra kua akatupu i tetai anoano anga rapurapu. E tauatini ua atu te au Are Uipaanga Patireia te anoanoia ra rai, i roto tikai i te au enua te tupu ra.​—Isaia 54:2; 60:22.

Ei akatutu anga: E ngauru ua rai au Are Uipaanga Patireia no te 290 putuputuanga i roto i te kapitara o Democratic Republic o Congo. Te anoano rapurapu ra taua enua ra i te au Are Uipaanga Patireia e manganui. I Angola te uipaanga ra te maata anga o te au putuputuanga i vao no te mea e tokoiti ua te numero o te au Are Uipaanga Patireia. Te aite ra te au anoano i tetai atu au enua e manganui.

No reira, mei te 1999, kua akapapaia tetai tauta anga ei tauturu i te patu anga i te Are Uipaanga Patireia i te au enua te kotingaia ra te au moni te ka rauka mai. Kia tauturu i te akono i te au angaanga patu anga are i taua au enua ra, te Au Kite karape ra kua oronga e na ratou e rave i te au angaanga. Me kapitiia atu taua au tauta anga ma te vaerua puareinga ra e te rauka anga mai te aronga tauturu o taua ngai ra, e akamaroiroianga tikai te au tupu anga. Aru mai, kua puapingaia te Au Kite o reira mei te terenianga tei rauka ia ratou. Te tauturu pouroa ra teia kia araveiia atu te au anoano anga i te patu anga i te Are Uipaanga Patireia i roto tikai i to ratou au enua.

No reira kua orongaia te tauturu anga tau na roto i tetai manako tau kia patu i te Are Uipaanga Patireia te taangaanga anga i te au ravenga e te au apinga o reira. Te akakoro anga kare anake e kia aravei atu i te anoano anga maata no te au Are Uipaanga Patireia mari ra kia akatupu katoa i tetai porokaramu angaanga te tau ra ki te au turanga o te reira ngai.​— 2 Korinetia 8:​14, 15.

Au Tupu Anga Akaangaroianga

Eaa te tupu anga o teia au tauta anga kia orongaia mai te au ngai no te akamori anga? I te akamata anga i te 2001, te karanga ra tetai ripoti mei Malawi e: “Ko tei tupu i roto i teia enua nei e mea akara anga meitaki tikai. I roto i nga marama e rua i aru mai, ka oti ia matou tetai atu au Are Uipaanga Patireia.” (Tutu 1 e te 2) I Togo kua rauka i te aronga tauturu i te patu i tetai au Are Uipaanga Patireia mako i te au marama i ou akenei. (Tutu 3) Te au angaanga memeitaki tei raveia e te aronga tauturu te tauturu katoa ra i te oronga atu i te au Are Uipaanga Patireia tau i Mexico, Brazil, e etai atu au enua.

Te kite ra te au putuputuanga e me patuia tetai Are Uipaanga Patireia, kua kite te au tangata o reira e ka vai rai te Au Kite o Iehova i reira. I te akara anga e manganui tei kore e inangaro roa ana i te taokotai mai ma te Au Kite kia rauka roa mai oki tetai ngai tau no te akamori anga. Te ripoti maira te  Putuputuanga Nafisi i Malawi e: “I teianei e Are Uipaanga Patireia tau to matou, te tupu ra tetai akakite anga meitaki. No reira, e mea ngoie ua i te akamata i te au apii Pipiria.”

Kua akakoromaki te au mema o te Putuputuanga Krake i Benin i te aviri anga maata i topa no te mea kua taito te Are Uipaanga Patireia o mua ana i te akaaiteia anga ki to tetai au akonoanga. (Tutu 4) I teianei e Are Uipaanga Patireia ou meitaki to te putuputuanga te akakite ra i te akamori anga mou i roto i tetai tu mako inara ma te ngateitei. (Tutu 5) E 34 papuritia Patireia o teia putuputuanga ma tetai akaputu anga avereti e 73 i te au uipaanga i te Tapati, inara e 651 tei tae mai ki te akatapu anga o te Are Uipaanga Patireia. Te maata anga ia ratou e au tangata no te taoni tei ariki reka maira i te kiteanga e kua rauka i te Au  Kite i te patu i tetai are uipaanga i tetai tuatau poto ua. Te akamanakoanga i te au tupu anga i pati ra no runga i teia turanga, kua tata te manga i Zimbabwe e: “I roto i te marama okotai te patuia anga tetai Are Uipaanga Patireia ou, kua taki rua ua i te maata anga o te taime tei tae mai.”​—Tutu 6 e te 7.

Kare e ekoko anga, te au Are Uipaanga Patireia ou e manganui te tauturu ra i te oronga i te au ngai no te akaangaroi anga i te pae vaerua no te au Kerititiano akatapuia e te au tangata inangaro ra. “Te rekareka maata nei matou,” ta tetai Kite i Ukraine e tuatua ra i muri ake i te akamata anga te putuputuanga o reira i te taangaanga i tona Are Uipaanga Patireia ou. “Kua kite matou ma to matou uaorai nga mata e akapeea a Iehova i te tauturu anga i tona au tangata.”

[Pia/Au Tutu i te kapi 10, 11]

Kua Arikiia te Tauturu Anga Oronga Ua

Kua rekareka te Au Kite o Iehova i te kite anga i te tere meitaki anga tei raveia ei akono i te anoano rapurapu no te au Are Uipaanga Patireia ou te takapini ra i te koropu. Te tupu meitaki anga te numero o te aronga akamori ia Iehova i roto i te au enua tuketuke te anoano ra i te au Are Uipaanga Patireia ou e manganui kia patuia i te tuatau ki mua. Eaa oki, i te avereti, i te tuatau o te mataiti tavini anga i te 2001, e 32 putuputuanga ou tei akamataia i te au epetoma katoa! Te anoano ra taua au putuputuanga ra i te au ngai kia akaputu e kia akamori.

Penei ka tupu mai te ui anga, ‘Akapeea tatou i te tauturu anga i taua au angaanga ra mei te patu anga i te au Are Uipaanga Patireia ou, i roto tikai i te au enua te kotingaia ra te au apinga i te pae moni a te au taeake ra?’ Te kapiti maira te pau anga i nga turu anga tu-Atua e te tu oronga ua o te au tangata.

Kia tika ki tana taputou, te riringi ra a Iehova i tona vaerua tapu ki rungao i tona au tavini, i te tauturuanga ia ratou “kia angaanga i tei meitaki, kia puapinga i te au angaanga memeitaki, kia tuku uaia, kia papa i te oronga.” (1 Timoteo 6:18, NW) Te akakeu ra te vaerua o te Atua i te Au Kite o Iehova kia tauturu i te angaanga tutuanga Patireia i roto i te au mataara katoa​—i te orongaanga i to ratou taime, te maroiroi, te angaanga uaorai, e tetai atu au apinga ki te au angaanga Kerititiano.

Te akakeu ra tetai vaerua orongaanga tikai i te Au Kite e etai atu tei tauturu i te angaanga akatotoa anga e te patu anga na roto i tetai mataara o te moni. I te pae atu i te tauturuanga kia tutaki putuputu i te au kaiou a te putuputuanga o reira, kua oronga atu ratou ki te angaanga patu anga i roto i tetai au tuanga ke o te enua ra.

I roto i te putuputuanga tataki tai, te vaira te au pia tei tata meitakiia e ko te “Au Akaputu Anga no te Angaanga i te Ao Katoa​—Mataio 24:14.” Ka rauka i reira i te au tangata tataki tai ra i te tuku atu i te au moni tauturu me te inangaro ra ratou. (2 Ariki 12:9) Te au moni katoatoa, tei maata e tei meangiti, te arikiia ra. (Mareko 12:​42-44) Te taangaangaia ra teia au moni i roto i tetai au mataara ke te tau ra ki te anoano, kapiti mai i te patu anga i te au Are Uipaanga Patireia. Kare taua au moni ra e taangaangaia ana ei moni tutaki i te aronga akatere no te mea kare o te Au Kite o Iehova aronga mei te reira rai.

Te akatupu ra ainei te au akaputu anga ki te angaanga i te ao katoa ra i ta ratou akakoro anga? Ae, te tupu ra ratou. Te manga i Liberia​—ko tetai enua te ki ra i te tamaki anga a te tangata​—te ripoti maira e te aro ra te maata anga o te Au Kite o te reira ngai i te angaanga kore e te au manamanata tikai o te moni. Akapeea e raukai i te au tangata o Iehova i roto i teia enua nei tetai ngai tau no te akamori anga? “Ka taangaangaia te au akaputu anga a te au taeake i tetai au enua ke kia tutaki i te angaanga,” i akakite mai ei te manga opati. “E akanoonoo anga pakari tikai e te aroa!”

Kua oronga katoa te au taeake i reira, noatu e te kotingaia ra ta ratou au moni. Te ripoti maira te enua i Aperika ko Sierra Leone: “Te turu nei te au taeake o reira i te tauta anga e te mataora ra i te oronga anga kia angaanga ratou e noatu e eaa te au akaputu anga moni te ka rauka ia ratou kia tauturu i te patu i te au Are Uipaanga Patireia.”

Tei maata atu, te apai maira teia tauta anga patuanga are i te akapaapaa anga kia Iehova. Te tuatua maoraora maira te au taeake mei Liberia e: “Te patu anga i tetai au ngai tau no te akamori anga na roto i te enua te akaari ra ki te au tangata e ka vai rai te akamori anga mou i konei e ka akangateitei e ka akamanea i te ingoa maata o to tatou Atua ra.”