Anoano Tatou Katoatoa i te Akameitaki Anga

E RA meitaki tikai no tetai tamaine meangiti. Noatu kua anoanoia te akatikatika anga e ia i tetai ua au taime, i teia ra tikai, kua akono meitaki tikai aia. Inara, i taua po ra, i muri ake i te tukuna angaia te tamaine meangiti ki runga i te roi, kua rongo atu tona mama iaia i te aueanga. I te ui angaia e eaa aia i aue ei, kua tuatua aue ua mai aia: “Kare ainei e tamaine meitaki au i teia ra?”

Kua akamamae tikai taua ui anga i tona mama. Kua viviki ua aia i te akatikatika i tana tamaine. Inara i teianei, noatu i te kiteanga e kua tauta pakari tana tamaine i te akono meitaki, kua poka te mama i te tuatua i te tuatua ariki meitaki.

Kare ua e ko te au tamaine meangiti te anoano ra i te akameitaki anga e te akapapu anga. Te anoano ra tatou katoatoa​—e pera katoa te ako anga e te akatikatika anga.

Eaa to tatou manako me rauka ia tatou te akameitaki anga ngakau tae? Kare ainei e te akapumaana ra te reira i to tatou ngakau e te akarekareka ra ia tatou? Papu e te kite ra tatou kua kite mai tetai tangata e te manako maira. Te akapapu maira te reira ia tatou e ko tei raveia e tatou kua puapingaia, e te akakeu ra ia tatou kia taangaanga akaou ia tatou uaorai a te tuatau ki mua. Kare i te mea poitirere e te akavaitata ra te akameitaki anga ngakau tae ia tatou ki te tangata te akanoo ra i te taime i te tuatua mai i tetai apinga akamaroiroianga.​—Maseli 15:23.

Kua ariki ua a Iesu Karaiti i te anoano kia tuatua i te akameitaki anga. I roto i te parapore o te au tareni, ko te pu (te akatutu maira ia Iesu uaorai) kua akameitaki maanaana i nga tavini tiratiratu taki tai, i te na ko anga: “Kua tika rava, e teianei tavini meitaki e te pikikaa kore.” Mei teaa atura te akapumaanaanga! Noatu kua rauka ia raua te au tu kite tukeke e te au rauka anga, kua rauka ia raua ma te aiteite te akameitaki anga.​—Mataio 25:19-23.

No reira kia akamaara ua tatou i te mama o taua tamaine meangiti ra. Kare tatou e anoanoia kia tiaki i tetai kia aue i mua ake ka tuatua ei tatou i te tuatua akameitaki anga kia ratou. Mari ra, ka rauka ia tatou i te kimi atu i te au tuatau kia tuatua akameitaki ua atu. E tikai, e tumu meitaki ta tatou no te tuatua i te akameitaki anga ngakau tae i te au tuatau ravarai.