Te Maro Anga no Tetai Pipiria Reo Ereni o Teia Tuatau

Penei ka poitirere koe i te apii mai e i Ereni, te enua tei tapaia i tetai taime e ko te akamataanga o te manako tuatua ua, kua riro te uri anga i te Pipiria i roto i te reo matauia e te tangata ei maro anga roa e te pakari. Inara koai ka patoi i te nenei anga i tetai Pipiria reo Ereni mama ua i te marama? Eaa ra tetai ka inangaro ei i te tapu i te reira?

PENEI ka manako tetai e kua akameitakiia te au tangata reo Ereni, i te mea kua tataia tetai tuanga maata o te au Tuatua Tapu mua i roto i to ratou reo. Inara, te tuke maata ra te reo Ereni o teia Tuatau mei te Ereni o te urianga Septuagint o te au Tuatua Tapu Epera e mei te au Tuatua Tapu Ereni Kerititiano. Ko te tika, no te ono anere mataiti i topa, kua ngata i te maata anga o te au tangata reo Ereni i te marama i te Pipiria Ereni mei tetai reo tuke rai. Kua tupau te au tuatua ou i te au tuatua takere, e kua taui te au pupu tuatua, te karama, e te papaanga tuatua.

Te akapapu maira tetai akaputuanga o te au tataanga Ereni mei te 3 ki te 16 anere mataiti e kia uriia te Septuagint i roto i tetai reo Ereni o teia tuatau. I roto i te toru anere mataiti, kua uri a Gregory, te epitekopo o Neocaesarea (c. 213-c. 270 T.N.), i te puka Koheleta mei te Septuagint i roto i te reo Ereni mama ua. I roto i te 11 anere mataiti, kua uri tetai ngati Iuda tona ingoa ko Tobias ben Eliezer te noo ra i Makedonia i te au tuanga o te Penetatuku Septuagint i roto i te reo Ereni matauia i te au ra ravarai. Kua taangaanga katoa aia i te au reta Epera ei akapuapinga i te au ngati Iuda i Makedonia tei tuatua i te reo Ereni inara te tatau ra i te tataanga Epera. Ko tetai Penetatuku katoa mei teia te tu kua neneiia i Constantinople i te 1547.

Etai Marama i Roto i te Poiri

I te aere anga mai te au ngai reo Ereni o te Patireia Byzantine i raro ake i te au Ottoman i te 15 anere mataiti, kua ngere te maata anga o te tangata i reira i te apii anga. Kua akatika manako kore ua te Ekaretia Otototi, noatu kua akara marekaia i raro ake i te Patireia Ottoman, i tana anana kia riro mai ei aronga putaua e te kite kore. Kua tuatua te tangata tata Ereni ko Thomas Spelios e: “Ko te akakoroanga maata o te Ekaretia Otototi e tana akaaereanga apii anga koia oki kia paruru i tona au mema mei te au apiianga akaariu ke a te Islam e te Katorika Roma. Tei tupu mai, kare i tere ki mua te apiipii anga Ereni.” I roto i taua reva tangotango, kua kite atu te au tangata inangaro i te Pipiria i te anoano kia oronga ki te au tangata taitaia i te akamaru anga e te akapumaana anga mei te puka Pipiria o Salamo. Mei te 1543 ki te 1835, kua vai te 18 uri anga o Salamo ki roto i te reo Ereni matauia.

Kua akapapaia te uri anga Ereni mua o te katoa anga o te au Tuatua Tapu Ereni Kerititiano i te 1630 e Maximus Callipolites e mongoka Ereni o Callipolis. Kua raveia teia i raro ake i te arataki anga e te akara anga a Cyril Lucaris, te pateriareka o Constantinople e e tangata taui kiteia o te Ekaretia Otototi. Inara, i roto ua i te ekaretia, kua patoi atu etai au  tangata ia Lucaris, tei kore i ariki i etai au angaanga akataui me kore kia akatika i tetai uri anga o te Pipiria ki roto i te reo tuatuaia i taua taime. * Kua kukumiia aia ei tangata pikikaa. Noatu rai, kua neneiia etai 1,500 kopi o te uri anga a Maximus i te 1638. I te pau anga ki teia uri anga, e 34 mataiti i muri mai kua akakite tetai pupu ekaretia Otototi i Ierusalema e “kia tatauia [te au Tuatua Tapu], kare e na tetai ua, mari ra na te aronga te akara ra i te au mea oonu i te pae vaerua i muri mai i te rave anga i te kimikimi anga tau.” Teia te aite anga e kia tatauia te au Tuatua Tapu e te au orometua apiipiiia anake.

I te 1703, kua tauta a Seraphim, e mongoka Ereni mei te airani o Lesbos, i te nenei i tetai tataanga tauiia o te uri anga a Maximus i London. I te poka anga te au taputou tauturu i te pae moni mei te mana akaaere o Engarani, kua nenei aia i te tataanga tauiia te akapou anga i tana uaorai moni. I roto i tetai akamata anga tuatua veravera, kua tuatua maata a Seraphim i te umuumu anga no te “au Kerititiano akono Atua,” kia tatau i te Pipiria, e kua akaapa aia i te au orometua turanga teitei o te ekaretia no te “uuna anga i to ratou tu akono tau kore na te akono neneva anga i te au tangata.” Mei tei tapapaia, kua umuumu atu tona aronga patoi Otototi kia opuia aia i Rutia e kia tuikaaia ki Siberia, te ngai i mate ei aia i te 1735.

Te tuatuaanga no runga i te matepongi oonu i te pae vaerua o te au tangata reo Ereni i taua tuatau ra, kua tuatua tetai orometua Ereni i te akakite anga e aru maira no runga i tetai tataanga tauiia o te uri anga a Maximus e: “Kua rauka i te au Ereni teia Pipiria Tapu, pera katoa tetai atu, ma te inangaro e te kaki anga. E kua tatau ratou i te reira. E kua kite atu ratou i te akamaru angaia te mamae i roto ia ratou, e to ratou akarongo i te Atua . . . kua akaketaketaia.” Inara, kua mataku to ratou au arataki pae vaerua e me marama te tangata i te Pipiria, ka akamaeuia i reira te au orometua no to ratou au irinaki e te au angaanga kare i tau ki te irava. No reira, i te 1823 e i te 1836, kua tuku atu te opati o te pateriareka o Constantinople i tetai akauenga kia tutungiia te au kopi katoatoa o taua au uri anga Pipiria.

Tetai Tangata Uri Mataku Kore

Te patoi anga i teia akanoo anga o te takinokino anga kino tikai e te kaki ngakau tae ra i te kite Pipiria, kua tu mai tetai tangata rongoia te ka akono i tetai tuanga maata i roto i te uri anga i te Pipiria i roto i te reo Ereni o teia tuatau. Ko teia tangata mataku kore ko Neofitos Vamvas, e tangata ngateitei kite i te reo e e tangata apiipii Pipiria rongonui, tei manakoia e ko tetai o te “Au Puapii o te Pa Enua.”

Kua kite taka meitaki a Vamvas e kua apa te Ekaretia Otototi no te kite kore o te tangata i te pae vaerua. Kua irinaki pakari tikai aia e raukai i te akaaraara i te tangata i te pae vaerua, kua anoanoia e kia uriia te Pipiria i roto i te reo Ereni o taua tuatau ra. I te 1831, ma te tauturu a tetai atu aronga apiipii, kua akamata aia i te uri i te Pipiria ki roto i te reo Ereni tatau meitakiia. Kua neneiia te katoa anga o tana uri anga i te 1850. I te mea kare te Ekaretia Otototi Ereni e tauturu atu iaia, kua angaanga kapipiti atu aia ma te British and Foreign Bible Society (BFBS) no te neneianga e te tua anga o tana uri anga. Kua tapa te ekaretia iaia “e tangata Porotetani,” e kare i roa ana kua kite aia iaia uaorai i te kore anga e arikiia.

Kua aru vaitata ta Vamvas uri anga ki ta te King James Version e kua tauru atu i te au tu tarevake o taua uri anga no te meangiti i te kite i te Pipiria e te kite i te reo o taua tuatau ra. Inara, no te au mataiti e manganui ko tetai apinga  vaitata ia ki tetai Pipiria reo Ereni o teia tuatau tei rauka i te tangata. Ma te tau, kua kapiti mai i te ingoa o te Atua e a taime, i te tu ko “Ieová.”​—Genese 22:14; Exodo 6:3; 17:15; Akava 6:24.

Eaa oki to te tangata manako no teia e tetai atu au uri anga mama ua i te marama o te Pipiria? E mea umere tikai! I roto i tetai poti i tetai o te au airani Ereni, kua “koropiniia [tetai tangata okooko no te BFBS] e te au poti tei ki i te tamariki tei aere atu no te [au Pipiria], e kua akakeuia aia . . . kia ota i te pu o te pai kia akaruke atu” me kare ra ka takake atu aia mei tana au apinga katoa i te ngai okotai! Inara kare te aronga patoi i tu ua.

Kua akamatakite atu te au orometua Otototi i te tangata kia kore e rave i taua au uri anga. Ei akatauanga, i roto i te oire o Atene kua raveia te au Pipiria. I te 1833, kua tutungi atu te epitekopo Otototi o Kereta i te “Au Koreromotu Ou” tei kitea e ia i roto i tetai are mongoka. Kua uunaia e tai kopi e tetai orometua, e kua uuna te au tangata i roto i te au vira i te pae mai i ta ratou au kopi e tae ua atu i te akaruke anga te aronga ekaretia i te airani.

I etai mataiti i muri mai i runga i te airani o Corfu, kua araiia te uri anga a Vamvas o te Pipiria e te Akaaerenga Tapu o te Ekaretia Otototi Ereni. Kua tureia te oko anga i te reira, e kua akapouia te au kopi tei toe mai. I runga i te au airani o Chios, Síros, e Mykonos, kua taki atu te tu riri tikai o te au orometua i reira e kia tutungiia te Pipiria. Inara te vaira ki mua tetai atu araianga o te uri anga Pipiria.

Inangaro Mai Tetai Ariki Vaine i te Pipiria

I te tuatau 1870, kua kite mai te Ariki Vaine ko Olga o Ereni e kare te au tangata Ereni i kite tikai i te Pipiria. I te irinaki anga e ka oronga mai te kite anga i te au Tuatua Tapu i te akamaru anga e te akaangaroi anga ki te enua, kua tauta aia e kia uriia te Pipiria ki roto i te reo mama ua i ta te uri anga a Vamvas.

Kare i tau ki te ture, kua akamaroiroi te epitekopo maata o Atene e te tangata maata o te Akaaerenga Tapu, ko Prokopios, i te ariki vaine kia rave i teia. Inara, i te tataanga aia ki te Akaaerenga Tapu e kia akatikaia mai, kare aia i akatikaia ana. Noatu rai, kua maro ua atu aia, i te tuku anga i te au tataanga ou, e kua patoi akaouia mai, i te 1899. Te kopaeanga i te patoi anga, kua iki aia i te nenei i tetai urianga kotinga uaia tei tutakiia e ia. Kua akatupuia teia i te 1900.

Aronga Patoi Kare e Tuku i te Au

I te 1901, kua nenei The Acropolis, e nutipepa rongoia i Atene, i te Evangeria a Mataio tei uriia i roto i te reo Ereni Demotic e Alexander Pallis, e tangata uri te angaanga ra mei Liverpool mai, i Engarani. Ko te akakoroanga o Pallis e tona au  taeake tauturu koia oki kia ‘apii i te au Ereni’ e kia “tauturu akaou i te enua” mei te topa anga.

Kua tapa te aronga apiipii akonoanga Otototi e to ratou au poropeta i taua urianga e “e mea akakino i te au apinga puapinga o te enua,” e mea akaviivii i te Tataanga Tapu. Kua tuku atu te Pateriareka ko Joakim III o Constantinople i tetai pepa i te akakiteanga i te patoi anga o taua urianga. Kua tupu mai te maro anga ki roto i te au ngai poritiki, e kua taangaangaia te reira na roto i tetai mataara pikikaa e te au pupu poritiki akatupu tamaki.

Kua akamata tetai tuanga rongoia o te pereti Atene i te tamaki atu i te uri anga a Pallis, te tapaanga i tona aronga tauturu ei “aronga irinaki kore i te Atua,” “aronga pikikaa,” e “ei au rima rave o te mana akaaere ke” tei tauta i te akangaueue i te au-enua Ereni. Mei ia Noema 5 ki te 8, i te 1901, i raro ake i te akakeu anga a te pupu pakari tikai o te Ekaretia Otototi Ereni, kua akatupu manamanata te aronga apiipii i Atene. Kua tamaki atu ratou i te au opati o The Acropolis, kua mati i te patoi anga i te au are ariki, kua rave atu i te Apii Teitei o Atene, e kua maro atu e kia akaruke te kavamani. I te take maata o taua akatupu anga manamanata, kua mate e varu tangata i te tamaki anga i te vaeau. I tera mai ra, kua maro atu te ariki e kia akaruke te Epitekopo ko Prokopios, e rua ra i muri mai kua akaruke te katoa anga o te Pupu.

E tai marama i muri mai kua akaariari patoi akaou te aronga apiipii e kua tutungi i tetai kopi o te uri anga a Pallis i te ngai tangata. Kua akakite ratou i te akakoroanga patoi no te tua anga i teia uri anga e kua pati e kia pakari maata te utunga no etai tauta anga a te tuatau ki mua. Kua riro teia ei kotoe anga kia arai i te taangaanga i etai uri anga Pipiria reo Ereni o teia tuatau. E tuatau poiri tikai!

“Te Tuatua a Iehova ra, e Tu ïa e Rimua”

Kua akakoreia te arai anga no te taangaanga anga i te Pipiria reo Ereni o teia tuatau i te 1924. Mei reira mai, kua kite atu te Ekaretia Otototi Ereni i te autu kore anga i roto i tana tauta anga i te tapu i te Pipiria mei te tangata. I teianei, kua rave maata te Au Kite o Iehova i te apii anga i te Pipiria i Ereni, mei ta ratou i rave i tetai au enua e manganui. Mei te 1905 mai, kua taangaanga ratou i te uri anga a Vamvas kia tauturu i te au tauatini tangata reo Ereni kia apii i te tuatua mou Pipiria.

I te au mataiti i topa, kua rave te aronga apiipii e te au poropeta e manganui i te nenei i tetai Pipiria i roto i te reo Ereni o teia tuatau. I teia ra, te vaira e 30 uri anga o te Pipiria, i te katoa anga me kore i tetai tuanga, te tatauia ra e te au tangata Ereni. Ko tetai apinganui tikai i roto ia ratou ko te uri anga Ereni o te New World Translation of the Holy Scriptures, tei tukunaia i te 1997 ei akapuapinga i te 16 mirioni tangata i te ao katoa te tuatua ra i te reo Ereni. Neneiia e te Au Kite o Iehova, te oronga ra teia uri anga i te Tuatua a te Atua na roto i tetai tu mama ua i te tatau, e kia maramaia, te aru tiratiratu anga i te tataanga mua.

Te akatutu maira te maro anga no tetai Pipiria i roto i te reo Ereni o teia tuatau i tetai tuatua puapinga. Te akataka meitaki maira noatu te au tauta anga kino a te tangata, “te tuatua a Iehova ra, e tu ïa e rimua.”​—1 Petero 1:25.

[Tataanga Rikiriki i Raro]

[Tutu i te kapi 27]

Kua akaaere a Cyril Lucaris i te uri anga mua reo Ereni o te au Tuatua Tapu Ereni Kerititiano i te 1630

[Akameitakianga]

Bib. Publ. Univ. de Genève

[Au Tutu i te kapi 28]

Etai au uri anga i te reo Ereni tuatuaia: Salamo neneiia i te: (1) 1828 e Ilarion, (2) 1832 e Vamvas, (3) 1643 e Julianus. “Koreromotu Taito” neneiia i te: (4) 1840 e Vamvas

Ariki Vaine ko Olga

[Akameitakianga]

Bibles: National Library of Greece; Queen Olga: Culver Pictures

[Akameitakianga no te Tataanga i te kapi 26]

Papyrus: Reproduced by kind permission of The Trustees of the Chester Beatty Library, Dublin

[Akameitakianga no te Tataanga i te kapi 29]

Papyrus: Reproduced by kind permission of The Trustees of the Chester Beatty Library, Dublin