Ngakau Tae​—Inangaroia, Inara kua Rava Ainei te Reira?

TE NGAKAU TAE te inangaroia ra ainei i roto i to tatou oraanga i te au ra taki tai? Te akataka ra tetai tikitinari i te “ngakau tae” e ko te “rangatira anga mei te akameamea me kare te pikikaa; te tu tau; te tu titika; te tika tikai.” Te taka meitaki ra, te puapinga ra teia tu i roto i te akaketaketa anga i te au pirianga meitaki ki tetai atu. Kua raurau te apotetoro ko Paulo: “E akamako atu i to kotou au pu i te kopapa nei i te au mea ravarai; auraka ei akarongo mata mei te tarekareka tangata ra; ma te ngakau tika ra, i te mataku anga i te Atua ra.” (Kolosa 3:22) Koai tei kore e ariki i tetai tangata ngakau tae ei angaanga nana? I teia tuatau, penei ka rauka i te au tangata ngakau tae te tuatau meitaki no te kimianga e te akonoanga i ta ratou au angaanga.

Inara, ko tei akariro i te ngakau tae kia inangaroia koia oki akapeea te reira i te akakeu anga i to tatou pirianga ma te Atua. Kua rekareka to Iseraela i taito i ta te Atua akameitakianga i te akono meitaki anga ratou i te au ture e te au oroa. Koi uriuri ei no runga i te tu ma tikai o te putuputuanga, kua raurau a Paulo i te au Kerititiano: “E akono tatou i taua oroa ra, eiaa ma te akaopue taito, eiaa katoa ma te akaopue akamoupuku e te kino, ma te kai akaopue koreia ra, ko te pikikaa kore e te tuatua-mou.” (1 Korinetia 5:8) E arikiia mai ei ta tatou akamori anga e te Atua, kare anake e inangaroia te ngakau tae te anoano katoaia ra. Inara, kare e rava ua te ngakau tae. Kia kapitiia atu te tuatua mou ki te reira.

Penei kua irinaki ngakau tae te aronga akatu e te au patete o te Titanic e kare rava taua pai moana e tomo. Inara, i tona teretere anga mua i te 1912, kua u atu te reira ki runga i te toka aiti e e 1,517 tangata i ngere i to ratou au oraanga. Penei kua irinaki ngakau tae te au ngati Iuda o te anere mataiti mua i roto i ta ratou tu akamori anga i te Atua, inara kare to ratou maroiroi i tau ki “te maroiroi kite.” (Roma 10:2) E arikiia mai ei tatou e te Atua, kia akanooia to tatou au irinaki anga ngakau tae ki runga i te kite tika tikai. Ka mataora te Au Kite o Iehova i toou ngai i te tauturu ia koe i te akara meitaki e eaa te o maira i roto i te tavinianga i te Atua ma te ngakau tae e te tuatua mou.