Au Kerititiano Neutara i te Tuatau Openga Nei
Au Kerititiano Neutara i te Tuatau Openga Nei
“Kare ratou i to teianei ao, mei iaku nei rai oki, kare i to teianei ao.”—IOANE 17:16.
1, 2. Eaa ta Iesu i tuatua no te pirianga o tana au pipi ma te ao, e eaa te au uianga a tana au tuatua i akakite mai?
I TE po openga o tona oraanga ei tangata apa kore ua, kua tuatua a Iesu i tetai pure roa i te akarongoanga mai tana au pipi. I taua pureanga ra, kua tuatua aia i tetai apinga tei akataka ra i te au oraanga o te au Kerititiano mou katoatoa. I te tuatuaanga no tana au pipi, kua karanga aia: “Kua tuku atu au i taau tuatua kia ratou; e te riri nei to te ao nei ia ratou, no te mea kare ratou no teianei ao, mei iaku nei rai oki kare i to teianei ao. Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao.”—Ioane 17:14-16.
2 E rua taime, o Iesu tuatua anga e kare tana au pipi i to teianei ao. Pera katoa, e no te takake anga ka taki atu ki te au pekapeka—ka makitakita to teianei ao ia ratou. Inara, auraka te au Kerititiano e taitaia; ka tiaki oki a Iehova ia ratou. (Maseli 18:10; Mataio 24:9, 13) I te manako anga i ta Iesu au tuatua, penei ka ui tatou e: ‘Eaa ra te au Kerititiano i kore ei i to teianei ao? Eaa te aiteanga e kare i to teianei ao? Me te makitakitaia maira te au Kerititiano e teianei ao, ka akapeea to ratou manakoanga i teianei ao? I te mea oki, ka akapeea to ratou manako anga i te au kavamani o teianei ao?’ Te au pauanga Tuatua Tapu ki teianei au uianga e puapinga maata no te mea e akatupu anga ta ratou kia tatou katoatoa.
“No te Atua Tatou”
3. (a) Eaa te akariro ra ia tatou kia takake mei to teianei ao? (e) Eaa te akakite anga e te vaira te ao “i raro ake i taua vaerua kino”?
3 To tatou pirianga vaitata ma Iehova ko tetai tumu ia i kore ei tatou i to teianei ao. Kua tata te apotetoro ko Ioane: “Kua kite oki tatou e no te Atua tatou, e te vai ua nei rai to te ao ravarai i raro ake i taua vaerua kino ra.” (1 Ioane 5:19) Te kite puia ra ta Ioane au tuatua no teianei ao e e tika tikai ia. Te au tamaki, te rave kino, te takino anga, te taomianga, te tiratiratu kore, e te ainga tau kore e tupu maata nei i teia tuatau te oronga mai nei i te akakite anga i to Satani mana, e kare i to te Atua. (Ioane 12:31; 2 Korinetia 4:4; Ephesia 6:12) Me riro mai tetai e ko tetai o te Au Kite o Iehova, kare aia e rave me kare e akatika ki taua au raveanga tarevake ra, e te akariro ra te reira iaia e kare no teianei ao.—Roma 12:2; 13:12-14; 1 Korinetia 6:9-11; 1 Ioane 3:10-12.
4. I roto i teea au tu ta tatou akaari anga e no Iehova tatou?
4 Kua tuatua a Ioane e ko te au Kerititiano, e tuke anga mei teianei ao “no te Atua” ratou. Pouroa te aronga tei akatapu ia ratou uaorai kia Iehova nana rai ratou. Kua tuatua te apotetoro ko Paulo: “Te ora nei tatou, i ora ïa tatou ei akatupu i ta te Atu; e te mate nei tatou, i mate ïa tatou ei akatupu i ta te Atu: e teianei, te ora nei tatou, e te mate nei oki, no te Atu rai tatou.” (Roma 14:8; Salamo 116:15) No te mea no Iehova tatou, ka oronga tatou kiaia anake te akamori anga. (Exodo 20:4-6) No reira, kare te Kerititiano mou e oronga i tona ora anga ki tetai tumu no teianei ao. E noatu te akangateitei ra aia i te au reva o te au pa enua, kare ra aia e akamori ia ratou, me na te au angaanga me kare i te vaerua. Kare rava aia e akamori i te aronga rongonui o te tarekareka me kare i etai atu au itoro o teia tuatau nei. Inara, ka akangateitei aia i te tika a etai ke kia rave i ta ratou i anoano, inara ka akamori anake aia i Tei Anga maira. (Mataio 4:10; Apokalupo 19:10) Ko teia oki te akariro ra iaia kia takake mei to teianei ao.
“Kare to Teianei Ao Taku Basileia”
5, 6. Akapeea te kauraro anga ki te Patireia o te Atua i te akariro anga ia tatou kia takake mei to teianei ao?
5 Te au Kerititiano e au pipi na Iesu Karaiti e e au tangata no te Patireia o te Atua, tei akariro katoa ia ratou kare i to teianei ao. I to Iesu ra akavaangaia ki mua ia Ponotio Pilato ra, kua tuatua aia: “Kare to teianei ao taku basileia: naringa no teianei ao taku basileia, kua akamaroiroi ïa toku au tavini, kia kore au e tukuia ki te ngati Iuda; kare ra toku basileia i to ko nei.” (Ioane 18:36) Ko te Patireia te apinga e akatapuiai te ingoa o Iehova, e akatikaiai tona akangateitei anga, e kia akonoia tona anoano ki runga i te enua nei, mei tei te ao katoa na. (Mataio 6:9, 10) I roto katoa i tana angaanga orometua, kua tutu aere a Iesu i te evangeria o te Patireia, e kua akakite aia e ka akakitekiteia te reira e tana au pipi tae roa ki te openga o te akatereanga o te au mea nei. (Mataio 4:23; 24:14) I te 1914 kua akatupuia te au tuatua totou ia Apokalupo 11:15 ra: “Ko te au basileia o teianei ao, kua riro ïa ei au basileia no to tatou Atu e no tana Mesia; e e vai rai te au iaia e tuatau e tuatau ua atu.” A tetai ra kare e roaia, ko taua Patireia o te rangi ra ka riro koia anake te mana tutaraanga i rungao i te au tangata katoa. (Daniela 2:44) A tetai tuatau, noatu ko te au tutara o teianei ao ka maroia kia akatika i te mana o te reira.—Salamo 2:6-12.
6 Ma te reira katoa i roto i te manako, ko te au Kerititiano mou o teia tuatau te kauraro ra i te Patireia o te Atua, e te aru nei ratou i ta Iesu akoanga kia ‘na mua i te kimi i te basileia o te Atua, e te tuatua-tika.’ (Mataio 6:33) Kare te reira e akariro ia ratou kia tiratiratu kore ki te enua e noo ra ratou, mari ra te akariro ra te reira ia ratou kia takake i te pae vaerua i to teianei ao. Ko te angaanga maata a te au Kerititiano i teia tuatau, mei te anere mataiti mua rai, ‘e akakite atura i te basileia o te Atua.’ (Angaanga 28:23) Kare i tetai kavamani a te tangata nei te tika kia arai i taua angaanga orongaia maira e te Atua.
7. Eaa ra i neutara ei te au Kerititiano mou, e akapeea ratou i te akaari anga i teia?
7 Kia rotai ma to ratou riroanga na Iehova e te riro anga ei au pipi na Iesu e ei au tangata no te Patireia o te Atua, kua vai neutara ua te Au Kite o Iehova i te au tamaki pa enua e to te ao katoa oki i te 20 e te 21 anere mataiti. Kare ratou i iki i tetai pae, kare katoa i mou i te au apinga tamaki ki tetai ke, e kare oki i akatotoa aere i te au tuatua pikikaa no tetai ua atu tumu ke. I roto i te akakite anga umere i te akarongo i te aro atu anga ki te au patoi anga maata te tu, kua aru ratou i te au kaveinga tei akakiteia ki te aronga tutara Nazi o Tiamani i te 1934 ra: “Kare o matou inangaro i te au akaaereanga poritiki, mari ra te pou katoa ra to matou manako anga ki te patireia o te Atua i raro ake ia Karaiti tana Ariki. Kare matou e rave i te kino me kare te takino ki tetai ua atu. Ka mareka matou i te noo anga ponuiaau ua e te rave meitaki ki te au tangata ravarai me va mai te tuatau kia matou nei.”
Au Karere e te Aronga Tuatua na Karaiti
8, 9. I roto i teea tu te Au Kite o Iehova i teia tuatau i riro ei ei karere e ei aronga tuatua, e akapeea te akatupu anga a teia i to ratou pirianga ma te au pa enua ra?
8 Kua akataka a Paulo iaia uaorai e te au oa Kerititiano akatainuia ra ei ‘karere na te Mesia, mei te mea e te ako nei te Atua i te tangata ia matou nei.’ (2 Korinetia 5:20; Ephesia 6:20) Mei te 1914 mairai, kua rauka tikai te au Kerititiano akatainuia i te vaerua kia tuatuaia ei au karere no te Patireia o te Atua, ko ratou ra te “tamariki.” (Mataio 13:38; Philipi 3:20; Apokalupo 5:9, 10) Pera katoa, kua apai mai a Iehova mei to te au pa enua “e aronga maata rava” o te “mamoe ke atu,” te au Kerititiano ma te manakonako anga no te enua nei, kia turu i te tamariki akatainuia ra i ta ratou angaanga karere. (Apokalupo 7:9; Ioane 10:16) Teia “mamoe ke atu” ka rauka kia tuatuaia “e aronga tuatua” no te Patireia o te Atua.
9 Ko te karere e tona aronga angaanga kare e kapiti atu ki roto i te au ravenga a te enua te tavini ra ratou. Mei te reira katoa, ka vai neutara ra te au Kerititiano i te au ravenga poritiki a te au pa enua o te ao nei. Kare ratou e iki kia patoi atu me kare kia o atu ki tetai ua atu angaanga pa enua, kopu, pupu tangata, me kare pupu akaaere puapinga. (Angaanga 10:34, 35) Kareka ra, ‘ka takinga-meitaki [ratou] i te tangata ravarai.’ (Galatia 6:10) Te aiteanga o te tu neutara o te Au Kite o Iehova e kare e rauka i tetai i te arai tikai i ta ratou tuatua anga na te karangaanga e te taokotai atura ratou ma tetai tua patoi o te au kopu, au pa enua, me kare te au kopu tataka ke ra.
Akatakaia e te Aroa
10. No tetai Kerititiano, mei teaa te puapinga maata i te aroa?
10 Kapiti katoa ki te au mea akakiteia akenei, e neutara te au Kerititiano i te au ravenga o teianei ao no to ratou pirianga ma etai atu au Kerititiano ra. Kua tuatua a Iesu ki tana au pipi: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) Ko te aroa taeake te taviri ki te riroanga ei Kerititiano. (1 Ioane 3:14) No runga i tona pirianga ma Iehova e Iesu, ko te pirianga vaitata tei rauka i tetai Kerititiano ma etai atu au Kerititiano e pirianga vaitata ia. Kare tona aroa e kotingaia ki te aronga o to ratou putuputuanga anake. Te takave ra i te [tona] au taeake katoa i te ao nei.’—1 Petero 5:9.
11. Akapeea te tu akono o te Au Kite o Iehova i te akamana anga e to ratou aroa tetai no tetai?
11 I teia tuatau, te akakite ra te Au Kite o Iehova i to ratou aroa taeake na te akatupuanga i te au tuatua ia Isaia 2:4; “E tupaki oki ratou i ta ratou au koke ei auri arote, e ta ratou au korare ra, ei tipi tope ïa: kare tetai enua e tamaki mai ki tetai enua i te koke, kare oki ratou e apii akaou i te tamaki.” I te apiianga ia e Iehova, te au ra te au Kerititiano mou ma te Atua e ma tetai atu. (Isaia 54:13) No to ratou inangaro i te Atua e to ratou au taeake, kare e rauka kia manakoia no ratou kia mou i te apinga tamaki atu i to ratou au oa Kerititiano—me kare ki tetai ke atura—i etai enua ke. Ko to ratou tu au e te taokotai anga tetai tuanga meitaki no ta ratou akamori anga, ko tetai akakite anga e tei ia ratou tikai te vaerua o te Atua. (Salamo 133:1; Mika 2:12; Mataio 22:37-39; Kolosa 3:14) Ko ratou ka “kimi i te au e aruaru atu,” i te kiteanga e “tei te aronga tuatua-tika ra to Iehova mata.”—Salamo 34:14, 15.
Akapeea to te Au Kerititiano Manako Anga i te Ao
12. Eaa te tu akono o Iehova ki te au tangata i te ao nei ta te Au Kite o Iehova e aru nei, e akapeea ra?
12 Kua akakiteia e Iehova tetai akavaanga mareka kore ki runga i teianei ao, inara kare aia i akava ake i te au tangata tataki tai katoa i te ao nei. Ka rave aia i te reira na roto ia Iesu i Tona uaorai tuatau tau. (Salamo 67:3, 4; Mataio 25:31-46; 2 Petero 3:10) I teia tuatau, te akaari nei aia i te aroa maata ki te au tangata. Kua oronga katoa aia i tana Tamaiti anau tai kia raukai te tuatau no te au tangata ravarai kia ariki i te ora mutu kore. (Ioane 3:16) Ei au Kerititiano, te aru nei tatou i to te Atua aroa na te tuatuaanga ki etai atu no ta te Atua akanoonoo anga no te ora, noatu me e putuputu te patoi mai i ta tatou tauta anga.
13. Akapeea tatou me manako atu i te au tutara o te ao nei?
13 Akapeea ta tatou manakoanga i te aronga tutara i te ao nei? Kua pau a Paulo i taua uianga i tana tata anga: “Kia kauraro marie te tangata katoatoa i te aronga mana taoonga ra, Kare rava oki e mana mari ra no ko mai i te Atua ra; te aronga mana e noo nei, kua akonoia ïa e te Atua.” (Roma 13:1, 2) Te mou ra te au tangata i te au turanga mana i “akonoia” (e maata ake me kare e meangiti ake i te pirianga ki tetai atu, mari ra e meangiti mai ki to Iehova ra) no te mea na te Mana Katoatoa ra i akatika ia ratou kia akono. Ka kauraro te Kerititiano ki te aronga mana taoonga o teianei ao no te mea e tuanga te reira no tona akarongo anga kia Iehova. Inara, akapeea, me ka tu mai te patoi anga i rotopu i ta te Atua ra au umuumu anga e ta te au kavamani a te tangata nei?
Ta te Atua Ture e ta Kaitara
14, 15. (a) Na roto i teea tu i raukai ia Daniela kia kopae i te maroanga i te tumu no te akarongo? (e) Eaa te turanga ta nga Epera e toru ra i rave i te koreanga e rauka kia akakoreia te maro anga no te tumu o te akarongo anga ra?
14 Kua oronga mai a Daniela e tona au oa e toru ra i tetai akaraanga meitaki e akapeea i te paranianga i te kauraro anga ki te kavamani o te tangata ma te kauraro anga ki te mana tu-Atua. I te kite anga nga Epera ou e a ra ia ratou uaorai i roto i te tuikaaanga i Babulonia, kua akono ratou i te au ture o taua enua ra e kua viviki ua te ikiia no te terenianga taka ke. Ko Daniela, te kiteanga e penei ka taki atu te terenianga ki tetai maro anga ma te ture a Iehova, kua uriuri manako atu i taua tumu ra ma te opita akaaere ra. Ei tupu anga, kua akonoia te au akanoonooanga taka ke kia akangateitei atu i te au akava ngakau o te au Epera e a. (Daniela 1:8-17) Te aru ra te Au Kite o Iehova i te akatauanga a Daniela me akataka mako tikai ratou i to ratou turanga ki te aronga opita kia kopae ke i te au manamanata tau kore ra.
15 Inara, i tetai atianga i muri iora, kare i rauka kia kopae ke i tetai pekapeka no te tumu o te kauraro anga. Kua akatuia e te ariki o Babulonia tetai itoro maata ki runga i te ngai mataataa o Dura e kua akaue atu i te au opita teitei ra, kapiti atu ki te aronga akaaere katoa i te au matakeinanga ra, kia akaputuputu mai no te akatapuanga ra. I teianei, kua akataoongaia nga oa e toru o Daniela ra ei au akaaere i te matakeinanga i Babulonia ra, no reira kua riro atu taua ikuiku anga kia ratou. I tetai atianga tikai i taua au ravenga ra, pouroa te aronga i putuputu mai kua riro kia tupou ki raro ki mua i te tiki. Inara kua kite nga Epera ra e e patoi anga teia i te ture a te Atua ra. (Deuteronomi 5:8-10) No reira i te tupou anga te katoatoa ki raro, kua tu ua ra ratou. No te akarongo kore i te ikuiku anga a te ariki ra, kua o atu ratou ki tetai matenga kino roa, e kua akaora anakeia ra ratou na tetai temeio; inara kua iki ratou kia o atu i te mate kare i te akarongo kore ia Iehova.—Daniela 2:49–3:29.
16, 17. I akapeea ta te au apotetoro ra akono anga i te ikuiku anga kia akamutu te tutu aereanga, e no teaa ra?
16 I te anere mataiti mua ra, kua kapikiia te au apotetoro a Iesu Karaiti ki mua i te au arataki ngati Iuda i Ierusalema e kua akaueia kia akamutu i te tutuanga i te ingoa o Iesu. Akapeea ratou i te raveanga? Kua akaue atu a Iesu ia ratou kia akariro i te au tangata i te au pa enua katoa ra ei pipi, tei kapiti katoa ra ia Iudea. Kua tuatua katoa oki aia kia ratou kia riro ei au kite nona i Ierusalema e pera katoa ki te toenga atu o te ao nei. (Mataio 28:19, 20; Angaanga 1:8) Kua kite te au apotetoro e ko te au akauenga a Iesu ra ko te anoano ia o te Atua no ratou ra. (Ioane 5:30; 8:28) No reira, kua tuatua ratou: “Ko te Atua ta matou e akarongo e tikaʼi auraka te tangata.”—Angaanga 4:19, 20; 5:29.
17 Kare te au apotetoro ra i te meameaau. (Maseli 24:21) Inara, i ta te au tutara tangata ra ikuiku anga kia kore ratou e rave i to te Atua anoano, kua tuatua anake ratou e, ‘Ko te Atua ta matou e akarongo, kare i te tangata.’ Kua tuatua a Iesu e ka tau tatou kia “apai mari i ta Kaisara ra kia Kaisara; e ta te Atua ra, e apai ïa ki te Atua.” (Mareko 12:17) Me ka akarongo kore tatou ki ta te Atua akauenga no te mea na te tangata i akaue mai kia tatou, te oronga ra tatou ki te tangata i ta te Atua. Kareka ra, ka apai tatou kia Kaitara i ta tatou e kai ou ra, inara te kite ra tatou i to Iehova mana teitei rava. Koia Tei Ngateitei i te Ao Katoa e Pini Ua Ake, Tei Anga maira, te Tumu tikai no te mana taoonga.—Apokalupo 4:11.
Ka Tu Ngaueue Kore Tatou
18, 19. Eaa te turanga meitaki ta to tatou au taeake i rave,e akapeea e raukai ia tatou kia aru i ta ratou akatauanga?
18 I teianei, te kite nei te maataanga o te kavamani tangata nei i te turanga neutara o te Au Kite o Iehova, e no te reira te akameitaki maata nei tatou. Inara, i etai au enua, kua aro atura te Au Kite i te patoianga ketaketa. I roto katoa i te 20 anere mataiti e te raveia nei i teia tuatau, tetai papaki o to tatou au taeake e te au tuaine kua tauta pakari, i te tamaki anga tu vaerua “i te kukumi anga meitaki ra i te akarongo.”—1 Timoteo 6:12.
19 Akapeea e raukai ia tatou kia tu ngaueue kore mei ia ratou rai? Te mea mua, kia maara tatou e ka tika kia manako atu tatou i te patoi anga. Kare tatou e va ua me kare kia poitirere me ka rokoia tatou e te reira. Kua akamatakite a Paulo ia Timoteo: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timoteo 3:12; 1 Petero 4:12) I roto i te ao te tutara ra te mana o Satani, eaa tatou ka kore ei e rokoia e te patoianga? (Apokalupo 12:17) Me te tiratiratu ra tatou, ka vairai te aronga tei ‘va ua ra e te tuatua akakino ra ia tatou.’—1 Petero 4:4.
20. Eaa te au akamaroiroianga tuatua mou ta tatou e akamaaraia maira?
20 Te rua, kua irinaki tatou e ko Iehova e tana au angera ka turu ia tatou. Mei ta Elisaia i taito i tuatua ra, “e maata oki to tatou pae, e iti to ratou.” (2 Ariki 6:16; Salamo 34:7) Penei ko Iehova, no tana uaorai akakoro anga meitaki, te akatika ra i te taomi anga mei te aronga patoi maira kia raveia no tetai tuatau. Inara, ka oronga ua mai aia kia tatou i te maroiroi te umuumuia ra kia akakoromaki. (Isaia 41:9, 10) Kua oronga tetai i to ratou oraanga, inara kare te reira e akapoitirere ia tatou. Kua tuatua a Iesu: ‘Auraka e mataku i te ta mai i te kopapa nei kare ra e mate ia ratou te meta; e mataku atu ra iaia i te ka rauka iaia te akapou i te meta e te kopapa katoa i Keena.’ (Mataio 10:16-23, 28, NW) E “tuitarere” ua tatou i roto i teia akatereanga o te au mea nei. Te taangaanga ra tatou i to tatou taime i ko nei e ‘rauka i te mouranga ketaketa ki runga i te oraanga tikai,’ te oraanga mutu kore i te ao ou a te Atua. (1 Petero 2:11; 1 Timoteo 6:19, NW) Kare e rauka i tetai tangata i te akakore i taua tutaki ra ia tatou me ka rave tamou tatou i te tiratiratu ki te Atua.
21. Eaa ta tatou ka tau kia akamanako ra?
21 No reira, kia maara tatou i to tatou pirianga okomaata ma te Atua ko Iehova. Kia ariki tamou marie tatou i te akameitakianga no te riroanga ei au pipi na Karaiti e ei au tangata no te Patireia. Kia aroa tatou i to tatou au taeake ma te ngakau katoa, e kia mareka katoa oki tatou i te aroa te rauka maira ia tatou mei ia ratou. Ko te mea maata rava, e akono tatou i te au tuatua a te tata taramo ra: “Tiaki ia Iehova: e akamaroiroi; e nana e akamaroiroi mai i to ngakau ra: e tenana e tiaki rai koe ia Iehova.” (Salamo 27:14; Isaia 54:17) Ei reira tatou, mei te au Kerititiano kare ra e rauka kia tatauia i mua ake ia tatou, e tu ngaueue kore ma to tatou manakonako anga papu—e au Kerititiano neutara tiratiratu kare ra i to teianei ao.
Ka Rauka Ainei ia Koe i te Akataka?
• Akapeea to tatou pirianga ma Iehova i te akariro anga kia takake tatou mei to teianei ao?
• Ei au tangata no te Patireia o te Atua, akapeea tatou i te akono anga i te turanga neutara i to teianei ao?
• I roto i teea au tu e raukai i te aroa no to tatou au taeake i te akono i to tatou tu neutara, takake mei to teianei ao?
[Au Uianga Apii]
[Tutu i te kapi 15]
Akapeea te akatupu anga to tatou kauraro anga ki te Patireia o te Atua ra i to tatou pirianga ma to teianei ao?
[Tutu i te kapi 16]
Kua angaanga kapiti mataora tetai Hutu e tetai Tutsi
[Tutu i te kapi 17]
Nga taeake Kerititiano ngati Iuda e te Arapia
[Tutu i te kapi 17]
Te au Kerititiano Serbia, te Bosnia, e te Croatia kua rekareka i te pirianga ratou tetai ma tetai
[Tutu i te kapi 18]
Eaa te aerenga tika me akaueia tatou e te aronga tutara kia aati i ta te Atua ture?