Akapeea Tatou i te Akapapu Anga i to Tatou Au Ra kia Iehova?

“Kua ngaro, i nanai, i rotopu i te itinga ra e te opunga ra, e rua nga ora auro, e taki tai ma te ono ngauru miniti mei te taimana te akaraanga. Kare i orongaia te tutaki anga, kua ngaro oki raua e tuatau ua atu!”​—Lydia H. Sigourney, e vaine tata Marike (1791-1865).

I TE akaraanga te pati viviki ra te au ra o to tatou oraanga. Kua akamanako te tata taramo ko Davida i te poto o te oraanga e kua akakeuia kia pure: “E akakite mai koe, e Iehova, i toku nei openga, e kua peea te rainga o toku nei puke rā, kia kite au nei i toku paruparu. I na! kua akariroia e koe toku nei puke rā ei rima okotai.” Ko tei manako maata ia e Davida koia oki kia akono na roto i tetai tu te akamareka ra i te Atua, na roto i tana tuatua e tana au angaanga. Te tuatuaanga i tona irinaki anga i te Atua, kua karanga aia: “Tei ia koe anake toku manakonako anga.” (Salamo 39:4, 5, 7) Kua akarongo mai a Iehova. Kua akara tikai aia i ta Davida au angaanga e kua tutaki iaia ma te tau ra.

E ngoie ua kia angaanga maroiroi i te au miniti ravarai o te ra e kia akakeuia e te tu oraanga aere viviki e te maata i te au angaanga. Ka akatupu teia i roto ia tatou i te manako apiapi, koia tikai ma te maata te ka raveia e kia kite e e meangiti te taime no te raveanga i te reira. Te aiteite ra ainei to tatou manako ki to Davida​—kia akono i to tatou oraanga e raukai te tu mareka anga o te Atua? Kia papu, te akara maira a Iehova e te akara meitaki maira ia tatou taki tai. Kua akakite a Iobu, e tangata tei mataku i te Atua, no etai 3,600 mataiti i topa e kua kite atu a Iehova i tona au tu e kua akara meitaki i tona au takainga. Kua ui ua a Iobu: “Kia atoro mai aia, naea au i te karanga anga atu kiaia?” (Iobu 31:4-6, 14) Ka rauka ainei i te akapapu i to tatou au ra ki mua i te Atua na te akanooanga i te au tumu pae vaerua na mua, te akarongo anga i tana au akauenga, e te taangaanga pakari anga i to tatou taime. Ka akara meitaki ana tatou i teia au tumu manako.

Akariro i te Au Tumu Pae Vaerua e ko to Tatou Manako Maataia

Te raurau tika maira te au Tuatua Tapu akauruia ia tatou kia akanoo i te au tumu pae vaerua na mua i te na ko anga: “Kia timata oki kotou i te au mea e maata ua atu te meitaki.” Eaa oki teia au mea maata ua atu? Te o maira i roto i te pau anga kia ‘maata atu rai te kite, e te utoa o te ngakau.’ (Philipi 1:9, 10) E rauka ei te kite i ta Iehova akakoroanga te umuumuia ra te taangaanga pakari anga i to tatou taime. Inara, te akariroanga i te au tumu pae vaerua e ko tei manako maataia e tatou te akapapu maira ia tatou i tetai oraanga puapinga e te merengo ua.

Te akamaaraara maira te apotetoro ko Paulo ia tatou kia “tamou ua atu rai i te akapapu i tei arikiia e te Atu ra.” I to tatou tamou ua atu anga te o maira te akara makitoro uaorai i to tatou au akakoroanga e te au inangaro o te ngakau. Te karanga ra te apotetoro: “Kia kite ra kotou i to te Atu ra anoano.” (Ephesia 5:10, 17, NW) No reira, eaa ta Iehova e ariki ra? Te pau maira tetai materi Pipiria: “Ko te pakari rai te mea meitaki; e aruaru i te pakari: e te au mea katoa e rauka ia koe ra, e aruaru rai i te kite. E akateitei koe iaia, e nana e akateitei ia koe.” ( Maseli 4:7, 8) Te rekareka ra a  Iehova i tetai tangata te rauka ra e te taangaanga ra i te pakari tau i te Atua. (Maseli 23:15) Ko te manea o taua tu pakari koia oki kare ia e rauka i te apai keia me kore kia takoreia. Ko te tika, ka riro mai te reira ei arataki e ei paruru ‘mei te arataa o te tangata kino ra e te aronga e tuatua i te tuatua akatoatoa ra.’​—Maseli 2:10-15.

Mei teaa te pakari, i reira, kia kopae i etai tu no te akono anga i te akara anga tuke ua no te au tumu pae vaerua! Ka anoanoia tatou kia tatanu i te tu ariki ua no te au tuatua a Iehova e te mataku meitaki iaia. (Maseli 23:17, 18) Koi raukai taua tu manako i tetai ua atu taime i te oraanga, e meitaki i te akanoo i teia tu tau e kia akaoonu i te au kaveinga Pipiria i roto i to tatou tu tangata i te tuatau mapu anga. “E tenana, e akamanako i Tei anga ia koe i to ou anga ra,” i na te ariki pakari ei ko Solomona.​—Koheleta 12:1.

Ko te mataara piri vaitata rava atu no te tatanu i te ariki anga ia Iehova koia oki na roto i te pure uaorai kiaia i te ra taki tai. Kua kite a Davida i te puapinga no te tuatua irinaki anga kia Iehova, kua pati oki aia: “E akarongo mai i taku pati anga, e Iehova e, e ariu mai i to taringa i taku kapiki anga: auraka koe e muteki ua mai i toku nei roi-mata.” (Salamo 39:12) Te akakeu ra ainei te oonu o to tatou pirianga vaitata ma te Atua i etai taime e kia aue tatou? E tika, ko te maata i ta tatou tuatua anga kia Iehova no te au mea piri vaitata ki to tatou ngakau e te akamaaraara i tana Tuatua, te vaitata atu ia i tona kapiti anga mai kia tatou.​—Iakobo 4:8.

Apii i te Akarongo

Ko Mose tetai tangata akarongo tei kite i tona irinaki anga i te Atua. Mei ia Davida rai, kua kite oki a Mose e kua ki te oraanga i te manamanata. No reira kua pati aia i te Atua kia akaari kiaia ‘i te tatau i tona puke rā, kia riro tona ngakau ki te pakari.’ (Salamo 90:10-12) Ka rauka ua mai tetai ngakau pakari mei te apii ua anga e te akonoanga kia tau ki ta Iehova au ture e te au kaveinga. Kua kite oki a Mose i teia e kua tauta pakari i te akamana i taua tuatua mou puapinga ki te iti tangata Iseraela na te ripiti ua anga i ta te Atua au ture e te au arataki anga kia ratou i mua ake ka noo ei i te Enua Taputou. Ko tetai ua atu ariki tangata ta Iehova ka iki i muri mai kia tutara ki rungao ia Iseraela kia tata nana uaorai i tetai kopi o te Ture e kia tatau i te reira i tona au puke ra. No teaa ra? E raukai iaia i te mataku i te Atua. E timata anga teia no te tu akarongo o te ariki. Ka paruru te reira iaia mei te akateiteianga i tona ngakau ki rungao i tona au taeake e ka akaroa katoa i tona puke ra ki runga i tona patireia. (Deuteronomi 17:18-20) Kua ripiti akaouia teia taputou i te tuatua anga a Iehova ki ta Davida tamaiti ko Solomona: “Kia aere koe na toku nei au arataa, e akono i taku nei au akonoanga, e taku nei au akauenga, mei to metua mei ia Davida i aere ra, e akaroaia e au toou ra au rā i reira.”​—1 Ariki 3:10-14.

E tumu pakari te akarongo ki te Atua. Me ka manako puapinga kore ua tatou i tetai au tuanga o ta Iehova au umuumu anga e te au akauenga e kare e puapinga roa ana, papu oki e ka akara mai aia i taua tu. (Maseli 15:3) I te kiteanga i teia ka akakeu ia tatou kia akono i te turanga teitei no ta Iehova au akauenga tu-Atua pouroa, noatu i te akono anga i te reira kare i te mea ngoie. Te rave ra a Satani i tei rauka iaia kia “akakore i to tatou arataa” ia tatou e tauta ra i te akono i ta te Atua au ture e te au akauenga​—1 Tesalonia 2:18, NW.

E puapinga tikai kia akatau ki te ako anga Tuatua Tapu kia uipa putuputu no te akamori anga e te kapitianga. (Deuteronomi 31:12, 13; Ebera 10:24, 25) No reira ka meitaki tatou i te ui kia tatou uaorai: ‘Kua rauka ainei iaku te tauta anga e te aruaru anga tei anoanoia kia rave i tei puapinga tikai?’ Kia akaruke i te taokotai anga e te ikuiku anga i te au uipaanga Kerititiano no te tauta anga i te akapapu i te tu tinamou i te pae moni ka  akaparuparu i to tatou pirianga ma Iehova. Kua tata te apotetoro ko Paulo: “Ei noo anga noinoi kore i te apinga to kotou; kia mareka i ta kotou i rauka ra: ko [Iehova] oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’” (Ebera 13:5) Te akaari maira te akarongo puareinga ki ta Iehova au akauenga i te irinaki anga tamou e ka akono mai aia ia tatou.

Kua apii katoa a Iesu i te akarongo e kua puapingaia. Pera katoa tatou. (Ebera 5:8) Te maata atu o ta tatou tatanu anga i te akarongo, te viviki i te reira i te tupu mai, e i roto i te au mea meangiti katoa. E tika, no to tatou tu tau, penei kia autu atu tatou i te akono anga tau kore e te kino mei tetai. Koia tikai teia i te ngai angaanga, i te apii, me kore i roto i tetai ngutuare tuke te akonoanga. Inara, te kitea ra e tatou te akapumaana i roto i te akakite anga tei tuatuaia ki to Iseraela me ‘inangaro oki [ratou] ia Iehova, kia akarongo i tona reo, e kia piri atu kiaia, ko to ratou ïa ora aia, e ko te roa ïa o to ratou ra puke rā.’ (Deuteronomi 30:20) Te orongaia mai nei teia taputou kia tatou.

Taangaanga Pakari i te Taime

Ka tauturu katoa ta tatou taangaanga pakari anga i to tatou taime ia tatou kia akapapu i to tatou au ra ki mua ia Iehova. Kare mei te moni ka akaputuia, kia akapouia te taime, me kore ka ngaro te reira. Ka ngaro tamou te au ora e topa atura. I te mea e maata te vaira kia raveia i te ka rauka ia tatou, te akapou ra ainei tatou i to tatou taime kia tau ki ta tatou au akakoroanga i te oraanga? Ko tetai akakoroanga maata no te au Kerititiano pouroa koia oki kia rave putuputu i roto i te angaanga akariro i te tangata ei pipi e te tutuanga i te Patireia.​—Mataio 24:14; 28:19, 20.

Te taangaanga pakari anga i to tatou taime ka tupu ua i muri mai i te kiteanga tatou i tona puapinga. Ma te tau ra, te raurau maira a Ephesia 5:16 ia tatou kia “taporoporo  marie i te tuatau,” te aite anga o te reira kia “oko” i te reira, te akaruke anga i te au mea kare e puapinga roa ana. Te aite anga kia akameangiti i te au taime tei akapouia no te au mea puapinga kore. Te maata o te akara tivi me kore te akara anga i te Internet, te tatauanga i te au apinga tau kore, me kore te aruaru anga i te tarekareka anga e te tamataora anga ka akaroiroi ia tatou. Pera katoa, te akaputu anga i te au apinga materia ka akapou i to tatou taime tei anoanoia kia rauka te ngakau pakari.

Te karanga ra te aronga akakitekite i te akanoo meitaki i te taime: “E ngata tikai i te akapou meitaki i toou taime ma te kore e akanoo meitaki i te au akakoroanga.” Te taiku maira ratou e rima au turanga no te akanooanga i te au akakoroanga: akataka tikai, tau ua, kia rauka ua, tika tikai, e kia akapapaia.

Ko tetai akakoroanga puapinga koia oki kia akamako mai i roto i ta tatou tatauanga i te Pipiria. Ko te takainga mua koia kia akataka tikai i to tatou akakoroanga​—kia tatau i te Pipiria katoa. Aru mai kia akariro i to tatou akakoroanga e kia tau ua. Na te raveanga i teia, ka rauka ia tatou i te akara i to tatou tere anga. Kia akariro te au akakoroanga ia tatou kia itae ua atu e kia tupu ua. Kia rauka ua e te tika tikai o te reira. Kia akamanakoia te au tu kite uaorai, te au tu karape, e te taime i rauka no te reira. No etai, penei te umuumuia ra te taime e raukai tetai akakoroanga. I te openga ra, kia akapapaia to tatou au akakoroanga. I te akanooanga i tetai ra no te akaotianga i tetai apinga penei ka akamaata i te akakeu anga kia akaoti i te reira.

Pouroa te au mema o te pamiri Betela i te koropu, te angaanga ra i te opati maata i te ao o te Au Kite o Iehova me kore i tetai o tona au manga i te ao katoa, e akakoroanga akataka tikai ta ratou kia tatau i te katoa anga o te Pipiria i to ratou mataiti mua i te Betela. Kua kite oki ratou e te akamaata ra te tatauanga Pipiria puapinga i to ratou tupuanga pae vaerua e tetai pirianga vaitata ma Iehova, te apii ra ia ratou kia akapuapinga ia ratou uaorai. (Isaia 48:17) Ka rauka ainei ia tatou i te akariro i te tatau putuputu anga i te Pipiria ei akakoroanga katoa na tatou?

Au Puapinga no te Akapapuanga i to Tatou Au Ra

Te akamanako anga i te au tumu pae vaerua ka akatupu i te au akameitaki anga e manganui. No tetai apinga, te tauturu maira i tetai oraanga rauka ua e te akakoroanga. Te tuatua putuputu anga kia Iehova na roto i te pure ngakau tae te akavaitata ra ia tatou kiaia. Te akaari maira te rave anga i te pure i to tatou tu irinaki iaia. I te tatau anga i te Pipiria i te au ra e te au puka akanooia ki runga i te Pipiria tei orongaia mai e te “tavini akono meitaki e te pakari” te akatutu maira i to tatou tu puareinga kia akarongo ki te Atua iaia e tuatua maira kia tatou. (Mataio 24:45-47) Te tauturu ra teia ia tatou kia rauka te ngakau pakari e raukai te tuku i te au manako tau e te au iki anga i te oraanga.​—Salamo 1:1-3.

Te rekareka ra tatou i te akarongo i ta Iehova au akauenga, ko te raveanga oki i te reira kare i te mea teiaa. (1 Ioane 5:3) Ia tatou e akapapu ra i to tatou ra taki tai ki mua ia Iehova, te akaketaketa ra tatou i to tatou pirianga kiaia. Ka riro katoa tatou ei tauturuanga pae vaerua mou ki to tatou au taeake Kerititiano. Te akarekareka ra taua au rave anga angaanga i to tatou Atua ko Iehova. (Maseli 27:11) E kare atu e tutaki anga maata e kia rekareka i to Iehova tu mareka i teianei e tuatau ua atu!

[Tutu i te kapi 21]

Te akono ra te au Kerititiano i te manako pakari no te au tumu pae vaerua

[Au Tutu i te kapi 22]

Te taangaanga pakari ra ainei koe i toou taime?

[Tutu i te kapi 23]

Te akaketaketa ra tatou i to tatou pirianga ma Iehova ia tatou e akapapu ra i to tatou ra taki tai kiaia