Akara i te Au Apinga Mei ta te Atua Akara Anga

I NEW YORK, U.S.A., e ra maanaana e te manea tikai a Tepetema 14, 2002. I taua ra ra, kua uipa mai tetai urupu mei te pa enua ravarai e 6,521 ki te Ngai Apiipii Anga i Patterson e tetai atu au ngai e rua o te Au Kite o Iehova i taua ngai ra. Kua putuputu mai te urupu no te akara atu i te karatuati anga o te 113 pupu o te Apii Pipiria Punanga Tiaki o Gileada. Kua aere mai te aronga apiipii mei te 14 enua e kua akapou i nga rima marama i topa ake nei i te akapapaanga no te angaanga mitinari i roto i te 19 enua ka tukunaia atu ratou.

Ko Carey Barber, e 98 mataiti tona ora anga e e mema no te Pupu Akaaere o te Au Kite o Iehova, te tiamana o taua porokaramu. Kua tuatua tikai aia i te tuanga puapinga vaitata i te 60 mataiti o te Apii Gileada, tei akateateamamao i te au tauatini kia akono atu i te angaanga mitinari. Kua tuatua te Taeake ko Barber e: “Kare i te au tuatua akamaata e kua rauka mai te au tupu anga mekameka mei ta ratou terenianga. E tikai e au anere o te au tauatini aronga akaaka i te enua katoa kua akatapu i to ratou oraanga kia Iehova e kua akono atu i tana akamori anga mou e te angaanga tapu no te tauturu tei orongaia kia ratou e te au mitinari tereniia.”

I mua ake ka aere atu ei ki Gileada, kua akaari te manganui o te aronga apiipii i te inangaro no te akamaata i ta ratou angaanga orometua. Kua pou i tetai nga tokorua i te mataiti okotai i te apii anga i te reo Manatarini e raukai i te atoro atu i te maata anga o te au tangata eteniki Tinito i to raua ngai i Kanata. Kua akamata tetai nga tokorua ko raua anake i te apii i te reo Arapania e i te openga ra kua neke atu ki Arapania i te akono i te inangaro maata i te Pipiria i reira. Kua aere mai tetai i roto i te pupu ki Gileada mei Ungari mai, Kuatemara, e te Tominika Repapuriki, ko te au enua tei aere atu ratou no te tavini i reira te umuumu maataia ra te tauturu no te aronga apiipii i te Tuatua a te Atua.

I teianei, i mua ake ka aere atu ei ki te au tukuanga angaanga i Aperika, Europa Itinga, Marike Rotopu e Tonga, e te Itinga Mamao, kua akamaroiroiia te katoatoa o te aronga apiipii karatuati kia akamanako i te Atua i roto i ta ratou pouroa ka rave.

E Akara i te Au Apinga Mei ta te Atua Manako Anga

Aru mai i tana au tuatua akamata anga, kua akaaravei mai te Taeake ko Barber ia Maxwell Lloyd, e mema no te Kumiti Manga o Marike. Kua akakite mai aia i te tumu tuatua “E Akara i te Au Apinga Ravarai Mei ta te Atua Akara Anga.” Kua tuatua te Taeake ko Lloyd i te au akaraanga o Davida e te Tamaiti a te Atua, ko Iesu. (1 Samuela 24:6; 26:11; Luka 22:42) I muri ake i te akamaaraanga i te aronga apiipii e kua tereni ta ratou apii anga i te Pipiria e rima marama ia ratou i te akara i te au apinga mei ta te Atua akara anga, kua ui te vaa tuatua: “I te raveanga i te au apii Pipiria ki te au tangata i roto i taau tukuanga angaanga ou, ka tauturu ainei koe ia ratou kia akamarama i te au apinga mei ta te Atua akara anga?” E no te ako anga i tetai, kua tuatua atu aia ki te aronga apiipii: “Auraka e tuatua, ‘Mei taku akara anga, i  toku manako . . . ’ Mari ra, e tauturu ia ratou kia kite i to te Atua manako. Te aruanga i teia akara anga, ka riro koe ei akameitaki anga ki te aronga te kapiti atura i roto i taau tukuanga angaanga.”

Tei aru mai i runga i te porokaramu ko Gerrit Lösch, e mema no te Pupu Akaaere. Te tuatuaanga no runga i te tumu tuatua “Vaitata Au ia Koe,” kua tuatua tikai aia i te au atianga e manganui i te tuatua anga a Iehova ki tona au tavini tiratiratu, “tei vaitata katoao au ia koe.” (Genese 26:23, 24; 28:15; Iosua 1:5; Ieremia 1:7, 8) I to tatou tuatau, ka rauka katoa ia tatou taua tu papu tikai i roto ia Iehova me vai tiratiratu tatou. Kua tuatua mai te Taeake ko Lösch: “Te manata ra ainei koe me te kitea ra e koe tetai tangata ka apii atu i te Pipiria? E akamaara, kua tuatua a Iehova, ‘tei vaitata katoao au ia koe.’ Te manata ra ainei koe me te rava ra i te pae apinga? Te tuatua maira a Iehova: ‘Kare rava au e akaruke atu ia koe, kare oki au e taka ke ia koe, kare, kare rava atu.’” (Ebera 13:5) Kua taopenga te Taeake ko Lösch na te akamaaraanga i te aronga apiipii e kua taputou mai a Iesu e te vaitata maira aia ki tana au pipi tiratiratu i roto i te angaanga akariro i te tangata ei pipi.​—Mataio 28:20.

“Ka Kitea Ainei e Koe Toou Tinamou i Roto i te Au Timataanga?” ko te tumu tuatua ia a te tangata ikuiku Gileada ko Lawrence Bowen. Kua tuatua mai no te au maro anga tei akatupuia mai i Edene, ko te aronga ravarai tei inangaro ra i  te akono i te akamori anga akono ua kia Iehova kua aro atu ana i te au tu ngata e, i tetai taime, te au timata anga kino pakari. Kua akamaroiroi aia i te aronga karatuati kia aru i te akaraanga o Iesu, tei kitea te tinamou na te irinaki anga pu tikai ki runga ia Iehova e te arikianga i te au timataanga kino pakari tei akatika uaia e Iehova ei akatinamou i te akarongo o tana Tamaiti. (Ebera 5:8, 9) Ka rauka a Iehova kia akaaiteia ki te tangata tama auro tei akono ua kia tau te vera no te akaatea i te au mea kinokino. E tikai, ko te akarongo tei tamaia e te ai te akapapu maira i te tinamou maata atu i te auro tamaia. No teaa ra? “No te mea ka rauka i te akarongo tamaia i te akono ua atu i etai au tu timata anga,” i tuatuai te Taeake ko Bowen, “e te akateateamamao ra ia tatou kia tamou marie ua atu e tae atu ki ‘te openga.’”​—Mataio 24:13.

Kua ui tetai ikuiku Gileada, ko Mark Noumair: “Ka Inangaroia Mai Ainei Koe?” Kua akara tana tumu tuatua i te au tuatua ia 1 Samuela 2:26, tei akataka ia Samuela e ko tei “akaperepereia mai e Iehova e te tangata katoa.” I muri mai i te akamanakoanga i to Samuela akaraanga, kua akakite te Taeake ko Noumair, tei akapou e tere atu i te ngauru mataiti i roto i te angaanga mitinari i Aperika, e: “Ka inangaro katoaia mai koe i nga mata o te Atua na te akono tiratiratu anga ki te angaanga tei orongaia mai e te Atua kia koe kia rave. Kua oronga mai aia i tetai tukuanga angaanga mitinari akaperepereia naau.” I reira kua akamaroiroi te Taeake ko Noumair i te pupu karatuati kia akara i ta ratou au tukuanga angaanga ei apainga tapu mei te Atua e kia akono i to te Atua manako i roto i te raveanga i ta ratou au tukuanga angaanga.

I te tuatau apii anga, kua rauka i te aronga apiipii te au tuatau e manganui i te openga epetoma kia akakite atu i “te peu taka ke a te Atua” tei akanooia i roto i te Pipiria ki te au tangata i taua ngai ra. (Angaanga 2:11) Ko te tika, kua rauka ia ratou i te tuatua i teia au apinga i te tai ngauru reo tuketuke. Kua uiui atu a Wallace Liverance, ko tetai tangata ikuiku Gileada, i tetai pupu aronga apiipii tei akakite mai i to ratou au tupu anga i raro ake i te tumu tuatua. “‘Te Peu Taka ke a te Atua’ te Akakeu ra i te Tangata kia Rave Angaanga.” Kua akakite mai aia: “Kua akakeu te vaerua i te aronga i roto i te pia i runga ia Penetekote kia tuatua i ‘te peu taka ke a te Atua.’ Te angaanga ra rai taua vaerua i teia tuatau i roto i te au tavini tiratiratu pouroa o te Atua.” Kua akakeuia etai kia apii i tetai reo ou ma te manako kia akakite aere ki te au tangata e manganui.

Ako Anga Tau no te Akara Anga i te Au Apinga Mei ta te Atua Akara Anga

Aru mai i te tuatua akamata anga, kua uiui atu a Gary Breaux raua ko William Young, e nga mema no te opati manga i Marike, i tetai au mema kumiti no te manga tuketuke i te au enua te tavini ra te au mitinari i reira e pera katoa i tetai nga tokorua tei akapou ana e 41 mataiti i roto i te angaanga mitinari. Ko tetai akakite anga tei taikuia: “Ko te aronga kare i umuumu maata ko ratou te ka noo roa atu. Kua akara ratou i te tumu i aere ei ratou ki reira. Kua kite ratou e kua aere atu ratou i te tutu aere i te tuatua meitaki e te tauturu i te tangata kia kite ia Iehova.”

Kua taopenga a David Splane, e mema no te Pupu Akaaere, i te porokaramu ma tetai tuatua te tumu manako “Kare Koe e Aere Mamao!” Eaa te aite anga o tana tuatua, i te mea te tukunaia nei te 46 karatuati ki te au enua takapini i te koropu? Kua akamarama aia: “Noatu e teiea koe i runga i te enua, tei roto rai koe i te are o te Atua me vai tiratiratu koe.” Ae, te tavini ra te au Kerititiano tiratiratu pouroa, noatu e teiea ratou, i roto i tetai tuanga o te iero maata o te Atua i te pae vaerua, me kare are, tei tupu mai i te tuatau i papetitoiai a Iesu i te anere mataiti mua. (Ebera 9:9) Mei teaa te pumaana no te aronga i tae atu kia kite e te vaitata ra a Iehova ki tona au tavini tiratiratu pouroa i te enua nei! Mei ia Iehova i manako atu ia Iesu iaia i te enua nei, pera katoa Aia te manako maira ia tatou katoatoa e ta tatou angaanga Kiaia, noatu e teiea tatou. No reira no te akamori anga, kare rava tatou e mamao roa mei tetai e tetai e mei ia Iehova raua ko Iesu.

I muri mai i te akakite angaia te au tuatua aroa takapini i te ao, te akakiteanga i te au tukuanga angaanga, e te tatauanga i tetai reta mei te pupu tei akakite i to ratou tu ariki no te terenianga tei rauka mai i Gileada, kua taopenga meitaki te tiamana i te porokaramu. Kua akamaroiroi aia i te au mitinari ou kia rave ua atu i ta ratou angaanga meitaki e kia pereperekavana i roto i ta Iehova angaanga.​—Philipi 3:1.

[Pia i te kapi 23]

TE AU TU O TE PUPU

Numero o te au enua tei komonoia: 14

Numero o te au enua tei tukuia: 19

Numero o te aronga apiipii: 46

Mataiti avereti: 35.0

Au mataiti avereti i roto i te tuatua mou: 17.2

Au mataiti avereti i roto i te angaanga orometua tamou: 13.7

[Tutu i te kapi 24]

Te Pupu 113 Karatuatianga o te Apii Pipiria Punanga Tiaki o Gileada

I te papaanga i raro ake, kua numeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.