Te Au Uruoaanga Pa Enua i te 2003

I TE Maanakai, ia Okotopa ra 6, 2001, kua raveia te uipaanga mataiti o te au mema o te Taiate Punanga Tiaki Pipiria e te Pepa o Pennyslvania i Jersey City, New Jersey, i Marike. I muri ake i taua uipaanga, kua rekareka te au mema e ta ratou au manuiri i tetai porokaramu takake. I tera mai ra, i te au uipaanga puapinga maata tei raveia i roto i te oire e a i Canada e i Marike, kua oronga te au mema o te Pupu Akaaere o te Au Kite o Iehova i te akakitekite anga i muri ake i ta ratou tuatua openga:

“Ia tatou e akara ra ki te tuatau ki mua, e mea puapinga maata no te au tangata katoatoa o te Atua e auraka e akaruke i ta ratou uaorai akaputuputu anga. Kua raurau te apotetoro ko Paulo e ko teia, e pera katoa te akamaroiroianga i tetai e tetai, kia raveia ma te maata atu oki ia tatou e akara ra i to Iehova ra maata e te mataku i te vaitata anga mai. (Ebera 10:​24, 25) Kia rotai ki te akauenga Tuatua Tapu, te manakonako nei matou kia raveia te au uruoaanga tapere i roto i te au tuanga katoatoa o te ao i tera atu mataiti [2002]. No reira i te mataiti 2003, me ko to Iehova anoano te reira, penei ka rauka te au uruoaanga pa enua kia raveia i roto i tetai au ngai i te ao. Ko teia te tuatau kia tapapa e kia matakite, i te akarakaraanga e te akapeea nei te au tupu anga e tupu nei i te ao.”

Noatu te tupu ra te manako papu kore e te au maro anga i te vaitata anga teia akatere anga o teia tuatau ki tona openga, ka tika kia tere ua atu te angaanga a te au tangata o te Atua ki mua. Te tuatua meitaki o te Patireia, kapiti atu te tuatua akamatakiteanga Pipiria, ka tika kia akakiteaia ki te au pa enua ravarai, ki te kopu tangata, te reo, e te iti tangata, i te kapikianga ia ratou kia ‘mataku i te Atua e kia akakaka iaia no te mea kua tae oki tona ora akautunga anga.’ (Apokalupo 14:​6, 7) No reira, kia tau ki te anoano o to tatou Atua i te rangi ra e te mareka anga meitaki, te paraniia ra te au uruoaanga pa enua i roto i te au ngai tukeke o te ao no te mataiti 2003.

Ma te akamata anga, kare i akapapuia ake taua au akaputuputu anga no te au oire tokoiti ua i Marike Tonga e i muri poto ake i Europa. I muri poto ua ake i te 2003, ka akanooia te au akapapa anga no te au pupu o te aronga tereketi kia aere ki tetai au oire tokoiti ua i Asia; e vaitata ki te openga o te mataiti, e au pupu ke atu tetai ka aere ki Aperika, ki Marike Tonga, e i te ngai i te Patipika. Ka patiia atu tetai au manga kia tuku mai i tetai numero tei rimitiia no te au tereketi ki te au ngai uruoaanga tau, no reira kare e rauka kia orongaia atu ki te au tangata katoatoa tetai pati anga kia aere atu. Noatu rai, e akamaroiroianga te reira kia tarimitiia te au tereketi te komono ra i te au enua tukeke i te ngai taki tai.

Kare e roa atu ka orongaia ki te au putuputuanga o te Au Kite o Iehova te nuti no runga i teia au akaputuputu anga. Te nuti no runga i te ra tikai e te au oire tau te ngai ka aere te au tereketi ka orongaia atu e to ratou au manga. No reira, te patiia atu nei auraka koe e tata me kare e rave i te au uiui anga no runga i teia tumu manako i teia taime.

Te aronga te ka ikiia ei tereketi ka rimitiia ki te Au Kite akatapuia e tei papetitoia te ka riro ei akaraanga memeitaki e te akaari ra i te aroa taeake ki te au taeake o te reira ngai. Tei aru mai, e au tuatau meitaki to ratou i te akaari atu ki te au manuiri i tetai turou aroa e te tu akamanuiri tika tikai. (Ebera 13:​1, 2) Ka tupu teia ei ‘akatinamou anga pumaana.’ (Roma 1:​11, 12) Tetai atu au akataka anga no runga i teia au akapapa anga ka orongaia ki te au manga tei patiia atu kia tono i te au tereketi ki tetai au enua ke.

Ka akapapaia e toru ra no te au uruoaanga tapere i te mataiti 2003 tei matauia ra ki te maata anga o te au oire. Na te akaputuputu mai anga, e tuatau to te katoatoa kia ‘akarongo, kia apiiia, e kia akamaroiroiia.’ (Deuteronomi 31:12; 1 Korinetia 14:31) Ka oronga teia i te tuatau no te au tangata katoatoa o te Atua kia “tongi ana kia kite i te meitaki o Iehova.” (Salamo 34:8) I te au uruoaanga pa enua katoatoa, e pera katoa i te au uruoaanga tapere e manganui, ka tae mai te au mitinari, ko etai ia ratou ka piri mai ki roto i te porokaramu.

I te tuatau o te mataiti i runga i teia karena, ka rekareka tatou i te Au Uruoaanga Tapere “Te Aronga Tutu Patireia Maroiroi,” te akakeu ra ia tatou kia oronga i tetai akakitekite anga maata rava atu. Ia tatou e rave ra i teia, ta tatou tapapa anga e mea papu e ka tupu ua atu ta Iehova ka rave no te mataiti ka aru mai. Ka tauturu teia ia tatou ‘kia matakite, kia tapapa, e kia vai teateamamao ia tatou uaorai’ i te manakoanga i teia au tuatau kino tikai e te puapinga maata.​—Mataio 24:​42-44.