“Kia Rave Tatou i Tei Meitaki ra ki te Katoatoa”
“E Aere Mai Kotou Kiaku Nei, . . . Naku e Akaanga i to Kotou Roi”
“Kia Rave Tatou i Tei Meitaki ra ki te Katoatoa”
TE TUTU anga e te apii anga i te tuatua meitaki o te Patireia o te Atua ko te angaanga maataia a Iesu. (Mareko 1:14; Luka 8:1) I te mea e te anoano ra te au pipi a Karaiti i te aru iaia, te manako ra ratou i te angaanga no te apiianga i te tuatua o te Pipiria no runga i te Patireia o te Atua e ko te angaanga maata roa atu i roto i to ratou oraanga. (Luka 6:40) E pumaana tikai te reira no te Au Kite o Iehova kia akara e akapeea te tuatua o te Patireia i te oronga mai anga i te akaangaroi mutu kore ki te aronga te ariki ra i te reira—mei tei raveia i to Iesu tuatau i runga i te enua nei.—Mataio 11:28-30.
I te pae mai i te apiianga i te Tuatua a te Atua, kua rave a Iesu i tetai atu au angaanga meitaki, mei te akaoraanga i te maki e te angaianga i tei pongi. (Mataio 14:14-21) Ma te aiteite, kua turu te Au Kite o Iehova i ta ratou angaanga apiianga Pipiria ma te au angaanga te tauturu ra i te au tangata te ngere ra. Ko te tika, te turu ra te au Tuatua Tapu i te au Kerititiano “i te au angaanga memeitaki katoa ra” e te raurau ia ra ratou kia rave “i tei meitaki ra ki te katoatoa.”—2 Timoteo 3:16, 17; Galatia 6:10, NW.
“Tei Reira to Tatou Au Taeake”
Ia Tepetema 1999, kua tupu tetai ngaruerue enua kino i Taiwan. E tokoiti ua marama i muri mai, kua akatupu te au ua pakari e te ngaoro enua i tetai au tumatetenga natura kino tikai i roto i te tuatua enua o Venezuela. I ou akenei, kua akakinoia a Mozambique e te au vaipuke maata. I te au akaraanga katoa e toru, kua tae viviki atu te Au Kite o Iehova ki reira ma te au apinga o te kai, te vai, te vairakau, te kakau, te au puakapa, e te apinga tunuanga na te aronga tei rokoia e te tumatetenga. Kua akatu te aronga tauturu ma te kite karape i te pae vairakau i te au are maki kia rapakau i te aronga i kino, e te aronga tauturu i te patu are kua akatu i te au are ou no te aronga kare o ratou are.
Kua akakeuia te aronga tei rokoia e te tumatetenga no te tauturu anga viviki tei orongaia kia ratou. “I to matou anoano maata anga, tei reira to tatou au taeake,” *
i karanga ei a Malyori, ko tona are ra kua tapokiia e te ngaoro enua i Venezuela. I muri ake i te akatu anga te aronga tauturu i tetai are ou tikai no tona ngutuare tangata, kua tuatua a Malyori: “Kare roa e rava ana ta matou akameitaki anga ia Iehova no tana au mea katoatoa i rave no matou!” E te oronga angaia te au taviri ki te aronga tei rokoia e te tumatetenga i Mozambique no to ratou au are tei patu ouia, kua imene pouroa mai te pupu i te imene Patireia “Ko Iehova to Tatou Punanga.”Te tauturuanga i te aronga tei ngere ra e akaangaroi katoa ia no te aronga tauturu. “E meitaki tikai kia taangaangaia no teia au taeake te maata ra te mamae,” i tuatua ei a Marcelo, tei tavini ra ei neti i roto i te puakapa no te kimi ora i Mozambique. Ko Huang, ko tetai tangata tauturu i Taiwan, kua tuatua: “E rekareka maata oki i te piri atu ki roto i te tuaanga i te kai e te au puakapa ki te au taeake te ngere ra. Kua akamaroiroi te reira i te akarongo.”
Tetai Porokaramu Tauturu te Angaanga Ra
Kua oronga katoa te angaanga tauturu i te akaangaroi anga i te pae vaerua ki te ngauru tauatini ua atu au mouauri i te ao katoa. Akapeea ra? I te au mataiti i ou akenei, kua oronga te Au Kite o Iehova i te puka Pipiria e tere atu i te 30,000 tangata tataki tai tei mouria i roto i etai 4,000 are auri i Marike ua. Pera katoa, me ka rauka, kua atoro te Au Kite uaorai i te au are auri kia apii i te Pipiria ki te au mouauri e kia raveia te au uipaanga Kerititiano. Kua puapingaia ainei te au mouauri?
Ko etai au mouauri te apii ra i te Pipiria kua akamata i te oronga i te au apiianga akaangaroi no te Tuatua a te Atua ma te au oa mouauri. Tei tupu, i roto i etai au mouauri takapini i te ao te vaira i teianei te au pupu mouauri te akamori kapiti ra kia Iehova. “Te tere nei to matou pupu ki mua,” i ripoti mai ei tetai tangata mouauri i Oregon, Marike., i te 2001. “E 7 o matou aronga papuritia Patireia e te rave ra e 38 apiipii Pipiria. Kua tere atu i te 25 tangata tei tae mai ki te tuatua a te katoatoa e te Apii Punanga Tiaki, e e 39 o matou tei tae mai ki te Akamaara Anga [o to Karaiti matenga]. Kare e roa atu ka papetitoia e toru tangata!”
Te Au Akameitaki Anga e te Au Rekareka Anga
Kua kite te aronga opita are auri e te angaanga ra teia porokaramu tauturu. Ko te mea te akaumere maata ra i te aronga opita, te puapinga ope kore o teia porokaramu tauturu. Kua tata tetai ripoti: “I te ngauru mataiti i te akamata anga teia porokaramu, kare roa tetai mouauri tei tukuia ki vao tei papetitoia ra i roto i te are auri ei Au Kite o Iehova i oki akaou mai ki te are auri—e tuke ki te 50-60 patene o tetai au pupu ke tei oki mai.” Kua akakeuia e te au tupu anga te raveia ra e te aronga tauturu Kite, kua karanga tetai orometua o te are auri i Idaho i roto i tetai reta ki te opati maata i te ao o te Au Kite o Iehova: “Kare ua rai oki au e akatika ana ki ta kotou apii anga, kua umere tikai ra au i ta kotou akaaerenga.”
I te tauturuanga i te aronga i roto i te are auri kua akapapu katoaia mai te tutakianga no te aronga tauturu. I muri ake i te rave angaia tetai uipaanga ma tetai pupu o te mouauri tei imene i tetai imene Patireia no te taime mua, kua tata tetai tangata tauturu: “E akamaroiroianga te reira i te akara anga e 28 tane tei piri mai ki roto i te imeneanga ma te akapaapaa ia Iehova. E kua imene maata ratou! Mei teaa ra te akameitaki anga i te tae anga ki taua atianga ra!” Kua karanga tetai tangata tauturu te atoro ra i te au are auri i Arizona e: “Mei teaa ra te akameitakianga o te reira e kua o atu ki roto i teia angaanga takake nei!”
Kua akatika tikai te aronga tauturu Kite takapini i te ao kia Iesu, te na ko ra: “E mea meitaki i te oronga atu i te rave mai.” (Angaanga 20:35) Kua akapapu katoa mai ratou e te aruanga i te ako anga Pipiria kia rave i tei meitaki ra ki te katoatoa e akaangaroi tikai ia.—Maseli 11:25.
[Tataanga Rikiriki i Raro]
^ para. 7 E akara i te imene numero 85 i roto i te puka Sing Praises to Jehovah, tei neneiia e te Au Kite o Iehova.
[Tutu i te kapi 8]
Venezuela
[Tutu i te kapi 8]
Taiwan
[Tutu i te kapi 8]
Mozambique