Ripoti a te Aronga Tutu Patireia

Au Are Uipaanga Patireia Akatueraia ki te Katoatoa

KOI tereni ei i tana au pipi no te angaanga orometua ki te tangata, kua akamaroiroi a Iesu Karaiti ia ratou kia “kapiki ua atu ki rungao i te are.” (Mataio 10:27) Ae, kia rave ratou i ta ratou angaanga orometua Kerititiano i te ngai tangata, kia kiteaia mai. Na te taangaangaanga i teia ako anga, te rave katoaia ra te angaanga a te Au Kite o Iehova i te ngai tangata. Kua akariro teia tu akatuera ua i te Au Kite kia autu i te patoi anga e kia rauka te kite anga arikiia.

Noatu kua akatueraia te au uipaanga putuputuanga a te Au Kite o Iehova ki te tangata, kua akariro te tu papaki tai e kia emiemi etai au tangata i te tomo atu ki roto i te Are Uipaanga Patireia. Te tika nei teia i Finland. Te emiemi ua ra etai i te aere atu ki te au ngai ou. Me akatuia tetai Are Uipaanga Patireia ou me kare kua akaouia tetai are uipaanga, tei matauia kua akanoonooia te akatuera anga ki te tangata. Penei ka akonoia te akara anga takake kia pati atu i te au tangata i te pae mai kia atoro i te Are Uipaanga Patireia e kia kite matau i te angaanga a te Au Kite o Iehova.

I tetai ngai, kua akanoonoo te Au Kite e kia raveia tetai oroanga makatini i taua ra ra te akono ra ratou i te akatuera anga i to ratou Are Uipaanga Patireia ou ki te tangata. Kua aravei atu e rua nga Kite i tetai tangata pakarikari tei tuatua e e reka ana aia i te tatau i te au makatini Punanga Tiaki e te Awake! ra. Kua akakite atu te nga taeake kiaia i te akatuera anga ki te tangata e kua tuatua atu no te apai iaia ki te Are Uipaanga Patireia. Kua tuatua mai te tangata e ka mataora aia i te aru atu ia raua. Kua ava mai tana vaine, te akarongo maira i te uriuri anga, e, “Ka inangaro katoa au i te aru atu!”

I te tomoanga atu ki roto i te Are Uipaanga Patireia, kua akara takapini te tangata e kua tuatua mai e: “Kare teia i kerekere tikai. Eaa ra, e manea tikai e te marama. Kua akakiteia mai kiaku e kerekere te Are Uipaanga Patireia!” Kua noo roa mai te nga tokorua e kua pati mai i tetai puka te akaariariia ra.

Kua inangaro tetai putuputuanga i te akakite ki roto i te nuti pepa i reira i te akatuera anga ki te tangata i te atianga o te akatapu anga i to ratou Are Uipaanga Patireia. I te raukaanga te akakite anga no taua tupu anga, kua taiku mai te pu vaine tata e kia tataia tetai atikara no runga i taua tumu manako. Kua akatika te au taeake, kare i roa ana, kua ira mai tetai atikara tau ma te apa kapi i roto i te nuti pepa, i te akonoanga i te tupu anga e te akatakaanga i te au angaanga a te putuputuanga o te Au Kite o Iehova i reira.

I muri mai i te nenei angaia te atikara, kua aravei atu tetai Kite pakarikari i tetai vaine i te pae mai tei tuatua kiaia: “E atikara meitaki tetai no runga i te Au Kite o Iehova i roto i te pepa i teia ra!” Kua rauka i te tuaine i te oronga i tetai akakite anga e aru mai kua akaruke atu kiaia i te poroutia Jehovah’s Witnesses in the Twentieth Century.

I te pae mai i te akatakaanga i te au manako tarevake no runga i te Au Kite o Iehova, ko te au akanoonoo anga ma te au porokaramu akatuera anga ki te tangata e te akatapu anga i te au Are Uipaanga Patireia ou kua akamatutu i te au papuritia na te akamaroiroi anga ia ratou kia pati ua atu i te au tangata kia aere mai ki te au uipaanga. Ae, i roto i te au enua e manganui, kapiti mai ia Finland, kua kite mai te au tangata e te akatueraia ra te au Are Uipaanga Patireia o te Au Kite o Iehova ki te katoatoa.