Eaa ra i Ngata Ei i te Tataraara?

IA Tiurai 2000, kua tukunaia tetai ture e te California State Legislature i Marike tei akakoroia kia akarangatira i te au tangata kia utungaia me tuatua ratou i te tu tangi ki tetai tangata takinoia i roto i tetai tumatetenga kua o ratou uaorai ki roto. Eaa ra te papa anga ture? Kua kiteia me akatupu te tumatetenga i te mamae me kore te kino, e putuputu te taime kua emiemi te tangata i te tataraara i te mataku anga e ka maramaia te reira i roto i te ngai akavaanga ei tumu anga akatika i te tarevake. I tetai tua, ko te aronga te manako ra e kia tuatua tataraaraia atu penei ka riri vave ua, e ka riro tetai tumatetenga meangiti ei taumaro anga maata.

E tika, kare e anoanoia te tataraara no tetai tumatetenga kare naau te apa. E te vaira te taime e ko te aerenga meitaki koia oki kia matakite i taau ka tuatua atu. Te karanga ra tetai materi taito: “Te maata ra i te tuatua ra, kare e kore te ara: ko tei tāpu ra i tona vaa, e pakari tona.” (Maseli 10:19; 27:12) Noatu rai, kia akono atu koe i te tu tau e te tauturu ua.

Inara, kare ainei i tika, e kua akamutu te tangata e manganui i te tataraara, noatu me kare i o atu te au akavaanga tutaki? I te kainga penei ka aue tetai vaine, ‘Kare  rava taku tane e tataraara ana no tetai apinga.’ I te angaanga ka tarotaro tetai tangata akaaere, ‘Kare taku aronga angaanga e aaki ana i to ratou au tarevake, e kare rava ratou e tuatua ana e te tataraara ra ratou.’ I te apii penei ka ripoti mai tetai puapii, ‘Kare te au tamariki i tereniia kia tuatua e akakore mai koe iaku.’

Tetai tumu i emiemi ei tetai tangata i te tataraara penei te mataku ra e ka kopaeia. Kua manamanata e ka kopaeia, penei kare aia e tuatua mai i tona manako tikai. Ko te tika, ko te tangata tei mamae ra penei ka kopae pu tikai i tei akakino maira, i te akariroanga e kia ngata te akaongi anga.

Penei ko te manako kore anga i te manako ngakau o tetai au tangata tetai atu tumu i emiemi ei etai i te tataraara. Penei ka tuatua ratou, ‘Kare te tataraara anga e akakore i te tarevake tei raveia e au.’ Noatu rai te emiemi ra tetai i te tuatua e te mii ra ratou no te au tupu anga tei tu mai. Te umere ra ratou, ‘Ka akaapaia ainei au e ka patiia mai kia oronga i te tutaki anga?’ Inara, ko te arai anga maata roa atu no te aakianga i te tarevake koia oki ko te ngakau parau. Ko tetai tangata te ngakau parau ra i te tuatua “te mii nei au” te taopenga ra, ‘kare au e inangaro i te taakamaia na te aakianga i toku tarevake. Ka akaparuparu te reira i toku turanga.’

Noatu e eaa te tumu, e manganui te ngata ra i te tuatua i te au tuatua tataraara. Inara te anoanoia ra ainei te tataraara anga? Eaa ra te au puapinga no te tataraaraanga?

[Tutu i te kapi 3]

“Kare te au tamariki i tereniia kia tuatua e akakore mai koe iaku”

[Tutu i te kapi 3]

“Kare rava taku aronga angaanga e aaki ana i to ratou au tarevake”

[Tutu i te kapi 3]

“Kare rava taku tane e tataraara ana”