Au Ngai Akamori​—Anoano Ainei Tatou ia Ratou?

‘E tauatini ua atu te aronga teretere te aao ra i te au kakau karakara mei te au ngai ke ke o te enua, te akatutu akaou ra te au pupu Initia i te au ura Paniora i mua ana tei manakoia ma te tangi anga o te au pau, e te aronga tiratiratu e aaere mamae ra i runga i to ratou nga turi na roto i te au urupu ki te ngai akamori anga tei akaki atura i te ngai atea i mua e te au mataara takapini i te are akamori.’

AKAPERA tetai nutipepa El Economista i te akataka anga i tetai urupu maata roa ia Titema 2001. I taua taime ra kua atoro atu etai toru mirioni tangata i te are akamori i Mexico City kia akapapu atu i to ratou akarongo i roto i te Paretenia o Guadalupe. Te akakeu katoa ra tetai atu au are pure, mei te Are Akamori o St. Peter i Roma, i te au manuiri e manganui.

Te akono ra te au are pure i tetai ngai takake i roto i te au ngakau o te manganui te inangaro ra i te akamori i te Atua. “Iaku, kua riro te are pure ei ngai ka rauka iaku i te akavaitata atu ki te Atua,” i na Maria ei no Brazil mai. “E ngai tapu ia. Kua irinaki au e ko te aere anga ki te pure te tama ra i te meta e e ara oki me kare e aere atu ki te Pure Tutia e kia aaki i te Tapati ravarai.” Te akakite maira a Consuelo no Meiko mai e: “Kua akatupu oki te are pure i roto iaku i te manako ngakau oonu; te akaperepere maata nei au i te reira. Iaku i reira, kua manako au e tei runga au i te rangi.”

Noatu te kapiti atura etai i te tu puapinga maata ki te au are pure, kua ekoko etai me te anoanoia ra ratou ei au ngai akamori anga. I te tuatuaanga no runga i te meangiti o te aronga aere pure, te karanga ra a Peter Sibert, e orometua Katorika i Engarani, e: “Te iki ra te [au tangata] i te au tuanga o te akonoanga te reka ra ratou. E au Katorika te maata anga o te au tangata pakarikari e te akono ra ratou i tei tau ki to ratou akarongo​—inara kare e kitea ana taua tu akono tikai i roto i te aronga mapu.” Te akakite maira te Daily  Telegraph o London o Noema 20, 1998, e: “Mei te 1979 mai kua topiriia etai 1,500 are pure i Engarani me akaaiteia ki te 495 are pure tei akatueraia e te 150 tei akatuia mai.”

I te 1997 kua ripoti mai te nutipepa Süddeutsche Zeitung o Munich, Tiamani, e: “Kua tauiia te au are pure ei au are teata e ei au apatimani: Kare te aronga irinaki e aere ana ki te pure, te tauiia ra te au ngai akamori. . . . Ko tei riro ei peu matauia i te Netherlands me kare i Engarani te rave katoaia ra i Tiamani.” Te karanga ra: “Ka kitea e tetai etai 30 me kare 40 au okooko anga are pure umere tikai i Tiamani i nga mataiti tokoiti i topa ake nei.”

Te anoano tika ia ra ainei te au are pure kia akamori i te Atua? E akamata anga puapinga ainei to te au are akamori e te au are pure akamaneaia i roto i te au Tuatua Tapu? Eaa te au tu are tei kapitiia atu ma te akamori anga i te Atua mou e te ora? Eaa ta tatou ka apii mai mei ia ratou no runga i te anoano anga i te au ngai akamori e no runga i te ka raveia ki reira?