“Kia Maata to Kotou ua Anga”

“Kia maata to kotou ua anga; e riro kotou ei pipi naku i reira.”​—IOANE 15:8.

1. (a) Eaa te umuumu anga no te riroanga ei au pipi ta Iesu i taiku ki tana au apotetoro? (e) Eaa te uianga ta tatou ka tau kia ui kia tatou uaorai?

KO TE aiai i mua ake i tona matenga. Kua akono maata a Iesu i te taime kia akamaroiroi atu i tana au apotetoro ma te tuatua ngakau ki te ngakau. I teianei, e tika kua pati atu te turuaipo, inara ko Iesu, kua akakeuia e te aroa no tona au oa piri vaitata, kua tuatua ua atu. I reira, i roto i tana tuatua anga, kua akamaara atura aia kia ratou e okotai atu umuumu anga ta ratou e anoano ra kia vai ei au pipi nana. Kua tuatua aia: “Ko te mea ïa e akakakāiaʼi taku Metua, kia maata to kotou ua anga; e riro kotou ei pipi naku i reira.” (Ioane 15:8) Te rauka ra ainei ia tatou teia umuumu anga i teia tuatau no te riroanga ei pipi? Eaa te aiteanga e “kia maata to kotou ua anga”? E kite ei, e oki akaou tatou ki te tuatua anga i taua aiai ra.

2. Eaa te akatutu anga no te ua ta Iesu i akakite i te aiai i mua ake i tona matenga?

² Te akoanga kia maata te ua anga e tuanga no tetai akatutu anga ta Iesu i akakite atu ki tana au apotetoro. Kua tuatua aia: “Ko au te vine mou, e ko taku Metua te tanu-kai. E te au rara ua kore katoa i roto iaku nei, nana ïa e tipu ke atu; e te au rara ua katoa, nana ïa e tope, kia maata ua atu te ua. Kua mā ra kotou i tenana, i te tuatua taku i apii atu ia kotou. Ka topiri mai kiaku, e naku e topiri atu kia kotou. Mei te rara kare e ua koia anake ra, kia kore tei piri ki te vine ra; kare katoa kotou, kia kore e piri mai kiaku ra. Ko au te vine, kotou te au rara. . . . Ko te mea ïa e akakakāiaʼi taku Metua,  kia maata to kotou ua anga; e riro kotou ei pipi naku i reira. Mei taku Metua i akaperepere mai iaku nei, kua akaperepere katoa atu oki au ia kotou: kia noo kotou ma te akaperepereia atu e au. I akono kotou i taku au akauenga, e vai akaperepereia atu kotou e au.”​—Ioane 15:1-10.

3. Eaa ta te au pipi a Iesu i tika kia rave kia uua mai ei i te au ua?

³ I roto i teia akatutu anga ko Iehova te Tanu Kai, ko Iesu te vine, e ko te au apotetoro ta Iesu i tuatua atura te au rara. Me tauta pakari te au apotetoro ra kia “piri mai” ma Iesu, ka uua mai ratou. Kua akataka mai a Iesu i reira e akapeea te au apotetoro ra e autu ei i te tamou marieanga i teia pirianga puapinga maata: “I akono kotou i taku au akauenga, e vai akaperepereia atu kotou e au.” I muri akera, kua tata te apotetoro ko Ioane i te au tuatua aiteite ki tona au oa Kerititiano: “Te akono ra i [ta Karaiti] ra au akauenga, te noo ra ïa aia i roto iaia.” * (1 Ioane 2:24; 3:24) No reira, na te akono ra i ta Karaiti au akauenga, ka vai rai tana au pipi e piri atu kiaia, ei reira, ko taua pirianga ra ka rauka ia ratou kia uua mai. Eaa te akatutu maira i te au ua te ka tau tatou kia ua mai.

Ngai no te Tupu Anga

4. Eaa ta tatou ka kite mei te tika e ka “tipu ke atu” a Iehova i te au rara ua kore katoa ra?

⁴ I te akatutu anga o te vine ra, na Iehova e “tipu ke atu,” i te rara ua kore. Eaa ta teia e akakite mai nei kia tatou? Te akakite mai nei teia kia tatou e te umuumuia ra te au pipi katoatoa kare e kia uua anake mari ra te rauka katoatoa ra kia rave i te reira, noatu rai eaa to ratou turanga me kare te au kotinga oki. Ko te tika, ka tuke ta Iehova ra ravenga aroa, ‘kia tipu ke atu,’ me kare kia akakore atu, i tetai pipi a Karaiti no te koreanga e oti iaia tetai apinga kare ra e rauka iaia.​—Salamo 103:4; Kolosa 3:23; 1 Ioane 5:3.

5. (a) Akapeea ta Iesu ra akatutuanga i te akakite anga e ka rauka ia tatou te uua anga? (e) Eaa nga tu ua e rua ta tatou ka akamanako?

⁵ Te akaari katoa maira ta Iesu akatutu anga no te vine e i roto i te au kotinga o to tatou au turanga, ka tika tatou kia akataka i te ngai no te tupu anga i roto i ta tatou au angaanga ei pipi. E akara i akapeea ta Iesu akakite anga i te reira: “E te au rara ua kore katoa i roto iaku nei, nana ïa e tipu ke atu; e te au rara ua katoa, nana ïa e tope, kia maata ua atu te ua.” (Ioane 15:2) I te vaitata anga te openga o te akatutu anga, kua raurau atura Iesu ki tana au pipi “kia maata to kotou ua anga.” (Irava 8) Eaa te akakite anga, i konei? Ei au pipi, auraka tatou kia riro ei manako kore ua. (Apokalupo 3:14, 15, 19) Mari ra, ka kimi tatou i te au ravenga e tere atu ei ki mua i te uuaanga i te ua. Eaa te au tu ua ka tauta tatou kia uua maata atu? Te vaira (1) “te ua o te vaerua” (2) ta te Patireia au ua.​—Galatia 5:22, 23, NW; Mataio 24:14.

Te Au Ua o te Tu Kerititiano

6. Akapeea a Iesu Karaiti i te tuatua pakari anga no te ua mua o te vaerua te taikuia ra?

⁶ Tei akapapa muaia i roto i “te ua o te vaerua” ko te aroa. Na te vaerua tapu o te Atua e akatupu ana i te aroa ki roto i te au Kerititiano, no te mea te akarongo ra ratou i te akauenga ta Iesu i oronga mai i mua poto ake i tana tuatua anga i te akatutu anga no te ua akatupu vine. Kua tuatua aia ki tana au apotetoro: “E tuku atu au i te akauenga ou kia kotou, E aroa kotou ia kotou uaorai.” (Ioane 13:34) Ko te tika, i roto i tana tuatua anga katoa i taua po openga o tona oraanga i te enua nei, kua akamaaraara taokioki a Iesu i te au apotetoro i te umuumu anga kia akaari i te tu aroa.​—Ioane 14:15, 21, 23, 24; 15:12, 13, 17.

7. I akapeea ta te apotetoro ko Petero akaari anga e ko te uua anga te akakite maira i te tu aite ki to Karaiti?

⁷ Ko Petero, i reira i taua po ra, kua kite e ko te aroa tau ia Karaiti e te au tu aiteite ka tika kia akakiteia i roto i te au pipi tikai a Karaiti. E au mataiti i muri mai, kua akamaroiroi atura Petero i te au Kerititiano kia tatanu i taua au tu ra mei te akono meitaki, te aroa anga taeake, e te aroa. Kua kapiti katoa mai aia e na te raveanga i te reira ka arai ia tatou “i te akatau e te uua kore.” (2 Petero 1:5-8) Noatu eaa to tatou au turanga, te akakiteanga i te au ua o te vaerua ka itaeia e tatou. No reira, e tauta tatou kia akaari i te aroa, te takinga meitaki, te maru e etai atu tu tau ia  Karaiti ki tetai tu ki katoa, no te mea “i te pae i teia au mea nei kare e ture,” me kare e kotingaia. (Galatia 5:23) Ka tika, kia uua tatou “kia maata atu te ua.”

Uuaanga i te Ua Patireia

8. (a) Eaa te pirianga i rotopu i te au ua o te vaerua e to te Patireia ra? (e) Eaa te uianga te tau ra no ta tatou akamanako anga?

⁸ Te au ua karakara e te vai ka akamaata atu i te manea o te rakau. Inara, ko te puapinga o taua au ua ra te mamao roa atura i te manea. E puapinga katoa oki te au ua no te akaevaanga atu i te au rakau na roto i to ratou au ua. Mei te reira katoa, te au ua o te vaerua ka rave kia maata atu i te akamanea anake i to tatou tu Kerititiano. Te au tu mei te aroa e te akarongo te akakeu katoa ra ia tatou kia akatotoa atu i te ua mei te tuatua Patireia te kitea ra i te Tuatua a te Atua. E akara i akapeea ta te apotetoro ko Paulo ra akaketaketa anga i teia kapitianga puapinga. Kua tuatua aia: “Kua akarongo katoa matou, [tetai tuanga no te au ua o te vaerua] i tuatuaʼi.” (2 Korinetia 4:13) I teia tu, kua akataka katoa a Paulo, e “te apai i te atinga ra, i te akameitaki i te Atua, eiaa e tivata, koia oki ta te vaa nei”​—te rua o te tu o te au ua ta tatou ka tau kia akakite. (Ebera 13:15) Te vaira ainei tetai ngai i to tatou oraanga kia maata atu te uua anga, e kia “uua maata,” ei aronga akakitekite i te Patireia o te Atua?

9. Te aiteite ra ainei te uua anga ki te akariroanga i te au tangata ei au pipi? Akataka mai.

⁹ Kia pau tika atu, ka tau tatou kia kite na mua e eaa te au ua o te Patireia. Ka tika ainei kia manako e ko te aiteanga o te uuaanga i te ua ko te akariro i te tangata ei au pipi? (Mataio 28:19) Te taiku ra ainei te au ua ta tatou e akatupu ki te aronga ta tatou e tauturu kia riro ei aronga akamori papetitoia no Iehova ra? Kare. Me ko te reira te tu, ka riro te turanga kia oonu te mareka koreanga no te Au Kite akaperepere katoatoa tei akakitekite tiratiratu ra i te tuatua no te Patireia no etai mataiti roa i te au ngai kare ra te au tangata e akarongo ana. Ae, me te akatutuia maira te ua o te Patireia e te au pipi ou anake, ka riro taua Au Kite rave angaanga maata mei te au rara ua kore i te akatutu anga a Iesu ra! Inara, kare te reira i te tika. Eaa i reira, te au ua mua o te Patireia o ta tatou angaanga orometua?

Uuaanga na te Akatotoaanga i te Ua Patireia

10. Akapeea ta Iesu ra akatutu anga no te ruru i te ua e nga tu tuke o te one i te akaari anga mai eaa te au ua o te Patireia e eaa kare i tona ua?

¹⁰ Te akatutu anga a Iesu no te tangata ruru ra e te au one tuketuke te tou maira ki te pauanga​—e pauanga akamaroiroi no te aronga tei akakitekite aere ra i te au ngai meangiti te uuaanga. Kua tuatua a Iesu e ko te ua ko te tuatua Patireia te kitea ra i te Tuatua a te Atua e ko te one te akatutu maira i te ngakau akatutuia o te tangata. Ko etai ua “topa iora oki tetai pae ki te ngai one meitaki, tupu akera, e uua atura.” (Luka 8:8) Eaa te ua? I muri ake i te kao anga mai te titona e ka pakari mai, ka akatupu mai ei ua, kare i te au kao titona rikiriki, mari ra e au ua ou. Pera katoa, ka akatupu mai te Kerititiano ei ua, kare i te au pipi ou, mari ra i te au ua ou no te Patireia.

11. Akapeea te akataka anga i te au ua o te Patireia ra?

 ¹¹ No reira, ko te au ua i teia tu kare i te au pipi ou kare katoa oki i te au tu Kerititiano meitaki. I te mea ko te ua tei ruruia ko te tuatua o te Patireia, te au ua ka tika te au tu e manganui no taua ua ra. Te uuaanga o te ua i teia tu te taiku ra i te au akakite anga i te Patireia. (Mataio 24:14) Te uua anga i taua au ua o te Patireia ra​—ko te akakiteanga i te evangeria o te Patireia​—ka itaeia, noatu eaa to tatou au turanga? Ae, koia ia! I roto i taua akatutu anga rai, te akataka maira Iesu e no teaa.

Orongaanga i to Tatou Meitaki no to te Atua Kaka

12. Te rauka ra ainei te uua anga Patireia e te au Kerititiano katoatoa ra? E akataka mai.

¹² “Tei topa ki roto i te ngai one meitaki ra,” ta Iesu i tuatua, “e ua maira tana, taki tai anere, taki ono ngauru, e taki toru ngauru i te ua okotai.” (Mataio 13:23) Te ua tei ruruia i te ngai tanuanga penei ka tuketuke i te uua anga kia tau ki te au turanga. Aiteite katoa, ta tatou ka rauka i te akakitekiteanga i te evangeria penei ka tuketuke tei runga i to tatou au turanga, e kua akaari mai a Iesu e kua kite aia i teia. Penei e maata atu te au tuatau o tetai papaki; ko etai atu e meitaki atu te ora anga e te maroiroi. No reira, ta tatou ka rauka kia rave penei ka maata atu me kare penei ka meangiti mai i ta etai atu ka rave, inara kia rave tatou i te meitaki te ka rauka, ka mareka a Iehova i reira. (Galatia 6:4) Noatu rai me kua ruaine me kare kua makimaki e kua kotinga mai i ta tatou tuanga i te angaanga tutuanga, kare e ekoko anga te manako mai ra to  tatou Metua aroa, ko Iehova, e ko tatou tetai tei ‘uua maata maira.’ No teaa ra? No te mea te oronga ra tatou kiaia ‘i te katoa anga o ta tatou ra’​—ta tatou tavini anga ma te ngakau katoa. *​—Mareko 12:43, 44; Luka 10:27.

13. (a) Eaa te tumu maata no tatou kia uua “ua atu” i te au ua Patireia? (e) Eaa te ka tauturu ia tatou kia uua ua atu i roto i te au ngai e meangiti mai te akarongo anga? (Akara i te pia i te kapi 21.)

¹³ Mei teaa te maata ka rauka ia tatou kia akatupu i te au ua Patireia, ka akakeuia tatou ‘kia aere e kia uua te ua’ me ka tamou tatou ki te manako e eaa tatou i rave ei i te reira. (Ioane 15:16) Kua taiku mai a Iesu i te tumu maata roa: “Ko te mea ia e akakakaiaʼi taku Metua, kia maata to kotou ua anga.” (Ioane 15:8) Ae, ta tatou angaanga tutuanga te akatapu ra i te ingoa o Iehova ki mua i te au tangata katoatoa. (Salamo 109:30) A Honor, ko tetai Kite tiratiratu e vaitata i te 75 mataiti, kua akakite mai: “Noatu rai i roto i te au ngai e meangiti ua te akarongo mai, e mea ngateitei kia tuatua na Tei Teitei Rava.” I te ui anga kia Claudio, tei akono ra ei Kite maroiroi mei te 1974 mairai, eaa aia i rave tamou ei i te tutu anga noatu ra e tokoiti ua i tona ngai tei akarongo mai, kua taiku mai aia ia Ioane 4:34, te ngai ka tatau tatou i ta Iesu au tuatua: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” Kua tuatua katoa a Claudio: “Mei ia Iesu rai, kua anoano au kare e kia akamata anake mari ra kia akaoti katoa i taku angaanga ei tangata akakitekite i te Patireia.” (Ioane 17:4) Te akatika ra te Au Kite o Iehova i te ao katoa nei.​—Akara i te pia “Akapeea me ‘Uua Anga i te Ua ma te Akakoromaki,’” i te kapi 21.

Kia Tutu e kia Apii

14. (a) Eaa nga akakoroanga e rua tuanga o te angaanga a Ioane Papetito raua ko Iesu? (e) Akapeea koe mea akataka i te angaanga Kerititiano i teia tuatau nei?

¹⁴ Te tangata mua tei taikuia i te au Evangeria tei akakitekite i te Patireia ko Ioane Papetito. (Mataio 3:1, 2; Luka 3:18) Tana akakoro anga mua “ei kite, ei akakite,” e kua rave aia ma te manako ngakau oonu te akarongo e ma te manakonako e “kia akarongo te tangata katoatoa.” (Ioane 1:6, 7) Ko te tika, tetai papaki o te aronga ta Ioane i tutu atu kua riro ei au pipi na Karaiti. (Ioane 1:35-37) No reira, e tangata tutu aere a Ioane e pera katoa te akariro ra i te tangata ei pipi. Ko Iesu katoa tetai e tangata tutu aere e te puapii. (Mataio 4:23; 11:1) Kare i te poitirere, i reira, e kua akaue atura Iesu i tana au pipi kare kia tutu anake i te tuatua Patireia mari ra kia tauturu katoa oki i te au tangata tei ariki i te reira kia riro ei pipi nana. (Mataio 28:19, 20) No reira ko ta tatou angaanga i teia ra e kapiti anga i te tutuanga e te apiianga.

15. Eaa te tu aiteite te vaira i te akarongoanga ki te angaanga tutuanga tei raveia i te anere mataiti mua T.N. e tei raveia oki i teia tuatau nei?

¹⁵ Te aronga tei akarongo atu ia Paulo i te anere mataiti mua T.N. i te tutuanga e te apiianga, “kua akarongo maira tetai pae i taua au tuatua i karangaia ra, e kare tetai pae i akarongo.” (Angaanga 28:24) I teia tuatau, te aiteite ra te akarongo anga. E mea mii, e ko te maataanga o te ua Patireia te topa ra ki runga i te one kare e ariki mai. Noatu rai, te topa ra etai ua ki runga i te one meitaki, kua akaia, e kua kao mai, mei ta Iesu i akakite maira. Ko te tika, i te ao katoa, ko te avereti e tere atu i te 5,000 tangata te riro maira ei au pipi tikai na Karaiti i te epetoma taki tai o te mataiti! Ko teia au pipi ou ‘kua akarongo maira i taua au tuatua i karangaia ra,’ noatu e kare te maata anga o te tangata e akarongo mai. Na teaa i tauturu i to ratou  ngakau kia ariki i te tuatua Patireia ra? E putuputu na te inangaro tei akaariia e te Au Kite ra​—na te tamauuanga o te au ua ou ra te ruru anga, ei akatutuanga​—kua akatupu i te tuke anga. (1 Korinetia 3:6) E akamanako i e rua ua o te au akatauanga e manganui.

Ka Akatupu te Inangaro Tangata i te Tuke Anga

16, 17. Eaa ra i puapinga maatai kia akaari i to tatou uaorai inangaro i te aronga ta tatou e aravei i te angaanga orometua?

¹⁶ Ko Karolien, tetai Kite ou i Peretiumu, tei aravei atu i tetai vaine ruaine tei akaari maira i te tu inangaro kore i te tuatua Patireia ra. I te mea te takaiia ra te rima o taua vaine ra, kua oronga atura Karolien raua ko tona oa i te tauturu, inara kare taua vaine ra i ariki mai. E rua ra i muri iora kua oki akaou atura aua kite ra ki te kainga o te vaine ra e kua ui atu kiaia e te akapeea ra tona tu. “Kua akatupu teia i te tuke anga,” ta Karolien i tuatua. “Kua poitirere aia te kite anga e te inangaro tika ra maua iaia ei vaine. Kua pati mai aia ia maua ki roto i tona ngutuare, e kua akamataia tetai apii anga Pipiria.”

¹⁷ Ko Sandi, tetai Kite i Marike, kua akaari katoa i te inangaro tangata ki te aronga tana e tutu atura. Kua akara aia i te au akakiteanga anau anga pepe i roto i te nuti pepa e i reira kua aere atu kia atoro i nga metua ou ra ma te puka My Book of Bible Stories. * I te mea ko te metua vaine te putuputu ra tei te kainga e te mareka ra kia akaari atu ki te au manuiri i tana pepe, e putuputu te akamataia te tuatuaanga. “Ka tuatua au ma nga metua i te puapinga maata o te tapekaanga ma te pepe ou ra na roto i te tatauanga,” ta Sandi i akakite. “I muri iora ka tuatua au no te au akaaoanga o te tupu akeanga i te tamaiti i roto i te taiate o teia tuatau nei.” I mua ua akenei, tetai tupuanga no taua tu aravei anga ra, kua akamata tetai metua vaine e ono ana tamariki i te tavini anga ia Iehova. Na te akaarianga i te tamata anga e te inangaro tangata penei ka taki atu ki te au tupu anga aiteite te rekareka anga i ta tatou angaanga orometua.

18. (a) Eaa ra te umuumu anga ‘kia uua maata’ e raukai ia tatou katoatoa? (e) Eaa nga umuumu anga e toru no te riroanga ei pipi te taikuia ra i te Evangeria a Ioane taau e tamanako ra kia akono?

¹⁸ Mei teaa ra te akamaroiroianga kia kite e ko te umuumu anga kia “uua maata maira” ka rauka ia tatou! Me te ou ra tatou me kare kua ruaine, me te meitaki ra to tatou oraanga me kare te apikepike ra, me te tutu ra tatou i te ngai arikiia, me kare e meangiti ua te arikiia maira, pouroa tatou ka rauka kia maata te ua anga. Akapeea ra? Na te akakiteanga i te au ua o te vaerua ki tetai tu maata atu e na te akatotoaanga i te tuatua o te Patireia a te Atua ki te meitaki e tei rauka ia tatou. I taua taime rai, ka tauta tatou kia ‘vai ki roto i te tuatua a Iesu’ e ‘kia aroa i roto ia tatou uaorai.’ Ae, na te akonoanga i eia nga umuumu anga puapinga maata e toru no te riroanga ei pipi tei taikuia ra i te Evangeria a Ioane, ka akapapu tatou e e ‘pipi tikai tatou na [Karaiti].’​—Ioane 8:31; 13:35.

[Au Tataanga Rikiriki i Raro]

Au Uianga Akamanako Anga

• Eaa te au tu ua ka tauta tatou kia uua maata atu?

• Eaa ra ka raukai ia tatou te akakoro anga ‘kia maata te ua anga’?

• Eaa nga umuumu anga puapinga maata e toru no te riro anga ei pipi tei taikuia ra i te Evangeria a Ioane ta tatou i akamanako ana?

[Au Uianga Apii]

[Pia/Tutu i te kapi 21]

AKAPEEA ME “UUA ANGA I TE UA MA TE AKAKOROMAKI”

EAA te tauturu ra ia koe kia rave tamou i te tutuanga ma te tiratiratu i te tuatua Patireia i te au ngai e akarongo meangiti maira? Teia etai au pauanga te ka tauturu i teia uianga.

“Te kiteanga e tei ia tatou to Iesu tauturu ki katoa te akamaroiroi ra i te manako papu e te tauta pakari, noatu eaa te tu akono i roto i te ngai tutuanga.”​—Harry, e 72 mataiti; papetitoia i te 1946.

“Te akamaroiroi ua maira te irava ia 2 Korinetia 2:17 iaku. Te tuatua ra te reira e te rave kapiti ra tatou i te angaanga orometua ‘ki mua oki i te aroaro o te Atua, ma te Mesia.’ Iaku e rave ra i te angaanga orometua, te rekareka ra au i te taokotaianga ma toku au oa meitaki rava.”​—Claudio, e 43 mataiti; papetitoia i te 1974.

“Te taka papu ra, ko te angaanga tutuanga e raveanga ngata ia naku. Inara, te kite ra au i te tika o te au tuatua tei kiteaia ia Salamo 18:29: ‘E kua taea te patu e au i taku Atua.’”​—Gerard, e 79 mataiti; papetitoia i te 1955.

“Me ka rauka iaku i te tatau e okotai ua irava i roto i te angaanga orometua, kua akamerengo mai te reira iaku e kua akara matatioia to tetai ngakau e te Pipiria.”​—Eleanor, e 26 mataiti; papetitoia i te 1989.

“Te tauta ra au i te au araveianga tuketuke. E manganui te reira e kare e rauka iaku i te taangaanga ia ratou katoa i te toenga o toku au mataiti o toku oraanga.”​—Paul, e 79 mataiti; papetitoia i te 1940.

“Kare au e riri ua i te au pauanga tau kore a te au tangata. Ka tauta au i tetai aravei anga maru ua, te tuatua anga ma te au tangata e te akarongoanga i to ratou manako.”​—Daniel, e 75 mataiti; papetitoia i te 1946.

“Kua aravei au i te aronga ou ua tei papetitoia tei akakite mai kiaku e e tuanga ta taku tutuanga i to ratou riro anga ei Au Kite. Kare au i kite ana, kua apii tetai ke i te Pipiria ma ratou e kua tauturu ia ratou kia tere ki mua. Te rekareka nei au i te kite e ko ta tatou angaanga orometua e tauta anga ia na te katoatoa.”​—Joan e 66 mataiti; papetitoia i te 1954.

Eaa te tauturu ra ia koe i te “uua anga i te ua ma te akakoromaki”?​—Luka 8:15, NW.

[Au Tutu i te kapi 20]

Na te akakiteanga i te au ua o te vaerua e te akakitekiteanga i te tuatua Patireia, ka maata atu to tatou uua anga

[Tutu i te kapi 23]

Eaa te aiteanga o ta Iesu i tana tuatua anga ki tana au apotetoro: “Kia maata to kotou ua anga”?