“Kua Kite Ainei Kotou Eaa Au i Akaoki Mai ei i ta Kotou Moni?”

‘AE, TE inangaro tikai ra au i te moni!’ i manako ei a Nana, ko tetai metua vaine takaua no nga tamariki tamaroa e toru te noo ra i Kaspi te Repapuriki o Georgia. I tetai popongi kua tupu tikai tana moemoea te rauka anga mai te moni. Kua kitea mai e ia e 300 lari te pae i te ngai o te akava. Kare e tangata i reira. E aka moni tikai. Ko te tika, kare a Nana i kite ana i tetai pepa moni 100 lari i te rima mataiti te riro mai anga te lari ei moni na te enua. Kare e rauka i te aronga okooko te angaanga kia rauka mai taua moni ra no tetai au mataiti.

‘Eaa au ka inangaro ei i teia moni me ka ngere au i toku akarongo, te mataku i te Atua, e te tu i te pae vaerua ra?’ i manako ei a Nana. Kua tatanu aia i taua au tu Kerititiano ra, te akakoromaki katoa anga oki i te tamamaeanga kino e te au papaanga no tona akarongo.

I tona aereanga ki te ngai o te akava, kua kite atu a Nana e rima opita te kimi pakari ra i tetai apinga. Kua kite aia e te kimi ra ratou i te moni, no reira kua aravei atu aia ia ratou e kua tuatua: “E apinga ta kotou i ngaro?”

“E moni,” i pau mai ei ratou.

“Eia?”

“E toru anere lari!”

“Kua kiteaia mai e au ta kotou moni,” i karanga atu ei a Nana. I reira kua ui atura aia: “Kua kite ainei kotou eaa au i akaoki mai ei i ta kotou moni?” Kare ratou i kite.

“No te mea ko au tetai o te Au Kite o Iehova,” i tuatua ei aia. “Naringa e kare au, kare au e akaoki mai i ta kotou moni.”

Kua oake atu te akavanui nana te moni i ngaro e 20 lari na Nana ei akameitaki anga i tona tu tiratiratu.

Kua akakite viviki aereia te tua na roto i te tapere o Kaspi. I tera mai ra, te aere maira tetai vaine angaanga tama no roto mai i te ngai o te akava kua tuatua atu kia Nana e: “E akaruke ua ana [te akavanui] i ta kotou puka i roto i tona opati. Penei i teianei ka ariki maata atu aia i te reira.” Kua tuatua katoa tetai opita akava: “Naringa te au tangata katoatoa i te Au Kite o Iehova, koai ma te ka rave i te kino?”