Au Uianga a te Aronga Tatau

Kua tinamou ua ainei te au tia tei tukunaia ki te Atua?

Kia tau ki te Tuatua Tapu, e taputou ngateitei te tia tei tukunaia ki te Atua kia rave angaanga, kia oronga i tetai atinga, kia rave i tetai angaanga takake me kore kia akono i tetai turanga, me kore kia akaruke i te au apinga kare i tureia. Te ki ra te Pipiria i te au tataanga no te au tia tei akanooia e te o maira ki roto i te reira tetai taputou kia akonoia tei tuatuaia me rave te Atua i tetai apinga na mua. Ei akaraanga, ko Hana, te metua vaine o te peroveta ko Samuela, “kua tia iora aia i te tia, kua karanga atura, E Iehova Sabaota e . . . kia kore koe e akapoina i to tavini vaine nei, kia oronga maira koe i tetai tamaiti tamaroa na to tavini vaine nei, ei reira au e orongaʼi iaia kia Iehova, e ope rava ake ona puke rā i te ao nei, e kare e reta e tae ki runga i tona upoko.” (1 Samuela 1:11) Te akataka katoa maira te Pipiria i te au tia kua oronga uaia. Mei teaa te tinamou te au tia Tuatua Tapu?

“Kia tia koe i te tia ki te Atua ra,” i na te Ariki ei ko Solomona o Iseraela taito ra, “e akamaroiroi i te akatae.” Te na ko maira aia: “E tenana e apai i taau i tia ra. E ngari ake kia kore koe e tia, ko te tia aea koe e kare e akatae.” (Koheleta 5:4, 5) Te akakite ra te Ture tei orongaia ki to Iseraela na roto ia Mose e: “Kia tia koe i te tia ki to Atua ra kia Iehova, auraka koe kia kore e rave i te reira; ka umuumu tika mai oki to Atua ra ko Iehova i te reira ia koe; e riro oki ei ara naau ra.” (Deuteronomi 23:21) Te taka meitaki ra, te tukuanga i te tia ki te Atua e tumu pakari ia. Kia raveia te reira ma tetai tumu meitaki, e ko tei tuku ra i te reira auraka e ekoko no runga i tona tu kia akono atu i tana i taputou i roto i te tia. Me kare ra, e meitaki atu auraka aia e tuku i te tia. Inara, me tukuia te reira, te tinamou pouroa ra ainei te au tia?

Akapeea me kua umuumu te tia i tetai kia rave i tetai apinga kua kitea mai i muri mai e kare e rotai ana ma to te Atua anoano? Ka akamanako ana e e tia te piri atura ki te tu akono tau kore ma te akamori anga mou? (Deuteronomi 23:18) Papu tikai, kare taua tia i tinamou. Pera katoa, i raro ake i te Ture a Mose, ka rauka te tia tei tukunaia e tetai vaine i te akakoreia e tona metua tane me kare e tana tane.​—Numero 30:3-15.

Ka akamanako katoa i tetai tangata tei tuku i tetai tia ki te Atua kia vai takaua inara te kite atu nei iaia uaorai i roto i tetai turanga maro anga. Kua tuku atu tana tia iaia ki roto i tetai turanga i reira te kite ra aia i te akonoanga i te reira te akavaitata atura iaia ki tetai turanga aatianga i te au kaveinga tu-Atua no te tu akono tau. Kia akono ua atu ainei aia i tana tia? Kare ainei i te mea meitaki nona kia paruru iaia uaorai kia kore e apa no te tu akono tau kore na te kore e tutaki i tana tia mari ra kia pati aia uaorai i to te Atua tu tangi aroa e te pati akatenga anga i tona tu akakore i te ara? Ka rauka ua iaia uaorai i te akono atu i taua tumu manako. Kare e rauka i tetai tangata ke i te akono i te tuku anga nona.

Akapeea me kua tuku tetai i te tia e i muri mai kua kite mai e kua rave akakoro koreia te reira? Ka akono ua atu ainei aia i taua tia? Kare i ngoie no Iepheta i te akono atu i taua tia tana i tuku ki te Atua, inara kua rave akava ngakau ua aia i te reira. (Akava 11:30-40) Ka taki atu to tetai tangata poka anga i te akono i tetai tia i te  “akariri” atu i te Atua e te akakore anga i tei rauka i tetai tangata. (Koheleta 5:6) Te akono manako kore anga i te akatupu i tetai tia ka tupu mai te akaateaanga i to te Atua tu mareka anga.

Kua tuatua a Iesu Karaiti: “Kia riro ra ta kotou Koia, ei koia; e ta kotou Kare, ei kare; e te vai atu rai te tuatua, no roto ïa i te kino.” (Mataio 5:37) Kia manako tetai Kerititiano kare ua no te akonoanga i te au tia ki te Atua pera katoa i te akapapuanga e kia irinaki no tana au tuatua​—ki te Atua e te au tangata ravarai. Akapeea me kite atu aia iaia uaorai i roto i tetai turanga kua akatika i tetai tuku anga ki tetai tangata i te akara anga e mea meitaki i te akamata anga inara kua kitea mai i te akara vaitata anga e mea neneva? Auraka aia kia manako kore i taua au mea. Inara no te uriuri anga pakari, penei ka iki te tangata no te akakore iaia mei tana apainga.​—Salamo 15:4; Maseli 6:2, 3.

No te au tia e tetai atu au apinga, eaa to tatou manako maata? Kia kimi ua tatou i te akono i tetai pirianga meitaki ma te Atua ko Iehova.

[Tutu i te kapi 30, 31]

Kare a Hana i emiemi ana no te akono i tana tia

[Tutu i te kapi 30, 31]

Noatu i te raveanga i te reira e mea ngata, kua akono ua a Iepheta i tana tia