Au Uianga a te Aronga Tatau

Eaa te arataki anga ta te au Tuatua Tapu i oronga mai no runga i te terenianga i te tamariki me e Au Kite o Iehova tetai metua e ko tetai ra kare?

E rua nga kaveinga Tuatua Tapu te oronga maira i te arataki anga no runga i te terenianga i te tamariki a tetai metua e Kite e tona tokorua ra kare i te Kite. Okotai oki: “Ko te Atua ta matou e akarongo e tikaʼi auraka te tangata.” (Angaanga 5:29) Ko tetai: “Ko te tane oki te upoko o te vaine, mei te Mesia katoa ra te upoko ïa i te ekalesia.” (Ephesia 5:23) Kare te irava openga e tau ua ki te au vaine e Kite ta ratou au tane mari ra ki te aronga katoa kare to ratou tokorua i te Kite ra. (1 Petero 3:1) Akapeea ra e raukai i tetai metua e Kite i te parani i teia au kaveinga me apii oki i tana tamariki?

Me ko te Au Kite o Iehova tetai metua tane ra, tei runga iaia te apainga kia rave i te au apinga i te pae vaerua e te pae kopapa no tona ngutuare. (1 Timoteo 5:8) Noatu rai e ka akapou te metua vaine akarongo kore ra i te tuatau ki ta raua tamariki, ka tau e na te metua tane e apii i tana tamariki na te orongaanga i te terenianga i te pae vaerua ki te kainga e na te apaianga ia ratou ki te au uipaanga Kerititiano, te ngai ka puapingaiai ratou mei te ikuikuanga tau e te taokotai anga tau.

Akapeea ra me ka maro tana vaine akarongo kore ra i te apai i ta raua tamariki ki tana akamori anga me kare i te apiianga i tona akarongo kia ratou? Penei ka oronga te ture o te enua i te tika anga kiaia kia rave i te reira. Noatu e kua timataia te tamariki ki roto i te au angaanga akamori anga i taua au ngai ra penei tei runga ia i te tu o te apiianga i te pae vaerua a te metua tane ra. Me pakari mai te tamariki, ka tau te apii anga Tuatua Tapu a to ratou metua tane ra ei tauturu ia ratou kia aru i te tuatua mou o te Tuatua a te Atua. Mei teaa ra te mataora no te tane akarongo ra me iki tana tamariki kia mou ratou i te tua o te tuatua mou ra!

Me ko te Au Kite o Iehova tetai metua vaine ra, ka kauraro atu aia ki te kaveinga upoko koi akamanako ei ra no runga i te turanga mutu kore o tana tamariki. (1 Korinetia 11:3) I te au tu e manganui, kare tona tokorua akarongo kore ra e manamanata ana me oronga tana vaine e Kite i te apii akono tau e i te pae vaerua ki ta raua tamariki, e te rauka ra taua tauturu i te au uipaanga a te au tangata o Iehova. Ka rauka i te metua vaine i te tauturu i tana tane akarongo kore ra kia kite i te au akameitaki anga no te apii akamaroiroianga te ka rauka i ta raua tamariki na roto i te akaaerenga a Iehova. Ka rauka iaia i te akakite tau ua atu i te puapinga no te tatanuanga i te au kaveinga tau o te Pipiria ki roto i ta raua tamariki, ia ratou e aro atura i te kino o tetai ao tau kore ra.

Inara, penei ka maro te tane akarongo kore ra e ka apii tana tamariki i tana akonoanga, i te apaianga ia ratou ki tana ngai no te akamori anga e te orongaanga kia ratou i te apii anga akonoanga te tau ra ki tona akarongo. Me kare penei ka patoi tetai tane i te akonoanga katoatoa e te maro anga e auraka e orongaia ki tana tamariki ra te apii anga akonoanga. Ei upoko no te ngutuare, tei runga iaia te apainga maata no te maanianga i te iki anga. *

Koi kauraro ei ki te taoonga upoko o tana tane, ei Kerititiano akatapuia, ka akamaara te vaine akarongo ra i te tu o nga apotetoro ra ko Petero raua ko Ioane, tei karanga e: “Kare oki matou e tika kia kore e tuatua i ta matou i akara akenei, e ta matou i akarongo akenei.” (Angaanga 4:19, 20) I te akamanako  anga no te turanga i te pae vaerua o te tamariki ra, ka kimi tetai metua vaine e Kite i te au tuatau kia oronga i te arataki anga tau kia ratou. Tei iaia te apainga i mua ia Iehova kia apii i tetai ke no runga i tana i kite e e mea tika, e kare e tau kia akaruke katoaia tana tamariki. (Maseli 1:8; Mataio 28:19, 20) Akapeea e raukai i te metua vaine e Kite i te akono anga i te manamanata ra?

Ka akara ana ei akatauanga i te tumu no te irinaki anga i te Atua. Penei kare e rauka i te vaine e Kite i te rave i tetai apii Pipiria tau ma tana tamariki no te au arairai anga a tana tane. Ka tau ainei kia kopae aia i teia tumu i te akakiteanga ki tana tamariki i tetai apinga no runga ia Iehova ra? Kare. Ko tana au tuatua e te au angaanga ka tau kia akaata mai i tona irinaki anga i roto i Tei Anga ra. Kare e ekoko anga e au uianga ta tana tamariki no te tumu manako ra. Ka tau kia manako rangatira aia i te akono i tona tu rangatira o te akonoanga na te akakiteanga i tona irinaki anga i Tei Anga ra, kapitianga atu ki tana tamariki ra. Noatu rai e kare e rauka iaia i te rave i tetai apii Pipiria ma tana tamariki me kare i te apai putuputu ia ratou ki te au uipaanga, ka rauka iaia i te oronga atu i te kite kia ratou no runga i te Atua ra ko Iehova.​—Deuteronomi 6:7.

Te akamanakoanga i te pirianga i rotopu i tetai Kite e tona tokorua akarongo kore ra, kua tata te apotetoro ko Paulo: “Kua tapu oki taua tane akarongo kore ra i te vaine, e kua tapu te vaine akarongo kore i te tane; naringa kare ra, kua noa ta kotou tamariki; i teianei ra, kua tapu ïa.” (1 Korinetia 7:14) E mea tapu te piri anga akaipoipo ki to Iehova manako no te tokorua akarongo ra, e te tamariki ra kua tapu ia i nga mata o Iehova. Ka tau te vaine e Kite i te rave i te ka rauka iaia i te tauturu anga i tana tamariki kia marama i te tuatua mou, i te akarukeanga i te tupu anga openga ki roto i nga rima o Iehova.

Me pakari mai te tamariki, ka iki ratou e ko teea tua ta ratou ka mou tei akatumuia ki runga i te apii anga tei rauka ia ratou mei to ratou nga metua ra. Penei ka iki ratou i te rave kia tau ki te au tuatua a Iesu: “Ko tei maata tona inangaro i tona metua tane e tona metua vaine, e mea ngiti iaku, kare aia e tau iaku.” (Mataio 10:37) Kua akaue katoaia ratou: “E te au tamariki ra, e akarongo atu i to kotou au metua i tei tau i te Atu ra.” (Ephesia 6:1) E manganui te au mapu tei iki i te ‘akarongo i te Atua’ kare ra ki tetai metua kare i te Kite, noatu te tamamaeanga pakari mei taua metua ra. Mei teaa ra te tutakianga o te reira ki te metua e Kite i te kite anga i te tamariki i te iki anga i te tavini ia Iehova noatu te patoi anga!

[Tataanga Rikiriki i Raro]