Akapeea ta Tatou Manako Anga i te Au Timataanga?

AU TIMATAANGA! Ka aro atu te au tangata ravarai ia ratou. Penei ka tupu mai no te tuke anga o te tu tangata, te au tu ngata o te apinga, te maki maki, te au timataanga, taomianga a te oa kia rave i te tarevake, takinga kinoanga, te au akaaoanga i to tatou turanga neutara me kare te patoi anga i te akamori itoro, e etai atu au apinga e manganui. Noatu eaa te au tu timataanga, kua akatupu putuputu rai ratou i te apiapi anga maata. Akapeea tatou i te akono anga autu ia ratou? E ravenga ainei tetai e puapingai tatou mei ia ratou?

Te Turu Anga Meitaki Rava Atu

Kua akono te Ariki ko Davida i te oraanga tei ki i te au timataanga, inara kua mate tiratiratu atu aia. Akapeea i raukai iaia i te akakoromaki? Kua tou atu aia ki te tumu o tona maroiroi i tana tuatua anga: “Ko Iehova toku tiaki; kare rava au e ngere.” I reira kua tuatua ua atu aia: “E kia aere ua atu au na te o ra o te maru-mate, kare rai au e mataku i te kino: tei vaitata katoao koe iaku; to rakau e to tokotoko tei akapumaana mai iaku.” (Salamo 23:1, 4) Ae, ko Iehova tetai tumu no te turu anga kotinga koreia. Nana i tiaki ia Davida na roto i etai au taime poiri, e te papa ra aia i te rave i te reira katoa no tatou me te umuumuia ra.

Akapeea e raukai ia tatou ta Iehova ra turu anga? Te tou maira te Pipiria i te aerenga i te tuatua anga: “Ka tongi ana kia kite i te meitaki o Iehova!” (Salamo 34:8) Ko tetai patianga pumaana te reira, inara eaa te aiteanga o te reira? E akamaroiroi anga te reira kia tavini ia Iehova e kia akatau katoa atu i to tatou au oraanga ki tona anoano. Ko te aiteanga o taua aerenga ra ko te akakoreanga i etai o to tatou tu rangatira, na te tukuanga i te au atinga. I etai au tu, ka arataki atu te reira ki te au timataanga​—takinga kino anga e te mamaeanga. Inara, ko te aronga tei ariki ngakau tae i te patianga a Iehova ra kare rava e tau kia mii i te raveanga i te reira. Ka takinga meitaki atu a Iehova ia ratou. Ka arataki aia ia ratou e ka akono atu ia ratou i te pae vaerua. Ka akatinamou aia ia ratou i roto i te au timataanga na roto i tana Tuatua, tona vaerua tapu, e te putuputuanga Kerititiano. E ka tutaki aia ia ratou i te openga ra ma te oraanga mutu kore.​—Salamo 23:6; 25:9; Isaia 30:21; Roma 15:5.

Ko te aronga tei akono i te ikianga tauianga i te ora anga kia tavini atu ia Iehova e ka mou ki taua ikianga ra ka kite e te akatupu ra a Iehova i tana au taputou katoatoa. Ko te reira te tupuanga ki to Iseraela tei aru atura ia Iosua ki roto i te Enua Taputouia ra. I to ratou aere atuanga ki tetai tua o Ioridana ra, e au timataanga etai kia akakoromakiia, e  au tamaki anga kia tamakiia, e te au apiianga ngata kia apiiia. Inara kua akapapu taua uki ra e e maata atu to ratou tiratiratu i to ratou au metua, tei aere maira mei Aiphiti e kua mate atu i roto i te metepara ra. No reira, kua turu atu a Iehova i te aronga tiratiratu ra, e no runga i to ratou tu i te openga o te oraanga o Iosua ra, te tata ra te Pipiria: “E kua oronga uā Iehova i te au no ratou e pini ua ake; mei tana oki i taputou mai ki to ratou ai metua . . . Kare rava tetai mea meitaki ta Iehova i tuatua mai ki te ngutuare o Iseraela i poka: ope rava akera i te tupu.” (Iosua 21:44, 45) Ka tupu katoa te reira kia tatou me irinaki ki katoa tatou kia Iehova i raro ake i te timataanga e i etai atu taime katoatoa oki.

Penei eaa te ka akaparuparu i to tatou irinaki anga ia Iehova? Kua tou atura Iesu ki tetai apinga i tana tuatua anga: “Kare e tika i te tangata kia akono i nga pu e toko rua . . . Ko kotou nei oki, kare e tika kia akono atu i te Atua e te Mamona.” (Mataio 6:24) Me e irinaki to tatou ia Iehova, kare tatou e akara i te tu tinamou i te ngai e kimi nei te maata anga o to te ao nei i te reira, i te au apinga kopapa. Kua ako maira a Iesu i tana au pipi: “E na mua ra kotou i te kimi i te basileia o te Atua, e te tuatua-tika nana ra, e kapiti katoaia mai taua au mea [te au apinga umuumuia] katoa ra ia kotou.” (Mataio 6:33) Te Kerititiano tei mou ra i te manako anga tau no te au apinga kopapa ra e kua tuku i te Patireia o te Atua ei mea mua i tona oraanga te akono ra i te ikianga tika. (Koheleta 7:12) Inara, penei ka tutaki aia i tetai apinga. Penei ka tuku atinga aia i te au apinga. Inara ka kokoti aia i te au tutaki e manganui. E ka turu atu a Iehova iaia.​—Isaia 48:17, 18.

Eaa ta Tatou ka Kite Mei te Au Timataanga

Te ikianga kia “tongi ana kia kite i te meitaki o Iehova” kare ra, e paruru i tetai mei te au tupuanga kare i manakoia atu i te oraanga; kare katoa oki e paruru takiri ia tatou mei te au ravenga a Satani e tona au rima rave tangata ra. (Koheleta 9:11) Ei tupuanga, penei ka timataia to tetai Kerititiano manako tauta e te ngakau tae. Eaa ra a Iehova i akaruke ei i tona aronga akamori kia aro atu i taua au timataanga ra? Kua oronga mai a Petero i tetai tumu i tana tata anga: “Taitaia poto uaorai kotou i teianei (no te mea tika ïa) i te au timataanga tu ke ke ra: Kia riro te timata anga o to kotou akarongo, ko tei maata rava i te meitaki i to te auro ngaro ua nei, timata uaʼi i te ai, ei akameitaki, ei teitei, e ei meitaki, i te mama anga mai o Iesu Mesia.” (1 Petero 1:6, 7) Ae, ka tuku te au timataanga ia tatou kia akakite i te tu o to tatou akarongo e to tatou inangaro ia Iehova. E ka tauturu ratou kia oronga i tetai pau anga ki te au akakino anga e te au akaapa anga a Satani te Tiaporo.​—Maseli 27:11; Apokalupo 12:10.

Ka tauturu katoa oki te au timataanga ia tatou kia akatupu i etai atu tu Kerititiano. Ei akatauanga, e akamanako i te au tuatua a te tata taramo ra: “Ka akono mairai [a Iehova] i tei akaaka; kareka te nengonengo ra, ei te mamao ke aia e akara mai ei.” (Salamo 138:6) E manganui ia tatou kare e akaaka ana i te tu akono, mari ra ka rauka i te au timataanga i te tauturu ia tatou kia akatupu i taua tu umuumuia ra. Kia maara i te atianga i te tuatau ia Mose ra i te kiteanga tetai papaki i te roiroi i te kai anga i te mana mei tetai epetoma ki tetai epetoma, tetai marama ki tetai marama. I te akaraanga, e timataanga te reira no ratou, noatu rai e ko te mana e mea oronga temeioia mai. Eaa te akakoro anga o te timataanga? Kua akakite atu a Mose kia ratou: “[Na Iehova i] angai ia koe i te medebara ki te māna ra . . . ei taakaaka anga ia koe, e ei timata anga ia koe.”​—Deuteronomi 8:16.

Aiteite katoa oki ka rauka kia timataia to tatou tu akaaka. Akapeea? Ei akatauanga, akapeea to tatou manako i te au akatikatika anga akaaerenga? (Isaia 60:17) Te oronga ra ainei tatou i te turu anga ngakau katoa ki te angaanga tutuanga e te apiianga? (Mataio 24:14; 28:19, 20) Te ariki akatenga ra ainei tatou i te au akataka anga i te tuatua  mou Pipiria tei orongaia maira e “te tavini akono meitaki e te pakari”? (Mataio 24:45-47; Maseli 4:18) Te kopae ke ra ainei tatou i te taomianga kia oko mai i te au mea ou, te au kakau ou, me kare te motoka ou tikai ra? Ka rauka i te tangata akaaka kia tuatua ae ki taua uianga ra.​—1 Petero 1:14-16; 2 Petero 3:11.

Ka tauturu te au timataanga i te akatupu ki roto ia tatou i tetai atu tu puapinga maata​—te akakoromaki anga. Kua tuatua te pipi ko Iakobo: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki.” (Iakobo 1:2, 3) Te autu anga i te akakoromakianga i tetai timataanga mei tetai ma te irinaki anga ki katoa i runga ia Iehova te akatupu ra i te tu ngaueue kore, te tamou marie, e te tiratiratu. Te akamaroiroi ra te reira ia tatou kia kopae atu i te au tamaki anga a Satani a te tuatau ki mua, te atua riri o teianei ao.​—1 Petero 5:8-10; 1 Ioane 5:19; Apokalupo 12:12.

E Akono i te Manako Tau no te Au Timataanga

Te Tamaiti apa kore ua a te Atua, ko Iesu Karaiti, kua aro atu i te au timataanga e manganui iaia i te enua nei e kua kokoti i te au puapinga maata mei te akakoromakianga ia ratou. Kua tata a Paulo e “i kite a Iesu i te akamoraro i tona au mate.” (Ebera 5:8) Na tona tiratiratu tae roa ki te matenga i apai mai i te akapaapaa anga ki te ingoa o Iehova e kua akariro kia rauka ia Iesu kia oronga i te puapinga o tona oraanga tangata apa kore ua ei oko no te au tangata. Na te reira i akatuera i te aerenga no te aronga tei akono i te akarongo ia Iesu kia rauka te manakonako no te oraanga mutu kore. (Ioane 3:16) No to Iesu vai tiratiratu anga i raro ake i te timataanga, kua riro aia i teianei ei Taunga Maata no tatou e ei Ariki akateronoia.​—Ebera 7:26-28; 12:2.

Ka akapeea tatou? To tatou tiratiratu i te aro atu anga i te au timataanga ka aiteite katoa i te apaianga mai i te au akameitakianga maata. No te aronga ma te manakonako anga no te rangi, te tuatua ra te Pipiria e: “E ao to te tangata e akakoromaki i te timataanga: kua akatika anakeia mai aia ra, e rauka ïa iaia te korona ora, ta te Atu i tuatua mai e no te aronga anoano iaia ra.” (Iakobo 1:12) Te aronga e manakonako to ratou no te enua nei tei ia ratou te akapapu anga e me ka akakoromaki tiratiratu ratou, ka akatuangaia ratou i te oraanga mutu kore i roto i te parataito i te enua nei. (Apokalupo 21:3-6) E eaa oki tei maata atu te puapinga, ka apai mai to ratou akakoromaki anga tiratiratu i te akapaapaa anga ki te ingoa o Iehova.

Ia tatou e aru ra i to Iesu au tapuae, ka rauka ia tatou kia irinaki e ko te au timataanga katoatoa ta tatou e aro atu nei i roto i teia akatereanga o te au mea nei ka rauka kia akono autuia. (1 Korinetia 10:13; 1 Petero 2:21) Akapeea? Na to tatou irinakianga ki runga ia Iehova, tei oronga maira i “te mana maata meitaki nei” ki te aronga te irinaki ra ki runga iaia. (2 Korinetia 4:7) Kia aite to tatou irinaki anga ki to Iobu, noatu i tona akakoromaki anga i te au timataanga kino ra kua akapapu mai ma te irinaki anga: “Kia oti au i te timataia e ia, e riro au mei te auro i reira.”​—Iobu 23:10.

[Tutu i te kapi 31]

To Iesu tiratiratu i raro i te timataanga kua apai mai i te akapaapaa anga ki te ingoa o Iehova. Ka rauka katoa to tatou