Eaa te Aite Anga no te Kaikai Anga Aiai a te Atu kia Koe?

“E teianei, ko te kai i teianei manga, e ko te inu i te kapu a te Atu, ma te tau kore ra, e ara ïa i te kopapa e te toto o te Atu.”​—1 KORINETIA 11:27.

1. Eaa te tupu anga puapinga maata roa atu tei paraniia no te mataiti 2003, e eaa tona akamataanga?

TE TUPU anga puapinga maata roa atu tei paraniia no te mataiti 2003 ka raveia i muri ake i te opunga ra ia Aperira 16. Ka akaputuputu mai te Au Kite o Iehova ki reira kia akono i te Akamaara Anga no to Iesu Karaiti matenga. Mei tei akaariia i te atikara i mua akenei, kua akanoo a Iesu i teia akono anga, tei kapiki katoaia te Kaikai Anga Aiai a te Atu, i muri ake i te akono anga aia e tana au apotetoro i te Pasa ia Nisana 14, 33 T.N. Kua akatutu maira te au oroa Akamaara Anga o te varaoa akaopue kore e te uaina muramura i to Karaiti kopapa ara kore e tona toto akamaringiia​—te atinga okotai te ka rauka i te oko i te au tangata mei te ara e te mate akatuangaia.​—Roma 5:12; 6:23.

2. Eaa te akamatakite anga tei rekotiia ia 1 Korinetia 11:27?

² Ko te aronga te kai ra i te au oroa Akamaara Anga ka tika kia rave ma te tau i te reira. Kua akamarama mai te apotetoro ko Paulo i tona tata anga ki te au Kerititiano i Korinetia i taito, te ngai kare te Kaikai Anga Aiai a te Atu i akonoia i roto i tetai mataara tau. (1 Korinetia 11:20-22) Kua tata a Paulo e: “E teianei, ko te kai i teianei manga, e ko te inu i te kapu a te Atu, ma te tau kore ra, e ara ïa i te kopapa e te toto o te Atu.” (1 Korinetia 11:27) Eaa te aiteanga no taua au tuatua ra?

Kua Akono Tau Kore Etai i te Reira

3. Akapeea te manganui o te au Kerititiano Korinetia i te rave akono anga ia ratou uaorai i te au akonoanga i te Kaikai Anga Aiai a te Atu ra?

³ E manganui te au Kerititiano i Korinetia kua kai tau kore i te Akamaara Anga. Te vaira te ke anga i rotopu ia ratou, e no tetai atu au tuatau, kua apai mai etai pae i ta ratou kai aiai e kua kai i te reira i mua ake me kore i te tuatau o te uipaanga, i te maata anga o te taime kua kai e kua inu maata. Kare roa ratou i vai ara ua i te pae o te manako e te pae vaerua. Kua “ara ïa [ratou] i te  kopapa e te toto o te Atu.” Te aronga kare i kaikai ana kua matepongi e kua manako ke katoaia. Ae, e manganui tei kai no te kore anga e akangateitei e te kite pu anga i te pakari anga tikai o te atianga. No reira rai i apainaia mai ei to ratou akava anga ki rungao ia ratou uaorai!​—1 Korinetia 11:27-34.

4, 5. Eaa ra ka puapingai te kimi matatio uaorai no te aronga tei matau i te kai i te au oroa Akamaara Anga?

⁴ Te vaitata anga mai te Akamaara Anga i te mataiti tataki tai, e mea puapinga i te kimi matatio uaorai no te aronga tei kai matau ana i te au oroa. Kia o tau atu ki roto i teia kaianga atinga au, ka tau e turanga oraora i te pae vaerua to ratou. Ko tetai tei akaari i te akangateitei kore, pera katoa te akavaavaa anga, no to Iesu atinga tei roto i te tu kino ka ‘tipu keia ïa i to te Atua uaorai iti-tangata’ ra, kua aite mei tetai tangata Iseraela tei kai i tetai kaianga atinga au i roto i tetai tu viivii.​—Levitiku 7:20; Ebera 10:28-31.

⁵ Kua akaaite a Paulo i te Akamaara Anga ki tetai kaianga atinga au i Iseraela i taito. Kua tuatua aia no te aronga te kai kapiti katoa ra i roto ia Karaiti e i reira kua na ko atura e: “Kare e tika ia kotou kia inu i te kapu a [Iehova], e te kapu a te au demoni: kare e tika ia kotou kia kai i te kaingakai a [Iehova] ra, e te kaingakai a te au demoni.” (1 Korinetia 10:16-21, akaaite ia NW.) Me rave tetai tangata tei kai ana i te au oroa Akamaara Anga i te ara kino, ka  tika kia aaki aia i teia kia Iehova e te kimi katoa anga i te tauturu anga i te pae vaerua a te au tane pakari o te putuputuanga. (Maseli 28:13; Iakobo 5:13-16) Me tataraara tikai aia e te akatupu ra i te ua te tau ra no te tataraaraanga, kare aia i kai tau kore ana.​—Luka 3:8.

Taeanga ei Aronga Akara Ngateitei Ua

6. Koai ma ta te Atua i akataka i te akameitaki anga i te kai anga i te Kaikai Anga Aiai a te Atu ra?

⁶ Ka tika ainei i teianei no te aronga te rave ra i te meitaki ki te toenga o te au taeake 144,000 o Karaiti i te kai i te Kaikai Anga Aiai a te Atu? (Mataio 25:31-40; Apokalupo 14:1) Kare. Kua akataka te Atua i taua akameitaki anga no te aronga tataki tai tei akatainuia e ia ki te vaerua tapu kia riro ei ‘aronga tuanga e te Mesia.’ (Roma 8:14-18; 1 Ioane 2:20) Eaa, i reira, te turanga no te aronga e manakonako anga te ka noo e tuatau ua atu ki roto i tetai ao parataito i raro ake i te tutara anga Patireia? (Luka 23:43; Apokalupo 21:3, 4) I te mea e kare ratou ei aronga tuangaia no Iesu ma tetai manakonako anga i te rangi ra, ka aere ratou ki te Akamaara Anga ei aronga akara ngateitei ua.​—Roma 6:3-5.

7. Eaa ra te au Kerititiano i te anere mataiti mua i kite ei e ka tau ratou kia kai i te au oroa Akamaara Anga?

⁷ Kua akatainuia te au Kerititiano mou i te anere mataiti mua e te vaerua tapu. E manganui i o ratou kua rauka i te taangaanga e tai me kare e maata atu te au apinga aroa temeio o te vaerua, mei te tuatua anga i roto i te reo ke. No reira, kare i te mea ngata te reira no taua aronga tataki tai ra i te kite e e aronga akatainuia ratou e te vaerua e ka tika kia kai i te au oroa Akamaara Anga. Inara, i to tatou tuatau, ka rauka teia kia tamanakoia ki runga i te tumu anga o taua au tuatua akauruia mei teia rai e: ‘Ko te aronga katoa oki i aratakiia e te vaerua o te Atua ra, e tamariki anake ïa ratou na te Atua. Kare oki te vaerua tuikaa tei rauka ia kotou kia mataku akaou; ko te vaerua akatamariki ra tei rauka ia kotou, i karangaʼi oki tatou e, E Aba, e taku Metua.’​—Roma 8:14, 15.

8. Koai ma te akatutuia ra e “te sitona” e “te zizania” tei taikuia i roto ia Mataio pene 13?

⁸ Tere atu i te au anere mataiti, kua tupu mai te aronga akatainu tika tikai ei “sitona” i roto i te kainga o te “zizania,” me kore te au Kerititiano pikikaa. (Mataio 13:24-30, 36-43) Mei te 1870, kua akakite maataia mai te “sitona,” e i etai mataiti i muri mai kua akakiteaia ki te au akaaere Kerititiano akatainuia e: “Ka tau kia akanoo . . . te aronga pakari ki mua i te aronga te akaputuputu maira ia ratou uaorai [no te Akamaara Anga] i teia au tuatua e te au turanga,—(1) te akarongo i roto i te toto [o Karaiti]; e te (2) akatapuanga ki te Atu e tana angaanga, e tae ua atu ki te matenga. Ka tau kia pati atu ratou i te katoatoa tei manako maira e tei akatapuia kia piri mai ki roto i te akamaara anga i te matenga o te Atu.”—Studies in the Scriptures, Series VI, The New Creation, kapi 473. *

Kimianga i te “Mamoe Ke Atu”

9. Akapeea i te akataka anga i te “aronga maata rava” tei akataka meitakiia mai i te 1935, e akapeea teia tupu anga ki etai tei kai ana i te au oroa Akamaara Anga?

⁹ Kare e roaia, kua akamata ta Iehova akaaerenga i te akara atu ki tetai ke tei tuke ra ki ta Karaiti au pipi akatainuia. Kua tupu tetai tupu anga kite maataia i roto teia tumu i rotopu i te 1930. I mua ake i te reira, kua manako te au tangata o te Atua i te “aronga maata rava” o Apokalupo 7:9 e ei pupu rua vaerua te ka taokotai atu ma te 144,000 aronga akatainu akatuia i te rangi ra​—mei te au apee me kare te au oa o te vaine akaipoipo a Karaiti ra. (Salamo 45:14, 15; Apokalupo 7:4; 21:2, 9) Inara ia Me 31, i te 1935, i roto i tetai uriuri anga manako tei orongaia i tetai uruoaanga a te Au Kite o Iehova i Washington, D.C., U.S.A., kua akatakaia mai mei te Tuatua Tapu ra e ko te “aronga maata rava” (“aronga tini,” King James Version) te taikuia ra ki te “mamoe ke atu” te ora ra i te tuatau openga. (Ioane 10:16) I muri ake i taua uruoaanga, ko etai tei kai ana i te au oroa Akamaara Anga kua akamutu i te kai no te mea kua kite ratou e e manakonako anga to ratou i te enua nei, kare i te rangi.

10. Akapeea koe me akataka i te manakonako anga e te au apainga a te “mamoe ke atu” o teia tuatau nei?

¹⁰ Koia tikai mei te 1935 maira te raveia anga tetai kimi anga no te aronga te ka riro mai ei “mamoe ke atu,” e e akarongo i roto i te atinga, kua akatapu ia ratou uaorai ki te Atua, e kua turu i te “anana iti” akatainuia i roto i te angaanga  tutu anga Patireia. (Luka 12:32) Te manakonako ra teia mamoe ke atu i te noo i runga i te enua e tuatau ua atu, inara i roto i tetai au tu ravarai, te aite ra ratou ki te toenga o te aronga akatuangaia no te Patireia i teia tuatau. Mei te tangata ke o Iseraela i taito tei akamori ia Iehova e kua kauraro ki te Ture, kua ariki te mamoe ke atu o teia tuatau i te au apainga Kerititiano, mei te tutuanga i te tuatua meitaki ra ma te au mema o Iseraela vaerua. (Galatia 6:16) Inara, mei te tangata ke kare i riro mai ei ariki me kare ei taunga no Iseraela, kare tetai o teia mamoe ke atu e tutara i te Patireia i te rangi ra me kare te tavini ra ei au taunga.​—Deuteronomi 17:15.

11. Eaa ra ka riro ei ei mana anga te ra akatapuanga o tetai tangata ra no runga i tona manakonako anga?

¹¹ Tae anga i te 1930, i reira, kua akamata te reira i te maramaia, tei matauia, e kua ikiia te pupu no te rangi. No te au ngauru mataiti i teianei, kua raveia te kimi anga no te mamoe ke atu, e manakonako anga to ratou i te enua nei. Me ka tiratiratu kore tetai tei akatainuia, i te akara anga maata penei e ko tetai tangata tei tavini tiratiratu roa ana i te Atua ra ei mamoe ke atu ka kapikiia kia akaki i te ngai i va mai tei akatupuia i roto i te 144,000 ra.

No Teaa te Tamanako Anga Tarevake

12. I raro ake i teea au turanga ka tau kia akamutu tetai tangata i te kai i te au oroa Akamaara Anga, e no teaa ra?

¹² Kua papu tikai i te au Kerititiano akatainuia e e kapiki anga no te rangi to ratou. Inara akapeea ra me te kai ra etai aronga tataki tai tei ngere i teia kapiki anga i te au oroa Akamaara Anga? Kua kite i teianei e kare roa o ratou manakonako anga i te rangi, kua papu tikai e ka akakeu to ratou akava ngakau ia ratou kia akamutu i te kaikai anga. Kare te Atua e akara mareka mai ki runga i tetai ua atu te akatutu maira iaia uaorai ei tangata tei kapikiia ei ariki e te taunga i te rangi ra i tona kite anga e kare ona kapiki anga tikai mei teia. (Roma 9:16; Apokalupo 20:6) Kua tamate a Iehova ia Kora ngati Levi no te kimi nonoi anga i te taoonga taunga o Aarona ra. (Exodo 28:1; Numero 16:4-11, 31-35) Me kite mai tetai Kerititiano e te tarevake ra iaia i te kai i te au oroa Akamaara Anga, ka tika i reira aia kia akamutu i te kaianga ma te pure taakaaka ki te Atua kia akakore mai i te ara.​—Salamo 19:13.

13, 14. No teaa ra etai i tamanako tarevake ei e e kapiki anga ki te rangi to ratou?

¹³ Penei no teaa ra i tamanako tarevake ei tetai e tei ia ratou te kapiki anga i te rangi? Te mate o te tokorua me kare e tumatetenga te ka akariro i tetai tangata kia ngaro tona inangaro i te oraanga i runga i te enua nei. Me kare penei te inangaro ra ratou i te reira noo anga mei te oa piri vaitata ra tei manako kia riro ei aronga akatainuia. Ae, kare te Atua i oronga ki tetai ua atu kia iki i etai atu no teia tika anga. E kare katoa aia e akatainu i te aronga tuanga o te Patireia kia rongo i tetai au reo ma te au tuatua kia akapapu i te akatainuanga.

¹⁴ Te manakoanga akonoanga pikikaa e ka aere pouroa te au tangata meitaki ki te rangi penei te taki ra i etai kia manako e tei ia ratou te kapiki anga i te rangi. No reira, ka anoanoia tatou kia matakite kia kore e aratakiia e te au manako taito tarevake me kore tetai atu au tumu. Ei akatauanga, penei ka ui etai kia ratou uaorai: ‘Te kai vairakau nei au te taparu ra i toku au manako ngakau? Te inangaro ra ainei au i te au manako oonu e penei e te manako tarevake ra au?’

15, 16. No teaa ra i manako tarevake ei etai e e aronga akatainuia ratou?

¹⁵ Penei ka ui etai kia ratou uaorai e: ‘Te inangaro nei au i te turanga teitei? Te noinoi nei au i tetai mana taoonga i teianei me kare ei ariki akatuangaia no te tuatau ki mua ma Karaiti?’ Te kapiki angaia te aronga akatuangaia no te Patireia i te anere mataiti mua, kare oki te katoatoa ia ratou i mou ana i te taoonga tiaki i roto i te putuputuanga. E ei aronga tataki tai ma te kapiki anga i te rangi ra kare i kimi ana i te taoonga teitei me kore te akaparau ra no tei akatainuia. Te akaari nei ratou i te tu akaaka tei tau ki te aronga tei ia ratou “te manako o Karaiti.”​—1 Korinetia 2:16.

¹⁶ Penei te taopenga ra etai e tei ia ratou te kapiki anga i te rangi no te mea kua rauka ia ratou te kite maata i te Pipiria. Inara kare te akatainu anga i te pae vaerua e oronga mai i te marama anga takake, no te mea kua apii e kua ako a Paulo i etai aronga tei akatainuia. (1 Korinetia 3:1-3; Ebera 5:11-14) E akapapa anga ta te Atua i te oronga anga i te kai vaerua no tona au tangata ravarai. (Mataio  24:45-47) No reira auraka tetai e manako e me akatainuia tetai Kerititiano ka rauka iaia te mana pakari teitei i runga ake i te aronga e manakonako anga to ratou i te enua nei. Te akatainuanga ki te vaerua kare te reira e kitea na roto i te pauanga i te au uianga Pipiria, te tutu aere anga, me kare te oronga anga i te au ako Pipiria. Te au Kerititiano e manakonakoanga to ratou no te enua, te rave pera katoa ra ratou.

17. Te vaira te akatainu anga vaerua ki runga i teaa e ki runga iaai?

¹⁷ Me ui tetai taeake akarongo no runga i te kapikianga i te rangi, te tangata pakari me kare etai atu Kerititiano maroiroi ka rauka kia uriuri atu i te reira kiaia. Inara, kare tetai tangata e tika kia oronga i teia tika no tetai atu. Ko tetai tei rauka teia kapiki anga kare rava e ui ki tetai ke e kua rauka ainei iaia te reira manakonako anga. Tei akatainuia ra, “kua akaanau akaouia, eiaa no te ua pe ua nei, no te ua pe kore ra, i te tuatua ora a te Atua, ko te ka tika i te vairanga, kare rava e mutu ra.” (1 Petero 1:23) Na roto i tona vaerua e te Tuatua, ka tanu te Atua i te “ua” te ka akariro i te reira uaorai ei “mea ou,” ma te manakonako anga i te rangi ra. (2 Korinetia 5:17) E na Iehova e rave i te ikianga. Ko te akatainu anga “kare to te anoano, kare oki to te oro, no te Atua ra i aroa maira.” (Roma 9:16) No reira akapeea e papu ei i tetai tangata e tei iaia te kapiki anga i te rangi ra?

Eaa ra i Papu ei ia Ratou

18. Akapeea te vaerua o te Atua i te akakite anga i te vaerua o te aronga akatainuia ra?

¹⁸ Te kite i te vaerua o te Atua te akapapu ra ki te au Kerititiano akatainuia e tei ia ratou te au manakonako anga i te rangi. ‘Ko te vaerua akatamariki ra tei rauka ia kotou,’ ta Paulo i tata, ‘i karangaʼi oki tatou e, E Aba, e taku Metua. Ko te vaerua uaorai oki, e to tatou katoa nei oki vaerua, tei akakite ïa e, e tamariki tatou na te Atua: E e tamariki ra, e aronga tuanga ïa; e aronga tuanga i te Atua ra, e aronga tuanga tatou e te Mesia; te mate kapipiti nei oki tatou ma ia katoa, kia akakakā kapipitiia ma ia katoa oki.’ (Roma 8:15-17) I raro ake i te mana o te vaerua tapu o te Atua, ko te vaerua, me kare teia tu teitei, o te aronga akatainuia ra te akakeu ra ia ratou kia akono kia ratou uaorai i ta te Tuatua Tapu e tuatua maira no runga i ta Iehova tamariki vaerua. (1 Ioane 3:2) Te oronga ra te vaerua o te Atua kia ratou i tetai manako anga akatamariki anga kiaia e te akakeu ra i roto ia ratou i tetai manakonako anga takake. (Galatia 4:6, 7) Ae, te oraanga mutu kore i runga i te enua ei au tangata tiama te koropini ra i te au mema ngutuare e te au oa e mea meitaki tikai, inara kare ko te reira to ratou manakonako anga  orongaia mai e te Atua. Na roto i tona vaerua, kua akatupu te Atua ki roto ia ratou i taua manakonako anga maroiroi i te rangi ra e te puareinga ra ratou i te akaatinga i te au piri anga katoatoa o te enua e te au manakonako anga.​—2 Korinetia 5:1-5, 8; 2 Petero 1:13, 14.

19. Eaa te tuanga ta te koreromotu ou i rave i roto i te oraanga o tetai Kerititiano akatainuia ra?

¹⁹ Kua papu i te au Kerititiano akatainuia to ratou manakonako anga i te rangi, e kua tukuia ratou ki roto i te koreromotu ou. Kua taiku mai a Iesu i te reira i te akanoo anga aia i te Akamaara Anga e kua na ko atura: “Teianei kapu, ko te koreromotu ïa i toku nei toto, e akamaringiia no kotou nei.” (Luka 22:20) Te aronga i roto i te koreromotu ou ko te Atua e te aronga akatainuia. (Ieremia 31:31-34; Ebera 12:22-24) Ko Iesu te rotopu. Kua akamataia na roto i te toto akamaringi anga o Iesu, kua rave mai te koreromotu ou kare no roto ua i te ngati Iuda mari ra no roto katoa i te pa enua i tetai au tangata no to Iehova ingoa e kua akariro ia ratou ei tuanga no te “uanga” a Aberahama. (Galatia 3:26-29; Angaanga 15:14) Te oronga ra teia “koreromotu mutu kore” no te Iseraela vaerua katoatoa kia akatuia ki te oraanga mate kore i te rangi ra.​—Ebera 13:20.

20. Ko tei akatainuia ra kua tukunaia ki roto i teea koreromotu ma Karaiti ra?

²⁰ Tei akatainuia ra kua papu to ratou manakonako anga. Kua tukunaia ratou ki roto i tetai atu koreromotu, te koreromotu Patireia. No runga i to ratou piri anga kia Karaiti, te karanga ra a Iesu e: “Ko kotou ko te aronga e noo tamou i vaitata iaku i toku au timataanga nei: Mei toku metua i akono i tetai basileia noku ra, kua akono katoa au ia kotou.” (Luka 22:28-30) Ko teia koreromotu i rotopu ia Karaiti e tana au ariki tei kapitiia mai te angaanga nei rai e tuatau ua atu.​—Apokalupo 22:5.

Te Tuatau Akamaara Anga​—E Tuatau Akameitakiia

21. Akapeea e puapinga maataiai tatou no te tuatau Akamaara Anga?

²¹ E manganui te au akameitaki anga no te tuatau Akamaara Anga. Ka puapingaia tatou mei te akapapa anga no te tatau anga i te Pipiria i teia tuatau. E tuatau meitaki katoa te reira no te pure, no te akamanakoanga i te oraanga e te matenga o Iesu i te enua nei, e te pirianga ki roto i te angaanga tutuanga Patireia. (Salamo 77:12; Philipi 4:6, 7) Te akamaara maira te reira uaorai akonoanga kia tatou i te aroa tei akaariia maira e te Atua raua ko Karaiti i te akono anga i te atinga oko o Iesu. (Mataio 20:28; Ioane 3:16) Te oronga maira teia apinga nei i te manakonako anga e te pumaana kia tatou e ka tika kia akamatutu i ta tatou tauta anga kia aruaru i tetai aerenga mei to Karaiti rai. (Exodo 34:6; Ebera 12:3) Ka tau katoa kia akamaroiroi te Akamaara Anga ia tatou kia akatupu i ta tatou akatapuanga ei au tavini no te Atua e kia riro ei au pipi tiratiratu no tana Tamaiti akaperepere.

22. Eaa ta te Atua apinga aroa maata roa atu ki te au tangata, e eaa tetai mataara kia akaari i te arikianga no te reira?

²² Mei teaa ra te au apinga aroa meitaki ta Iehova i oronga mai kia tatou! (Iakobo 1:17) Tei ia tatou te aratakianga o tana Tuatua, te tauturu o tona vaerua, e te manakonako anga no te oraanga mutu kore. Te apinga aroa maata roa atu a te Atua koia oki te atinga o Iesu no te au ara o te aronga akatainuia e no te aronga katoatoa tei akono i te akarongo. (1 Ioane 2:1, 2) No reira mei teaa te maata anga i te aite anga o to Karaiti matenga kia koe? Ko koe ainei tetai tei akaari i te mareka anga no te reira na te akaputuputu mai anga i muri ake i te opunga ra ia Aperira 16, 2003, kia akono i te Kaikai Anga Aiai a te Atu?

[Tataanga Rikiriki i Raro]

Eaa Taau Pau Anga?

• Koai ma te ka tau i te kai i te au oroa Akamaara Anga?

• Eaa ra te “mamoe ke atu” ka aere ei ki te Kaikai Anga Aiai a te Atu ei aronga akara ua?

• Akapeea ra te au Kerititiano akatainuia ra i kite ei e ka tau ratou i te kai i te varaoa e te uaina i te Akamaara Anga i te matenga o Karaiti?

• Te tuatau Akamaara Anga e tuatau meitaki no teaa?

[Au Uianga Apii]

[Tutu i te kapi 18]

Ko koe ainei tetai ka tae mai no te Kaikai Anga Aiai a te Atu i teia mataiti nei?

[Au Tutu i te kapi 21]

E tuatau meitaki te tuatau Akamaara Anga no te akamaata i te tatau i te Pipiria e kia piri ki roto i te angaanga tutu anga Patireia