Iehova—E Atua Tau kia Kiteia

PENEI e te ngere ra koe i tetai apinga puapinga i te oraanga? Me e meangiti ua taau i kite no te Atua, papu tikai te ngere ra koe. No teaa ra? No te mea, mei tei kitea mai e te au mirioni ua atu au tangata, te kiteanga i te Atua o te Pipiria te apai maira i te au puapinga maata i te oraanga. Te akamata vave ra taua au puapinga e ka vai e tuatau ua atu ki mua.

Te inangaro ra te Atua ko Iehova, te Tata o te Pipiria, ia tatou kia kite iaia. Kua tata te tata taramo: “Kia kite ratou e, ko Iehova toou ingoa, e ko koe anake Tei Teitei i te enua katoa nei.” Kua kite aia e e meitaki rai no tatou kia kite atu iaia. “Ko au toou Atua ra ko Iehova, ko tei akakite ia koe i te mea e puapingaʼi koe na.” Akapeea tatou i te puapingaanga mei te kiteanga i te Atua ko Iehova, ko tei Teitei Rava?​—Salamo 83:18; Isaia 48:17.

Ko tetai puapinga tikai koia oki te rauka ra ia tatou te aratakianga no te akono anga i te au manamanata i te au ra, tetai manakonakoanga ngaueue kore no te tuatau ki mua, e te au o te manako. Pera katoa, te kite meitaki anga ia Iehova te akakeu ra ia tatou kia akatupu i te tu tuke no runga i te au maroanga puapinga te aro atura te au tangata takapini te ao i teia tuatau. Eaa oki teia au maroanga?

E Akakoroanga Ainei to Toou Oraanga?

Noatu te tereanga meitaki ki mua o te au tangata ravarai, te ui nei rai te au tangata tataki tai i teia tuatau i taua uianga puapinga: ‘Eaa oki toku akakoroanga i konei? Te aere nei au kiea? Eaa te akakoroanga o te oraanga?’ Me kare e rauka i tetai tangata te au pauanga merengo ua, kare o tona oraanga akakoroanga. Te kite ra ainei te au tangata e manganui i te puapinga o teia? Te akakite maira tetai apiianga tei raveia i Tiamani i te openga o te au mataiti 1990 e te manako putuputu ra me i tetai taime te apa o te aronga tei pau mai e kare o te oraanga akakoroanga. Penei te vaira tetai turanga aiteite i roto i toou ngai e noo ra.

Me kare o te oraanga akakoroanga, e akatumu anga meangiti ua to tetai tangata no te akanoo i tana uaorai au akakoroanga. E manganui te tauta ra i te pau i teia ngai va na te aruaruanga i tetai angaanga puapinga meitaki me kare kia rauka maata te au apinganui. Noatu rai, ka riro te manako ki kore ei manamanata. Me kare o te oraanga akakoroanga te tamamae ra i tetai e kua vare ua ratou kia kore e ora atu. Ko teia tei tupu ki tetai vaine mapu manea, i na te International Herald Tribune ei, kua utuutuia mai “i roto i te tu oraanga puapinga e te au akameitakianga kotinga koreia.” Noatu kua noo puapinga ua aia, kua maromaroa aia e kua manako aia e kare o tona oraanga akakoroanga. Kua kai maata aia i te au ua akamoe e kua mate i te kitea angaia. Penei kua kite ana koe i tetai aronga maromaroa kua tupu te tumatetenga kia ratou.

Inara, kua rongo ana ainei koe i te au tangata i te tuatua anga e ka rauka i te taineti i te akakite mai kia tatou no runga i te oraanga? Kua akakite mai te pepa epetoma Tiamani Die Woche e: “Noatu te tika ra te taineti, te paruparu ra te reira i te pae vaerua. I te akara anga e mea tau kore te tupu ua anga, e te apii anga quantum physics, ma  tana au tamanakoanga puapinga kore, kare e oronga mai ana i te pumaana e te tinamou.” E maata tei raveia e te au kiteanga taineti no te akataka mai i te oraanga e tona au tu tuketuke e kia akamarama mai i te au aerenga natura e te au angaanga te akono tamou ra i te oraanga. Inara, kare e rauka i te taineti i te akakite mai kia tatou i to tatou akakoroanga i konei e te aere nei tatou kiea. Me irinaki ua tatou i te taineti, kare rava ta tatou au uianga no te akakoroanga o te oraanga e pauia mai. Tei tupu, mei tei ripotiia mai e te nutipepa Süddeutsche Zeitung e, “te anoanoanga i te arataki anga i te ao katoa.”

Koai atu tei roto i tetai turanga meitaki i te oronga mai i te aratakianga i Tei Anga maira? I te mea kua tuku mai aia i te au tangata ki te enua nei i te akamata anga, kua kite aia i to ratou akakoroanga i konei. Te akamarama maira te Pipiria e kua anga a Iehova i te au tangata e raukai ia ratou i te akaki i te enua e kia akono i te reira, te riro anga mai ei aronga akono i te reira. I roto i ta ratou au angaanga, kia akaata te au tangata i tona au tu, mei te tuatua tau, te pakari, e te aroa. Me marama tatou i te tumu i angai a Iehova ia tatou, ka kite tatou e eaa to tatou akakoroanga i konei.​—Genese 1:26-28.

Eaa Taau ka Rave?

Akapeea me kare i kitea e koe i te tuatau i topa te au pau anga merengo ua no te au uianga: ‘Eaa oki toku akakoroanga i konei? Te aere nei au kiea? Eaa te akakoroanga o te oraanga?’ Te raurau maira te Pipiria e kia kite meitaki tikai koe ia Iehova. Ko te tika, kua tuatua a Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” Te akamaroiroi katoaia ra koe kia akatupu i te au tu akono i te Atua, koia tikai te aroa, e kia akariro ei akakoroanga naau uaorai kia noo i raro ake i to te Atua Patireia i raro i te Mesia te aere maira. Ka rauka i reira ia koe tetai akakoroanga i te oraanga e tetai manakonakoanga meitaki e te tinamou no te tuatau ki mua. Te au uianga puapinga tei tamanamanata ia koe e tae ua mai i teianei papu tikai ka pauia.​—Ioane 17:3; Koheleta 12:13.

Mei teaa te maata o te tukeanga ta te reira ka akono? Ko Hans tetai tangata tei kite i te reira. * I te au mataiti i topa kua rauka iaia te kiteanga meangiti i te Atua, inara kare to Hans akarongo i akakeu ana i tona oraanga. E reka ana a Hans i te au apinga akakona, te au vaine akono tau kore, te rave anga kino meangiti ua, e te au patikara matini. “Inara kua puapinga kore te oraanga, kare e merengo tikai,” i akamarama mai ei aia. I rotopu i tona 20 mataiti, kua iki a Hans i te kite tikai i te Atua na te tatau meitaki anga i te Pipiria. I te kite meitaki anga aia ia Iehova e kua marama i te akakoroanga no te oraanga, kua taui a Hans i tona tu oraanga e kua papetito e ko tetai o te Au Kite o Iehova. Kua rave ana aia i te angaanga orometua tamou no tetai ngauru mataiti i topa. Kua tuatua tika ua mai aia: “Te tavinianga ia Iehova ko tetai mataara meitaki roa atu ia o te oraanga. Kare atu e apinga e aiteite atu ki te reira. Te kiteanga ia Iehova kua oronga mai i te akakoroanga ki toku oraanga.”

E tika, kare ko te akakoroanga o te oraanga tetai maroanga te manata ra te manganui. I te au turanga o te ao e kino ua atura, e maata te aronga te manamanata ra i tetai atu maroanga puapinga.

Eaa ra te Reira i Tupu Ei?

Me tupu mai te turanga mamae ua, te manako maata ra te au tangata tei takinoia i tetai uianga: Eaa ra te reira i tupu ei? E raukai i te autu i te pae ngakau i te au tu mamae te iri ra i tetai tuanga ki runga i te kite anga i te pauanga tau ki taua uianga. Me kare e rauka te pauanga merengo ua, ka tupu ua atu te mamae e ka akariri tei takinoia. Ei akaraanga, ka akamanako ana i te tupuanga o Bruni.

“I etai au mataiti i topa kua mate taku pepe tamaine,” i akamarama mai ei a Bruni, teianei e mama manga pakari. “E irinaki ana au i te Atua, no reira kua aere atu au ki te orometua i reira kia  akapumaanaia mai. Kua akakite mai aia kiaku e kua apai te Atua ia Susanne ki runga i te rangi, i reira e angera aia i teianei. Kare anake e kua akaraanga puapinga kore toku oraanga no tona matenga mari ra kua riri tikai au i te Atua no te apai ke anga iaia.” Kua tupu tamou ua atu to Bruni tu taitaia e te mamae ngakau no tetai au mataiti. “I reira kua akaari mai tetai o te Au Kite o Iehova kiaku mei te Pipiria e kare oku tumu kia riri i te Atua. Kare a Iehova i apai ke ia Susanne ki te rangi, e kare aia i te angera. E tupuanga tona maki no te tu ara ua o te tangata. Te moe ra a Susanne i roto i te mate, te tapapa ra ia Iehova kia akatu mai iaia. Kua apii katoa mai au e kua anga mai aia i te au tangata ravarai kia noo e tuatau ua atu i te enua parataito, e kare e roa atu ka kiteia teia. I te marama anga au ia Iehova ei peretana tikai, kua akavaitata atu au kiaia, e kua akamata toku mamae i te ngaro.”​—Salamo 37:29; Angaanga 24:15; Roma 5:12.

E mirioni ua atu te au tangata te akakinoia ra e te mamae mei tetai tu e tetai tu: te tumatetenga uaorai, te tamaki, te onge, me kare te tumatetenga natura. Kua kite atu a Bruni i te akamaruanga mei tona apii anga mei te Pipiria e kare ko Iehova te ka akaapaia no te kino, kare rava aia i akakoro ana e kia mamae te tangata, e kare e roa atu ka takore aia i te kino. Te tika anga e te tupu maata nei te kino e akairo ia e te noo nei tatou i roto i te “tuatau openga ra” o teia akatereanga. Te vaitata mai nei te taui anga maata e meitaki ei ta tatou e umuumu nei.​—2 Timoteo 3:1-5; Mataio 24:7, 8.

Kiteanga i te Atua

Kua rauka ana ia Hans raua ko Bruni te kite meangiti ua no runga i te Atua. Kua irinaki raua iaia kare ra i kite maata atu no runga iaia. Te akanoo anga raua i te tuatau no te kite tikai ia Iehova, kua pauna ia ta raua tauta anga. Kua rauka ia raua te au pauanga tau no runga i te au uianga puapinga maata o to tatou tuatau. Kua oronga mai teia kia raua i te au o te manako e te manakonakoanga tinamou no te tuatau ki mua. Kua rauka katoa i te au mirioni tavini o Iehova taua tupuanga aiteite.

Te akamata ra te kiteanga ia Iehova na te akara meitaki anga i te Pipiria, te akakite maira kia tatou no runga iaia e tana e umuumu maira ia tatou. Ko te reira tei raveia e etai i te anere mataiti mua. Kua ripoti mai te tangata tuatua enua e te taote ko Luka no te au mema o te putuputuanga ngati Iuda i Berea, Ereni, “kua āriki ua oki ratou i te tuatua [mei ia Paulo raua ko Sila] ma te ngakau maora, e te kimi anga i te tuatua i tataia ra, i te tau anga oki i taua tuatua ra, kare e rā i tukua.”​—Angaanga 17:10, 11.

Kua akaputuputu katoa te au Kerititiano o te anere mataiti mua i roto i te au putuputuanga. (Angaanga 2:41, 42, 46; 1 Korinetia 1:1, 2; Galatia 1:1, 2; 2 Tesalonia 1:1) Te tika katoa ra te reira i teia tuatau. Te uipa ra te au putuputuanga a te Au Kite o Iehova no te au uipaanga tei akapapaia ei tauturu i te au tangata taki tai kia akavaitata atu kia Iehova e kia rauka te rekareka i roto i te tavinianga iaia. Te taokotai anga ma te Au Kite i reira e puapinga ke atu tona. I te mea te riro marie maira te au tangata mei te Atua ta ratou e akamori ra, te akaari ra te Au Kite o Iehova i te au tu​—noatu i roto i tetai tu kotinga ua​—te akaari ra a Iehova uaorai. No reira te tauturu maira te akaputuputuanga ma te Au Kite ia tatou kia kite meitaki atu ia Iehova.​—Ebera 10:24, 25.

Te riro ra ainei te reira ei angaanga maata i te kite ua anga i taua Peretana okotai ra? Te umuumuia ra te tautaanga. Inara kare ainei te reira e tika ana no te au mea e manganui i te oraanga ta taau e inangaro ra kia rauka? Ka akamanako ana i te tautaanga a tetai tangata oro meitaki no te terenianga. Ei akaraanga, te karanga ra te tangata tupaorooro aiti tei re i te metera auro Olympic Varani ko Jean-Claude Killy no runga i tei umuumuia ei tangata taemoemo tarekareka puapinga i te pa enua: “Ka akamata koe e 10 mataiti i mua atu i taua tuatau e kia parani i te reira no tetai au mataiti e ka akamanako ua i te reira i te au ra . . . E angaanga te pou ra e 365 ra  i te mataiti, i te pae manako e te kopapa.” Pouroa taua taime e te tautaanga i te taemoemo i roto i te oroanga penei ka pou i roto i te ngauru miniti! Mei teaa atura te maata​—e te puapinga mutu kore​—i te ka rauka mei te kiteanga ia Iehova.

Tetai Pirianga te Tupu Vaitata Ra

Koai te ka inangaro kia kore e puapinga mei tetai apinga maata i te oraanga? Kare okotai. No reira, me te kite ra koe e te ngere ra toou oraanga i te akakoroanga mou me kare me te anoano ra koe i tetai akamaramaanga i te tumu i tupu ei te mamae, kia akakoro ngaueue i reira i te kite ia Iehova, te Atua o te Pipiria. Te apiianga no runga iaia ka taui i toou oraanga e kia meitaki atu, ma te mutu kore.

Ka akamutu ainei tatou i te apii no runga ia Iehova? Ko te aronga tei tavini ana iaia no te ngauru mataiti te umere nei rai i ta ratou i apii no runga iaia e te au apinga ou ta ratou i apii tamou ua atu no runga iaia. Te apiianga no runga i taua au apinga ra te akamataora ra ia tatou e te akavaitata atura ia tatou kiaia. Kia aite to tatou au manako mei to Paulo rai, tei tata: “Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e! ‘Koai oki tei kite i te ngakau o te Atu? e koai ïa tana tumu korero?’”​—Roma 11:33, 34.

[Tataanga Rikiriki i Raro]

[Tataanga i te kapi 5]

Te ui nei rai te au tangata tataki tai i taua uianga puapinga: ‘Eaa oki toku akakoroanga i konei? Te aere nei au kiea? Eaa te akakoroanga o te oraanga?’

[Tataanga i te kapi 6]

“I te marama anga au ia Iehova ei peretana tikai, kua akavaitata atu au kiaia”

[Tataanga i te kapi 7]

“Te tavinianga ia Iehova ko te mataara meitaki roa atu ia o te oraanga. Kare atu e apinga e aiteite atu ki te reira. Te kiteanga ia Iehova kua oronga mai i te akakoroanga ki toku oraanga”