Au Apiianga Mei te Tataanga o te Anau Anga o Iesu

E MIRIONI ua atu te umere ra no runga i te au tupu anga o te anau anga o Iesu. Te kiteaia nei teia i roto i te au tutu Anau Anga te akaariariia ra e te au akatutu anga o te Anau Anga te rave akaouia ra takapini i te ao i te tuatau Kiritimiti. Noatu e mea umere tikai, kare te au tupu anga o te anau anga o Iesu i tataia i roto i te Pipiria ei akareka i te tangata. Mari ra, e tuanga te reira o te Tuatua Tapu tei akauruia e te Atua no te apiianga e no te akatikatikaanga i te au mea.​—2 Timoteo 3:16.

Me kua inangaro te Atua i te au Kerititiano kia akamaara i te anau anga o Iesu, ka oronga mai te Pipiria i te ra tikai. Te pera ra ainei? I muri mai i te taikuanga e kua anauia a Iesu i te tuatau te akono ra te au tiaki mamoe i te ngai atea i te po i ta ratou au anana, kua taopenga te tangata kite apii Pipiria o te 19 anere mataiti ko Albert Barnes e: “Te taka meitaki ra mei teia e kua anauia to tatou Akaora i mua ake i te 25 o Titema . . . E anu tikai taua taime, koia tikai i te au ngai maunga i te pae ia Betelehema. Kua uuna te Atua i te tuatau i anauiai [a Iesu] ra. . . Kare i te mea puapinga maata kia kite i te tuatau, me koia ia, ka akono ua te Atua i te tataanga o te reira.”

Ei tuke anga, kua akakite taka meitaki mai te aronga tata Evangeria e a kia tatou i te ra i mate ei a Iesu. Kua tupu te reira i te ra o te Pasa, tei raveia i te ra 14 o te marama ngati Iuda ko Nisana, i te tuatau tupu anga rau. Pera katoa, kua akaue a Iesu i tana au pipi kia akono i taua ra ei akamaara anga iaia. (Luka 22:19) Kare e akauenga i roto i te Pipiria kia akamaara i te ra i anauiai a Iesu, kare katoa, e tikai, i to tetai ua atu tangata ra  anau anga. Ma te maromaroa, penei kua akakore te au taumaro anga no te ra i anauiai a Iesu i te au tupu anga puapinga maata tei raveia i taua tuatau ra.

Ikiia te Nga Metua e te Atua

Mei te au tauatini pamiri i Iseraela, mei teaa te tu o nga metua ta te Atua i iki kia utuutu i tana Tamaiti? Kua manako ainei Aia i te au mea mei te tu rongonui e te apinganui ei mea puapinga? Kare. Mari ra, kua akara a Iehova i te au tu pae vaerua o nga metua. Akara matatio ana i ta Maria imene akapaapaa, tei tataia i roto ia Luka 1:46-55, tana i imene i muri ake i te akakite angaia i tana akameitaki anga kia riro mai ei metua vaine no te Mesia. Ko tetai o te au mea, kua tuatua aia: “Kua akamaata toku vaerua i te Atu . . . Koia kare i akavaavaa i te akaaka anga o tona tavini.” Kua manako akaaka aia iaia uaorai e ko tetai i te “akaaka anga,” o te tavini o Iehova. Tei maata rava, te akaari maira te au akakiteanga manea akapaapaa i roto i te imene a Maria e e vaine pae vaerua aia tei kite meitaki i te au Tuatua Tapu. Noatu e uanga ara ua no Adamu, kua tau te iki anga iaia kia riro ei metua vaine i te enua nei no te Tamaiti a te Atua.

Akapeea ta Maria tane, tei riro mai ei metua angai no Iesu? E tangata kite ua a Iosepha i te kamuta. No tona tu puareinga i te angaanga pakari ma tona nga rima, kua rauka iaia i te akono ua i tona pamiri te katoa anga e rima tamaroa e penei e rua tamaine. (Mataio 13:55, 56) Kare a Iosepha i te tangata apinganui. I te tae anga te tuatau no Maria kia apai i tana tamaiti mua ki te iero o te Atua, penei kua maromaroa a Iosepha e kare i rauka iaia i te oronga i te atinga mamoe. Kareka ra, kua taangaanga raua i tei akatikaia no te aronga putaua. No te metua vaine o tetai tamaiti anau ouia, te akakite ra ta te Atua ture: “E kia kore e tika iaia kia apai mai i te mamoe, ei kukupa tana e apai mai kia rua ake; e kare ra, kia rua ake punua rupe; ei atinga karakaratio tetai, ei tarangaara tetai: e na te taunga e apai i te tapokiangaara nana, e ka mā ïa aia.”​—Levitiku 12:8; Luka 2:22-24.

Te karanga ra te Pipiria e e “tangata tuatua-tika” a Iosepha. (Mataio 1:19) Ei akaraanga, kare aia i rave ana i te ainga ma tana vaine paretenia i muri roa mai i te anau angaia a Iesu. Kua kopae teia i te tu marama kore e koai tikai to Iesu Metua. No tetai nga tokorua akaipoipo ou kia akaruke i te pirianga koi noo ei i roto i te kainga okotai penei kare e ngoie ana, inara te akaari maira te reira e kua akaperepere raua i ta raua akameitakianga i te iki angaia kia utuutu i te Tamaiti a te Atua.​—Mataio 1:24, 25.

Mei ia Maria rai, e tangata akono pae vaerua a Iosepha. Kua akamutu aia i te angaanga i te au mataiti ravarai e kua apai i tona ngutuare tangata e kua teretere atu e toru ra mei Nazareta ki Ierusalema kia tae atu no te oroa i te mataiti o te Pasa. (Luka 2:41) Pera katoa, penei kua tereni a Iosepha ia Iesu ou ra i roto i te peu matauia i te epetoma no te pirianga ki roto i te akamorianga i te tunako, i reira kua tatauia e kua akamaramaia ta te Atua Tuatua. (Luka 2:51; 4:16) No reira, kare e ekoko anga e kua iki te Atua i te metua vaine tau i te enua nei e te metua tane angai no tana Tamaiti.

Tetai Akameitakianga Mekameka no te Au Tiaki Mamoe Akaaka

Noatu te tu ngata no tana vaine, e iva marama i tona nui anga i teianei, kua teretere atu a Iosepha ki te oire o tona ui tupuna kia retitaia, e tau ei ki ta Kaisara akauenga. I te tae anga nga tokorua ki Betelehema, kare i kitea e raua tetai ngai noo anga i roto i te oire kiia e te tangata. Kua maro atu te au turanga i reira ia raua kia noo i te ngai no te manu, i reira kua anauia a  Iesu e kua tukunaia ki roto i tetai pia vairanga kai a te manu. Kia akaketaketa i to raua akarongo, kua oronga atu a Iehova i te tuatua akapapu anga ki nga metua akaaka e ko teia anau anga e anoano ia no te Atua. Kua tuku atu ainei aia i tetai tereketi o te aronga pakari rongonui mei Betelehema kia akapapu ki nga tokorua? Kare. Mari ra, kua akakite te Atua ko Iehova i taua tumu manako ki te au tiaki mamoe e angaanga pakari ra tei akapou i te po i vao i te tiakianga i ta ratou au anana.

Kua mama atu ta te Atua angera kia ratou e kua akakite atu kia ratou e kia aere ki Betelehema, i reira ka kite atu ratou i te Mesia tei anau ouia i te “vai ua anga ki roto i te are puakatoro.” Kua poitirere ainei me kare kua akama ainei teia aronga akaaka i te akarongo e tei roto te Mesia ou i te are o te manu? Kare rava! Kare i taroaroa ana, kua akaruke ratou i ta ratou au anana e kua aere atu ki Betelehema. I te kite anga ratou ia Iesu, kua akakite atu ratou kia Iosepha raua ko Maria i ta te angera a te Atua i tuatua atu. Kare e ekoko anga, kua akaketaketa teia, i te akarongo o nga tokorua e te tupu meitaki ra te au mea ta te Atua i akakoro ra. Kua “oki atura taua au tiaki mamoe ra,” no ta ratou tuanga, “i te akakakā anga, e te akameitaki anga i te Atua, i te au mea ta ratou i akarongo e ta ratou i kite.” (Luka 2:8-20) Ae, i te akakite anga i te au mea ki te au tiaki mamoe mataku i te Atua, kua akono a Iehova i te iki anga tau.

Mei to runga ake nei, kua apii mai tatou i te tu o te tangata ka anoanoia tatou kia pera e raukai te rekareka i to Iehova tu mareka anga. Kare tatou e anoanoia kia kimi i te tu rongonui me kare te apinganui. Mari ra, mei ia Iosepha, Maria, e te au tiaki mamoe, ka anoanoia tatou kia akarongo i te Atua e kia akapapu i to tatou aroa nona na te tukuanga i te au mea pae vaerua na mua i te au apinga materia. E tika, te vaira te au apiianga meitaki kia apiiia mai na te akamanakoanga i te au tataanga o te au tupu anga tei raveia i te tuatau i anauia ei a Iesu.

[Tutu i te kapi 7]

Eaa ta Maria atinga o nga punua rupe e akakite maira?

[Tutu i te kapi 7]

Kua iki te Atua i te akakite i te anau anga o Iesu ki te au tiaki mamoe akaaka tokoiti ua