Ka Akono Tamou Ainei Koe i Toou Tu Tau?

EIA manu rikiriki i mate i nanai? Kare e tangata i kite, e penei e tokoiti ua tangata e manako atu ana​—e manganui oki te au manu. Inara, ko Iehova, te manako atura. I te taikuanga i teianei au manu rikiriki ua, kua tuatua a Iesu ki tana au pipi: “Kare oki tetai o ratou ra e ngaro i to kotou Metua kia topa ki raro i te enua.” Kua tuatua katoa aia: “Auraka mari kotou e mataku, e maata to kotou meitaki i to te au manu rikiriki e manganui.”​—Mataio 10:29, 31.

I muri akera kua meitaki atu te kite o te au pipi ra i te maata o to Iehova ra manako no ratou. Tetai o ratou, ko te apotetoro ko Ioane, kua tata: “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia.” (1 Ioane 4:9) Kare a Iehova i oronga ua i te oko mari ra kua akapapu katoa mai ki tona au tavini ravarai: “Kare rava au e akaruke atu ia koe, kare oki au e taka ke ia koe, kare, kare rava atu.”​—Ebera 13:5.

Te taka meitaki ra, e ngaueue kore to Iehova ra aroa no tona au tangata. Inara, te tu maira te uianga, ‘Te mou piri ra ainei tatou kia Iehova e kare rava tatou e akaruke iaia?’

Ta Satani Au Timataanga kia Aati i to Tatou Tu Tau

I ta Iehova taki anga i to Satani manako ki to Iobu ra tu tu tau, kua pau aviri atura Satani: “E akamori atu ainei a Iobu ia koe me kare ana mea e rauka mai i te reira?” (Iobu 1:9, Today’s English Version) Kua akakite mareka kore aia e ko te tiratiratu o te au tangata ki te Atua tei runga anake i ‘te ka rauka mai ia ratou i te reira.’ Me ko te tika teia, ka rauka ua te tu tau o tetai ua atu Kerititiano kia akaparuparuia​—me te rava ra te timataanga o tei orongaia ra.

I to Iobu ra turanga, kua tuatua a Satani e ko to Iobu tiratiratu ki te Atua ka ngaro ke atu me ngere aia i tana au mea akaperepere ra. (Iobu 1:10, 11) I te riro anga kia tarevake teia tuatua akakino, kua tuatua ua a Satani: “Ka oronga te tangata i tana au mea ravarai kia ora atu aia.” (Iobu 2:4, TEV) Penei e tika ta Satani tuatua no etai atu, kare a Iobu i akatika kia akakore i tona tu tau. Te akatika maira te tuatua enua i te reira. (Iobu 27:5; 42:10-17) E tiratiratu aiteite ainei toou? Me kare ka tuku ainei koe ia Satani kia aati i toou tu tau? E tamanako ia koe uaorai ia tatou e akara matatio nei i etai au tuatua mou te o atura te au Kerititiano ravarai.

Kua irinaki te apotetoro ko Paulo i te tiratiratu o te au Kerititiano mou ka rauka kia maroiroi tikai. Kua tata aia: “Kua kite tikai oki au e, kare te mate, kare oki te ora . . . kare oki te au mea e vai nei, kare oki te au mea e ka tupu a muri atu . . . e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.” (Roma 8:38, 39) E raukai ia tatou tetai irinaki anga aiteite me te maroiroi ra to tatou inangaro no Iehova. Ko taua inangaro ra ko tetai tapeka kare e rauka kia akapouia noatu ko te mate kare e rauka iaia kia upokotu.

Me tei ia tatou taua pirianga ra ma te Atua, kare tatou e ui, ‘Ka vai ainei au i te tavini anga ia  Iehova i te au mataiti tokoiti e toe mai nei?’ Taua tu ekoko ra ka akakite e ko to tatou tiratiratu ki te Atua tei runga i te ka tupu kia tatou i te tuatau o to tatou oraanga. Kare te tu tau mou e akatupuia mai e te au turanga no vao. Tei runga te reira i to tatou tu tangata o roto ra. (2 Korinetia 4:16-18) Me te anoano ra tatou ia Iehova ma to tatou ngakau katoa, kare rava tatou e akamareka kore iaia.​—Mataio 22:37; 1 Korinetia 13:8.

Inara, ka tika tatou kia maara, e te kimi tamou marie ra a Satani kia aati i to tatou tu tau. Penei ka timata aia kia tuku ua tatou ki te au inangaro o te kopapa, kia tuku ua ki te au taomianga a te au oa, me kare etai au tu patoi kia akariro ia tatou kia akaruke i te tuatua mou. Te ao tei taka ke ra i te Atua ko to Satani tokorua maataia i roto i teia tamaki, noatu rai e ko to tatou uaorai au tu apa ua ka akariro i tana angaanga kia ngoie ua. (Roma 7:19, 20; 1 Ioane 2:16) Tera ra, e manganui to tatou au turanga meitaki i roto i teia tamaki anga, ko te mea maata e kare tatou i te kite kore i ta Satani au ravenga.​—2 Korinetia 2:11.

Eaa ta Satani au ravenga? Kua akataka a Paulo i te reira i roto i tana reta ki to Ephesia ra ei “au ravenga pakari” me kare ei ‘au angaanga kikite.’ (Ephesia 6:11) Te tuku maira Satani i te au ravenga kikite ki roto i to tatou arataa kia raukai iaia kia aati i to tatou tu tau. E mea meitaki ra, e ka kite tatou i teianei au angaanga kikite, i te mea kua tataia mai no tatou i roto i te Tuatua a te Atua. Ta Satani au tauta anga kia akapou i te tu tau o Iesu raua ko Iobu te akakite mai ra i etai o te au tu tana e kimi ra kia aati i to tatou tu tau Kerititiano.

Kare i Rauka kia Aatiia to Iesu ra Tu Tau

I te akamataanga o ta Iesu angaanga orometua, ia Satani e manako akaparau ra kia timata i te Tamaiti a te Atua na te akaaoanga iaia kia akariro i te toka ei kai. Mei teaa ra te kikite! Kare a Iesu i kaikai ake no etai 40 ra, no reira kare e ekoko anga e te maata ra tona onge kai. (Luka 4:2, 3) Kua tuatua atura Satani kia Iesu kia akamerengo i tona inangaro natura i reira tikai, na roto i te tu tei patoi ra i to Iehova anoano. Pera katoa oki i teia tuatau, te tauta anga akaariuke o teianei ao te akamaroiroi maira i te akamerengoanga viviki, ma te manakoanga meangiti ua me kare no te manako kore ua i te au tupuanga. Ko te tuatua teia, ‘Te tau ra koe no te reira i teianei,’ me kare, ‘E rave ua i te reira!’

Naringa a Iesu i akamerengo ua i te kaki anga no te kai ma te akamanakoanga kore ua i te au tupuanga, kua autu a Satani i te akariro anga ia Iesu kia akakore i tona tu tau. Kua akara a Iesu i te au tumu pae vaerua, e kua pau ngaueue kore atu aia: “Kua tataia oki, ‘Kare o te manga anake ra te mea e oraʼi te tangata nei.’”​—Luka 4:4; Mataio 4:4.

Kua neke atura Satani i tana aravei anga i reira. I te akono tarevake anga i te au Tuatua Tapu, ta Iesu i taiku ra, kua akamaroiroi atura te Tiaporo ia Iesu kia akatopa mai iaia uaorai mei te poretiko o te iero ra. ‘Na te angela e akaora mai ia koe,’ ta Satani i tuatua. Kare o Iesu manako anga kia pati i te paruru anga temeio mei ko mai i tona Metua ra kia taki ua mai ei i te manako anga kiaia uaorai. “Auraka koe e timata atu i toou Atua ra ia Iehova,” ta Iesu i tuatua atu.​—Mataio 4:5-7; Luka 4:9-12.

 Te ravenga openga ta Satani i taangaanga e tika tika atu ia. Kua tauta aia kia akanoonoo i tetai akapapa anga ma Iesu ra na te orongaanga kiaia i te ao katoa e tona kaka no tetai akamori anga okotai ua. E vaitata e ko ta Satani au mea katoa ia te ka oronga. Inara akapeea e raukai ia Iesu kia rave i tetai angaanga no te akamori anga ki mua i te enemi maata o tona Metua ra? Kare a Iesu i manako pera! Kua pau atura Iesu. “Ko toou Atua ra ko Iehova taau e akamori, e koia anake rai taau e akarongo.”​—Mataio 4:8-11; Luka 4:5-8.

I muri ake i te puapinga kore anga taua timataanga e toru ra, ‘kua aere ke atura a Satani ia Iesu akaruke maira iaia i tetai tuatau iti.’ (Luka 4:13) Te akakite maira teia e te akara tamou maira Satani no tetai tuatau kia timata akaou i to Iesu ra tu tau. Kua tu mai tetai tuatau tau i etai rua e te apa mataiti i muri akera i to Iesu ra akamata anga i te teateamamaoanga i tana au pipi no tona matenga. Kua tuatua te apotetoro ko Petero: “Auraka takiri ïa, e te Atu: eiaa koe e peraia mai.”​—Mataio 16:21, 22.

Penei taua ako anga akara anga meitaki ra mari ra te tarevake ra te tangi anga meitaki ra kia Iesu, i te aere anga mai mei ko mai ainei i tetai o tana au pipi ra? Kua kite tika atura Iesu i taua au tuatua ra te akaata maira i te au manako o Satani, kare i to Iehova. Kua pau ngaueue kore atura Karaiti: “Ka aere ke atu koe, e Satani, ki muri iaku, e maitu koe naku; kare koe i tau i ta te Atua ra, ko ta te tangata ra taau i tau.”​—Mataio 16:23.

No to Iesu rai inangaro tamou no Iehova, kare i rauka ia Satani kia aati i tona tu tau. Kare e mea i rauka i te Tiaporo kia oronga, kare e timataanga, noatu te kino, te ka akaparuparu i to Iesu ra tiratiratu ki tona Metua i te rangi ra. Ka rauka ainei ia tatou te tamanako anga aiteite me akariro te au turanga kia ngata no tatou kia tamou i to tatou tu tau? Na te akatauanga o Iobu e tauturu ia tatou kia kite meitaki atu i te au akaaoanga ta tatou ka aro atu.

Tiratiratu i te Aro Atu i te Tu Pekapeka

Mei ta Iobu ra i kite, ka tupu te au tu pekapeka kia tatou i tetai ua atu taime. Koia tetai tangata akaipoipo mataoraia ma te taingauru tamariki e e raveanga meitaki tona i te pae vaerua. (Iobu 1:5) Inara kare a Iobu i kite, kua riro mai tona ra tu tau ki te Atua ei tumu maroanga i te paepae i te rangi ra, e kua inangaro a Satani kia aati iaia na roto i tetai ua atu tu e rauka iaia.

E viviki ua, kua ngere a Iobu i tana apinganui i te pae kopapa. (Iobu 1:14-17) Inara, kua mou to Iobu ra tiratiratu i te timataanga no te mea kare aia i tuku i tona irinaki anga ki runga i te moni. I te akamaaraanga i tona tuatau iaia e apinganui ra, kua tuatua a Iobu: “E kua akariro au i te auro ei manako anga noku, . . . E kua rekareka au i te mea kua maata toku apinga, . . . e riro katoa te reira ei ara . . . kua uuna ïa au i reira i te Atua i runga ra.”​—Iobu 31:24, 25, 28.

I teia tuatau, ka rauka rai kia ngere tatou i te au mea ravarai i te po okotai. Ko tetai tangata pitiniti ko tetai o te Au Kite o Iehova e maata tana moni tei keiaia, i te akaruke anga mai iaia e vaitata kua pangakarapu. Te tuatua tika ra aia: “Vaitata rai mei tupu te maki pukuatu tupu poitirere kiaku. Ko te tika, i toku manako ka rokoia au e te reira naringa kare toku pirianga ma te Atua. Inara, na teia tupu anga i akakite mai kiaku i te tika e kare te au puapinga pae vaerua i te mea mua i roto i toku oraanga. Te mareka anga i te angaanga no te moni kua tapoki mai i etai atu mea katoa.” Kua akameangiti mai teia Kite i tana angaanga pitiniti, e kua tavini putuputu aia ei painia tauturu, i te raveanga e 50 ora me kare tere atu i te marama i te angaanga orometua Kerititiano. Inara, ko etai atu manamanata, e kino maata atu i to te ngere anga i te au apinga ra.

Kare i oti ake te akakite anga i te nuti kia Iobu no te ngere anga i tana apinganui i tae mai ei te tuatua e kua mate tana au tamariki e taingauru. Kua manono ua atu aia: “Kia akameitakiia te ingoa o Iehova.” (Iobu 1:18-21) Ka tamou ainei tatou i to tatou tu tau me ka ngaro viviki ua tatou i etai au mema o to tatou pamiri? Ko Francisco, e akaaere Kerititiano no Paniora mai, kua taka ke tana nga tamariki e rua i tetai tumatetenga i te bus. Kua kitea e ia te pumaana na te akapiri vaitataanga kia Iehova e te akamaata atuanga i tana angaanga i te angaanga orometua Kerititiano.

Noatu rai i muri ake i te mate poitirereanga o tana tamariki, kare i ope ake to Iobu au taitaia. Kua ta atura Satani iaia ma te maki mamae kino.  I taua atianga ra, kua tae mai kia Iobu te akoanga kino mei ko mai i tana vaine ra. “Ka akakino atu i te Atua, ka mate atu ei!” tana i raurau atu kiaia ra. Kare a Iobu i akarongo atu i tana akoanga, e kare aia “i ara i teia katoa nei au mea.” (Iobu 2:9, 10) Kua vai katoa tona tiratiratu, kare ki runga i te turu anga a tona pamiri, mari ra ki runga i tona uaorai pirianga ma Iehova.

Kua kite a Flora, ko tana tane e tana tamaiti mataiapo kua akaruke i te aerenga Kerititiano tere atu i te tai ngauru mataiti kua topa, i te manako ngakau o Iobu ra. “Me ngere viviki ia koe te turuanga a to pamiri, ka riro ia ei mea mareka kore” tana i akatika. “Inara kua kite au e kare e kitea e au te mataora i vao ake i ta Iehova ra akaaerenga. No reira kua tu ngaueue kore au e kua tuku ia Iehova ki te ngai mua i te tautaanga kia tamou ua atu ei vaine meitaki e te metua vaine oki. Kua pure putuputu au, e kua akamaroiroi mai a Iehova iaku. E vaine mataora au no te mea, noatu te patoianga tamou o taku tane, kua kite au i te irinaki ki runga ia Iehova.”

Te ravenga a Satani i muri mai kia aati i to Iobu tu tau kua o atu tona nga oa e toru. (Iobu 2:11-13) Mei teaa ra te pekapekaanga i te reira i to ratou akamata anga i te akaapa iaia ra. Naringa aia i ariki i ta ratou au taumaro anga, kua ngere aia i tona ra irinakianga i te Atua ko Iehova. Ta ratou akoanga akamaroiroi kore ra ka rauka kia akaati i tona vaerua e tona tu tau, e na te reira e autu ei ta Satani ra ravenga.

Kareka ra, kua manono atura Iobu: “E mate ua atu au, kare rai au e pa i te tuatua-tika naku ra!” (Iobu 27:5) Kare aia i tuatua, ‘Kare rai au e tuku ia kotou tangata nei kia apai ke atu i toku tiratiratu!’ Kua kite a Iobu e ko tona tiratiratu tei runga iaia uaorai e tona inangaro no Iehova ra.

E Ravenga Kikite Taito te Opu Anga i te Puereere Ou

Te taangaanga nei rai a Satani i te akoanga arataki koreia me kare te au tuatua kare i manakoia mei ko mai i te au oa e te au oa irinaki. Te akamaroiroi kore mei roto mai i te putuputuanga ka rauka kia akaparuparu i to tatou irinaki anga tau e ngoie atu i ta te takinga kino no vao maira. Tetai tangata pakari Kerititiano tei kite ra i te tamaki anga vaeau i mua ana kua akakite mai i te tuke anga o te reira ma te mamae anga tana i kite no te au tuatua e te au angaanga manako kore uaia e etai au oa Kerititiano. No te tu i muri akenei, kua tuatua aia: “Ko te mea ngata rava ia taku i na roto ana.”

Mei tetai atu turanga, ka rauka kia maata to tatou pekapeka ma te au tu apa ua o te au oa akarongo ra e ka akamutu tatou i te tuatua atu ki etai ra me kare ka akamutu i te aere ki te au uipaanga Kerititiano. Ko te akapumaanaanga i to tatou au mamae ngakau penei ka akaraia ei tumu puapinga maata rava. Inara mei teaa ra te mii e kia akono i taua manako akaraanga poto ra e kia tuku i ta tatou apinga okomaata​—to tatou pirianga ma Iehova​—te akaparuparuia ra na roto i ta etai e rave ra me kare e tuatua ra. Me ka tuku tatou i te reira kia tupu, te topa atura tatou ki roto i te puereere o ta Satani au ravenga taito ra.

E tika ra, te akara atura tatou no te au turanga teitei i roto i te putuputuanga Kerititiano. Inara me ka maata roa ta tatou e manako atu mei to tatou au oa akamori ra, te vai apa ua ra, ka papu e ka mareka kore tatou. Ei tuke anga, e tika tikai a Iehova i tana au umuumuanga i tona au tavini. Me ka aru tatou i tana akaraanga, ka akapapa tatou kia akakoromaki i to ratou au tu apa ua. (Ephesia 4:2, 32) Kua oronga mai te apotetoro ko Paulo i teia apii anga: “Ka riri kotou ra, auraka kia araia: auraka e topa te rā i to kotou riri anga: Auraka e tuku i ta te diabolo ngai kia o mai.”​—Ephesia 4:26, 27.

Mei ta te Pipiria e akakite meitaki maira, te taangaanga ra Satani i te au ravenga kikite tuke tuke kia kite ei e​—me ka rauka iaia​—te ravenga kia aati i te tu tau o te Kerititiano. Etai o tana au angaanga kikite te marekaia ra e te kopapa ara ra, ko etai atu e tumu no te mamae. Mei te uriurianga i mua akenei, ka kite koe eaa i kore ei e tau kia rokoia koe e te poitirere ua. Ma toou inangaro ngaueue kore no te Atua i roto i to ngakau, e akapapu kia akakite e e pikikaa te Tiaporo e kia akariro kia mareka te ngakau o Iehova ra. (Maseli 27:11; Ioane 8:44) Kia maara, ka tika te tu tau Kerititiano mou ra kia kore e pikikaa, noatu eaa te au timataanga te ka aere mai kia tatou.