Anau Anga o Iesu​—Akapeea e Eaa ra te Reira i Tupu Ei

“KARE E RAUKA!” Ka tuatua ei te au tangata e manganui kare i te Kerititiano i te akarongoanga i te tua no runga i te anau anga o Iesu. Te manako ra ratou e kare i tau i te taineti kia irinaki e ka nui e ka anau tetai paretenia i tetai tamaiti ma te kore te metua tane tangata. Eaa toou manako?

I te 1984, kua nenei The Times o London i tetai reta tei akamarama mai i teia tumu manako, i te na ko anga: “Kare i te mea tau tikai te taangaanga i te taineti ei taumaro anga no te patoi i te au temeio. Te irinaki anga e kare te reira au temeio e tupu, aiteite rai ki te akarongo no te irinaki anga e ka tupu te reira.” Kua tainaia taua reta e te 14 poropeta taineti i te au apii teitei i Peritane. Kua tuatua ratou: “Te ariki mataora nei matou i te anau anga o te paretenia, te au temeio Evangeria, e te akatuakaou anga o Karaiti ei au tupu anga tuatua enua.”

Inara, e mea marama uaia kia oripu ua tetai tangata i te akarongo mua anga i te tua no Iesu tei anauia e tetai paretenia. Kua oripu ua to Iesu uaorai metua vaine paretenia i te akakite anga te angera a te Atua: “E i na, ka to oki koe, e ka anau taau tamaiti, e naau e tapa i te ingoa ia Iesu.” I te pau anga, kua ui atu a Maria: “Eaa e tikaʼi; kare oki au i kite i te tane?” Kua akamarama i reira te angera e ka rave te Atua i teia temeio na roto i Tona vaerua tapu, i te na ko anga: “Kare rava oki e mea e kore e tika i te Atua.” (Luka 1:31, 34-37) Papu tikai ko Tei anga i te au uanga o te tangata ka rauka katoa i te akatupu i te to anga e te anau anga o Iesu ki tetai paretenia tau ua. Me kua rauka i te Atua i te anga i te ao e pini ua ake e tona au ture tau meitaki, ka rauka katoa iaia i te taangaanga i tetai ua teera mei te ngai vairanga tamariki o Maria kia anga i tetai Tamaiti tangata apa kore.

Eaa ra te Reira i Umuumuia Ei

Kua tapaoia te tangata akono tau i te Atua ko Iosepha kia Maria i te tuatau i to ei aia. Na roto i tetai moemoea, kua akamarama atu ta te Atua angera kia Iosepha i te tumu meitaki i nui ei tana vaine paretenia tei tapaoia. Kua tuatua te angera: ‘Auraka koe e mataku i te arataki mai i to vaine ia Maria ki o ou ra: no te vaerua tapu i nui ei aia. E tamaiti tana e anau, e ko Iesu te ingoa taau e tapa nona: e akaora oki aia i tona au tangata i ta ratou ara.’ (Mataio 1:20, 21) Te aite anga o te ingoa Iesu i roto i te reo Epera “Ko Iehova Oki te Ora.” Te akamaara maira te reira ia tatou i te umuumu anga no te ora mei te ara e te mate e ta te Atua ko Iehova ravenga no taua ora na roto ia Iesu.

 No te mea kua ara te tangata mua, ko Adamu, pouroa tana uanga kua anauia ma te apa ua, ma te anoano i te aati i ta te Atua au ture. (Roma 5:12) Akapeea ta Adamu au uanga i te akaora angaia mei te ara e raukai te tu apa kore? Kia tutakiia tetai oraanga tangata apa kore, te aiteite ra tona puapinga ki to Adamu, kia akaaiteite i te au paunu no te tuatua tau. No reira oki te Atua i akatupu ei i te anau anga temeio o te tangata apa kore, ko Iesu, e no reira oki a Iesu i akatika ei i tona au enemi kia tamate iaia. (Ioane 10:17, 18; 1 Timoteo 2:5, 6) I muri ake i to Iesu tuakaouanga e te kake anga ki te oraanga i te rangi, kua tuatua papu aia e: ‘Ko au i mate ana rai oki: e i na, e ora atu rai au e tuatau ua atu, Amene; e tei iaku te taviri o te mate e to ade [te vaarua o te tangata ravarai].’​—Apokalupo 1:18.

Ma nga taviri akatutu ua o te mate e to ate, kua akatuera a Iesu i te mataara no te au tangata ara ua kia rauka akaou i tei ngereia e Adamu. Kua akamarama mai a Iesu: “Ko au te tuakaouanga, e te ora; ko te akarongo mai iaku ra, mate ua atu rai, ka ora ra ïa: E te tangata ora katoa nei e akarongo mai iaku ra, kare rava atu ïa e mate.” (Ioane 11:25, 26) Mei teaa te meitaki i taua taputou! E noatu rai, te vaira tetai tumu maata atu no te anau anga o Iesu.

Te Tumu Puapinga Maata Rava

To Iesu to angaia i roto i te ngai vairanga tamariki o Maria kare ia e ko te akamata anga o tona oraanga. “I eke mai nei oki au mei te rangi mai,” i akakite taka meitaki mai ei aia. (Ioane 6:38) Kua ora ana a Iesu i te ngai vaerua ma tona Metua i te rangi ra mei te akamataanga o te anga mai anga. Ko te tika, kua akataka te Pipiria iaia e ko “te tumu o te au mea ravarai a te Atua i angaia ra.” (Apokalupo 3:14) Mei te rangi maira, kua kite atu a Iesu i te meameaau a tetai angera kino tei uri ke i nga tangata mua kia patoi i ta te Atua tutara. Kua oronga mai teia i te tumu puapinga maata rava kia Iesu i te inangaro kia anauia ei Tamaiti tangata apa kore na te Atua. Eaa ra te reira?

Kia akapapu e e tika anga ta tona Metua i te rangi ra kia tutara i te ao katoa e pini ua ake. Na te vai tiratiratu anga mei tona anau anga e mate ua atu aia i te enua, kua akatutu mai a Iesu i tona tu puareinga kia kauraro iaia uaorai ki ta Iehova mataara tutara anga i Tana au mea ora. I mua ake ka mate ei i te rima o to te Atua au enemi, kua akakite taka meitaki a Iesu i te tumu i puareinga ei aia i te akono ua atu i taua aerenga mate akaatinga ua. Kua tuatua aia kia kite ra to te ao e te anoano ra aia i te Metua. (Ioane 14:31) Naringa nga tangata mua, ko Adamu raua ko Eva, i akatupu ana i taua tu anoano, ka rauka ua ia raua i te vai tiratiratu i raro ake i to raua timata anga ngoie ua.​—Genese 2:15-17.

Kua akamaeu katoa to Iesu tu tiratiratu i te angera kino, ko Satani, ei pikikaa. Kua akakino a Satani i te Atua e te tangata na te tuatuaanga ki mua i te au angera i te rangi ra: “E riro oki ta te tangata katoa ra ei oko i tona ora.” (Iobu 2:1, 4)  Kua akaapa tarevake a Satani e ka akarongo kore te au tangata ravarai i te Atua ei akaora ia ratou uaorai.

Kua akaao taua au maro anga i runga ake nei i te tu tau e te tu tika tikai o ta te Atua tutara anga. Kia akatikatika i te reira, kua puareinga a Iesu e kia anauia mai ei tangata e kia akapapu tiratiratu iaia uaorai e mate ua atu.

No reira, ko te tumu maata i anauia mai ei a Iesu i te enua nei koia oki, mei tana uaorai i tuatua, kia “akakite [aia] i te tuatua-mou.” (Ioane 18:37) Kua rave aia i te reira na te akaarianga na roto i te tuatua e te angaanga e e tu tau ta te Atua tutara anga e te kauraro anga ki te reira ka akatupu i te mataora mutu kore. Kua akamarama katoa a Iesu e kua aere mai aia ki teianei ao kia oronga i tona oraanga tangata ei “oko no te tangata e manganui,” i te akatueraanga i te mataara no te au tangata ara ua kia rauka te tu apa kore e te ora mutu kore. (Mareko 10:45) E marama ei te au tangata ravarai i teia au tumu puapinga, kua umuumuia tetai tataanga no te anau anga o Iesu. Pera katoa, te vaira tetai atu au apiianga puapinga mei te au tupu anga no runga i to Iesu anau anga, mei ta te atikara e aru mai nei ka akaari mai.

[Au Tutu i te kapi 4]

Akapeea ta Adamu au uanga i te akaora angaia mei te ara?