Aaereanga i te Au Arataa o Iehova ka Apai Mai i te Au Tutaki Apinganui

KUA aaere ainei koe i te au maunga ra? Me kua pera koe, penei kua manako koe e mei te mea rai tei runga koe i te take o te ao nei. Mei teaa rai te marekaanga o te reira kia akaea i te reva meitaki, kia akara i te ngai mamao atu, kia akara i te manea natura! Penei te au apiapi o te kainga i te au ra kua akara anga meangiti ua te tu.

Ki te maataanga o te au tangata e iti ua te reira au terepu mataora e taki tai ua ake, inara me ko koe tetai Kerititiano akatapuia, penei kua aaere ana koe na te enua teitei no etai taime​—i te tu pae vaerua. Mei te tata taramo i taito ra, kare e ekoko anga kua pure koe: “E akakite mai koe kiaku i to au arataa, e Iehova; e apii mai koe iaku i to au aerenga.” (Salamo 25:4) Te maara ra ainei ia koe i akapeea toou manako ngakau i toou aerenga mua ki runga i te maunga o te are o Iehova e te akamata anga i te aere i te au ngai teitei ra? (Mika 4:2; Habakuka 3:19) Kare e ekoko anga, e kare i roaia kua kite koe e i te aaereanga na teia au ngai teitei i te au arataa no te akamori anga ma kua apai mai i te paruru anga e te rekareka kia koe. Kua riro koe kia kapiti ia atu ki te au manako ngakau o te tata taramo ra: “E ao to te au tangata i kite i te reo rekareka ra: e aaere rai ratou, e Iehova, i te mārama o to mata ra.”​—Salamo 89:15.

Inara, i etai taime, te aronga aaere i runga i te au ngai maunga ka akakoromaki i te roa e te teitei o te au tuaivi. Ka akamata to ratou nga vaevae i te mamae, e ka roiroi ua ratou. Ka rauka katoa oki kia kite tatou i te au tu ngata i roto i ta tatou tavini anga i te Atua. Koi ou ua akenei, penei kua manga teiaa to tatou au takainga. Akapeea e rauka akaou mai ei to tatou maroiroi e to tatou rekareka? Ko te takainga mua kia kite i te teitei o to Iehova ra au aerenga.

Ta Iehova Au Ture Akateiteiia

To Iehova au aerenga e ‘teitei atu i to te tangata nei au aerenga,’ e ko tana akamori anga kua ‘akatinamouia ki runga i te take o te au maunga e kua akateiteiia ki rungao i te au tuaivi.’ (Isaia 55:9; Mika 4:1) Ko to Iehova ra pakari “te pakari no runga maira.” (Iakobo 3:17) E teitei atu tana au ture i ta etai katoa ra. Ei akatau anga, i te tuatau te akono ra to Kanaana i te atinga takino i te tamariki, kua oronga atu a Iehova i te au ture ki to Iseraela tei teitei ra te akono tau e kua akairoia na te aroa. Kua tuatua aia kia ratou: “Auraka kotou e akatika i te tuatua-tika kore i te akava anga: auraka koe e uri ki te tangata rikiriki, auraka oki e tatomo atu ki te tangata mamaata. . . . Kia riro ra te tangata ke . . . mei te tangata tupu katoa ia kotou, e aroa oki koe iaia mei te aroa ia koe uaorai.”​—Levitiku 19:​15, 34.

E 15 anere mataiti i muri iora, kua oronga katoa maira Iesu i etai atu akatauanga no ta Iehova ‘ture teitei.’ (Isaia 42:21) I te Ako Anga i te  Maunga ra, kua tuatua aia ki tana au pipi: “E aroa ua atu i to kotou au enemi e te pure oki no te aronga e takinga kino mai ia kotou na; kia akakite kotou ia kotou uaorai ei tamariki na to kotou Metua i te rangi ra.” (Mataio 5:​44, 45, NW) “E te au mea katoa ta kotou i anoano ia etai ke ra, na reira katoa kotou ia ratou,” kua tuatua katoa aia. “Ko ta te ture ïa, e ta te au peroveta.”​—Mataio 7:12.

E akatupu anga ta teianei au ture akateiteiia ki runga i te au ngakau o te au tangata tei akarongo maira, e te akakeuanga ia ratou kia aru i te Atua ta ratou e akamori ra. (Ephesia 5:1; 1 Tesalonia 2:13) E tamanako ana i te akatuke anga tei rokoia i te tu o Paulo ra. I to tatou rongoanga mua nona ra, ‘kua mareka rava aturā [aia] i te ta anga’ o Setephano e kua “pou atura te ekalesia iaia.” I etai mataiti tokoiti ua i muri iora, kua akono maru atura aia i te au Kerititiano i Tesalonia ra “mei te metua i matuapuru i tana tamariki.” Na te apiianga tu-Atua i taui ia Paulo mei tetai tei takinga kino ra ki tetai Kerititiano matuapuru ra. (Angaanga 8:​1, 3; 1 Tesalonia 2:7) Kua akameitaki tikai aia e kua tauiia tona tu tangata e te apiianga a Karaiti. (1 Timoteo 1:​12, 13) Akapeea e raukai i te ariki anga aiteite kia tauturu ia tatou kia aaere marie i te au arataa akateiteiia a te Atua ra?

Aaereanga Ariki Anga

Te mareka ra te aronga aaere i te au ngai manea te akakiteia maira i te enua teitei. Ka kite katoa ratou i te rekareka i te au mea rikiriki i te pae o te arataa, mei tetai toka tuke ra, te tiare manea, me kare te akaraanga i te animara rerevao. I te pae vaerua, ka tau tatou kia matakite i te au tutaki​—me e maata e me e rikiriki​—te aere maira na te aereanga ma te Atua. Na teia matakite anga e tuku i te akakeu anga ki roto i to tatou takainga e ka akatuke i te aerenga roiroi ki roto i tetai aereanga maroiroi. Ka tuatua akaou tatou i te au tuatua a Davida ra: “E akakite mai koe iaku i to aroa i te popongi; te irinaki nei oki au ia koe: e akakite mai koe kiaku i toku arataa kia aere ra.”​—Salamo 143:8.

Ko Mary, tei aaere ra no te au mataiti e manganui i te au arataa o Iehova, kua tuatua: “Me akara atu au i tei angaia mai e Iehova ra, ka kite au kare i te papa anga meitaki anake ra mari ra i to te Atua ra tu pumaana. Noatu me e animara, e manu, me kare e manumanu, ko ratou taki tai e ao rikiriki te ki ra i te manea anga. Ko taua rekareka ra te aere maira no te au tuatua mou pae vaerua te riro maira kia taka meitaki atu i te au mataiti kua topa ra.”

Akapeea e raukai ia tatou i te akaoonu atu i to tatou ariki anga? Ei tuanga, na te kore e manako meangiti ua i ta Iehova i rave mai no tatou. “Auraka e tukutuku i te pure,” ta Paulo i tata. “E akameitaki i te Atua i te au mea katoa ra.”​—1 Tesalonia 5:​17, 18; Salamo 119:62.

Te tauturu ra ta tatou uaorai apiianga i te vaerua akameitaki anga. Kua raurau a Paulo i te au Kerititiano i Kolosa: “Kia akono kotou i tana [i ta Iesu Karaiti]: . . . kia maata atu te reira ma te akameitaki.” (Kolosa 2:​6, 7) Na te tatauanga i te Pipiria e te tamanakoanga i ta tatou i tatau ana ka akamaroiroi i to tatou akarongo e ka akavaitata atu ia tatou ki te Tata o te Pipiria ra. I roto i tona au kapi katoa te vaira te au apinganui te ka akakeu ia tatou kia ‘maata atu te akameitaki anga.’

Na te tavini anga ia Iehova i te pae i to tatou au taeake ka akariro kia ngoie atu te aerenga. Kua tuatua te tata taramo nona uaorai: “E tangata tau oki au ki te aronga ravarai e mataku ia koe ra.” (Salamo 119:63) Etai o to tatou atianga mataora katoa te akapouia ra i te au akaputuputu anga Kerititiano me kare i te kapitianga ma to tatou au taeake. Kua kite tatou e ko to tatou pamiri Kerititiano okomaata i te ao katoa nei te kaiou ra i tona vai maianga kia Iehova e tona au aerenga akateiteiia ra.​—Salamo 144:15e.

 I te pae mai i te ariki anga, ko te manako apainga ka akamaroiroi ia tatou kia tere ki mua i te au arataa akateiteiia o Iehova ra.

Te Aaereanga ma te Tu Apainga

Te aronga aaere ma te manako i te apainga ka kite i te umuumu anga kia aaere matakite kia kopae ke ratou i te ngaroanga me kare te aereanga vaitata roa ki te au ngai tariva. Ei aronga rima rave rangatira tau, te akatika maira a Iehova i tetai tuanga tu rangatira e te tauta anga. Inara ko taua tu rangatira ra te umuumuia ra tetai tu apainga ia tatou e akatupu ra i ta tatou au apainga Kerititiano.

Ei akatauanga, te irinaki ra a Iehova i tona au tavini kia akatupu i ta ratou au apainga ra ma te tau tikai. Kare aia e akataka mai eaa te maata o te maroiroi e te taime ka tau tatou kia akapou i te au angaanga Kerititiano me kare eaa te maata o te moni ta tatou ka tau kia oronga ei tauturu me kare i etai atu aerenga. Kareka ra, ko ta Paulo au tuatua ki to Korinetia te piri maira kia tatou katoatoa: “E oronga te tangata ravarai i tana i akakoro i roto i tona ngakau.”​—2 Korinetia 9:7; Ebera 13:​15, 16.

Te orongaanga apainga a te Kerititiano te kapiti ra i te tuaanga i te tuatua meitaki ma etai atu. Ka akaari katoa tatou e e apainga ta tatou na te tauturu anga i te angaanga Patireia i te ao katoa nei. A Gerhardt, ko tetai o te aronga pakari, kua akataka mai e kua akamaata atu raua ko tana vaine i ta raua tauturuanga i muri ake i te aereanga ki tetai akaputuanga i Europa Itinga. “Kua kite maua e ko to tatou au taeake i reira e meangiti ua ta ratou i te pae o te apinga; inara te ariki maata ra ratou i ta tatou au puka Pipiria,” tana i tuatua, “no reira kua iki maua e ka anoano maua kia oronga kia maata atu te tauturu te ka rauka ia maua ki to tatou au taeake te ngere ra i etai atu au enua ke.”

Akamaata Atuanga i to Tatou Akakoromaki Anga

Te aaereanga i te au enua teitei ra te umuumuia ra te maroiroi. Te akono ra te aronga aaere ra i te tuatau ka rauka ia ratou, e manganui te aaere poto ua ra kia teateamamao ia ratou uaorai no te aaereanga roa. Mei te reira katoa, te akamaroiroi maira Paulo e kia rave maata tatou i te au angaanga teokaratiki kia tamou i to tatou tu tau i te pae vaerua. Te aronga te anoano ra “kia tau to [ratou] aerenga i te Atu” e kia “akamaroiroiia mai,” kua tuatua a Paulo, e ka tau “kia tupu te au angaanga meitaki katoa.”​—Kolosa 1:​10, 11.

Ka tauturu te akakeuanga i te mana tamou o te aronga aaere ra. Na ea? Na te akaraanga tamou ki runga i tetai akakoro anga atea, mei te maunga mamao ra, e akatupu anga maroiroi tona. E me tae tei aaere ra ki te au ngai matauia ra, ka rauka iaia te vaito i tona aereanga ki tana akakoro anga i akanoo ra. Iaia e akara ra ki muri i te mamao o te aerenga i raveia ra, kua manako ngakau merengo aia.

Mei te reira katoa, to tatou manakonako oraanga mutu kore ka tamou e ka akakeu oki ia tatou. (Roma 12:12) I teianei, ia tatou e aaere ra i to Iehova au aerenga, ka kite tatou i te aerenga ki mua i te akanooanga e te raukaanga te au akakoro anga Kerititiano. E mei teaa ra te rekareka ta tatou ka manako ngakau me akara tatou ki muri ki te au mataiti o te tavini anga tiratiratu me kare te akara anga i te au taui anga ta tatou i akono i to tatou tu tangata!​—Salamo 16:11.

Kia aereia te au aerenga mamao e te akono i te ririnui, ka aere marie te aronga aaere ra. Aiteite katoa, te aerenga meitaki te kapiti ra i te aere putuputu ki te au uipaanga e te tutu aere anga ka tamou i to tatou aereanga akakoroia ra. No reira, kua akamaroiroi a Paulo i te au taeake Kerititiano: “Na reira tatou i te aere na taua akairo rai, kia akono oki tatou i te mea okotai.”​—Philipi 3:16.

Inara, kare tatou e aaere ko tatou anake i te au arataa o Iehova. “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra,” ta Paulo i tata. (Ebera 10:24) Te taokotai anga meitaki i te pae vaerua ka akariro kia ngoie atu kia tamou marie i ta tatou aaereanga ma te au oa akarongo ra.​—Maseli 13:20.

Te openga, e te puapinga maata oki, auraka e ngaropoina ia tatou te mana ta Iehova e oronga maira. Ko te aronga tei roto ia Iehova to ratou maroiroi “ka aere rai oki ratou mei te maroiroi ki te maroiroi.” (Salamo 84:​5, 7) Inara i etai taime ka tika kia aaere tatou na te ngai ngata, ma ta Iehova ra tauturu ka rauka ia tatou te rave i te reira.