E Kapiti Atu i te Akono i te Atua ki Toou Akakoromaki
E Kapiti Atu i te Akono i te Atua ki Toou Akakoromaki
“Kapiti katoa to kotou akarongo . . . ki te akakoromaki; te akakoromaki oki, ki te akono i te Atua.”—2 PETERO 1:5, 6.
1, 2. (a) Eaa te tu tupu anga te manakoia atura i te turanga o te tamaiti? (e) Eaa te puapinga o te tupu anga i te pae vaerua?
TE TUPU ake anga e mea puapinga maata ki tetai tamaiti, inara e maata atu i te tupu anga kopapa te anoanoia ra. Te tupu anga manako e te manako ngakau te manakonako katoaia ra. I muri akera, ka akaruke te tamaiti i tona au aerenga pakari kore ra e ka tupu mai ki roto i tetai tangata pakari ra me kare vaine. Kua taiku mai te apotetoro ko Paulo i teia i tana tataanga: “I taku tamariki anga ra, mei ta te tamariki katoa taku tuatua, mei to te tamariki toku kite, mei to te tamariki toku manako; kia riro ra au ei tangata pakari, tuku ke atura au i te peu a te tamariki.”—1 Korinetia 13:11.
2 Kua akakite mai te au tuatua a Paulo i tetai tumu puapinga maata no te tupu anga i te pae vaerua. Ka umuumuia te au Kerititiano kia tupu ua mei te au pepe i te pae vaerua “i te kite ra, ei tangata pakari ïa kotou.” (1 Korinetia 14:20) Ka tau ratou kia itae atu e kia kimi “kia taea te aite ra i te ki o te Mesia i te maata.” I reira kare ratou e, “tauriuriia, e akapeke aereia e te matangi ra, i tera tuatua i tera tuatua, mei te tamariki ra.”—Ephesia 4:13, 14.
3, 4. (a) Eaa ta tatou ka tika kia rave e riro ei kia tupu ki katoa i te pae vaerua? (e) Eaa te au tu tau i te Atua ka tau tatou kia akakite, e eaa to ratou ra puapinga?
3 Akapeea tatou e riro ei kia tupu ki katoa i te pae vaerua? Koi tere otomatiki uai te tupu anga i te pae kopapa i raro ake i te au turanga matauia, te umuumuia ra te tupu anga vaerua i te tauta anga akakoroia. Ka akamataia ma te tauruanga i te kite tika i te Tuatua a te Atua e te raveanga kia rotai ma ta tatou i kite. (Ebera 5:14; 2 Petero 1:3) I muri iora, na teia e tauturu ia tatou kia akakite i te au tu tei tau i te Atua. Mei te tupu anga i te pae kopapa e tona au tu te piri maira, ko te tupu anga i roto i te au tu tuke tuke i tei tau i te Atua ra te mea matauia te tupu taokotai maira ratou i te tuatau aiteite. Kua tata te apotetoro ko Petero: “Ka akamaroiroi ua i te kapiti katoa to kotou akarongo ki te mataku kore; e te mataku kore oki, ki te kite; Te kite oki, ki te noo marie; te noo marie, ki te akakoromaki; te akakoromaki oki, ki te akono i te Atua; Te akono i te Atua oki, ki te aroa taeake; te aroa taeake oki, ki te aroa i te tangata katoa.”—2 Petero 1:5-7.
4 Te au tu takitai ta Petero i papa mai e puapinga ia, e kare tetai e rauka kia akakoreia atu. Kua kapiti mai aia: “E tei ia kotou te reira au mea, e te maata ra, na te reira e akakite e, kare kotou i te akatau e te uua kore i te kite i to tatou Atu ia Iesu Mesia ra.” (2 Petero 1:8) E akara tatou ki runga i te umuumu anga kia kapiti atu i te akono i te Atua ra ki to tatou akakoromaki anga.
Te Umuumu Anga no te Akakoromaki
5. Eaa ra tatou i umuumu ei i te akakoromaki?
5 Kua kapiti a Petero raua ko Paulo i te akono i te Atua ma te akakoromaki. (1 Timoteo 6:11) E maata atu te aiteanga o te akakoromaki i te apai ua anga i te maroiroi i raro ake i te tu ngata e te kore anga e unui ki muri. Te kapiti ra i te tamou marie anga, te mataku kore, e te ngaueue kore, te kore anga e ngere te manakonako anga me aroia mai e te au timataanga, te au arairai anga, me kare te au takinga kinoanga. Ei aronga te noo ra ma te “akono i te Atua, ei roto rai i te Mesia ra ia Iesu,” ka manako atu tatou e kia takinga kinoia. (2 Timoteo 3:12) Ka tika tatou kia akakoromaki e raukai ia tatou te akapapu i to tatou aroa no Iehova e kia akatupu i te au tu te umuumuia ra no te ora. (Roma 5:3-5; 2 Timoteo 4:7, 8; Iakobo 1:3, 4, 12) Me kare e akakoromaki, kare e rauka ia tatou te ora mutu kore.—Roma 2:6, 7; Ebera 10:36.
6. Eaa te aiteanga e kia tapu tikai e tae ua atu ki te openga ra?
6 Noatu rai eaa te meitaki o to tatou akamataanga, ko te mea puapinga ra kia rauka ia tatou te akakoromaki. Kua tuatua a Iesu: “Kareka te tāpu tikai e tae ua atu ki te openga ra, ka ora ïa.” (Mataio 24:13) Ae, ka tika tatou kia akakoromaki tae ua atu ki te openga, me ki te openga o to tatou oraanga nei me kare ki te openga o teia akatereanga kino o te au mea nei. I tetai ua atu tu, ka tika tatou kia tamou i to tatou tiratiratu ki te Atua. Inara, me kare e kapitiia atu te akono i te Atua ki to tatou akakoromaki, kare e rauka ia tatou i te akamareka ia Iehova, e kare e rauka ia tatou te ora mutu kore. Inara eaa te akono i te Atua?
Eaa te Aiteanga o te Akono i te Atua
7. Eaa te akono i te Atua, e eaa ta te reira te ka akakeu ia tatou kia rave?
7 Te akono i te Atua e akangateitei tapu anga naau uaorai, e akamori anga, e e tavini anga i te Atua ko Iehova no te tiratiratu ki tona ngateitei i te ao katoa e pini ua ake. Kia rave i te akono i te Atua ma te akangateitei ia Iehova, ka umuumu tatou i te kite tika iaia e tona au aerenga. Ka tau tatou kia anoano i te kite i te Atua uaorai, ma te tika tikai. Ka akakeu teia ia tatou kia akatupu i tetai pirianga manako ngakau kiaia, tetai te ka akakiteia e ta tatou au angaanga e te tu o te oraanga. Ka tau tatou kia inangaro kia aite tikai kia Iehova i te ka rauka—kia aru i tona au aerenga e kia akaata i tona au tu ei peretana. (Ephesia 5:1) E tika, ka akakeu te akono i te Atua ia tatou kia anoano kia akamareka i te Atua i ta tatou katoa ka rave.—1 Korinetia 10:31.
8. Akapeea te akono i te Atua e te akamori anake iaia i te angaanga piri vaitata anga?
8 E raukai te rave tikai i te akono i te Atua, ka tika tatou kia akamori ia Iehova anake, auraka e akatika i tetai apinga ke kia akono i tona turanga i roto i to tatou au ngakau. Ei Tei Anga ia tatou, tei iaia te tika ki ta tatou akamori anake. (Deuteronomi 4:24; Isaia 42:8) Tera ra, kare a Iehova e opara ia tatou kia akamori iaia. Te inangaro ra aia i ta tatou akamori anga puareinga. Ko to tatou aroa no te Atua, tei akatumuia ki runga i te kite tika tikai iaia, te akakeu ra ia tatou kia tama i to tatou au oraanga e kia rave i te akatapu anga kiaia e kia akono oki i te reira.
E Patu i te Pirianga ma te Atua
9, 10. Akapeea e raukai ia tatou te patu e kia tamou i tetai pirianga vaitata ma te Atua ra?
9 I muri ake i te akatutuanga i to tatou akatapu anga ki te Atua na te papetito anga, te tau ra tatou kia patu i tetai pirianga vaitata atu kiaia. No reira na to tatou inangaro kia rave i teia e kia tavini tiratiratu ia Iehova ka akakeu ia tatou kia apii ua atu i tana Tuatua e te manakoanga i te reira. Ia tatou e tuku ra i te vaerua o te Atua kia angaanga ki runga i to tatou au manako e te au ngakau, ka oonu atu to tatou inangaro ia Iehova. Ka tamou ua atu to tatou pirianga kiaia ei mea puapinga maata i to tatou oraanga. Ka manako tatou ia Iehova ei Oa meitaki no tatou e ka anoano kia akamareka iaia i te au taime katoatoa. (1 Ioane 5:3) Ka tupu to tatou rekareka i to tatou pirianga mareka ma te Atua, e ka akameitaki tatou e te apii aroa maira aia ia tatou e te akatikatika maira ia tatou i te ngai te umuumuia ra.—Deuteronomi 8:5.
10 Na ta tatou tauta anga tamou kia akamaroiroi i to tatou pirianga okomaata ma Iehova, ka rauka ua kia paruparu te reira. Me ka tupu te reira, kare te reira e riro ei tarevake no te Atua, no te mea “kare ra aia i atea ke atu ia tatou katoa nei.” (Angaanga 17:27) Mei teaa ra to tatou mataora e kare a Iehova i akariro kia ngata te akavaitata atu kiaia! (1 Ioane 5:14, 15) Inara, ka tika tatou kia tauta kia tamou marie i te pirianga vaitata ma Iehova ra. Inara, te tauturu ra aia ia tatou kia akavaitata atu kiaia na te orongaanga mai kia tatou i te au tauturu anga ta tatou e umuumu ra kia patu e kia tamou marie i te akono i te Atua ra. (Iakobo 4:8) Akapeea e raukai ia tatou i te taangaanga i teia au mea aroa katoatoa te orongaia maira?
Kia Vai Maroiroi i te Pae Vaerua
11. Eaa etai akakiteanga i to tatou akono i te Atua?
11 Ka akakeu to tatou inangaro oonu no te Atua ia tatou kia akakite i te oonu o to tatou akono i te Atua, kia rotai ma te akoanga a Paulo: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra.” (2 Timoteo 2:15) Te umuumuia ra te raveanga i teia kia tamou marie tatou i te raveanga i te apii putuputu i te Pipiria, te aereanga ki te uipaanga, e te raveanga i te tutu aere. Ka rauka katoa ia tatou te akapiri vaitata kia Iehova na ‘te kore e tukutuku i te pure.’ (1 Tesalonia 5:17) E au akakiteanga puapinga teia i to tatou akono i te Atua. Na te kopaeanga i tetai ua atu ia ratou penei ka apai mai i te maki i te pae vaerua e ka akariro ia tatou kia topa ua ki te au ravenga a Satani.—1 Petero 5:8.
12. Akapeea e raukai ia tatou kia autu ma te au timataanga ra?
12 Na te tamouanga i te maroiroi i te pae vaerua e te rave anga i te angaanga ka tauturu katoa ia tatou kia aro atu i te au timataanga e manganui te ka tupu mai kia tatou. Penei ka aere mai te au timataanga mei te au tumu te ka timata maata ia tatou. Te tuke anga, te patoianga, e te takinga kinoanga ka riro kia ngata atu i te akakoromaki me ka akamata mai mei te au mema piri vaitata o te pamiri, te au kopu tangata, me kare te au tangata tupu. Te au taomianga kikite kia akakore i to tatou au kaveinga Kerititiano penei ka tu mai i to tatou ngai angaanga me kare i te apii. Te akamaroiroi kore, te maki, e te maromaroa ka rauka kia akaparuparu ia tatou i te pae kopapa e ka akariro kia maata atu te ngata kia akono i te au timataanga no te akarongo. Inara ka autu tatou i te akonoanga i te au timataanga katoatoa me ka tamou tatou “i te tuatua tapu e te akono i te Atua; I te tatari anga, e te rapurapu anga atu, kia tae mai taua rā o te Atua ra.” (2 Petero 3:11, 12) E ka rauka ia tatou te tamou i to tatou rekareka i te raveanga i te reira, ma te irinaki anga i te akameitaki anga a te Atua.—Maseli 10:22.
13. Eaa ta tatou ka tika kia rave me ka tamou ua atu tatou i te raveanga i te akono i te Atua ra?
13 Noatu rai te takete ra a Satani i te aronga te rave ra i te akono i te Atua, kare tatou e tau kia mataku. No teaa ra? No te mea “kua kite mari te Atu i te akaora i te aronga akono i te Atua i roto i te timataanga ra.” (2 Petero 2:9) Kia akakoromaki i te au timataanga e kia kite i taua akaora anga ra, ka tika kia “kopae tatou i te akono kore i te Atua, e te anoano o teianei ao, kia noo tatou ma te tau meitaki, te tuatua-tika, e te akono i te Atua, i teianei ao.” (Tito 2:12) Ei au Kerititiano, ka tika tatou kia matakite kia kore tetai ua atu tu paruparu te kapiti ra i te anoano o te kopapa e te au angaanga e o mai ki runga i to tatou akono i te Atua e ka akapou atu ei i te reira. E akamanako tatou i teianei i etai o teia au akakoko anga.
Kia Matakite i te Au Akakoko Anga i te Akono i te Atua
14. Eaa ta tatou ka tau kia maara me ka akavareia tatou e te ereere no te noinoi apinga?
14 Te noinoi apinga tetai ereere ki te manganui. Penei ka akavare tatou ia tatou uaorai, “ko tei manako ko te mea e raukaʼi te apinga [materia] ra, ko te akono i te Atua ïa.” No reira, penei ka manako tatou kia rave i te mea tika kore i te irinaki anga tei akaariia maira e te au oa akarongo ra. (1 Timoteo 6:5) Penei ka manako tarevake tatou e te meitaki ra kia manono i te Kerititiano apinganui ra no tetai ou anga kare ra e rauka ia tatou i te tutaki. (Salamo 37:21) Inara ko te akono i te Atua, kare ko te rauka anga i te au apinga kopapa ra, e “meitaki tei akakiteia mai to te reira i teianei ao, e te ao a muri atu.” (1 Timoteo 4:8) I te mea ‘kare a tatou apinga i apai mai ki teianei ao e kare takiri e apinga e tika kia apai ke tatou,’ e tamanako tatou kia aruaru i “te akono i te Atua e te mareka ua ra” e tuku ia tatou uaorai ‘kia mareka i te kai e te kakau.’—1 Timoteo 6:6-11.
15. Eaa ta tatou ka rave me te akakoko maira te aruaru anga navenave kia pokia to tatou akono i te Atua ra?
15 Te aruaru anga i te mea e navenave ei ra ka rauka kia pokia atu te akono i te Atua ra. Ka riro ainei e ka tau tatou kia rave viviki i te akatikatika anga i teia tu? E tika, ka rauka etai puapinga mei te terenianga kopapa e te tarekareka anga. Inara, e meangiti ua taua au tutaki ra me akaaiteia atu ki te ora mutu kore. (1 Ioane 2:25) I teia tuatau, e manganui tei “anoano i te au mea e navenave ei ra, kare i anoano i te Atua; E tutu akono i te Atua to ratou, kareka te mana ra, kua akakore ratou i te reira,” e ka tau tatou kia ariu ke atu mei taua aronga ra. (2 Timoteo 3:4, 5) Ko te aronga te akaketaketa ra ki runga i te akono i te Atua “te akaputu marie anga i te meitaki tumu no ratou uaorai a muri atu, kia rave ratou i te ora mutu kore.”—1 Timoteo 6:19.
16. Eaa te au inangaro rave ara te arai ra i etai mei te akonoanga kia tau ki te au umuumu tuatua tika a te Atua, e akapeea e raukai ia tatou kia autu ki rungao i teia au inangaro anga?
16 Te kai kava e te apinga akakona, te akono tau kore, e te au inangaro rave ara ka akapou i to tatou akono i te Atua ra. Te tuku uaanga ki teia au tu ka arai mai ia tatou mei te noo anga kia tau ki to te Atua ra au umuumu anga tuatua tika. (1 Korinetia 6:9, 10; 2 Korinetia 7:1) Noatu rai ko Paulo kua akakoromaki i tetai kukumi anga tamou marie ma te kopapa ara nei. (Roma 7:21-25) Te au ravenga ketaketa te umuumuia ra kia takore atu i te au inangaro tarevake ra. Ko tetai apinga, ka tika tatou kia tamanako kia vai ma i te akono tau. Te tuatua maira Paulo kia tatou: “Ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore, e te noinoi apinga, e akamori idolo oki te reira.” (Kolosa 3:5) Te tamateanga i te au mero o to tatou kopapa no runga i taua au rave anga ara ra te umuumuia ra te tamanako anga kia takore atu ia ratou, te tama takiri anga ia ratou. Na te pure akatenga anga no ta te Atua tauturu ka rauka ia tatou te akakore atu i te au inangaro tarevake e kia aruaru i te tuatua tika e te akono i te Atua i roto i teia akatereanga kino o te au mea nei.
17. Akapeea te manako tau no tatou no te papa?
17 Ka rauka i te akamaroiroi anga kore i te akaparuparu i to tatou akamaroiroi anga e ka akatupu i te tu kino ki to tatou akono i te Atua. E manganui te au tavini o Iehova kua kite i te akamaroiroi anga kore. (Numero 11:11-15; Ezera 4:4; Iona 4:3) E maata tikai ta te akamaroiroi anga kore ka akatupu ia tatou me te kapitiia ra ma te riri no te mea kua akakinoia tatou me kare kua papa ketaketaia me kare kua akoia mai. Inara, ko te papa anga e te akoanga e akakite anga i te manako tu-Atua e te manako aroa. (Ebera 12:5-7, 10, 11) Ka tau te papa anga kia manakoia kare ei akautunga ua mari ra ei terenianga ia tatou i te aerenga o te tuatua tika. Me e tu akaaka to tatou, ka ariki tatou e ka mareka i te akoanga, i te kiteanga e ko “te ako i te apii anga, ko te ara ora ïa.” (Maseli 6:23) Ka rauka i teia te tauturu ia tatou kia rave i te tereanga meitaki ki mua i te pae vaerua i te aruaruanga i te akono i te Atua.
18. Eaa ta tatou apainga no runga i to tatou uaorai tarevake?
18 Te kite koreanga e to tatou uaorai au tarevake penei ka akatupu i te akaaoanga ki to tatou akono i te Atua. Penei ka akatupu ratou i te apiapi me kare ka akakeu i tetai papaki kia rave i te takainga pakari kore i te akataka keanga ia ratou uaorai mei to ratou au taeake e te au tuaine i te pae vaerua ra. (Maseli 18:1) Inara e mea meitaki kia maara e ko te mouanga i te riri me kare te akamoupuku anga kia etai ke ra ka akakino i to tatou pirianga ma Iehova. (Levitiku 19:18) Ko te tika, “ko tei kore e aroa i tona taeake tei akaraia e ia ra, eaa e tikaʼi iaia kia anoano i te Atua tei kore i akaraia e ia ra.” (1 Ioane 4:20) I tana Tuatua i runga i te Maunga ra, kua akaketaketa mai a Iesu i te umuumu anga kia rave viviki i te au takainga kia akatikatika i to tatou uaorai tarevake. Kua tuatua aia ki te aronga tei akarongo atura kiaia: “E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.” (Mataio 5:23, 24) Penei na te tataraara e tauturu kia rapakau i te kino tei akatupuia ra e te au tuatua aroa kore me kare te au angaanga ra. Ka rauka te mamae i te akaoraia e ka akaora katoaia te au pirianga au me ka pati tatou i te akakoreanga ara e ka akatika e kua tarevake tatou i te akono anga no runga i te au tumu ra. Kua oronga katoa a Iesu i etai atu akoanga i te akonoanga i te au tu ngata. (Mataio 18:15-17) Mei teaa ra to tatou mataora me autu te au tauta anga kia akakore i te au manamanata ra.—Roma 12:18; Ephesia 4:26, 27.
E Aru i ta Iesu Akatauanga
19. Eaa ra i puapinga maata ravai kia aru i ta Iesu akatauanga?
19 Ka tupu rai te au timataanga kia tatou, inara kare ratou e tika kia akaaere ke ia tatou mei te oroanga no te ora mutu kore. Kia maara e ka rauka ia Iehova i te akaora ia tatou i te timataanga. Kia “kopae atu tatou i te au mea teiaa ravarai,” e “e oro tamou marie ei i teianei oroanga i tukuia mai ki mua ia tatou nei,” e kia rave tatou i “te akara tamou kia Iesu i te tumu e te akaoti i to tatou akarongo.” (Ebera 12:1-3) Te akara vaitata ua anga ki ta Iesu akatauanga e te tautaanga kia aru iaia i te tuatua e te angaanga ka tauturu ia tatou kia tatanu i te akono i te Atua e kia akakite i te reira i roto i te tu maata atu.
20. Eaa te au tutaki te ka tupu mai mei te aruaruanga i te akakoromaki e te akono i te Atua ra?
20 Te angaanga kapiti ra te akakoromaki e te akono i te Atua ra i te tauturuanga kia akapapu i to tatou ora. Na te akakiteanga i eia nga tu okomaata, ka rauka ia tatou i te rave tiratiratu ua atu i ta tatou tavini anga tapu ki te Atua. Noatu me tei raro ake i te timataanga, tei ia tatou nei te mataora anga ia tatou e kite nei i to Iehova ra tu aroa maru e te akameitakianga no te mea kua akakoromaki tatou e te rave nei i te akono i te Atua. (Iakobo 5:11) Pera katoa, te akapapu maira Iesu uaorai kia tatou: “E ora ra kotou kia mou tamou marie.”—Luke 21:19.
Akapeea Koe me Pau?
• Eaa ra i puapinga maatai te akakoromaki?
• Eaa te akono i te Atua, e akapeea te akakite anga i te reira?
• Akapeea e raukai ia tatou te patu e te tamou marie i te pirianga vaitata ma te Atua ra?
• Eaa etai akakoko anga ki to tatou akono i te Atua ra, e akapeea e raukai ia tatou te kopae ke atu ia ratou?
[Au Uianga Apii]
[Au Tutu i te kapi 12, 13]
E manganui te au mataara te akakite maira i te akono i te Atua?
[Au Tutu i te kapi 14]
Kia matakite i te au akakoko anga i ta kotou akono i te Atua