Eaa Tikai a Era?

NOATU eaa te tu o te tuatua no “era” e tupu ra ki toou manako, te manakoia ra a era ei ngai tamamaeanga no te ara. No runga i te ara e tona tupu anga, te karanga ra te Pipiria: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Kua akakite katoa te au Tuatua Tapu: “E utunga te mate no te ara.” (Roma 6:23) I te mea te utunga no te ara ko te matenga, te ui anga maata i te akamanako anga i te tu tikai o era koia oki: Eaa te tupu ra kia tatou me mate tatou?

Te ora ua atura ainei te oraanga mei etai atu tu, i roto i tetai turanga, i muri ake i te matenga? Eaa oki a era, e eaa te tu o te au tangata e aere ra ki reira? E manakonako anga ainei tetai no te aronga i roto ia era? Te oronga maira te Pipiria i te au tuatua mou e te au pau anga akamerengo ki teia au ui anga.

E Oraanga Ainei to Muri Ake i te Matenga?

Te ora ua ra ainei tetai apinga i roto ia tatou, mei tetai meta me kare tetai vaerua, i roto i te kopapa mate ra? E akamanako ana i te tangata mua, ko Adamu, e akapeea i ora mai ei. Te na ko ra te Pipiria: “E kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei tangata ora.” (Genese 2:7) Noatu e na te ao i akaora iaia, te tukuanga “i te aʼo ora” ki roto i tona nga putangiu e maata atu i te pupui anga i te ao ki roto i tona atemama. Te aite anga o te reira kua tuku te Atua ki roto i to Adamu kopapa ora kore te pura o te ora​—“e uti i te aʼo,” te angaanga ra i roto i te au mea ora i runga i te enua nei. (Genese 6:17; 7:22) Te taiku ra te Pipiria ki teia mana angaanga ei “vaerua.” (Iakobo 2:26) Ka rauka taua vaerua ra i te akaaiteia ki te uira te taangaanga ra i tetai matini me kare i tetai apinga kia rauka i te reira i te rave i tana angaanga. Mei te uira ra kare e mono atu i te au tutu o te apinga ta te reira e tangaanga ra, kare katoa te ao ora e mono atu i tetai o te au tutu o te au mea ora ta te reira e akaora ra. Kare o te reira tu peretana e kare e rauka i te manako.

Eaa te ka tupu ki te vaerua me mate tetai tangata? Te karanga ra a Salamo 146:4: “Te riro nei oki tona vaerua, te oki nei aia ki tona ra one; kore rava atura tana i akakoro i taua rā ra.” Me mate tetai tangata, kare tona uaorai vaerua e ora ua atu i roto i tetai ngai ei mea ora. Te “oki ra te vaerua ki te Atua i oronga maira.” (Koheleta 12:7) Te aiteanga o teia e tei te Atua te tika anga i teianei no tetai manakonako anga kia ora taua tangata ra i te tuatau ki mua.

Kua irinaki te nga tangata kite Ereni taito ko Socrates raua ko Plato e ko tetai meta i roto i  tetai tangata te ora ua atura i te matenga e kare roa e mate. Eaa ra ta te Pipiria e apii ra no runga i te meta? Ko Adamu ‘riro akera ei tangata ora,’ ta Genese 2:7 ia e karanga ra. Kare i rauka iaia tetai meta; koia te meta​—e tangata katoa. Te tuatua ra te au Tuatua Tapu no tetai meta tangata e rave ra i te angaanga, te kaki ra i te kai, te keia anga, te kite anga i te rava kore o te maroiroi, e te vai atura. (Levitiku 23:30; Deuteronomi 12:20; 24:7; Salamo 119:28) Ae, ko te tangata uaorai e meta ia. Me mate tetai tangata, kua mate taua meta ra.​—Ezekiela 18:4.

Eaa, i reira, te turanga o te mate? I te akakiteanga i te utunga ki runga ia Adamu, kua tuatua a Iehova: “E one-pueu oki koe, e ka riro akaou rai koe ei one-pueu.” (Genese 3:19) Iea a Adamu i mua ake ka angai te Atua iaia mei te one pueu e te oronga anga i te ora kiaia ra? Kare aia i vai ana! Te mate anga aia, kua oki a Adamu ki taua turanga te kore anga o te ora. Kua akamaramaia te turanga o te mate ia Koheleta 9:​5, 10, i reira ka tatau ei tatou: “Kare ra a te aronga i mate ra e tuatua i kitea . . . Kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.” Kia tau ki te Pipiria, ko te matenga ko te tu vai kore anga. Kare te mate e kite, kare e manako ngakau, kare te au manako.

Tamamae Anga Ope Kore me Kare e Vaarua Ua?

I te mea e kare o te mate manako ngakau kite, kare a era i te ngai ai no te tamamae anga e ngai te mamae ra te aronga kino i muri ake i te matenga. Eaa, i reira, a era? I te akara matatio anga eaa tei tupu kia Iesu i muri ake i tona mate anga ka tauturu ia kia pau i taua ui anga. Kua tata akaou te tangata tata Pipiria ko Luka e: ‘Kare [a Iesu] e vaooia i ade [“era,” King James Version] kare tona kopapa i tuku uaia kia kite i te pe.’ * (Angaanga 2:31) Ko teea te era ta Iesu i aere atu? Kua tata te apotetoro ko Paulo: “Kua tuku atu oki au ia kotou . . . i mate te Mesia i ta tatou nei ara, mei tei te tuatua i tataia ra: E i tanumia oki aia, e tu akaou maira i te po toru, mei tei te tuatua i tataia ra.” (1 Korinetia 15:​3, 4) No reira no roto a Iesu ia era, te vaarua, inara kare aia i akarukenaia i reira, no te mea kua akatuia mai aia, me kare kua akatuakaouia.

E akamanako katoa i te tu o te tangata tuatua tika ko Iobu, tei mamae maata. Te anoanoanga kia ngaro ke atu tona manamanata ra, kua pati akatenga aia: “Naai e oronga mai i teia kiaku, penei e kia paruruia au e koe na i roto ia era [Teoro], e e uuna iaku e pati ua atu toou riri?” * (Job 14:13, Douay Version) Mei teaa te tu tau kore kia manako e kua anoano a Iobu i te aere atu ki tetai ngai ai vera no te paruru anga! Kia Iobu, ko “era” ko te vaarua ia, te ngai e ope ei tona mamaeanga. No reira, te era o te Pipiria, e vaarua tanumanga ia no te tangata te ngai te aere nei te au tangata meitaki e pera katoa te aronga kino.

Ai Era​—E Akapouanga Katoa Ainei?

Kare ainei e ko te ai o era e akatutu anga ia no te akapouanga katoa, me kare te takore, takiri anga? Te akatakakeanga i te ai mei ia Ate, me kare ia era, te karanga ra te au Tuatua Tapu: “E uriia atura te mate e ko ade ki roto i te roto ai.” “Te roto” te taikuia ra i konei e akatutu angaia, i te mea ko te mate e era (Ate) tei uriia ki roto i reira kare e rauka tikai i te tau ia. “Ko [te roto ai] te rua teia o te mate”​—e mate kare e manakonako anga no te oki akaou mai anga ki te ora.​—Apokalupo 20:14.

Te roto ai te tau ra te aiteanga ki “te ai i Keena [“ai era,” King James Version]” ta Iesu i tuatua ana. (Mataio 5:22, NW; Mareko 9:47, 48) Kua tataia a Keena e 12 taime i roto i te au Tuatua Tapu Ereni Kerititiano, e te taikuia ra ki te o o Hinoma, i vao mai i te au patu o Ierusalema. Ia Iesu i runga i te enua nei, ko teia o nei kua akariroia ei ngai titiri anga tita, “ko te ngai te reira i uriia atu ei te au kopapa mate o te aronga rave kino, e te au kopapa o te manu, e etai atu au mea viivii katoatoa ra.” (Smith’s Dictionary of the Bible) Kua ka ua te ai na te tukuanga i te teio ki runga i te tita. Kua taangaanga a Iesu i taua o ra ei akatutu anga tau no te akapou anga mutu kore.

Mei ia Keena rai, te akatutu maira te roto ai i te akapou anga mutu kore. Ko te mate raua ko Ate ‘kua uriia atura ki roto’ i te reira e ka takoreia atu raua me akarangatiraia te au tangata mei te ara e te akaapa anga o te matenga. Ko te aronga rave akakoro, e te tataraara kore i te ara ra e “tuanga” ta ratou i roto i taua roto ra. (Apokalupo 21:8) Ka takore takiriia ratou e tuatau ua atu. I tetai tua, ko te aronga i roto i te manako o te Atua tei roto ia era​—te vaarua tanumanga o te tangata​—e tuatau umere to ratou ki mua.

Akiri Takiriia a Era!

Te na ko ra a Apokalupo 20:13: “E kua tuku maira te tai i te aronga i mate i roto iaia ra; e kua tuku maira te vaarua e ko ade i te aronga i mate i roto ia raua ra.” Ae, te era o te Pipiria ka akiri takiriia. Mei ta Iesu i taputou maira, “te vaitata mai nei oki te ora, e akarongo ei te aronga katoa i roto i te rua i [to Iesu] reo, E kua aere mai ki vao.” (Ioane 5:​28, 29) Noatu e kare rava e ora i teianei i roto i tetai ua atu tu, te au mirioni ua atu tangata tei mate tei roto i te manako o te Atua ko Iehova ka akatuakaouia mai, me kare ka akaoki akaouia mai ki te ora, ki roto i tetai enua parataito akaouia.​—Luka 23:43; Angaanga 24:15.

I roto i te ao ou a te Atua, te au tangata akatuakaouia tei akatika i tana au ture tuatua tika ra kare rava e anoanoia kia mate akaou. (Isaia 25:8) Na Iehova e “orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.” Ko te tika, “[ka] kore te au mea taito.” (Apokalupo 21:4) Mei teaa ra te akameitakianga te vai nei no te aronga i roto ia era​—“i roto i te rua”! E tumu anga tikai teia akameitaki anga no tatou kia akatere maata atu i te kite i te Atua ko Iehova e tana Tamaiti, ko Iesu Karaiti.​—Ioane 17:3.

[Au Tataanga Rikiriki i Raro]

[Tutu i te kapi 5]

Kua pure a Iobu no te paruru anga i roto ia era

[Tutu i te kapi 6]

Te ai i Keena​—e akatutu anga no te akapou anga mutu kore

 [Tutu i te kapi 7]

‘Te aronga i roto i te rua ka aere mai ki vao’