Kua Matau Ainei Koe ia Saphana e Tona Pamiri?

I TE tatauanga i taau Pipiria, kua kite ana ainei koe i te au taiku anga ia Saphana e etai atu au mema o tona pamiri rongonui? Koai ma ratou? Eaa ta ratou i rave? Eaa te au apiianga ka apii mai tatou mei ia ratou?

Te akakite maira te Pipiria ia “Saphana, te tamaiti a Azalia, te tamaiti a Mesulama” kia tatou i te tuatau i akanoo akaou ei a Iosia i te akamori anga mou i te 642 M.T.N. (2 Ariki 22:3) I te 36 mataiti i aru mai, e tae ua atu ki to Ierusalema akapou angaia i te 607 M.T.N., kua akakiteia mai kia tatou tana nga tamariki tamaroa e a, ko Ahikama, Elasa, Gemaria, e Iaazania, e tana nga utaro tamaroa e rua, ko Mikaia raua ko Gedalia. (Akara i te papa anga.) “Kua akono te pamiri o Saphana i te turanga akaaere anga [i roto i te patireia o Iuda] e kua mou i te au taoonga ei au tangata tata no te ariki mei to Iosia tuatau e tae ua atu ki te Tuikaa Anga,” i akataka mai ei te Encyclopaedia Judaica. Na te akara akaou anga i ta te Pipiria e karanga ra no runga ia Saphana e tona pamiri ka tauturu ia tatou kia ariki e akapeea ratou i te turuanga i te peroveta ko Ieremia e te akamori anga mou a Iehova.

Turu a Saphana i te Akamori Anga Mou

I te 642 M.T.N., vaitata te Ariki ko Iosia i te 25, kua kite tatou ia Saphana e angaanga ra ei teketere e ei tangata kopi no te ariki. (Ieremia 36:10) Eaa tei o mai ki roto i te reira? Te akakite ra te puka tei taikuia mai i runga ake nei e ko tetai tangata kopi e tetai tekeretere e tangata ako tei piri vaitata ki te ariki, te akaaere ra i te au mea i te pae moni, te rave meitaki ra i te angaanga akatikatika, e te kite meitaki ra i te au mea no te enua ke, te ture pa enua, e te au akatika anga i te pae okooko. No reira, ei teketere no te ariki, ko Saphana tetai tangata rongonui i roto i te patireia.

E tai ngauru mataiti i mua atu, kua “akamata atura [a Iosia ou ra] i te kimi i te Atua o tona tupuna o Davida.” I te akara anga kua pakari atu a Saphana ia Iosia e kua riro ei tangata ako meitaki i te pae vaerua kiaia e ei tangata turu i te oro anga mua a Iosia no te akanoo akaouanga i te akamori anga mou. *​—2 Paraleipomeno 34:1-8.

I te tuatau o te angaanga ripea i te iero, kua kiteaia “te buka ture,” e kua “tatau iorā Saphana ki mua i te aroaro o te ariki.” Kua poitirere tikai a Iosia i te akarongo i to roto i te reira e kua tuku atu i tetai pupu komono irinakiia ki te vaine peroveta ko Hulada e raukai i te uiui kia Iehova no runga i taua puka ra. Kua akaari te ariki i te tu papu i roto ia Saphana e tana tamaiti ko Ahikama na te kapitianga ia raua ki roto i te pupu komono.​—2 Ariki 22:8-14; 2 Paraleipomeno 34:14-22.

Ko teia anake te akakite anga i roto i te au Tuatua Tapu no runga i ta Saphana uaorai i rave. I roto i tetai atu au irava Pipiria, kua tuatua uaia aia ei metua tane me kare ei papa ruau. Ko ta Saphana uanga kua kite meitaki i te peroveta ko Ieremia.

Ahikama Raua ko Gedalia

Mei ta tatou i kite ana, kua taiku muaia ta Saphana tamaiti ko Ahikama ma te pupu komono tei tukunaia atu ki te vaine peroveta ko Hulada. Te akakite ra tetai puka: “Noatu kare i akakiteia mai to Ahikama taoonga i roto i te Pipiria Epera, te papu ra e e taoonga teitei tona.”

 No etai 15 mataiti i muri mai i taua tupu anga, kua o atu to Ieremia oraanga ki roto i te tumatetenga. I te akamatakite anga aia i te tangata no runga i to Iehova akakoroanga no te akapou ia Ierusalema, “kua opu atura te kau taunga, e te au peroveta, e te tangata katoa iaia, na ko atura, Ka mate takiri koe na.” Eaa i reira tei tupu mai? Te na ko ra taua tataanga: “Tei ia Ieremia ra te rima o Ahikama, te tamaiti a Saphana, kia kore aia e tukuia atu ki te rima o te tangata kia ta mai iaia ra.” (Ieremia 26:1-24) Eaa ta teia e akaari mai nei? Te akakite ra The Anchor Bible Dictionary e: “Kare anake teia e akapapu mai ana i te tupu anga i te mana akaaere o Ahikama, mari ra te akakite katoa maira e kua akono aia, mei tetai atu au mema o te pamiri o Saphana, i te tu takinga meitaki kia Ieremia.”

Vaitata i te 20 mataiti i muri mai, i muri ake i te akapou anga a Babulonia ia Ierusalema i te 607 M.T.N. e kua apai atu i te maata anga o te tangata ki roto i te tuikaa anga, kua ikiia te utaro a Saphana ko Gedalia, te tamaiti a Ahikama, ei kavana ki rungao i te au ngati Iuda tei vai mai. Kua akono ainei aia, mei tetai atu o to Saphana au mema pamiri, ia Ieremia? Te tatau ra te tataanga Pipiria e: “Aere atura oki a Ieremia kia Gedalia, te tamaiti a Ahikama, ki Mizepe; noo iora ki ona ra, i rotopu i te au tangata i vaooia ki runga i te enua ra.” I nga mea marama i muri mai, kua tamateia a Gedalia, e kua apai atu te au ngati Iuda tei vai mai ia Ieremia ma ratou i te neke anga ratou ki Aiphiti.​—Ieremia 40:5-7; 41:1, 2; 43:4-7.

Gemaria Raua ko Mikaia

Kua rave te tamaiti a Saphana ko Gemaria e te utaro ko Mikaia i tetai tuanga puapinga i roto i te au tupu anga te akatakaia ra i roto ia Ieremia pene 36. Te tuatau vaitata i te 624 M.T.N., i roto i te rima mataiti o te Ariki ko Iehoiakima. Kua tatau maata a Baruka, te tekeretere o Ieremia, mei te puka i te au tuatua a Ieremia i te are o Iehova, “i te pia o Gemaria, te tamaiti a Saphana.” Ma te tau ra, kua “akarongo akerā Mikaia, te tamaiti a Gemaria, te tamaiti a Saphana, i te au tuatua katoa a Iehova, i roto i taua buka ra.”​—Ieremia 36:9-11.

Kua akakite atu a Mikaia ki tona metua tane e te katoa anga o te au tamariki ariki no runga i te pokaikai tuatua, e kua inangaro pouroa ratou i te akarongo i ta te reira e akakite ra. Akapeea ratou i te ariu anga? “E ope akera taua tuatua ra i te akarongoia e ratou ra, kua mataku ua iora ratou tetai e tetai: e kua karanga atura kia Baruka, E riro matou i te akakite ki te ariki i teia katoa nei au tuatua.” Inara, i mua ake ka tuatua ei ki te ariki, kua ako atu ratou ia Baruka: “Ka aere ka pipini, korua ko Ieremia, e auraka e tangata e kite i to korua ngai.”​—Ieremia 36:12-19.

Mei tei tapapaia, kua kopae te ariki i te akakite anga i roto i te pokaikai tuatua e kua tutungi taki tai i te reira. Ko etai au tamariki ariki, kapiti mai  i te tamaiti a Saphana ko Gemaria, kua ‘pati akatenga atura i te ariki ra e auraka e tungia taua pokaikai ra ki te ai; kare rava aia i akarongo ia ratou.’ (Ieremia 36:21-25) Te taopenga ra te puka Jeremiah​—An Archaeological Companion: “E tangata turu pakari a Gemaria ia Ieremia i roto i te aua o te Ariki ko Iehoiakima.”

Elasa Raua ko Iaazania

I te 617 M.T.N., kua akaaere atu a Babulonia i te patireia o Iuda. E tauatini ua atu te au ngati Iuda, “te aronga mamaata katoa, e te au tangata toa katoa . . . e te au taunga tarai rakau, e te au tupaki auri katoa,” kua apainaia ki roto i te tuikaa anga, kapiti atu i te peroveta ko Ezekiela. Kua riro a Matania, tona ingoa kua tauiia e te au Babulonia kia Zedekia, e ko te ariki ou ma te turanga akaaka. (2 Ariki 24:12-17) I muri mai kua tuku atu a Zedekia i tetai pupu komono tei kapiti mai i te tamaiti a Saphana ko Elasa ki Babulonia. Kua oronga atu a Ieremia i tetai reta kia Elasa ma te akakite anga puapinga mei ia Iehova ki te au ngati Iuda tei akatuikaaia.​—Ieremia 29:1-3.

No reira te akakite maira te tataanga Pipiria e kua taangaanga a Saphana, e tana tamariki tamaroa e toru, e tana nga utaro e rua i to ratou au turanga rongonui kia turu i te akamori anga mou e te peroveta tiratiratu ko Ieremia. Akapeea te tamaiti a Saphana ko Iaazania? Kare mei tetai au mema o te pamiri o Saphana, i te akaraanga kua rave aia i te akamori anga itoro. I roto i te ono mataiti i te tuikaa angaia a Ezekiela i Babulonia, me kare penei vaitata i te 612 M.T.N., kua rauka i te peroveta tetai orama i roto i reira kua oronga te 70 tangata i te atinga kakara ki te au itoro i te iero o Ierusalema. I roto ia ratou ko Iaazania, ko tetai ua tei taikuia te ingoa. Penei te akakite mai nei teia e e mema rongonui aia no teia pupu. (Ezekiela 8:1, 9-12) Te akatutu maira to Iaazania akaraanga e noatu kua utuutuia mai i roto i tetai pamiri akono i te Atua kare te reira e akapapu i to tetai riro anga mai ei tangata akamori tiratiratu ia Iehova. E apainga taki tai ta te au tangata tataki tai no tona uaorai aerenga.​—2 Korinetia 5:10.

Te Tuatua Enua o Saphana e Tona Pamiri

I te tae anga ki te tuatau i akono ei a Saphana e tona pamiri i tetai tuanga i roto i te au tupu anga tei tupu i Ierusalema, kua riro te taangaanga anga i te au apinga akairo ei mea matauia i Iuda. Kua taangaangaia te au apinga akairo ei akakite me kare ei taina i te au pepa e kua maaniia te reira mei te au toka apinganui, te auri, te nio erepani, me kare te io. I te maata anga o te taime kua taraiia te ingoa o te ona o te apinga akairo, te ingoa o tona metua e, i tetai taime, te taoonga o te ona ki runga i te reira.

 Kua kiteaia e au anere ua atu au apinga akairo Epera i runga i te au karakaraea. Kua akakite te Poropeta ko Nahman Avigad, e tangata kite i te apii epigraphy Epera, te apiianga i te au tataanga taito e: “Ko te au tataanga o te apinga akairo anake tetai tumu epigraphy Epera te taiku ra i te au tangata tei kiteaia mei te Pipiria.” Kua kiteaia ainei tetai apinga akairo tataanga no runga ia Saphana me kare tona au mema pamiri? Ae, te ira ra te ingoa o Saphana e tana tamaiti ko Gemaria i runga i tetai apinga akairo te akaariia maira i te kapi 19 e te 21.

Te karanga katoa ra te aronga kite penei kua taikuia e a au mema ke atu o te pamiri i runga i te apinga akairo​—ko Azalia, te metua tane o Saphana; ko Ahikama te tamaiti a Saphana, ko Gemaria te tamaiti a Saphana; e Gedalia, tei taikuia i te akaraanga i runga i tetai apinga akairo e ko “tei tutara i te Are.” Kua manakoia te a o teia au apinga akairo e no Gedalia ia, te utaro a Saphana, noatu rai kare tona metua tane ko Ahikama, i taikuia ana. Te akakite maira tona taoonga i runga i te apinga akairo e koia tetai o te au opita teitei roa atu i roto i te au-enua.

Eaa ta Tatou ka Apii Mai?

Mei teaa te meitaki i te akaraanga tei akanooia e Saphana e tona pamiri i te taangaangaanga i to ratou turanga akaaere ei turu i te akamori anga mou e ia Ieremia tiratiratu! Ka rauka katoa ia tatou i te taangaanga i ta tatou au apinga e kia akakeuia kia turu i ta Iehova akaaerenga e to tatou au taeake irinaki.

E mea puapinga e te akamaroiroi anga i te pae akarongo no tatou kare anake kia tatau putuputu i te Pipiria pera katoa kia ko oonu i roto i te reira e kia akamatau ia tatou uaorai ma taua au kite taito o Iehova mei ia Saphana ra e tetai atu au mema o tona pamiri. Ko ratou katoa tetai o te “urupu maata i kite nei” to ratou au akaraanga ka aru tatou.​—Ebera 12:1.

[Tataanga Rikiriki i Raro]

[Pia i te kapi 22]

Hulada​—Tetai Vaine Peroveta Rongonui

I te akarongoanga i te tatauanga o “te buka ture” tei kiteaia i roto i te iero, kua ota atu te Ariki ko Iosia ia Saphana e tetai au opita turanga teitei e a kia “ui kia Iehova” no runga i taua puka ra. (2 Ariki 22:8-20) Ka kitea e te pupu komono te pau anga kiea? Ko Ieremia e penei ko Nahuma raua ko Zephania, pouroa e au peroveta e e aronga tata Pipiria te noo ra i Iuda i taua taime ra. Inara, kua aravei atu te pupu komono i te vaine peroveta ko Hulada.

Te akakite ra te puka Jerusalem​—An Archaeological Biography e: “Ko te mea umere rava no runga i teia tupu anga koia oki ko te tua o te turanga tane e te vaine kare i tuatuaia ana. Kare tetai i manako ana e e mea tau kore e kia apai atu tetai kumiti tane i te Pokaikai Tuatua o te Ture ki te vaine kia akataka i tona aite anga. I te akakite anga aia i te reira ei tuatua na te Atu, kare tetai i ekoko ana i tona mana no te akataka i taua tumu manako. E putuputu te taime kua manako kore ia teia tupu anga e te aronga apii te akataka ra i te tuanga angaanga a te vaine i roto ia Iseraela taito.” E tika, te tuatua akakite tei rauka mai no ko mai ia Iehova.

[Tutu i te kapi 21]

(No runga i teia, akara i te puka)

To Saphana Papaanga Pamiri

Mesulama

↓

Azalia

↓

Saphana

↓ ↓ ↓ ↓

Ahikama Elasa Gemaria Iaazania

↓ ↓

Gedalia Mikaia

[Tutu i te kapi 20]

Kua pati akatenga a Gemaria e tetai atu ia Iehoiakima auraka e tutungi i te pokaikai tuatua no ko mai ia Ieremia

[Tutu i te kapi 22]

Ko Iaazania, noatu e mema no te pamiri o Saphana, kua kiteaia i roto i tetai orama te akamori ra i te au itoro

[Akameitakianga no te Tataanga i te kapi 19]

Courtesy Israel Antiquities Authority

[Akameitakianga no te Tataanga i te kapi 21]

Courtesy Israel Antiquities Authority