‘Akakore Ua i te Ara a Tetai e Tetai’

TE IRINAKI ra ainei koe e kua akakore mai te Atua i taau au ara? I Marike, i te akara anga kua akapera te maata anga o te aronga mamaata. Kua ripoti a Dr. Loren Toussaint, te tangata tata mua no tetai apii tei raveia i te Apii Teitei o Michigan Institute no te Social Research, e ko te 1,423 aronga Marike tei tareia, vaitata i te 80 patene o te aronga mamaata tere atu i te 45 mataiti te karanga ra e kua akakore mai te Atua i ta ratou au ara.

Inara, ma te umere, e 57 ua patene o te aronga tei tareia te karanga ra e kua oronga atu ratou i te akakore anga i te ara a tetai ke. Te akamaara maira taua tare anga kia tatou i te au tuatua a Iesu i te Tuatua i runga i te Maunga: “Kia akakore oki kotou i ta etai ke ra ara, e akakore katoa to kotou Metua i te ao ra i ta kotou; Kia kore ra kotou e akakore i ta etai ke ra ara, kare katoa oki to kotou Metua i te ao ra e akakore mai i ta kotou ara.” (Mataio 6:14, 15) Ae, te akakore anga a te Atua i ta tatou au ara kua tatuangaia, i tetai tua, i to tatou papa anga i te akakore atu i te ara a tetai ke.

Kua akamaara te apotetoro ko Paulo i te au Kerititiano i Kolosa i teia kaveinga. Kua raurau aia ia ratou: “E tamou rai i te akakoromaki anga tetai e tetai e te akakore ua anga i te ara tetai e tetai me e tumu ta tetai no te tapepeanga ki tetai. Mei ia Iehova i akakore ua maira i ta kotou ara, kia pera katoa oki kotou.” (Kolosa 3:13, NW) E tika tikai, kare teia i te mea ngoie ua i te raveia. Ei akatauanga, me ko koe tei akaapaia ra no te au tuatua manako kore e te tau kore, e mea ngata i te akakoreia atu.

Noatu rai, e manganui te au akameitaki anga no te akakore anga maata i te ara. Te karanga ra tetai tangata apii no runga i te tu o te tangata, ko Dr. David R. Williams, no runga i tana kimikimi anga: “Kua kiteaia mai e matou tetai pirianga ketaketa tikai i rotopu i te akakore anga i te ara a tetai mai e te manako pae kopapa i roto i te aronga pakarikari e te au ruaine o Marike ra.” Te rotai ra te reira, ki te au tuatua a te Ariki pakari ko Solomona, tei tata i etai 3,000 mataiti i topa e: “Tei te maki kore o te ngakau, ko to te kopapa ïa ora.” (Maseli 14:30) I te mea e te akamaata ra tetai vaerua akakore i te ara i te au piri anga meitaki ma te Atua e ma to tatou tangata tupu ra, e tumu meitaki to tatou kia inangaro atu i te akakore i ta tetai ara mei te ngakau ra.​—Mataio 18:35.