Au Uianga a te Aronga Tatau

E tarevake ainei i te peti me e meangiti ua te moni e o atura ki roto?

Kare te Tuatua a te Atua e uriuri taka maata ana no runga i te pere moni, inara e maata ta te reira e akakite ra kia akaari mai e kare e aiteite ana te pere moni ki te au kaveinga Pipiria. * Ei akatauanga, te akakite maataia ra e te akakeu ra te pere moni i te tu noinoi. E akamanako anga puapinga taua tuatua tika ki te au Kerititiano, mei te mea te akakite ra te Pipiria e kare te “noinoi apinga” e noo atu ki raro i te Patireia o te Atua e kua akatuangaia te morimori apinga ma te akamori anga itoro.​—1 Korinetia 6:9, 10; Kolosa 3:5.

Te akatupu katoa ra te pere moni i te tu akateitei e tetai tu taemoemo kare e meitaki ana, te inangaro pakari kia re. Kua akamatakite te apotetoro ko Paulo no taua au apinga i tona tataanga: “Eiaa tatou e akateitei puapinga kore ua, i te akaongoongo anga tetai ki tetai, e te vareae anga tetai ki tetai.” (Galatia 5:26) Pera katoa, te akamaroiroi ra te pere moni i roto i etai te irinaki anga purepure ki runga i te tu manuia. Te akatupu ra te aronga pere moni i te au tu purepure tuketuke, te manakonakoanga no te akamana i te tu manuia ei meitaki no ratou. Te akamaara maira ratou kia tatou i te au Iseraela tiratiratu kore tei “ārikiriki i te kaingakai na Gada, e kua akaki i te atinga inu na Meni.”​—Isaia 65:11.

Penei ka akamarama mai etai e ko te petianga i te moni meangiti koi kanga ei i tetai kati kangakanga ua me kare tetai board game ma te au kopu tangata me kore tetai au oa vaitata e tarekareka anga kino kore ua ia. E tika, te manako ra etai te peti ra i tetai moni meangiti iaia uaorai kare i te tangata noinoi, akateitei, taemoemo, me kore purepure. Noatu rai, eaa te tupu anga o tana pere moni ki tetai tana e pere atura? Kua akamata mai te aronga pere anoano pakari e manganui na te peti meangiti ua anga ei mea ‘kanga ua.’ (Luka 16:10) Kua riro mai tetai rave anga kino kore ei apinga kino maata i to ratou turanga.

Te tika ra te reira me kua piri mai te tamariki ki roto. Kua kite ana te au tamariki e manganui i te rekareka no te re anga i tetai peti meangiti e kua timataia kia akono i te au moni maata. (1 Timoteo 6:10) Kua akapapu mai tetai apii anga roa tei neneiia i Marike e te Konitara o Arizona no te Pere Moni Anoano Pakari e e manganui te aronga kaki pere moni tei akamata mai mei te mataiti ou anga “na te tukuanga i te au peti meangiti ki runga i te au tupu anga tarekareka me kore te kanga kati ma te au oa me kore te au kopu tangata.” Te karanga maira tetai ripoti e kua “akamata te tamariki i te pere moni i te kainga, tei matauia te kanga kati ma te pamiri e te au oa.” Te akakite ra te ripoti e “toru ngauru patene o te tamariki tei pere kua akamata i te rave i te reira i mua ake i to ratou tai ngauru ma tai ra anau anga.” Te tutaki ra te aronga mapu pere moni e manganui i to ratou kaki anga ma te rave anga kino me kore te ainga tau kore, i na tetai apii ei Why Do People Gamble Too Much​—Pathological and Problem Gambling. Mei teaa atura te tumatetenga o tetai tupu anga i te akaraanga kare e kino roa ana i te akamata anga!

I te mea te noo nei tatou i roto i tetai ao e manganui te au ereere e te au timata anga, eaa ra ka akamaeu atu ei ia tatou uaorai ki tetai atu? (Maseli 27:12) Te pere moni​—ma te tamariki me kare ra, no tetai moni meangiti me kore me maata​—te takino ra i te pae vaerua e te tau ra kia kopaeia. Ko te au Kerititiano te mataora ra i te board game me kore kati ei tarekareka anga ka meitaki kia tata i te re me kore kia kanga ua ma te kore te tare anga. Ko te au Kerititiano pakari te manako ra i to ratou uaorai turanga pae vaerua e pera katoa i to ratou au taeake e te pamiri ka kopae i te angaanga pere moni​—noatu me no tetai moni meangiti ua.

[Tataanga Rikiriki i Raro]