Te Maara ra Ainei ia Koe?

Kua ariki ainei koe i te tatauanga i te au itiu i ou akenei o Te Punanga Tiaki? Ka akara ana me ka rauka ia koe i te pau i te au uianga te ka aru mai:

• Akapeea te “kite akono meitaki” e riro ei ei paruru anga? (Maseli 1:4)

Ka rauka i te reira i te akamatakite ia tatou kia kite i te au tu kino i te pae vaerua e te akakeu anga ia tatou kia parani i tetai aerenga tau, mei te kopaeanga i te au timataanga ainga i te ngai angaanga ra. Te tauturu ra te reira ia tatou kia kite e e tu apa ua to te au oa Kerititiano, te ka rauka i te akaneke ia tatou kia kopae ke i te au riri anga viviki me akaririia mai. Ka tauturu katoa te reira ia tatou kia kopae ke i te au taomi anga i te pae apinga te ka opara ke atu ia tatou i te pae vaerua.​—8/15, kapi 21-4.

• Akapeea tetai e riro mai ei ei puapinga ei tangata tupu ra?

E rua mataara e riro ei ei tangata tupu memeitaki te riro mai anga ei tangata oronga meitaki ua e ei tangata rave aroa ra. E puapinga te reira kia riro mai ei tangata tupu meitaki me tupu te tu kino. Te tauta ra te Au Kite o Iehova kia riro mai ei au tangata tupu meitaki na te akamatakiteanga i tetai atu e kare e roa atu ana ka tupu mai te tupu anga ra, ta te Atua ka rave i te takore anga i te kino.​—9/1, kapi 4-7.

• Kia tau ki te Pipiria, koai ma te aronga tapu tika tikai, e akapeea ratou i te tauturu anga i te au tangata?

Te au Kerititiano mua ravarai ra e aronga tapu tika tikai, tei akariroia kia pera e te Atua, kare na te au tangata me kore na te au akaaerenga ra. (Roma 1:7) I te akatu akaouia anga ki te oraanga i te rangi, ka piri atu te aronga tapu ma Karaiti i te akameitakianga i te aronga tiratiratu i runga i te enua nei. (Ephesia 1:18-21)​—9/15, kapi 5-7.

• Te kiteanga i tetai apinga no runga i te au oro taemoemo anga i Ereni taito ra eaa te puapinga ka rauka ki te au Kerititiano?

Te au tataanga a nga apotetoro ko Petero raua ko Paulo e au akatutu anga tei akanooia ki runga me kore e au manako no te au tarekareka anga taito. (1 Korinetia 9:26; 1 Timoteo 4:7; 2 Timoteo 2:5; 1 Petero 5:10) No tetai tangata oro taemoemo taito ra, e mea puapinga kia rauka tetai tangata akamatau meitaki, kia akono i tei tau, e kia akatano atu ki tana au tauta anga meitaki. Te tika ra te reira no runga i te au tauta anga i te pae vaerua a te au Kerititiano i teia tuatau.​—10/1, kapi 28-31.

• Eaa te au akaaoanga e te au tutaki anga i te utuutuanga i te tamariki i tetai enua ke?

E manganui te au tamariki tei viviki i te kite i tetai reo ou i to ratou au metua, penei ka ngata i te marama i te manakoanga e te au ariu anga o ta ratou au tamariki. E penei kare i te mea ngoie i te tamariki i te marama i te au apiianga Pipiria i roto i te reo o to ratou nga metua. Inara, ka akamaroiroiia te au pirianga ngutuare me apii te nga metua ra i to raua reo ki ta raua tamariki, penei i reira i kite ei i nga reo e rua e te manako anga ei tuanga no nga peu e rua ra.​—10/15, kapi 22-6.

• Eaa ra te apiianga kia tataraara i puapinga ei?

Ko tetai tataraara anga ngakau tae e putuputu te taime e mataara ia te ripea ra i tetai pirianga akakinoia. Kua oronga mai te Pipiria i te au akaraanga no te mana te ka rauka no tetai tataraara anga. (1 Samuela 25:2-35; Angaanga 23:1-5) Putuputu te taime, me taumaro nga tangata e rua, te vaira te akaapa anga ki nga tua e rua. No reira, te umuumuia ra te au akatikaanga tau e te au tataraara anga.​—11/1, kapi 4-7.

• Eaa ra te pere moni, noatu e meangiti ua te moni, i kino ei?

Te akatupu ra te pere moni i te tu akateitei, i tetai tu taemoemo, e te noinoi, ta te Pipiria e akaapa ra. (1 Korinetia 6:9, 10) Te manganui tei kaki ra i te pere moni kua akamata mai mei te mataiti ou anga na te tukuanga i te au peti meangiti.​—11/1, kapi 31.

• I te mea e manganui te au puka o te Pipiria kua tataia i roto i te reo Ereni, eaa ra i anoanoiai te urianga i te Pipiria ki roto i te reo Ereni, e eaa te au tupu anga?

E tuke tikai te Ereni i teia tuatau mei te Ereni o te urianga Septuagint o te au Tuatua Tapu Epera e mei te au Tuatua Tapu Ereni Kerititiano ra. Kua tere atu i te au anere mataiti i ou akenei e manganui te au tauta anga kia uriia etai me kore te katoa anga o te Pipiria i roto i te reo Ereni e tuatuaia ra. I teia ra, te vaira e 30 urianga o te Pipiria, i te katoa anga me kore i tetai tuanga, te tatauia ra e te au tangata Ereni, ko tetai tei kite meitakiia ra ko te New World Translation of the Holy Scriptures, neneiia i te 1997.​—11/15, kapi 26-9.

• Eaa ra i kore ei e umuumuia te tuanga ngauru no te au Kerititiano ra?

I raro ake i te Ture tei orongaia ki Iseraela taito ra, te aite anga no te tuanga ngauru te turuanga i te kopu Levi e te akonoanga i te aronga e anoano ra. (Levitiku 27:30; Deuteronomi 14:28, 29) Na te matenga atinga o Iesu i akakore atu i te Ture e tona umuumu anga tuanga ngauru ra. (Ephesia 2:13-15) I roto i te putuputuanga mua, te akatauanga oki kia oronga te Kerititiano tataki tai ra i tei tau ra ki tana au apinga e i tana i akakoro i roto i tona ngakau. (2 Korinetia 9:5, 7)​—12/1, kapi 4-6.

• Te karanga ra ainei Apokalupo 20:8 e ko te timata anga openga ra, e maata ua atu te numero ka pikikaaia e Satani?

Te karanga ra te irava e ko taua aronga tei pikikaaia “mei te one taatai.” I roto i te Pipiria, ko taua tuatua ra i te maata anga o te taime te aite anga ko tetai numero kitea koreia, kare i tuatuaia ana e e maata tikai te reira. To Aberahama uanga, mei “te onetea i taatai,” kua riro mai e 144,000 peretana i te pae atu ia Iesu Karaiti. (Genese 22:17; Apokalupo 14:1-4)​—12/1, kapi 29.