Au Uianga a te Aronga Tatau

Eaa a Isaia 30:21 (NW) i karangai i ta Iehova tuatua e te aere maira i “muri ia koe,” i te mea e ko te irava i mua ake te tuku ra ia Iehova ki mua na te tuatua anga e, “Ka riro to kotou au mata ei au mata tei kite ra i to kotou Pu Ikuiku Maata Rava Atu”?

Te tatau ra Isaia 30:20, 21 e: “Kare to kotou Pu Ikuiku Maata Rava Atu e uuna iaia uaorai, e ka riro to kotou au mata ei au mata tei kite ra i to kotou Pu Ikuiku Maata Rava Atu. E ka akarongo toou uaorai taringa i tetai tuatua i muri ia koe i te tuatuaanga: ‘Teia te mataara. E aaere na reira, e toku iti tangata,’ penei e e tau toou iti tangata i te aere ki te tua katau e penei e e tau ki te tua kaui.”

I te akamanako anga tika tikai i te irava, te kite ra te aronga tatau ia Iehova, te Pu Ikuiku Maata Rava Atu, i mua iaia inara te rongo ra i Tona reo i muri. Inara, ko te au tuatua, e akatutu anga ua e ka tau kia maramaia na te reira mataara.

Te tuatua akatutu anga o taua irava 20 te akamarama maira no runga i tetai tavini te akono ra i tona pu, te papa ra i te rave i te au ikuiku anga a te pu. Mei tetai tavini rai tei akara meitaki atu i te rima o tona pu kia rauka i te kite i te akataka anga i tona anoano, ka akara mou atu to Iehova au tangata i to ratou au mata ki runga i te au ikuiku anga tei akatumuia ki runga i te Pipiria te aere ua atura ki mua ta Iehova e oronga maira na roto i tana akaaerenga i te enua nei. (Salamo 123:1, 2) Ae, te rave ra ratou i tana arataki anga, ma te akara e eaa ua atu rai ta Iehova e akakite maira na roto i “te tavini akono meitaki e te pakari.”​—Mataio 24:45-47.

Akapeea i reira, te tuatua ta tona au tavini i akarongo ana i muri? E mea tau i reira, i te akatika e ko te reo i muri e reo no te Atua no te tuatau i topa, i te tuatua anga na roto i tana Tuatua tei tataia mei tei akamaramaia mai na roto i tona “akaaere pikikaa kore.” (Luka 12:42) Te rongo ra te au tavini o te Atua i teia tuatau i tona reo na te apii marieanga i te Pipiria e te akono anga i tana au kaveinga i roto i to ratou oraanga ma te tauturu anga a te au puka tei akapapaia e “te tavini akono meitaki e te pakari,” “te akaaere pikikaa kore.” Na te irinaki anga ma te akara anga, i te arataki anga tau ta te Pu Ikuiku Maata Rava Atu i oronga mai e te apii anga i te Tuatua a te Atua, tei tataia i te au anere mataiti i topa akenei, te kite ra tona au tavini iaia na roto i te tu akatutuanga i mua ia ratou e te rongo ra i tona reo i muri.​—Roma 15:4.