“Kia Aroa Kotou ia kotou Uaorai”

“Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—IOANE 13:35.

1. Eaa te tu ta Iesu i akaketaketa mai i mua poto ake i tona matenga?

“E AKU au tamariki e.” (Ioane 13:35) Ma taua tuatua maru ra, kua tuatua atu a Iesu ki tana au apotetoro i te aiai i mua ake i tona matenga. Kare a tatou tataanga i roto i te au tataanga Evangeria e kua taiku a Iesu i teia tuatua aroa i mua ana i te tuatuaanga kia ratou. Inara, i taua po taka ke ra, kua akakeuia aia kia taangaanga i teia tuatua maru kia oronga atu i te aroa oonu tana i manako ngakau no tana au pipi. Ko te tika, kua tuatua a Iesu no te aroa no etai 30 taime i taua po ra. Eaa ra aia i orongai i taua akaketaketa anga ra ki teia tu?

2. Eaa ra te akaarianga i te aroa i puapinga maatai no te au Kerititiano?

² Kua akataka mai a Iesu e eaa i puapinga maata ei te aroa. “Ko te mea teia,” tana i tuatua, “e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35; 15:12, 17) I te riroanga ei pipi na Karaiti te aere kapipiti ra ma te akaarianga i te aroa taokotaianga taeake. Te akatakaia maira te au Kerititiano mou, kare na tetai tu kakau anga me kare na etai peu takake ra, mari ra na te aroa pumaana e te maru ta ratou e akaari ra tetai ki tetai. Ko te tu anga i teia tu meitaki o te aroa ko te rua ia o nga umuumu anga maata e toru o tetai pipi a Karaiti tei taikuia maira i te akamata anga o te atikara i mua akenei. Eaa te ka tauturu ia tatou kia rave ua atu i teia umuumu anga?

“Kia Maata Ua Atu Rai”

3. Eaa te akoanga no runga i te aroa ta te apotetoro ko Paulo i oronga?

³ Mei te tu i roto i te au pipi a Karaiti i te anere mataiti mua ra, te kitea nei teia aroa meitaki i teia tuatau i roto i te au pipi tikai a Karaiti. Kua tata atura te apotetoro ko Paulo ki te au Kerititiano i te anere mataiti mua ra: “I te tuatua i te aroa taeake  nei, auraka ua rai au e tata atu i te tuatua ia kotou: kua apiiia kotou uaorai e te Atua i te aroa ia kotou uaorai. E te pera tika nei oki kotou ki te au taeake ravarai.” Noatu rai, kua kapiti katoa atura Paulo: “Kia maata ua atu rai.” (1 Tesalonia 3:12; 4:9, 10) Ka anoano katoaia tatou kia akarongo i ta Paulo akamaroiroianga e kia tauta i te akaari i te aroa ki tetai e tetai “kia maata ua atu rai.”

4. Kia tau ki ta Paulo raua ko Iesu, kiaai ma ta tatou oronga anga tau i te akamanako anga taka ke?

⁴ I taua reta akauruia rai, kua akamaroiroi atura Paulo i tona au oa akarongo kia “akapumaana atu i te ngakau taitaia” e kia “tauturu atu i tei apikepike.” (1 Tesalonia 5:14) I tetai atu atianga, kua akamaara atu aia i te au Kerititiano e ko te aronga “tei maroiroi nei, ka akakoromaki i te apikepike o te maroiroi kore e tikai.” (Roma 15:1) Kua oronga katoa a Iesu i te apiianga no te tauturuanga i te aronga apikepike ra. I muri ake i te totouanga i te reira i te po o tona tapekaanga ka akaruke a Petero iaia, kua tuatua a Iesu kia Petero: “Kia akaariuia mai koe ra, ka akatinamou atu i to au taeake.” No teaa ra? No te mea, ka akaruke katoa ratou ia Iesu e no reira ka umuumuia te tauturu anga. (Luka 22:32; Ioane 21:15-17) No reira, te arataki maira te Tuatua a te Atua ia tatou kia oronga atu i to tatou aroa ki te aronga apikepike i te pae vaerua e penei kua kore te pirianga ma te putuputuanga Kerititiano ra. (Ebera 12:12) Eaa tatou i tau ei kia rave i te reira? E rua nga akatutu anga maroiroi a Iesu i oronga mai tei pau maira.

Te Mamoe i Ngaro e te Moni i Ngaro

5, 6. (a) Eaa nga akatutuanga poto e rua ta Iesu i akakite maira? (e) Eaa ta teia nga akatutu anga i akakite no Iehova?

⁵ Kia apii atu i te aronga akarongo atura kiaia i to Iehova ra manako anga no te aronga tei aere ke atura, kua oronga atu a Iesu e rua akatutu anga poto ua. Tetai no te tiaki mamoe. Kua tuatua a Iesu: “Koai ia tangata i o kotou nei, okotai anere ana mamoe, kia ngaro ra tetai, kare ainei aia e vaio i te iva ngauru ma iva i te medebara ra, e aere, ka kimi ei i tei ngaro ra, e kia kitea atu? E kitea atura e ia, tuku iora ki runga i tona pakuivi ma te rekareka. E tae maira aia ki te ngutuare, kua akaputuputu maira aia i te au taunga nona, e te aronga tangata tupu ra, kua na ko atura kia ratou, E rekareka katoa tatou; kua kitea oki iaku taku mamoe i ngaro ra. E akakite atu oki au kia kotou, E rekareka maata to runga i te rangi i te tangata ara okotai kia tataraara, i te aronga tuatua-tika, e kia iva ua atu te ngauru anga ma iva, te kore e tau ia ratou i te tataraara.”​—Luka 15:4-7.

⁶ Te rua o te akatutu anga no tetai vaine. Kua tuatua a Iesu: “Koai oki ïa vaine, okotai ngauru ana diderama, kia ngaro ra tetai, kare ïa e tutungi i te lamepa, ka purumu ei i te are, ka kimi marie ei, e kia kitea atu e ia? E kitea atura e ia kua akaputuputu maira aia i te au taunga nona e te au vaine rikiriki tupu ra, ka na ko atu ei, E rekareka katoa tatou; kua kitea oki iaku te diderama i ngaro iaku ra. E karanga atu au kia kotou, mei te reira katoa te tu o to te au angela a te Atua ra rekareka, kia tataraara te tangata rave ara okotai ra.”​—Luka 15:8-10.

7. Eaa nga apiianga e rua ta nga akatutuanga no te mamoe i ngaro ra e te moni i ngaro ra, no tatou?

⁷ Eaa ta tatou ka kite mei teia nga akatutuanga poto ua? Te akaari maira ratou kia tatou (1) akapeea tatou me manako ngakau i te aronga kua apikepike e (2) eaa ta tatou kia rave i te tauturu ia ratou. Ka akamanako ana tatou i teia au tumu.

Kua Ngaro Inara Kua Akaperepereia

8. (a) Akapeea te akono anga a te tiaki mamoe ra e te vaine oki ki to raua ngere anga? (e) Eaa ta raua akono anga i akakite mai kia tatou e i akapeea to raua manako anga no te mea i ngaro ra?

⁸ I nga akatutuanga e rua kua ngaro tetai apinga, inara ka akamanako i te tupuanga ki nga ona. Kare te tiaki mamoe i tuatua ana: ‘Eaa oki te mamoe okotai me e 99 te toe ra naku? Ka meitaki ua au me kare te reira.’ Kare te vaine i tuatua e ‘Eaa ka manata ei no te moni okotai ra? Te merengo ua nei au i te iva te vai nei iaku.’ Kareka ra, kua kimi te tiaki mamoe i tana mamoe i ngaro mei te mea rai e ko tera anake tana. E ko te vaine kua manako ngakau no tana moni i ngaro mei te mea rai e kare atu ana moni. I roto i teia nga turanga e rua kua riro te mea i ngaro ei mea akaperepereia i roto i te manako o te ona. Eaa ta teia e akatutu maira?

9. Eaa te akatutuia maira e te manako tei akaariia maira e te tiaki mamoe e te vaine ra?

 ⁹ E akara i ta Iesu ra taopenga anga i nga tumu e rua ra: “E rekareka maata to runga i te rangi i te tangata ara okotai kia tataraara,” e “e karanga atu au kia kotou, Mei te reira katoa te tu o to te au angela a te Atua ra rekareka, kia tataraara te tangata rave ara okotai ra.” No reira, te tamanako anga o te tiaki mamoe e te vaine ra te akaata ra, i roto i tona uaorai tu rikiriki, i te au manako ngakau o Iehova e tana au mea ora i te rangi ra. Mei tei ngaro ra kua vai ei mea okomaata i nga mata o te tiaki mamoe ra e to te vaine oki, mei te reira katoa te aronga tei aere ke atura e kua kore te pirianga ma te au tangata o te Atua ra kua vai ei mea okomaata i nga mata o Iehova ra. (Ieremia 31:3) Penei ko taua aronga ra e apikepike i te pae vaerua, inara kare ratou i te meameaau. Noatu rai to ratou tu apikepike, i tetai tu penei te mou ra ratou i ta Iehova au umuumu anga. (Salamo 119:176; Angaanga 15:29) No reira, mei te tuatau i topa ra, te taroaroa ra a Iehova kia “tuaru ia ratou i mua i tona mata.”​—2 Ariki 13:23.

10, 11. (a) Akapeea to tatou anoano kia manako atu ki te aronga tei aere ke atura mei te putuputuanga? (e) Kia tau ki ta Iesu nga akatutu anga e rua ra, akapeea e raukai ia tatou kia akakite i to tatou manakoanga no ratou ra?

¹⁰ Mei ia Iehova raua ko Iesu rai, te manako oonu katoa ra tatou no te aronga te apikepike ra e te ngaro ra i te putuputuanga Kerititiano. (Ezekiela 34:16; Luka 19:10) Ka manako tatou i tei apikepike ra i te pae vaerua mei tetai mamoe ngaro ra​—kare mei tetai kare e puapinga i te tauturu. Kare tatou e manako e: ‘Eaa ka manako atu ei i tei apikepike ra? Te meitaki ua ra te putuputuanga noatu kare aia.’ Kareka ra, mei ia Iehova rai, ka manako atu tatou i te aronga tei aere ke ra, mari ra te anoano ra kia oki akaou mai ei aronga akaperepere.

¹¹ Akapeea, i reira, e raukai ia tatou i te akakiteanga i to tatou manako manata? Te akakite maira nga akatutuanga e rua a Iesu e ka rauka ia tatou i te rave akapera (1) na te tamata i te akono, (2) na te akono maru, e (3) na te rave akatenga. E akara tatou i teia nga tu e okotai i te taime.

Tamata i te Akono

12. Eaa ta te au tuatua “ka kimi i tei ngaro ra” e akakite maira kia tatou no te tu akono o te tiaki mamoe ra?

¹² I te mea mua o nga akatutu anga e rua ra, te tuatua ra a Iesu e ko te tiaki mamoe “ka kimi ei i tei ngaro ra.” Kua tamata i te akono te tiaki mamoe e kua tauta pakari tikai kia kitea te mamoe ngaro ra. Kare te tu ngata, te kino, e te mamao e akaunui iaia ki muri. Ei tuke anga, kua tauta tamou atura te tiaki mamoe “kia kitea atu.”​—Luka 15:4.

13. Akapeea ta te au tangata tiratiratu i muatangana ra akono anga i te umuumu anga o te aronga apikepike ra, e akapeea e raukai ia tatou kia aru i taua au akatauanga Pipiria ra?

¹³ Aiteite katoa, i te itaeanga ki tetai tangata te anoano ra i te akamaroiroi anga e putuputu te umuumuia kia riro na tei maroiroi ra e tamata i te akono. Kua kite te aronga tiratiratu o muatangana i teia. Ei akatauanga, i te kite anga a Ionatana, te tamaiti a te Ariki ko Saula, i tona oa piri vaitata ko Davida i te umuumu anga akamaroiroi anga, “kua tu akera [a Ionatana], e aere atura ki taua vaorakau ra kia Davida, e kua akamaroiroi atura iaia i te Atua.” (1 Samuela 23:15, 16) I etai anere mataiti i muri akera, i te kite anga te Kavana ko Nehemia e ko etai o tona au taeake ngati Iuda kua apikepike, koia katoa “kua tu ki runga” e kua akamaroiroi atura ia ratou ‘e akamaara ia Iehova.’ (Nehemia 4:14) Tatou katoa i teia tuatau ka tau kia anoano kia ‘tu ki runga’​—tamata i te akono​—kia  akamaroiroi atu i te aronga te apikepike ra. Inara koai ma i roto i te putuputuanga ra ka tau kia rave i te reira?

14. Koai ma i roto i te putuputuanga Kerititiano te ka tau kia itae atu ki te aronga tei apikepike ra?

¹⁴ Tei te aronga pakari Kerititiano, tikai, te apainga ‘kia akaketaketa i te rima apikepike. . . e e akapakari i te turi ru ua ra’ e kia ‘karanga atu ki te ngakau taitaia, Kia maroiroi; auraka e mataku.’ (Isaia 35:3, 4, NW; 1 Petero 5:1, 2) Inara, e akara e ko ta Paulo akamaroiroi anga “e akapumaana atu i te ngakau taitaia” e “e tauturu atu i tei apikepike” kare i te aronga pakari anake ua. Kareka ra, kua aratakiia atu ta Paulo au tuatua ki te katoa anga o ‘te ekalesia i Tesalonia ra.’ (1 Tesalonia 1:1; 5:14) No reira ko te itaeanga ki te aronga te apikepike ra e angaanga ia na te au Kerititiano katoatoa. Mei te tiaki mamoe i te akatutu anga ra, ka tau te au Kerititiano tataki tai ra kia akakeuia kia aere “ka kimi ei i tei ngaro ra.” Inara, ka meitaki rava atu te rave anga i teia na te taokotai anga ma te aronga pakari ra. Ka rauka aina ia koe kia rave i etai au takainga kia tauturu atu i tetai tei apikepike ra i roto i toou putuputuanga?

Kia Akono Maru

15. Penei eaa te tiaki mamoe ra i akono ei na roto i te tu tana i rave ra?

¹⁵ Eaa ta te tiaki mamoe ra i rave i te kitea anga te mamoe i ngaro ra? “Tuku iora ki runga i tona pakuivi.” (Luka 15:5) Mei teaa ra te akatukianga e te akakiteanga te reira! Penei kua ori aere te mamoe ra no etai ra e te au po na roto i te au ngai kare ia i matau ana, penei paa kua o atu ki roto i te tamatakuanga a te au riona e arumaki ra. (Iobu 38:39, 40) Kare e ekoko anga e kua apikepike taua mamoe i te kore anga te kai. Kua apikepike kia akakore atu i tona uaorai maroiroi i te au arairai anga tei rokoia i te mataara oki ra ki te koro. No reira, kua piko iora te tiaki mamoe, kua taki maru akera i te mamoe, e kua apai na roto i te au ngai arairai katoa tae roa ki te anana. Akapeea e raukai ia tatou te akaata i te tiaki anga tei akaariia mai e teia tiaki mamoe?

16. Eaa tatou i tau ei kia akaata i te tu maru ta te tiaki mamoe ra i akaari ki te mamoe tei aere ke atura?

¹⁶ Te tangata kare i kapiti atu ana ma te putuputuanga penei kua roiroi i te pae vaerua. Mei te mamoe i akatakakeia mei te tiaki mamoe, penei kua ori aere tau kore ua taua tangata na roto i te ngai kino o teia ao. Ma te kore te paruruanga tei orongaia e te anana ra, te putuputuanga Kerititiano, kua akamaeu uaia aia ki te au akakinoanga a te Tiaporo, ‘te aaere nei mei te liona ngunguru ra, i te kimi anga i te tangata e pou iaia.’ (1 Petero 5:8) Pera katoa, kua apikepike ia aia no te ngereanga i te kai vaerua. No reira, koia anake uaorai penei kua apikepike aia kia autu atu i te au araianga te ka rokoia e ia i tona oki anga atu ki te putuputuanga. No reira, ka anoanoia tatou kia piko ki raro, mei tera te tu, e taaki maru i tei apikepike ra, e ka apai atu iaia. (Galatia 6:2) Akapeea e raukai ia tatou i te reira?

17. Akapeea e raukai ia tatou kia aru i te apotetoro ko Paulo ra me atoro tatou i tetai tei apikepike ra?

¹⁷ Te tuatua ra te apotetoro ko Paulo: “Me te apikepike ra tetai, kare ainei au e piri atu ki tona apikepike anga?” (2 Korinetia 11:29, The New English Bible; 1 Korinetia 9:22) E tu tangi to Paulo no te au tangata, kapiti katoa i te aronga apikepike. Kia anoano tatou kia akakite i te tu manako  ngakau aiteite no te aronga tei apikepike ra. Me te atoro ra i te aronga Kerititiano apikepike i te pae vaerua, e akapapu atu kiaia e okomaata aia i nga mata o Iehova e te tangiia ra e tona oa Au Kite ra. (1 Tesalonia 2:17) E akakite kiaia e te papa ra ratou i te tauturu atu iaia e te puareinga ra kia riro e ko tetai tei ‘anauia maira ei taeake no te tuatau e tumatetengaʼi ra.’ (Maseli 17:17; Salamo 34:18) Na ta tatou au tuatua manako ngakau aroa penei te apai maru marie ra iaia ki te turanga ka rauka iaia kia oki akaou mai ki te anana. Eaa ta tatou ka rave i muri akera? Te oronga maira te akatutuanga o te vaine e te moni i ngaro ra i te arataki anga no tatou.

Kia Rave Akatenga

18. (a) Eaa ra te vaine i roto i te akatutu anga ra i kore ei e manako ngakau manakonako kore ua? (e) Eaa te au tauta anga akatenga ta te vaine ra i akono, e eaa te tupu anga?

¹⁸ Te vaine i ngaro ra te moni kua kite e e akaaoanga te turanga ra inara kare i te manakonako kore. Naringa i topa te moni ki roto i tetai ngangaere maata, me kare ki tetai roto vari, oonu, penei ka manako aia e kare e kitea. Inara, i te kiteanga e tei roto i tetai ngai i tona are taua moni ra, ka rauka kia kitea, kua akamata aia i te kimi meitaki ma te akatenga. (Luka 15:8) Te mea mua, ka akaka aia i te ramepa kia akamarama i tona are poiri. I reira, ka purumu aia i te taua ma tana purumu, ma te manakonakoanga kia rongo i tetai tangitangi anga. I te openga, ka kimi matatio aia i te au ngai ravarai e te ngai araiia tae roa kia kanapanapa mai tetai moni ario. Kua tutakiia te tautaanga akatenga a te vaine ra!

19. Eaa te au apiianga i te tauturuanga i te aronga apikepike ra te ka rauka ia tatou mei te au angaanga a te vaine i roto i te akatutu anga no te moni i ngaro ra?

¹⁹ Mei ta teianei akakite anga i te akatutuanga ra te akamaara maira kia tatou, ko te apainga Tuatua Tapu kia tauturu i tetai Kerititiano apikepike kare i maata roa no ta tatou ka rauka. I taua taime rai, te kite ra tatou e te umuumuia ra te tauta anga. I te mea, kua tuatua te apotetoro ko Paulo ki te aronga pakari i Ephesia: “I te rave i te angaanga, e e turu atu oki kotou i te aronga apikepike, e tikaʼi.” (Angaanga 20:35a) E tamou marie i te manako e kare i kitea e te vaine ra te moni na te akaraanga takapini i tona are i etai taime ua. Kare, kua autu aia no te mea kua kimikimi tikai aia, “e kia kitea atu e ia.” Mei te reira katoa, me ka tauta tatou kia oki akaou mai tetai tei apikepike ra i te pae vaerua, ka tau ta tatou aravei anga kia akatenga e e akakoro anga oki. Eaa ta tatou ka rave?

20. Eaa te ka rauka kia raveia ei tauturu i te aronga apikepike ra?

²⁰ Akapeea e raukai ia tatou te tauturu i tei apikepike ra kia patu i tona akarongo e te ariki anga? Na te apii Pipiria nana uaorai i roto i tetai puka Kerititiano tau penei ko tei umuumuia. Ka tau oki, te akonoanga i te apii Pipiria ma tetai te apikepike ra ka akatika ia tatou kia tauturu iaia na roto i te tu putuputu e te tau. Penei te tika ra e na te akaaere kotinga e iki naai e oronga i te tauturu e umuumuia ra. Penei nana e akakite mai ko teea te au tumu kia apiiia e ko teea puka te mea meitaki ei tauturu. Mei te vaine i te akatutu anga tei taangaanga i te au apinga tauturu no te akatupu i tana angaanga, pera katoa i teia tuatau e au apinga  ta tatou ei tauturu ia tatou kia rave i ta tatou apainga orongaia mai e te Atua kia tauturu i te aronga te apikepike ra. E rua o ta tatou nga apinga ou, me kare nga puka, ka tauturu mai i teia tautaanga. Ko nga puka Akamori i te Atua Mou Anake e te Akavaitata Atu kia Iehova. *

21. Akapeea te tauturuanga i te aronga tei apikepike i te apai anga mai i te akameitakianga ki te katoatoa?

²¹ Te tauturuanga i te aronga te apikepike ra ka apai mai i te au akameitakianga ki te katoatoa. Ko tei tauturuia ka rekareka i te mataora anga no te riro anga kia taokotaiia ma te au oa mou ra. Ka kite tatou i te rekareka no te manako ngakau te ka rauka anake na te orongaanga. (Luka 15:6, 9; Angaanga 20:35e) Ka tupu te putuputuanga i roto i te tu maanaana i te rave anga te au mema tataki tai i te manakoanga aroa no etai atu. Ei runga roa, ka aere atu te ngateitei ki to tatou nga tiaki mamoe aroa ra kia Iehova raua ko Iesu, i te akaata angaia mai to raua inangaro kia turu i tei apikepike i roto i to raua au tavini i te enua nei. (Salamo 72:12-14; Mataio 11:28-30; 1 Korinetia 11:1; Ephesia 5:1) No reira, mei teaa ra te au tumu meitaki no tatou, kia tamou marie ‘kia aroa tatou ia tatou uaorai’!

[Tataanga Rikiriki i Raro]

Ka Rauka Ainei ia Koe te Akataka?

• Eaa ra te akaarianga aroa i puapingai no tatou tataki tai?

• Eaa tatou i tau ei kia akatotoa atu i to tatou aroa ki te aronga tei apikepike ra?

• Eaa te au apiianga ta nga akatutu anga no te mamoe i ngaro ra e te moni i ngaro ra i apii mai ia tatou?

• Eaa te au takainga tau ka rauka ia tatou kia rave ei tauturu atu i tetai tei apikepike?

[Au Uianga Apii]

[Au Tutu i te kapi 16, 17]

Te tauturuanga i te aronga apikepike, ka tamata tatou i te akono e kia maru e te rave akatenga

[Tutu i te kapi 16, 17]

Te tauturuanga i te aronga tei apikepike ra ka apai mai i te au akameitakianga ki te katoatoa