Irinakianga i Tetai Atua Penei Kare Tatou i Kite

E RUA i roto i te toru tangata i Tiamani te irinaki ra i te Atua. Inara, i te ui angaia i te tere atu i te tai tauatini kia akataka mai i te Atua ta ratou e irinaki ra, vaitata rai kua oronga mai te katoatoa i te pauanga tuketuke. “E au manako tuketuke to te au tangata Tiamani no te Atua mei te au tangata uaorai i tuketuke,” i ripoti mai ei te makatini nuti FOCUS. Koi akameitakiiai te irinakianga i te Atua, kare ainei i te mea tangi ua i te irinaki iaia ma te kore e kiteanga e mei teaa rai tona tu?

Te kiteaia ra teia manako papu kore i to te Atua tu tikai me kare peretana kare ua i Tiamani; te vaira te reira takapini ia Europa. Te akakite maira tetai tare anga tei raveia i Autiria, Peritane, e te Netarani i te tikaanga maata e e “mana teitei [te Atua] me kare e muna kare e rauka i te akatakaia.” Koia tikai i roto i te au mapu, e pera katoa te aronga te irinaki ra iaia, e muna ngaro tikai aia.

Kua Kite Tikai Ainei Koe i te Atua?

Te vaira te tukeanga maata i rotopu i te kiteanga i tetai tangata e te kite tikai iaia uaorai. Kia kite i tetai tangata​—e uanga ariki aravei koreia, e tangata oro meitaki, e tangata akatutu teata​—te aiteanga te kite ra e te vaira aia. Inara, kia kite tikai i tetai uaorai, e maata atu tona aiteanga. Te kapiti maira i te matauanga i te tu o taua tangata, te tu akono, te au manako ngakau, tei rekaia e tei kore i rekaia, e te au parani no te tuatau ki mua. Kia kite tikai i tetai uaorai te akanoo ra i tetai mataara kia rauka te pirianga vaitata kiaia.

Kua taopenga te au anere o te au tauatini ua atu tangata e kare e rava ua​—te kiteanga meangiti ua i te Atua​—me kare te kiteanga iaia. Kua tere atu ratou ki mua no te akono anga kia kite meitaki i te Atua. Kua kitea ainei e ratou ei mea puapinga? Kua iki tetai tangata ko Paul tona ingoa, e noo ra i te tua tokerau o Tiamani tei irinaki noa ua no runga i te Atua, i te kite meitaki Iaia uaorai. Te akamarama maira a Paul: “E kite meitaki ei i te Atua te anoanoia ra te tuatau e te tautaanga, inara e meitaki te au puapinga. Te raukaanga tetai pirianga vaitata ma Tei Anga te akariro ra i te oraanga i te au ra ei mea meitaki.”

Kua pauna ainei te tuatau e te tautaanga tei anoanoia i te kite meitaki tikai i te Atua? E tatau i te atikara e aru mai nei ine.

[Tataanga i te kapi 3]

Te vaira te tukeanga maata i te kiteanga i tetai tangata e te kite tikai iaia uaorai