Te Atarau​—Eaa Tona Ngai i Roto i te Akamorianga?

TE MANAKO ra ainei koe i te atarau e ko tetai tuanga puapinga i roto i taau akamorianga? No te manganui te aere ra ki te au ekaretia o Kerititome, penei te riro ra te atarau e ko tetai tuanga maata. Kua manako ana ainei koe i ta te Pipiria e akakite maira no runga i te taangaangaanga i te au atarau i roto i te akamorianga?

Ko te atarau mua tei taikuia i roto i te Pipiria koia oki ko tera tei akatuia e Noa no te oronga i te au atinga animara i te akaruke anga aia i te araka akaora i muri ake i te Tiruvi. *​—Genese 8:20.

Aru mai i te akaoripu angaia te au reo i Babela, kua akatotoaia te au tangata ravarai ki runga i te enua. (Genese 11:1-9) Ma to ratou inangaro i te akamori, kua kimi ravenga te au tangata no te akavaitata atu ki te Atua, tei matau koreia e ratou, te ‘kimianga’ iaia ma te kitea kore. (Angaanga 17:27; Roma 2:14, 15) Mei te taime mai o Noa e manganui te au tangata tei akatu i te au atarau ki to ratou au atua. Kua taangaanga te au akonoanga e te au tangata i te au atarau i roto i te akamorianga pikikaa. I te akatakake angaia mei te Atua mou, kua taangaanga etai i te au atarau no te au peu rikarika te kapitianga mai i te au tangata ei atinga, e pera te tamariki. I te akarukeanga ratou ia Iehova, kua akatu etai au ariki o Iseraela i te au atarau ki te au atua peikani, mei ia Baala rai. (1 Ariki 16:29-32) Inara akapeea te taangaangaanga i te au atarau i roto i te akamorianga mou?

Au Atarau e te Akamorianga Mou i Iseraela

I muri mai ia Noa, kua akatu tetai au tangata tiratiratu i te au atarau ei taangaanga i roto i ta ratou akamorianga i te Atua mou, ko Iehova. Kua akatu a Aberahama i te au atarau i Sekema, i tetai ngai vaitata i Betela, i Heberona, e ki runga i te Maunga Moria, i reira kua tuku atinga aia i tetai toa mamoe tei orongaia mai e te Atua ei tupau ia Isaaka. I muri mai, kua akatu ua a Isaaka, Iakoba, e Mose i te au atarau ei taangaanga i roto i ta ratou akamorianga i te Atua.​—Genese 12:6-8; 13:3, 18; 22:9-13; 26:23-25; 33:18-20; 35:1, 3, 7; Exodo 17:15, 16; 24:4-8.

I te oronga anga te Atua ki te iti tangata Iseraela i tana Ture, kua akaue aia e kia akatu ratou i tetai tapenakara, e puakapa tari aere, tei tapa katoaia ko “te Are uipaanga,” e ko tetai tuanga maata o te akanoonooanga no te aere atu kiaia. (Exodo 39:32, 40) Kua rauka i te tapenakara, me kare te puakapa, e rua nga atarau. Tetai no te au atinga karakaratio,  tei maaniia mei te au rakau titima e kua vaiia ki te veo, kua akanooia ki mua atu i te ngai tomoanga e kua taangaangaia no te oronga i te au atinga animara. (Exodo 27:1-8; 39:39; 40:6, 29) Te atarau no te atinga kakara, e rakau titima katoa inara kua vaiia ki te auro, kua tukunaia ki roto i te tapenakara, ki mua i te paruru o te Ngai Tapu. (Exodo 30:1-6; 39:38; 40:5, 26, 27) Kua tutungiia te atinga kakara ki runga i te reira e rua taime i te ra, i te popongi e te aiai. (Exodo 30:7-9) Kua aru katoa te iero tamou tei akatuia e te Ariki ko Solomona i taua parani o te tapenakara, ma nga atarau e rua.

“Te Puakapa Mou” e te Atarau Akatutu Ua

I te oronga anga a Iehova i te Ture kia Iseraela, e maata atu tana i oronga i te au ture kia akonokono i te au oraanga o tona iti tangata e to ratou aere anga atu kiaia na roto i te atinga e te pure. Kua akatutu mai te maata anga i tona au akanoonooanga tei tapaia e te apotetoro ko Paulo “ko te tutu ïa,” “e akatauanga te reira,” me kare “e ata anake no te ka tupu a muri atu.” (Ebera 8:3-5; 9:9; 10:1; Kolosa 2:17) Tera te aiteanga, kare anake e kua arataki te au tu e manganui o te Ture i te au Iseraela e tae roa ki te aerenga mai o te Karaiti pera katoa te akaata maira i ta te Atua au akakoroanga kia akatupuia na roto ia Iesu Karaiti. (Galatia 3:24) Ae, e puapinga i te pae totou anga to te au tu o te Ture. Ei akatauanga, te mamoe Pasa, te toto o te reira kua taangaangaia ei akairo o te ora no te au Iseraela, te akatutu maira ia Iesu Karaiti. Koia te “te Punua-mamoe a te Atua, ko tei apai ke atu i te ara a to te ao,” tona toto kua akamaringiia ei akarangatira ia tatou mei te ara.​—Ioane 1:29; Ephesia 1:7.

E manganui te au apinga te piri atura ki te tapenakara e te angaanga iero te akatutu maira i te au mea tikai i te pae vaerua. (Ebera 8:5; 9:23) Ko te tika, kua tata a Paulo no “te puakapa mou, ta te Atu i patia, kare ta te tangata.” Te na ko ra aia: “Ko te Mesia ra i tae maira ei taunga maata no te au mea memeitaki a muri nei, i roto i te Are maata e te meitaki rava, kare i angaia e te rima ra, kare te mea no teianei ao.” (Ebera 8:2; 9:11) “Te Are maata e te meitaki rava” ko ta Iehova akanoonooanga o te iero maata i te pae vaerua. Te akakite maira te au reo o te Tuatua Tapu no te iero maata i te pae vaerua e akanoonooanga na roto i te reira ka rauka i te au tangata i te aere atu kia Iehova tei tau i te atinga tarangaara o Iesu Karaiti.​—Ebera 9:2-10, 23-28.

Te apiianga mei te Tuatua a te Atua te akatutu maira i etai o te au mea o te Ture e tei akatakaia mai, te au tu tika tikai i te pae vaerua e te puapinga maata, papu tikai te akamaroiroi ra i te akarongo i roto i te au akauruanga o te Pipiria. Te akamaata katoa ra te reira i te tu arikianga no te pakari tu-Atua tei akakite takakeia mai i roto i te au Tuatua Tapu.​—Roma 11:33; 2 Timoteo 3:16.

E totou puapinga katoa to te atarau no te atinga karakaratio. I te akaraanga te komono maira te reira i to te Atua “inangaro,” me kare tona tu puareinga i te ariki i to Iesu atinga tangata apa kore.​—Ebera 10:1-10.

I muri mai i roto i te puka Epera, kua akakite mai a Paulo i teia tuatua umereia: “E atarau ta tatou, ko tei kore rava e tau i te aronga e akamori ki roto i te puakapa ra kia kai.” (Ebera 13:10) Ko teea atarau tana e tuatua ra?

E manganui te aronga uri Katorika te tuatua ra e ko te atarau tei taikuia ia Ebera 13:10 ko tera tei taangaangaia no te Eucharist, te “tia anga” na roto i te reira kua tuatuaia e kua akaouia to Karaiti atinga i te tuatau o te Oroa. Inara ka kitea uaia e koe mei te aerenga manako  e ko te atarau ta Paulo e uriuri ra e mea akatutu ua. E manganui te aronga kite te tuatua ra e e akatutu ua taua “atarau” i roto i teia aerenga manako. I na Giuseppe Bonsirven ei e Jesuit, “te akatika apa kore ra teia i te au mea akatutu anga o te au reta [ki te au Epera].” Kua tata aia: “I roto i te reo Kerititiano, te tuatua ‘atarau’ i te akamata anga te taangaangaia ra i te pae vaerua e i muri ake ia Irenaeus, e koia tikai i muri ake ia Tertullian raua ko St. Cyprian, kua uriia te reira e ko te oroa e tei taka meitaki tikai ki te kaingakai oroa.”

Mei tei taikuia e tetai makatini Katorika, kua totoa atu te taangaanga i te atarau i roto i te “tuatau o Constantine” ma te “akatuanga o te au are pure.” Kua akakite katoa te Rivista di Archeologia Cristiana (Akara Akaou a te Kimikimianga Taito Kerititiano) e: “Kua papu no nga anere mataiti e rua, kare e rauka i tetai i te tuatua i tetai ngai tamou no te akamorianga mari ra te au akaputuputuanga akamorianga tei raveia i roto i te au are o etai ke . . . , te au pia i te openga o te akamori anga, kua taui vivikiia ki tona au tu i mua ana.”

Ta Kerititome Taangaangaanga i te Atarau

“Te atarau,” i akakite ei tetai tianara Katorika La Civiltà Cattolica “ko te ngai maata ia kare ua e no te are pure pera katoa no te Ekaretia tikai.” Inara, kare rava a Iesu Karaiti i akanoo ana i tetai oroa akonoanga e kia raveia ki runga i tetai atarau; kare katoa aia i akaue ana i tana au pipi kia rave i te au oroa na te taangaanga anga i tetai. Ta Iesu taikuanga i tetai atarau ia Mataio 5:23, 24 e i tetai ngai ke te taiku ra ki te au raveanga akonoanga tei matauia i roto i te au ngati Iuda, inara kare aia i akakite ana e kia akamori tana au pipi i te Atua na te taangaanga anga i tetai atarau.

Kua tata tetai tata tuatua enua ko George Foot Moore (1851-1931), e: “Te aiteite ua ra te au tu maata o te akamorianga Kerititiano, inara kare i roa ana kua akamaataia te au peu ngoie ua tei akatakaia mai e Justin i rotopu i te rua anere mataiti ei peu akamorianga mekameka e te umereia.” Te au peu Katorika e te au oroa akonoanga a te papuriki kua maata tikai e te ngata e kua akanooia kia apiiia​—te peu​—i roto i te au apiianga Katorika. Te karanga ra a Moore: “Ko teia tu, te kiteaia ra i roto i te au peu katoatoa, kua akatotoa maataia e te akamanaanga a te Koreromotu Taito i te manako angaia te au orometua Kerititiano e ko ratou te mono ra i te ngai o te kau taunga o te akanoonooanga akonoanga i mua ana. Te au kakau kaka rava o te taunga maata, te au pereue akonoanga o tetai atu au orometua, te tereanga ki mua ma te pakari, te au pupu imene Levi te atu ra i te au taramo, te auai kakara mei te au apinga apai kakara e ruruia ra​—te akaraanga e au tutu tu-Atua katoatoa ia no te akamorianga mou, tei akatika i te ekaretia kia akaaiteite i te tu kaka o te au peu taito.”

Penei ka poitirere koe i te kite e manganui te au peu, te au oroa, te au pereue no te oroa, e tetai atu au apinga tei taangaangaia i roto i te akamorianga e te au ekaretia tuketuke te aru ra, kare i te au apiianga Kerititiano o te Evangeria, mari ra i te au raveanga e te au peu a te au ngati Iuda e te au peikani. Te akakite ra te Enciclopedia Cattolica no te Akonoanga Katorika “kua rauka mai te taangaanga i te atarau mei te Akonoanga ngati Iuda e i tetai tuanga mei te Akonoanga Peikani.” Kua tata a Minucius Felix, e tangata paruru o te toru anere mataiti T.N., e kare o te au Kerititiano ‘au iero e kare e au atarau.’ Te akakite katoa ra te tikitinari enetaikoropitia Religioni e Miti (Au Akonoanga e te Au Peu) e: “Kua kopae te au Kerititiano mua i te taangaanga i te atarau ei akatakake ia ratou uaorai mei te ngati Iuda e te akamorianga peikani.”

No te mea kua akatumuia te Akonoanga Kerititiano ki runga i te au kaveinga tei tau kia arikiia e kia taangaangaia i te au ra ravarai o te oraanga e i roto i te au enua ravarai, kare i anoanoia tetai oire tapu i te enua nei, me kare no tetai iero tikai ma te atarau, me kare no te au orometua tangata ma tetai turanga takake tei akataka keia e te au pereue tukeke. “Kua vaitata te ora e,” i na Iesu ei, “kare kotou e akamori i te Metua i teianei maunga, e kare rai oki i Ierusalema. . . . e akamori ei i te Metua te aronga akamori tika ra, ma te vaerua e te tuatua-mou.” (Ioane 4:21, 23) Te tu ngata o te au peu e te taangaangaanga i te au atarau i te tuanga o te au ekaretia e manganui te kopae ra i ta Iesu i tuatua no runga i te mataara e akamoriiai te Atua mou.

[Tataanga Rikiriki i Raro]