Kua Rekareka e Kua Kite Ratou i te Tatau!

I TETAI au ngai i te Solomon Islands, tere atu i te 80 patene o te aronga tei riro mai ei Au Kite o Iehova i teianei te tauta ra ma te kore oki e kite i te tatau. Kare e ko teia ua te kotinga ra i ta ratou paupau anga i te au uipaanga epetoma a te putuputuanga ra kua riro katoa rai te reira kia ratou ei mea ngata i te apii i te au tuatua mou o te Patireia ki tetai ke. Ka rauka tikai ainei te reira i te aronga mamaata kare roa i mou ana i tetai penitara kia kite i te tatau?

Te poroutia Apply Yourself to Reading and Writing, tei neneiia e te Au Kite o Iehova, kua taangaangaia i roto i te pupu apii no te tatau vaitata rai e i roto pouroa i te putuputuanga o te Au Kite o Iehova i te Solomon Islands. Te akaari maira te au tupu anga te aru maira e i akapeea te manganui i te tauturu angaia ki tetai turanga no te tu kite na roto i teia porokaramu. Te mea puapinga maata ra, te kiteanga i te tatau kua tauturuia atu ratou kia oronga i tetai akakitekite anga meitaki no to ratou akarongo.​—1 Petero 3:15.

Ko tetai mitinari tei tukunaia ki tetai putuputuanga tere atu i te anere te au papuritia Patireia kua kite atu e i te apii Pipiria i te epetoma te taangaangaia ra Te Punanga Tiaki, e tokoiti ua e kopi ta ratou uaorai no te makatini e e tokoiti ua te paupau ra. Te tumu? Kare oki e kite i te tatau. Te akakite anga te putuputuanga e ka akamataia tetai apii no te apii anga i te tatauanga e te tataanga, kua ariki rekareka atu te mitinari kia riro mai e koia te puapii. I te akamata anga, tokoiti ua te aronga apiipiiia i aere mai, inara kare i roa ana tere atu i te 40 tangata tukeke te au mataiti tei akamata i te aere mai.

Eaa te au tupu anga? Kua akakite mai te mitinari: “I tetai tuatau i muri ua ake i te akamata anga te pupu apii no te tatau, kua aere atu au ki te makete i te ora ono i te popongi i te oko mai i te kai no te kainga mitinari. I reira i kite ei au i etai o te aronga apiipiiia, e te aronga ou katoa atu, te okooko ra i te au nu e te au rau rakau. No teaa ra? No te mea te inangaro ra ratou kia rava te moni  no te oko anga i tetai peni e tetai puka tata no te pupu apii tatau ra! Pera katoa, te aereanga ki taua pupu apii ra e akakeu anga ia kia rauka mai ta ratou uaorai kopi o te makatini no te Punanga Tiaki.” Te karanga ra aia: “I teianei i te tuatau o te Apii Punanga Tiaki a te putuputuanga, ka paupau mai te aronga ou e te ruaine, e ka oraora ta matou au uriuri anga.” Kua mataora tikai teia mitinari i te pati mai anga e a mema o te pupu apii e me ka rauka rai e kia piri atu ratou ki roto i te angaanga tutuanga ki te tangata no te mea, mei ta ratou e tuatua ra, kare ratou “e mataku akaou ana.”

Te au tupu anga puapinga ki runga i te aronga apiipiiia i roto i te pupu apii i te tatau ra kua tere mamao atu i te kiteanga i te tatau e te tata anga. Ei akatauanga, no te au mataiti e manganui kua riro te vaine irinaki kore a tetai Kite ei tumu manamanata no te putuputuanga. Kua pepeiia e ia te au toka ki runga i te tangata me ka manga maro mai tetai ka rutu katoaia te au vaine ki te potonga rakau. Me aru mai aia i tana tane i tetai taime ki te au uipaanga Kerititiano, e vareae tikai tona iaia no reira i aao ei tana tane i te titiakia kore oki aia e akaapa mai iaia no te akara atu i tetai vaine ke.

Inara, i muri ua ake te akamata anga te pupu apii tatau, kua ui mai teia vaine e: “Ka rauka ainei kia piri atu au ki te pupu apii?” Te pau anga ae. Mei reira mai kare roa aia i topa ana i tetai pupu apii me kare te uipaanga a te putuputuanga. Kua tauta pakari aia i tana au apii no te tatauanga e kua tere ki mua ma te umere, kua mataora tikai aia. Tana pati anga i muri mai koia oki: “Ka rauka ainei tetai apii Pipiria naku?” Kua rekareka tana tane i te akamata anga i te apii kiaia, e kua tere ua atu aia ki mua i tona tu kite i te tatau e te tata e tona kite i te Pipiria.

Ko tetai tangata e 50 mataiti kare roa i mou ana i tetai penitara, te mou anga aia i tetai peni e kia tata i te au reta o te ara reta ra kua riro ia ei mea ngata tikai. Ki etai ra kua tupu te au patoa ki runga i to ratou au rima no ta ratou taomi pakari anga i te penitara e te pepa i te tuatau o te akamata anga mua o te apiianga. I te au epetoma i muri ake i te tautaanga kia mou e te akaaere anga i te penitara, kua tuatua mai etai aronga apiipiiia ma tetai kata anga: “Ka rauka iaku i te akaneke mama ua i toku rima na runga i te pepa!” Te kiteanga i to te aronga apiipiiia tere anga ki mua te akamataora katoa ra i te au puapii. Te tuatua ra tetai puapii: “E mea reka tikai te apii i te pupu apii, kua akakite putuputuia mai to te aronga apiipiiia ariki tikai anga i teia akapapa anga no ko mai ia Iehova ma te pokarakara anga i te akamutu anga tetai apii.”

Kapiti atu ma te au mitinari, te rekareka nei teia Au Kite tei kite i te tatau. No teaa ra? No te mea te rauka nei ia ratou i te taangaanga i to ratou tu kite i te tatau e te tata anga kia akangateitei ia Iehova.

[Au Tutu i te kapi 8, 9]

Te aronga ou e te ruaine kua ariki i te pupu apii tatau