E Kopae i te Akavare Angaia

TE AKAVARE anga vaitata e kua taito mei te tangata ra. Ko tetai tupu anga mua i roto i te tuatua enua tei rekotiia ko te angaanga o te akavare anga. Kua tupu te reira i to Satani akavare anga ia Eva i roto i te kainga i Edene.​—Genese 3:13; 1 Timoteo 2:14.

Noatu e kare roa e taime mei reira mai e kare te akavare anga i akatotoaia i runga i te enua, e maata tikai te reira i teia tuatau. Te akaraanga ki mua i teia au tuatau nei, kua akamatakite mai te Pipiria: “Ko te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.”​—2 Timoteo 3:13.

Kua akavareia te au tangata no te au tumu tukeke e manganui. Te akavare ra te aronga pikikaa e te aronga tapikikaa i te au tangata no ta ratou moni. Kua akavareia e etai aronga poritiki to ratou au tangata voti, i te tauta anga kia vai ua rai te taoonga noatu e eia moni ka pou. Kua akavare rai te au tangata ia ratou uaorai. Kare e aro atu i te au tuatua mou mareka kore ra, kua akapapu ratou kia ratou uaorai e kare e kino roa ana te aruaru i te au ravenga kino tikai, mei te kai avaava, te apinga akakona, me kare te ainga tau kore.

E te vaira oki te akavare anga i roto i te au tumu akonoanga. Kua akavare te au arataki akonoanga i to Iesu tuatau i te au tangata. No taua aronga akavare ra, kua na ko atura a Iesu: “E matapo arataki matapo ïa. E kia arataki te matapo i te matapo, e topa kapipiti ïa ki roto i te vaarua.” (Mataio 15:14) Pera katoa, kua akavare te au tangata ia ratou uaorai i roto i te au tumu akonoanga. Te karanga ra Maseli 14:12 e: “E ana rai te tangata i te arataa e, e mea tika i tona ra manako; ko te openga ra o taua arataa ra, ko te mate ïa.”

Mei to Iesu tuatau ra, e manganui i teia tuatau kua akavareia e te au tumu akonoanga e kare ia i te mea umere! Kua karanga te apotetoro ko Paulo no Satani e “i akapoiriia to ratou ngakau akarongo kore e te atua o teianei ao ra, kia kore te mārama o te evangelia kakā o te Mesia, ko te tutu o te Atua ra, kia kakā mai i roto ia ratou.”​—2 Korinetia 4:4.

Me akavareia tatou e tetai tangata pikikaa ra, ka ngere tatou i te moni. Me akavareia tatou e tetai tangata poritiki, no tei tupu ra penei ka ngere tatou i to tatou au rangatira. Inara me akavareia tatou e Satani e kua akaruke tatou i te tuatua mou no runga ia Iesu Karaiti, ka ngere tatou i te ora mutu kore! No reira e kopae i te akavare angaia. E akatuera i toou manako e te ngakau ki te tumu taumaro koreia no te tuatua mou akonoanga ra, te Pipiria. E maata tikai te ka ngaro me kare e raveia te reira.​—Ioane 17:3.