Aronga Turu i te Akamori Anga Mou​—I Taua Taime e i Teianei

TE MAARA ra ainei ia koe te ingoa o tetai tangata tei aue i te oire taito ko Ierusalema? ‘Ko Iesu,’ ka tuatuai koe​—ae, e tika, kua pera a Iesu. (Luka 19:28, 41) Inara, i te au anere mataiti i mua ake ka aaere ei a Iesu i te enua nei, kua aue aiteite katoa tetai tavini tiratiratu o te Atua ia Ierusalema. Tona ingoa ko Nehemia.​—Nehemia 1:3, 4.

Eaa tei akakeu ia Nehemia kia maromaroa e kua aue atura aia ia Ierusalema? Eaa tana i rave e puapinga ei te oire e tona iti tangata? E eaa ta tatou ka apii mai mei tana akaraanga? E pau ei, ka akara akaou ana tatou i etai au tupu anga o tona tuatau.

E Tangata Manako Ngakau e te Rave Angaanga

Kua ikiia a Nehemia ei kavana no Ierusalema, inara i mua ake i te reira, e opita aia ma tetai turanga teitei i roto i te aua Peresia i te oire ko Susana. Inara, kare tona oraanga meitaki i akameangiti ana i tona manako i te tu oraanga o tona au taeake ngati Iuda i Ierusalema mamao ra. Ko te tika, ko te apinga mua tana i rave i te atoro anga mai te aronga tereketi ngati Iuda mei Ierusalema ki Susana koia oki ‘kua ui  atura kia ratou i te au ngati Iuda i ora ra, ko tei toe i te tuikaa ra, e ia Ierusalema katoa oki.’ (Nehemia 1:2) I te pau anga mai te aronga atoro e tei roto i te “tumatetenga maata” te au tangata o Ierusalema e kua “vai ngaangaa ua” te patu oire ‘kua noo [a Nehemia] ki raro ma te aue, e kua mii ua i etai puke rā.’ I muri akera kua akakite aia i tona manako ngakau maromaroa na roto i tetai pure ngakau tae kia Iehova. (Nehemia 1:3-11) Eaa ra a Nehemia i maromaroa ei? No te mea ko Ierusalema te ngai maata no te akamori anga ia Iehova i te enua nei, e kua akono koreia te reira. (1 Ariki 11:36) Pera katoa, e akaata anga te turanga pueurikiriki o te oire i te turanga kino i te pae vaerua o te au tangata i reira.​—Nehemia 1:6, 7.

Kua akakeu to Nehemia manako anga ia Ierusalema e tona tangi aroa i te au ngati Iuda e noo ra i reira kia oronga iaia uaorai. I te akatika anga te ariki Peresia iaia kia akaruke i tana au angaanga, kua akamata a Nehemia i te parani i tetai terepu roa ki Ierusalema. (Nehemia 2:5, 6) Kua inangaro aia i te akapou i tona maroiroi, te taime, e te kite karape no te turuanga i te angaanga ripea tei anoanoia ra. I roto ua i nga mea ra i tona tae anga, kua parani takere aia no te ripea i te patu katoa o Ierusalema.​—Nehemia 2:11-18.

Kua akatakake a Nehemia i taua angaanga maatamaata no te ripeaanga i te patu i roto i te au pamiri e manganui, pouroa ratou kua angaanga kapipiti ma tetai e tetai. * E maata atu i te 40 pupu tangata tuketuke tei akatakaia kia ripea i tetai “ngai toe” tataki tai. Tei tupu? Ma te aronga angaanga e manganui​—kapiti mai te au metua ma ta ratou au tamariki​—i te akapou anga i to ratou taime e te maroiroi, kua rauka i te raveia tetai angaanga tei akaraanga e kare e rauka i te raveia. (Nehemia 3:11, 12, 19, 20) I roto ua i nga marama e rua tei raveia te angaanga, kua ripeaia te katoa anga o taua patu! Kua tata a Nehemia no te aronga tei patoi i te angaanga ripea e kua akakeuia kia tuatua e “mea raveia mai taua angaanga nei e to matou Atua.”​—Nehemia 6:15, 16.

E Akaraanga kia Akamaaraia

E maata atu ta Nehemia i oronga ua i tona taime e te tu kite no te akaaerenga. Kua taangaanga katoa aia i tana au apinga kia turu i te akamori anga mou. Kua akapou aia i tana moni kia oko i tona au taeake ngati Iuda mei te tuikaa anga. Kua oronga ua aia i te moni ma te kore te initereti. Kare rava aia i ‘akateiaa’ i te au ngati Iuda na te maroanga i te tutaki anga ei kavana, ko tetai apinga kua tau kiaia. Mari ra, kua akatuera ua aia i tona kainga ei angai e “okotai oki anere e rima ngauru ngati Iuda e te aronga tutara i taku ra kaingakai, te taka atura tei aere mai kia matou no te au etene i vaitata maira.” I te ra taki tai kua oronga aia ‘okotai oki puakatoro e te mamoe meitaki e ono, e te moa katoa oki’ no tana au manuiri. I te pae mai, e okotai taime i te tai ngauru ra kua oronga aia kia ratou i te ‘wina e manganui te tu’​—pouroa teia kua tutakiia e ia.​—Nehemia 5:8, 10, 14-18.

Mei teaa te meitaki i te akaraanga o te tu oronga ua ta Nehemia i akanoo no te au tavini pouroa o te Atua i taua taime e i teianei! Kua taangaanga ua e kua rave puareinga ua teia tavini mataku kore o te Atua i tana au apinga kia turu i te aronga angaanga e raukai i te akatere ki mua i te akamori anga mou. Ma te tau, kua rauka iaia i te pati kia Iehova: “E akamaara mai . . . e taku Atua e, kia meitaki au, mei taku oki i rave i teianei au tangata.” (Nehemia 5:19) Papu tikai ka rave akapera a Iehova.​—Ebera 6:10.

Ta Nehemia Akaraanga te Aruia Nei i Teia Tuatau

E pumaana anga i te kite atu e te akaari katoa ra te au tangata o Iehova i teia tuatau i taua manako ngakau maana, te puareinga ra i te rave angaanga, e tetai tu akaatinga uaorai no te akamori anga mou. Me rongo atu tatou e kua mamae tetai au taeake akarongo i te kino, te manako oonu ra tatou no to ratou tu oraanga. (Roma 12:15) Mei ia Nehemia rai, ka uri tatou kia Iehova na roto i te pure i te turu anga i to tatou au taeake akarongo tei takinokinoia, te pati anga kiaia: “Kia akarongo mai to taringa i te pure a to tavini nei, e te pure a to au tavini ra, i tei anoano i te mataku i toou ra ingoa.”​—Nehemia 1:11; Kolosa 4:2.

 Inara, ta tatou manako anga i te tu pae vaerua e te pae kopapa o to tatou au taeake Kerititiano e no te akatere ki mua i te akamori anga mou kare te reira e akakino ua i to tatou au manako ngakau. Te akakeu katoa ra te reira ia tatou kia rave angaanga. Ko te aronga te akatika ra to ratou au turanga te akakeuia ra e te inangaro kia akaruke i te turanga tau ua o to ratou au enua e, mei ia Nehemia rai, kua neke atu ki tetai au ngai kia tauturu i te aronga te umuumu ra i te tauturu. Kare i akaparuparuia e te au turanga oraanga tau kore te aro atura taua aronga oronga ua i etai au tuanga o te ao, te turu ra ratou i te akatere ki mua te akamori anga mou i reira, te tavinianga i te pae i tetai e tetai ma to ratou au taeake Kerititiano. Te tu akaatinga uaorai ta ratou e akaari ra e tau meitaki tikai.

Raveanga i ta Tatou Tuanga i to Tatou Ngai

Tei maramaia, kare e rauka i te maata anga ia tatou i te neke atu ki tetai ngai. Te turu nei tatou i te akamori anga mou i to tatou ngai. Te akatutu katoaia maira te reira i roto i te puka a Nehemia. Ka akara ana i te au tataanga ta Nehemia i kapiti mai no etai au ngutuare tangata tiratiratu tei piri atu ki roto i te angaanga ripea anga. Kua tata aia: “Kua patu iorā Iedaia, te tamaiti Harumapha, i vaitata i tona uaorai are . . . kua patu iorā Beniamina raua ko Hasuba, i vaitata i to raua are. I muri ake iaia, kua patu iorā Azaria te tamaiti a Maaseia, te tamaiti a Anania, i tona pae are.” (Nehemia 3:10, 23, 28-30) Kua tauturu maata taua au tangata e to ratou ngutuare tangata i te akatere ki mua i te akamori anga mou na te raveanga  i ta ratou tuanga i roto i te angaanga ripea vaitata i to ratou kainga.

I teia tuatau, te turu ra te manganui ia tatou i te akamori anga mou i to tatou uaorai ngai na roto i te au mataara tuketuke. Te piri atura tatou ki roto i te au angaanga patu anga i te Are Uipaanga Patireia, te au angaanga tauturu i te pae tumatetenga e, tei maata rava, te angaanga tutuanga i te Patireia. I te pae mai, me ka rauka ua ia tatou te piri atu ki roto i te angaanga patu anga me kore te tauturu anga me kare ra, e anoano ngakau tae to tatou i te turu i te akamori anga mou ma ta tatou au apinga, mei ta Nehemia rai i rave oronga ua i tona tuatau ra.​—Akara i te pia “Au Ravenga ta Etai e Iki ra no te Oronga.”

Te kimianga i te au moni tauturu tei anoanoia kia tutaki i ta tatou au angaanga neneianga e tupu atura, te au angaanga tauturu anga, e tetai atu au angaanga tuketuke te raveia ra takapini i te koropu i tetai taime kua akaraanga maata ia. Inara, e akamaara, kua akaraanga maata katoa te angaanga ripea i te patu maatamaata o Ierusalema. (Nehemia 4:10) Inara, no te mea kua akatakakeia te angaanga i rotopu i te au ngutuare tangata puareinga, kua oti meitaki te angaanga. Pera katoa i teia tuatau, te kimianga i te au mea anoanoia no te akono atu i ta tatou au angaanga takapini i te ao te vaira e kia rauka ua me akono ua atu tatou tataki tai i tetai tuanga o te angaanga.

Te pia “Au Ravenga ta Etai e Iki ra no te Oronga” te akaari maira i te au ravenga te turuia ra te angaanga Patireia i te pae moni. I te mataiti i topa, e manganui i roto i te au tangata o te Atua kua oronga i taua turu anga, e te inangaro nei te  Pupu Akaaere o te Au Kite o Iehova i te taangaanga i teia tuatau i te akakite i to ratou tu ariki oonu ki te katoatoa tei akakeuia to ratou ngakau kia piri mai na roto i teia oronga ua anga. Tei maata rava, te akameitaki nei matou ia Iehova no tana akameitakianga apinganui no te au angaanga ngakau katoa a tona iti tangata i te akamaataanga i te akamori anga mou takapini i te ao. Ae, me akamanako tatou akapeea to Iehova rima i te arataki anga ia tatou i te au mataiti i topa, te akakeuia ra tatou kia taiku akaou i te au tuatua a Nehemia, tei tuatua akameitaki ua e: “I te rima takinga-meitaki o taku Atua i runga iaku.”​—Nehemia 2:18.

[Tataanga Rikiriki i Raro]

[Pia/Au Tutu i te kapi 28, 29]

Au Ravenga ta Etai e Iki ra no te Oronga

AKAPUTU ANGA NO TE ANGAANGA I TEIANEI AO

E manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia “Akaputu Anga no te Angaanga i Teianei Ao​—Mataio 24:14.”

I te au marama katoatoa, e tuku ana te au putuputuanga i teia au moni ki te opati maata o teianei ao o te Jehovah’s Witnesses, me kore ki te opati manga o te reira ngai. Kia tuku tika katoaia te au moni tauturu tei oronga uaia ki te Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, me kore ki te opati manga e akono ra i toou enua. Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te au akaputu anga no te akakite i teia apinga aroa tikai.

AKANOO ANGA I TE TURANGA NO TE TAUTURU

Penei ka orongaia te moni na roto i tetai akanoo anga takake i roto i te reira, me e anoano takake to te tangata oronga, ka akaokiia atu te moni oronga ua kiaia. No tetai akakite anga maata atu, e tata ki te Treasurer’s Office i te ngai noo anga i akakiteia i runga ake nei.

PARANIANGA ORONGA UA

I te pae i te au moni aroa oronga ua e te au moni tauturu akaturangaia, te vaira tetai atu au ravenga orongaanga no te akapuapinga i te angaanga Patireia i teianei ao. Ka kapiti mai te:

Initiua: Penei kia tukuia te ingoa o te Taiate Punanga Tiaki e ko tei puapingaia mei tetai tika anga initiua ora me kore tetai akapapa anga akaangaroi anga/moni pakari.

Akapapa Anga Pangika: Penei kia tukuia te au akapapa anga pangika, te au pepa tuku anga, me kore te au akapapa anga akaangaroi no tetai tangata ki roto i te tataanga irinakiia me kore tei maaniia kia tutakiia me mate ake ki te Taiate Punanga Tiaki, kia tau ki te au ikuiku anga a te pangika o te reira ngai.

Au Apinga Akaputuia e te Poni: Penei ka orongaia te au apinga akaputuia e te poni ki te Taiate Punanga Tiaki ei apinga aroa.

Enua: Penei ka orongaia te au enua e te au are ka rauka i te oko ki te Taiate Punanga Tiaki ei apinga aroa me kore na te akono anga i tetai pepa koreromotu ki tei orongaia mai i te reira, te ka rauka iaia i te noo ki roto i te tuatau e ora ra aia. Kia araveiia atu te opati manga i toou enua i mua ake ka akamanaiai tetai ua atu enua.

Moni Oronga ei Apinga Aroa: E akapapaanga te moni oronga ei apinga aroa i roto i te reira ka tuku atu tei oronga ra i te moni me kare te au apinga akaputuia ki te Taiate Punanga Tiaki. Ei tupau anga, ka rauka i tei oronga ra, me kare te aronga tei ikiia e tei oronga ra, i tetai tutaki anga moni oronga tei akatakaia i te au mataiti ravarai no te oraanga. Ka rauka i tei oronga ra tetai tero akameangitiia i te mataiti i akanooiai te moni oronga ei apinga aroa.

Au Koreromotu e te Au Tataanga Irinakiia: Penei ka oronga tikaia te apinga me kore te moni ki te Taiate Punanga Tiaki na roto i tetai koreromotu tikaia e te tataia, me kore kia tukuia te ingoa o te Taiate Punanga Tiaki te ka puapingaia no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime.

Mei ta te tuatua “paranianga oronga ua” e taiku ra, ka anoanoia kia paraniia teia au ravenga oronga moni tauturu i te tua o te tangata oronga. Ei tauturu i tetai te inangaro ra i te akapuapinga i te angaanga a te Au Kite o Iehova i te ao katoa na roto i tetai paranianga oronga ua, kua akapapa te Taiate i tetai poroutia reo Papaa e te reo Paniora te ingoa Charitable Planning to Benefit Kingdom Service Worldwide. Kua tataia te poroutia ei pau i te au uiui anga e manganui tei rauka no te au apinga aroa, au koreromotu, e te au tataanga irinakiia. Te kapiti katoa maira i tetai akakite anga puapinga no runga i te enua, pae moni, e te parani anga i te tero. Kua akanooia te reira ei tauturu i tetai i Marike te parani ra i te oronga i tetai apinga aroa takake i teianei me kore no te akaruke i tetai koreromotu i te mateanga kia iki i tetai ravenga meitaki rava e te mako i te manako anga i to ratou uaorai turanga e te pamiri. Ka rauka tetai kopi o teia poroutia na te pati tikai anga i tetai kopi no ko mai i te Charitable Planning Office.

I muri ake i te tatauanga i te poroutia e te tuku anga ki te Charitable Planning Office, kua rauka i te manganui te tauturu i te Au Kite o Iehova i teianei ao e i taua taime rai, kua akameangiti i te au puapinga o te tero no te akapera anga. Ka tau kia akakiteia e kia rauka i te Charitable Planning Office tetai kopi o tetai tataanga tau te piri atura ki teia au akanoo anga. Ko te aronga te inangaro ra i etai o teia au akanoo anga paranianga oronga ua, ka tau kia aravei atu i te Charitable Planning Office, na te tataanga me kore na te terepaoni anga, i te atereti i tataia i raro ake nei me kare i ko i te opati o te Jehovah’s Witnesses e akono ra i toou enua.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707

[Pia i te kapi 30]

Au Ravenga ta Etai e Iki ra no te Oronga

I roto i tana au reta ki to Korinetia, kua taiku te apotetoro ko Paulo e toru au ravenga puapinga no te oronga anga. (1) I te tataanga no runga i te koi moni, kua ako atu a Paulo: “Te au ra mua ravarai o te epetoma kia vaio kotou tataki tai i tona kainga i tetai apinga.” (1 Korinetia 16:2a) No reira, te anoanoia ra kia paraniia na mua te orongaanga, e kia raveia te reira ma te tamou ua. (2) Kua tata katoa a Paulo e kia oronga te tangata tataki tai “kia tau ki tana tutaki.” (1 Korinetia 16:2e, New International Version) Tera te aite anga, ko tetai tangata te inangaro ra i te piri atu i roto i te oronga ua anga ka rauka kia pera ma te akatuanga ua. Noatu me e meangiti ua te ka rauka i tetai Kerititiano, te akaperepereia ra te meangiti o tana ka rauka i te oronga na Iehova. (Luka 21:1-4) (3) Kua tata atu a Paulo: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) Te oronga ra te au Kerititiano ngakau tae mei te ngakau​—ma te rekareka.

[Au Tutu i te kapi 26]

E tangata manako ngakau e te rave angaanga a Nehemia

[Au Tutu i te kapi 30]

Te turu ra te au tauturu oronga ua i te au angaanga neneianga, te au angaanga tauturu anga, te patu anga Are Uipaanga Patireia, e tetai atu au angaanga puapinga takapini i te koropu