Te Akatupu ra Ainei Taau Apiianga i te Meitaki?

TE AU metua, te aronga pakari, te aronga tutu aere i te tuatua meitaki​—pouroa te umuumuia ra ei au puapii. Te apii ra te au metua i ta ratou tamariki, te apii ra te aronga pakari i te au mema o te putuputuanga Kerititiano, e te aronga tutu aere i te tuatua meitaki te apii ra i te aronga inangaro ou. (Deuteronomi 6:​6, 7; Mataio 28:​19, 20; 1 Timoteo 4:​13, 16) Eaa taau ka rave kia raukai i te akatupu i taau apiianga kia meitaki atu? Ko tetai apinga, ka rauka ia koe kia aru i te akatauanga e te ravenga a te au puapii karape tei taikuia maira i roto i te Tuatua a te Atua. Ko Ezera tetai o taua puapii ra.

Apiianga Mei ta Ezera ra Akatauanga

Ko Ezera tetai taunga e anaunga na Aarona tei ora ra i etai 2,500 mataiti kua topa i Babulonia. I te mataiti 468 M.T.N., kua aere aia ki Ierusalema kia akatere atu i te akamori ma i roto i te au ngati Iuda i noo i reira ra. (Ezera 7:​1, 6, 12, 13) Kua umuumuia aia kia apii i te tangata i te Ture a te Atua. Eaa ta Ezera i rave kia akapapu e e meitaki tana apiianga? Kua rave aia i etai au takainga umuumuia ra. E akara i teianei au takainga tei tataia ia Ezera 7:10:

“Kua [1] akonokono ua ana oki a Ezera i tona ngakau [2] e kimi, e [3] e rave, i te ture a Iehova, [4] e apii oki ia Iseraela i te au akonoanga e te au tuatua-tau.” E akara poto ua tatou i teia au takainga taki tai kia kite eaa ta tatou ka apii mei ia ratou.

“Kua Akonokono Ua Ana Oki a Ezera i Tona Ngakau”

Mei te pama ka akonokono i te one na mua na te aroteanga i mua ake i te ruruanga i te ua, kua akonokono a Ezera i tona ngakau na roto i te pure kia ariki i te tuatua a te Atua. (Ezera 10:1) I tetai tu, ‘kua ariu aia i tona ngakau’ ki te apiianga a Iehova.​—Maseli 2:2.

Aiteite katoa, te tuatua ra te Pipiria e ko te Ariki ko Iehosaphata ‘kua akonokono i tona ngakau kia kimi i te Atua.’ (2 Paraleipomeno 19:3) Ei tukeanga, ko tetai uki o Iseraela “kare i akonokono i to ratou ngakau,” kua akatakaia ei “uki māroketaketa e te meameaau.” (Salamo 78:8) Te kite ra a Iehova i “te tangata ngaro ra ko te ngakau.” (1 Petero 3:4) Ae, “e apii mai aia i te aronga ngakau maru i tona uaorai arataa.” (Salamo 25:9) No reira, mei teaa ra te puapinga, kia  aru te au puapii i teia tuatau i to Ezera akatauanga na te pureanga na mua kia apai mai i to ratou ngakau ki roto i te turanga tika!

‘E Kimi i te Ture a Iehova’

Kia riro ei puapii karape, kua kimi a Ezera i te Tuatua a te Atua. Me ka kimi koe i te taote, kare ainei koe e akarongo takiri atu e kia kite papu koe i tana katoa e tuatua maira me kare e akataka maira? Kare e ekoko anga ka pera koe, no te mea tei roto toou ora anga i te tu kino. No reira, mei teaa atu te maata, kia oronga tatou i te akamanako anga maata ki te au mea ta Iehova e tuatua maira kia tatou, me kare e akataka maira, na roto i tana Tuatua, i te Pipiria ra, e na roto i “te tavini akono meitaki e te pakari.” No te mea, ko tana akoanga no to tatou oraanga tikai ia! (Mataio 4:4; 24:​45-47) Inara, ka rauka kia tarevake ta te taote, mari ra “ko te ture a Iehova kare e apa.” (Salamo 19:7) Kare rava tatou e umuumu i tetai manako tuarua.

Te nga puka Pipiria a Paraleipomeno (ta Ezera i tata mua maira ei voriumu okotai) te akaari maira e e tangata apii papu tikai a Ezera. Kia tata i aua nga puka ra, kua taiku aia i etai atu tumu e manganui. * Ko te au ngati Iuda ra, koi tae ua maira mei Babulonia, te umuumu ra i tetai akataka anga meitaki i te tuatua enua o to ratou iti tangata. Kare i rava to ratou kite i te au ravenga a to ratou akonoanga, te akono anga i roto i te iero, e te au angaanga a te ngati Levi. Te au tata akapapaanga e maata e puapinga no ratou. Kua rave angaanga taka ke a Ezera ki taua au tumu ra. Tae roa ki te aerenga mai o te Mesia ra, kua vai te au ngati Iuda ei iti tangata ma to ratou uaorai enua, te iero, te kau taunga, e te kavana. Kia akameitakiia te akakite anga ta Ezera i akaputu, te taokotai e te akamori mou kua akaoraia.

Akapeea taau au ravenga apii me akaaiteia atu ma ta Ezera ra? Na te apiianga tikai i te Pipiria ka tauturu ia koe i te apiianga meitaki i te Pipiria ra.

‘E Kimi i te Ture a Iehova’ ei Pamiri

Te kimi anga i te ture a Iehova kare i te mea kotingaia ki te apii a tetai anake. Ko te apiianga a te pamiri tetai tuatau meitaki no te rave katoa i te reira.

Ko Jan raua ko Julia, nga tokorua i te Netherlands, kua tatau maata atu ki ta raua nga tamaroa mei te ra i anau mai ei. I teia tuatau, e 15 o Ivo mataiti, e 14 to Edo. E tai taime i te epetoma, te apii ra rai raua i te apii a te pamiri. Te akataka maira Jan: “Ta matou akakoro anga maata kare kia maata te tatau e oti i te apiianga mari ra kia mou meitaki i nga tamaroa ra i te tumu tei uriuri manakoia.” Kua tuatua katoa aia: “E maata ta nga tamaroa ra kimikimi anga. Te akarakara ra raua i nga tuatua matau koreia e te tu tangata o te Pipiria​—to ratou tuatau i orai, koai ma ratou, eaa ta ratou angaanga, e te vai atura. Mei to raua kite anga i te tatau, kua akarakara raua i te au puka mei te Insight on the Scriptures, te au tikitinari, e te au enetaikoropitia. Na teia i akariro i te apii a te pamiri kia maata atu te rekareka. Te tatari maira nga tamaroa e te papa ra oki no te apii.” Ei puapinga kapitiia mai, i teianei ko nga tamaroa e rua ra tei mua i to raua nga pupu i te kite i te reo.

Ko John raua ko Tini, tetai atu nga tokorua i te Netherlands, te apii ra ma ta raua tamaroa, ko Esli (i teianei e 24 mataiti e te painia ra i roto i tetai atu putuputuanga), e ta raua tamaine, ko Linda (i teianei e 20 mataiti e kua akaipoipo ki tetai taeake mapu memeitaki ra). Inara, kare na te apiianga i tetai puka na te ravenga uianga e te pauanga matauia ra, kua akonokono raua i te apiianga pamiri kia tau ki te mataiti e te umuumuanga o te tamariki. Eaa ta raua ravenga i taangaanga ana?

Kua akataka mai a John e na tana tamaiti e te tamaine ra i iki i tetai tumu inangaroia mei te “Au Uianga a te Aronga Tatau” (mei Te Punanga Tiaki) e “Te Manako no te Pipiria” (mei te Awake! maira). I muri akera, kua oronga mai raua i ta raua i teateamamao, tei riro ra te tupu anga ei au uriuri anga mareka na te pamiri. Na teianei tu kua rauka i eia aronga ou te kite i te raveanga i te kimikimi e te uriurianga manako i te au tupu anga no ta raua apii. Te rave ra ainei koe i te ‘kimi i te ture a Iehova’ ma taau tamariki? Kare teia e akatere anake i toou uaorai kite no te apiianga mari ra ka tauturu katoa i taau tamariki kia riro mai ei au puapii meitaki atu.

 ‘E Rave i te Reira’

Kua akono a Ezera i tana i apii. Ei akatauanga, iaia e vaira i Babulonia, penei kua noo aia i tetai oraanga tau tikai. Inara, i tona kite anga e ka rauka iaia te tauturu i tona iti tangata i te ngai mamao ke ra, kua taui aia i te au tu pumaana o Babulonia ra no te oire mamao o Ierusalema ra, ma tona au tu tau kore, te au manamanata, e te au kino oki. Te taka meitaki ra, kare a Ezera i akaputu anake i te kite Pipiria mari ra kua papa aia i te akono i tana i apii ra.​—1 Timoteo 3:13.

I muri akera, iaia e noo ra i Ierusalema, kua akaari akaou a Ezera e kua akono aia i tana i apii ra e tana i apii atura. Kua riro teia kia kitea i tona rongo anga i te au akaipoipo anga o te au tangata Iseraela ra ki te au vaine etene ra. Te akakite maira te tataanga Pipiria kia tatou e ‘kua aae aia i tona kakau, e tona pona roroa, e kua uuti aia i te rauru o tona mimiti, e tona kumikumi, e kua noo iora ma te poitirere e tae ua atura ki te aiai.’ E kua, ‘akama aia e kua aringaringa oki kia nānā i tona mata’ kia Iehova.​—Ezera 9:​1-6.

Mei teaa ra te tupu anga o tana apii anga i te Ture a te Atua ra kiaia! Tei ia Ezera tetai kite anga marama i te au tupu anga kikino no te akarongo kore o te au tangata ra. Te numero o te au ngati Iuda tei oki maira e meangiti ua. Me tomo atu ratou ki roto i te au akaipoipo anga kairoia ra, penei i te openga ka kapiti atu ratou ma te iti tangata peikani i te pae maira, e ka ngoie ua te akamori anga ma i te ngaro ke atu mei runga i te enua nei!

E mea mataora ra, ta Ezera ra akatauanga no te mataku e te maroiroi kua akakeu i to Iseraela kia akatikatika i to ratou aerenga. Kua akakore atu ratou i ta ratou au vaine ke ra. I roto i te toru marama kua oti te katoatoa i te akatikatikaia. Kua akariro to Ezera uaorai tiratiratu ki te Ture a te Atua kia maata te tupu anga mei tana apiianga ra.

Ko te tika katoa te reira i teia tuatau. Kua tuatua tetai metua Kerititiano: “Kare te tamariki e rave i taau e tuatua atu; ka rave ra ratou i taau i rave!” Te tupu ra taua kaveinga ra i roto i te putuputuanga Kerititiano. Te aronga pakari tei akanoo ra i te akatauanga meitaki penei ka manakonako e ka akono te putuputuanga i ta ratou au apiianga.

“E Apii Oki ia Iseraela i te Au Akonoanga e te Au Tuatua-Tau”

Te vaira tetai atu tumu i puapingai ta Ezera apii anga. Kare aia i apii i tona uaorai au manako, mari ra kua apii aia i te “au akonoanga e te au tuatua-tau.” Koia oki, te au akonoanga, me kare te au ture, a Iehova. Ko tana apainga ia ei kau taunga. (Malaki 2:7) Kua apii katoa aia i te tuatua tau, e kua oronga aia i te akatauanga no tana i apii na te mouanga ki te tika na te tu tau e te kore e papakitai, kia tau ki te turanga. Me akaari te aronga mana ra i te tuatua tau, ka patuia te tu ngaueue kore e ka akatupuia te tu tinamou. (Maseli 29:4) Aiteite katoa, te aronga pakari Kerititiano, te au metua, e te aronga akakitekite Patireia tei matau ra i te Tuatua a te Atua ka patu i te tu vaerua ngaueue kore ia ratou e apii ra i ta Iehova au akonoanga e te tuatua tau i roto i te putuputuanga, i roto i to ratou au pamiri, e ki te aronga inangaro mai.

Kare ainei koe e akatika e penei ka riro taau apiianga kia meitaki atu me aru koe ma te ki katoa i te akatauanga a Ezera tiratiratu ra? No reira, e ‘akonokono i toou ngakau, e kimi i te ture a Iehova, e rave i te reira, e apii i ta Iehova au akonoanga e te au tuatua-tau.’​—Ezera 7:10.

[Tataanga Rikiriki i Raro]

[Pia/Tutu i te kapi 22]

NA TEAA I AKARIRO I TA EZERA APIIANGA KIA MEITAKI?

1. Kua apai mai aia i tona ngakau ki roto i te turanga tika

2. Kua kimi aia i te Ture a Iehova

3. Kua akanoo aia i te akatauanga meitaki i te akonoanga i tana i apii ra

4. Kua akono aia iaia uaorai ki te apiianga i te manako Tuatua Tapu ra