“Te Au Tangata Pakari e Toru”​—Koai ma Ratou?

Te au tutu anau anga te akatutu maira e toru tangata tei akakakauia e ma ta ratou au kamera, i te taeanga ki tetai are o te manu te ngai e takoto ra te pepe ko Iesu i roto i tetai pia vairanga kai a te manu. Te aronga atoro akakakau maneaia kua matauia i te kapikiia ko te au tangata pakari e toru. Eaa ta te Pipiria e karanga ra no runga ia ratou?

Kia tau ki te Pipiria, te karangaia ra e ko te au tangata pakari ra “mei te itinga o te rā mai,” e ko te reira te ngai i kite ei ratou i te anau anga o Iesu. (Mataio 2:1, 2, 9) Penei kua roa te tuatau te aere anga teia au tangata ki Iudea. I te openga ra i te kitea angaia e ratou a Iesu, kare aia i te pepe anau ouia i roto i te are o te manu. Kareka ra, kua kite atura te au tangata ia Maria e “taua tamaiti iti ra” i te nooanga i roto i tetai are.​—Mataio 2:11.

Te kapiki ra te Pipiria i teia au tangata e magi, me kare e ‘au tangata akara etu,’ e kare te reira i akakite mai e tokoia ratou. Kua akataka mai The Oxford Companion to the Bible: “Te piri anga i rotopu i te purepure e te akara etu kua akaataia mai i roto i te tu umere anga o te aronga atoro ra i te etu tei taki atura ia ratou ki Betelehema.” Kua akaapa taka meitaki mai te Pipiria i te au tu ravarai no te manamana e te peu a te au Babulonia i te tautaanga kia rauka mai te akakite tuatua mei te au etu ra.​—Deuteronomi 18:10-12; Isaia 47:13.

Te akakite tuatua tei akakiteia ki teia au tangata nei kare i taki atu ki tetai mea meitaki. Kua akakeu te reira i te riri vareae o te ariki kino ra ko Heroda. Kua akatupu katoa teia, i te oro anga a Iosepha, Maria, e Iesu ki Aiphiti e te tamate katoatoa anga i te au tamariki tamaroa i Betelehema “tei tae ki te rua o te mataiti ra e tei kore.” Kua kite papu meitaki a Heroda i te tuatau e anauia mai ei a Iesu mei tana i kite mei ko mai i te au tangata akara etu ra. (Mataio 2:16) I te manako anga i te au manamanata ravarai i akatupuia e ta ratou atoro anga, e mea tau i reira i te taopenga e ko te etu ta ratou i kite e te tuatua no runga i “te Ariki anau ou o te ngati Iuda nei” no ko mai ia i te enemi o te Atua, ko Satani te Tiaporo, tei inangaro i te takore atu ia Iesu.​—Mataio 2:1, 2.