‘Kia Maroiroi e kia Matutu!’

“Ka akamaroiroi ra, kua riro te re o teianei ao iaku.”​—IOANE 16:33.

1. Te manako anga i tei tapapa atu i to Iseraela i Kanaana, eaa te akamaroiroianga tei rauka ia ratou?

I TE vaitata anga to Iseraela i te tikoti i te Kauvai Ioridana ki roto i te Enua Taputouia, kua akakite atu a Mose kia ratou: ‘Kia maroiroi, e kia ketaketa roa, auraka e ngarangara, auraka rava e mataku ia ratou: ko to Atua oki ko Iehova, koia uaorai te aere katoa nei i vaitata ia koe.’ I reira kua kapiki atu a Mose ia Iosua, ko te ka arataki i to Iseraela ki roto ia Kanaana, e kua ripiti akaou kiaia i te akoanga kia maroiroi. (Deuteronomi 31:6, 7) I muri mai, kua akamaroiroi a Iehova uaorai ia Iosua, i te na ko anga: ‘Kia maroiroi koe, e kia matutu . . . Kia maroiroi ra, e kia maata rava te matutu.’ (Iosua 1:6, 7, 9) Kua tau tikai taua au tuatua. Ka anoano to Iseraela i te tu akamaroiroi kia aro atu i te au enemi ririnui e tapapa maira ia ratou i tetai tua o Ioridana.

2. Eaa te turanga te kite nei tatou ia tatou uaorai i roto i teia tuatau, e eaa ta tatou e anoano ra?

² I teia tuatau, ka tikoti atu te au Kerititiano mou kare e roa atu ki roto i te enua ou tei taputouia mai e, mei ia Iosua rai, te anoanoia ra kia maroiroi. (2 Petero 3:13; Apokalupo 7:14) Inara, te tuke ra to tatou turanga mei to Iosua ra. Kua tamaki atu a Iosua ma te au koke e te au korare. Te tamaki nei tatou i te tamakianga pae vaerua e kare rava e taangaanga tikai ana i te au apinga tamaki. (Isaia 2:2-4; Ephesia 6:11-17) Pera katoa, kua tamaki atu a Iosua i te au tamakianga kino tikai e pera i muri ake i te tomoanga ki roto i te Enua Taputouia. Inara te kite nei tatou i ta tatou au putotoanga kino roa atu i teianei​—i mua ua ake ka tomo atu ei tatou ki roto i te ao ou. Ka akara ana tatou i etai au turanga te umuumuia ra te tu akamaroiroi.

Eaa ra Tatou ka Putoto Ua Atu Ei?

3. Eaa ta te Pipiria e akakite maira no tei patoi maata ia tatou?

³ Kua tata te apotetoro ko Ioane: “Kua kite oki tatou e no te Atua tatou, e te vai ua nei rai to te ao ravarai i raro ake i taua vaerua kino ra.” (1 Ioane 5:19) Te akaari maira taua au tuatua i te tumu i putoto ua atu ei te au Kerititiano no te akono tamou i to ratou akarongo. Me akono tetai Kerititiano i tona tu tau tikai, i tetai tuanga e autu anga ia kia Satani te Tiaporo. No reira, te aaere ra a Satani mei te “liona ngunguru ra” te tauta anga i te tamataku e te apuku i te au Kerititiano tiratiratu. (1 Petero 5:8) E tikai, te tamaki ra aia i te au Kerititiano akatainuia e to ratou au oa. (Apokalupo 12:17) I roto i teia tamakianga, kua taangaanga aia i te au tangata tei kite me kare tei kore i kite i te akono atu i tana au akakoroanga. Ka anoanoia te tu akamaroiroi kia tu ngaueue kore i te patoi ia Satani e tona au rima rave katoatoa.

4. Eaa ta Iesu akamatakiteanga i oronga, inara eaa te tu tei akaariia e te au Kerititiano mou?

⁴ I te mea kua kite a Iesu e ka tauta pakari a Satani e tona au rima rave i te patoi i te tuatua meitaki, kua akamatakite atu Aia i tana au pipi: “E tuku ei ia kotou no te mate, e ka tamate ravaia kotou; e e makitakitaia mai kotou e te pa enua ravarai i toku nei ingoa.” (Mataio 24:9) Kua tupu tikai taua au tuatua i te anere mataiti mua, e te tika katoa nei ratou i teia tuatau. E tikai, ko etai tu  takinokinoanga tei akono tamou marieia e etai Au Kite no Iehova i teia tuatau e mea kino roa tikai i roto i te tuatua enua. Noatu rai, te maroiroi ra te au Kerititiano mou i roto i te aro anga atu i taua taomianga. Kua kite ratou e “rokoia e te ii tei mataku i te tangata ra,” e kare ratou e inangaro kia opuia atu ki roto i te puereere.​—Maseli 29:25.

5, 6. (a) Eaa te au turanga te umuumuia ra no te tu akamaroiroi i ta tatou tuanga? (e) Akapeea te au Kerititiano tiratiratu i te ariu anga atu me timataia to ratou tu akamaroiroi?

⁵ Te vai atura tetai mai au akaaoanga i te pae mai i te takinokinoanga te umuumu ra tatou i te tu akamaroiroi. No etai, te tuatuaanga ki te aronga ke i te tuatua meitaki e akaaoanga ia. Te timataia ra te tu akamaroiroi o etai tamariki apii me kapikiia ratou kia tuatua taokioki i te tia tiratiratu ki te enua me kare ki te reva. I te mea e tuatua akonoanga taua tia ra, kua iki papu te au tamariki Kerititiano ma te mataku kore i te rave i te ka akamareka i te Atua, e kua riro to ratou rekoti meitaki ei mea pumaana anga.

⁶ Ka anoano katoa tatou i te tu akamaroiroi me akakeu te aronga patoi i te akakitekite anga nuti kia akatotoa i te au ripoti kino no runga i to te Atua au tavini, me kare me tauta ratou i te arai i te akamorianga mou na te rave kikite anga i te “takinga-kino na runga i te ture.” (Salamo 94:20) Ei akaraanga, eaa to tatou manako me ripoti mai te nutipepa, te ratio, me kare te tivi i te au manako tarevake me kare te au tuatua pikikaa no runga i te Au Kite o Iehova? Ka tau ainei tatou kia poitirere? Kare. Te tapapa ra tatou i taua au mea. (Salamo 109:2) E kare tatou e poitirere ana me irinaki etai i te au tuatua pikikaa tei neneiia e te au manako tarevake, i te mea “te akarongo ra te kite kore i te au tuatua katoa ra.” (Maseli 14:15) Noatu rai, ka patoi te au Kerititiano tiratiratu i te irinaki i tetai ua atu tuatuaanga te akakiteia ra no runga i to ratou au taeake, e papu kare ratou e akatika i te akakiteanga kino ki te katoatoa kia akakeu ia ratou kia kore e aere ki te au uipaanga Kerititiano, kia kore e aere putuputu ki roto i te angaanga tutuanga, me kare kia akaparuparu i to ratou akarongo. Ei tukeanga, te “akakite ua nei ra [ratou] ia [ratou] uaorai e e rave angaanga na te Atua . . . i te teitei, e te akaaka, i te rongo kino, e te rongo meitaki: mei [tei tau ki te aronga patoi] te aronga pikikaa ra, e [i te tikaanga e e] aronga tuatua-mou ra.”​—2 Korinetia 6:4, 8.

7. Eaa te au uianga kimikimi ka tau tatou kia ui kia tatou uaorai?

⁷ Kua tuatua a Paulo, i te tataanga kia Timoteo, e: “Kare oki i te ngakau kopē ta te Atua i oronga mai no tatou; te ngakau maroiroi ra . . . Eiaa koe e akama i te tuatua-akakite a to tatou Atu.” (2 Timoteo 1:7, 8; Mareko 8:38) I te tatau anga i taua au tuatua, ka ui tatou kia tatou uaorai: ‘Te akama ra ainei au i toku akarongo, me kare te maroiroi ra ainei au? I taku ngai angaanga (me kare te aere ra ki te apii), te akakite ra ainei au ki te aronga takapini mai iaku e e Kite au no Iehova, me kare te uuna ra ainei au i te tika? Te akama ra ainei au no te tuke anga mei tetai ke, me kare te ngakau parau ra ainei au i te tu tuke anga no toku pirianga ma Iehova?’ Me te manako papu kore ra tetai tangata no te tutu aerenga i te tuatua meitaki me kare i te tu ua ma te tuke, kia akamaara aia i ta Iehova akoanga kia Iosua: ‘Kia maroiroi e kia matutu.’ Auraka rava e ngaropoina, kare ko te  manako o to tatou au oa angaanga me kare to tatou au oa apii te mea puapinga atu mari ra to Iehova manako e to Iesu Karaiti.​—Galatia 1:10.

Akapeea me Tatanu i te Tu Akamaroiroi

8, 9. (a) I tetai atianga, akapeea te tu akamaroiroi o te au Kerititiano mua i te timata angaia? (e) Akapeea a Petero raua ko Ioane i te ariu anga atu noatu te au tamatakuanga, e eaa ta raua e to raua au taeake i kite atu?

⁸ Akapeea e raukai ia tatou i te tatanu i te tu akamaroiroi te ka akariro ia tatou kia akono i to tatou tu tau i teia au tuatau ngata tikai? Ina, akapeea te au Kerititiano mua i te tatanu anga i te tu akamaroiroi? Ka akamanako ana i tei tupu i te tuatua anga te kau taunga nunui e te aronga pakari i Ierusalema kia Petero raua ko Ioane auraka e tutu aere ra na roto i to Iesu ingoa. Kua patoi nga pipi e kua tamatakuia e oti akera kua tukunaia kia aere. I reira, kua kapiti atu raua ki te au taeake, e kua pure kapiti ratou katoatoa, i te na ko anga: “E akara mai koe, e te Atu, i ta ratou nei akamataku anga mai, e akamaroiroi mai i to au tavini kia tuatua ua i taau tuatua ma te mataku kore.” (Angaanga 4:13-29) I te pau anga atu, kua akaketaketa a Iehova ia ratou ma te vaerua tapu, e mei tei akatikaia e te au arataki ngati Iuda i muri maira, kua “[aka]ki rava [ratou ia] Ierusalema” ma ta ratou apiianga.​—Angaanga 5:28.

⁹ Ka akara ana tatou i tei tupu i taua atianga. I te tamatakuangaia te au pipi e te au arataki ngati Iuda, kare ratou i manako ana i te tuku ua atu i raro ake i te taomianga. Mari ra, kua pure te au pipi no te tu akamaroiroi kia tutu aere ua atu. E oti kua rave ratou ma te rotai ma ta ratou pure, e kua akaketaketa a Iehova ia ratou ma tona vaerua. Te akaari maira to ratou tupuanga i ta Paulo i tata no etai mataiti i muri maira i roto i tetai aerenga manako tuke te tau ra ki te au Kerititiano me takinokino ia ratou. Kua tuatua a Paulo: “E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:13.

10. Akapeea to Ieremia tupuanga i te tauturu i te aronga tu akama?

¹⁰ Ka tamanako ana, i reira, i te tangata tu akama tikai. Ka rauka ainei iaia i te tavini ia Iehova ma te mataku kore noatu te patoianga? Papu tikai! Ka akamaara ana i to Ieremia manako i te iki anga a Iehova iaia ei peroveta. Kua tuatua te mapu tane: “E tamaiti ua oki au nei.” Te taka meitaki ra, kua manako aia e kare i tau tikai. Noatu rai, kua akamaroiroi atu a Iehova iaia ma teia au tuatua: “Aua koe e karanga e, E tamaiti ua au: e aere ra koe ia ratou katoa e tonokia koe e au ra; e ko te au mea katoa taku e akaue kia koe ra, ko taau ïa e tuatua. Auraka e mataku i to ratou mata: ei vaitata katoao au ia koe ei akaora, ia koe.” (Ieremia 1:6-10) Kua irinaki papu tikai a Ieremia ia Iehova, e tei tupu mai, i roto i to Iehova tu ketaketa kua autu aia i tona tu emiemi e kua riro atura ei kite akakite maroiroi i roto ia Iseraela.

11. Eaa te tauturu ra i te au Kerititiano i teia tuatau kia riro mei ia Ieremia rai?

¹¹ Kua rauka katoa i te au Kerititiano akatainuia  i teia tuatau tetai akauenga aiteite ki ta Ieremia, e te turuturuia ra e te “aronga maata rava” o te “mamoe ke atu,” kua akakite ua atu ratou i to Iehova au akakoroanga, noatu te tangi kore, te avirianga, e te takinokinoanga. (Apokalupo 7:9; Ioane 10:16) Te akamanako ra ratou i ta Iehova au tuatua kia Ieremia: “Auraka e mataku.” Kare rava ratou e ngaropoina ana e kua akaueia ratou e te Atua e te tutu aere ra i tana tuatua.​—2 Korinetia 2:17.

Au Akaraanga o te Tu Akamaroiroi te Tau ra kia Aruia

12. Eaa te akaraanga meitaki roa o te tu akamaroiroi ta Iesu i oronga mai, e akapeea aia i te akamaroiroi anga i tana au pipi?

¹² Ka tauturuia tatou i roto i ta tatou aruaruanga no te akatupu i te tu akamaroiroi me akamanako tatou i te au akaraanga o etai ke, mei ia Ieremia rai, kua rave angaanga ma te maroiroi. (Salamo 77:12) Ei akaraanga, ia tatou e akara meitaki ra i ta Iesu angaanga orometua, kua umere tatou no tona mataku kore i tona timata angaia e Satani e i tona aro anga atu i te tu patoitoi o te au arataki ngati Iuda. (Luka 4:1-13; 20:19-47) I roto i to Iehova tu ketaketa, kare rava a Iesu i akangaueueia ana, e kare i roa i mua ua ake i tona matenga, kua tuatua aia ki tana au pipi: “E tumatetenga to kotou i teianei ao: ka akamaroiroi ra, kua riro te re o teianei ao iaku.” (Ioane 16:33; 17:16) Me aru te au pipi a Iesu i tona akaraanga, ka riro katoa te re kia ratou. (1 Ioane 2:6; Apokalupo 2:7, 11, 17, 26) Inara ka anoanoia ratou kia “akamaroiroi.”

13. Eaa te akamaroiroianga ta Paulo i oronga no to Philipi ra?

¹³ I etai mataiti i muri mai i to Iesu matenga, kua tiriaia a Paulo raua ko Sila ki roto i te are auri i Philipi. I muri mai, kua akamaroiroi a Paulo i te putuputuanga i Philipi kia “tāpu meitaki ra kotou ma te vaerua okotai, e te ngakau okotai, i te uapou anga kotou ravarai i te akarongo i te evangelia nei: E auraka rava e vi i to [ratou] au enemi.” Kia akaketaketa ia ratou no teia, kua tuatua a Paulo: “E [no te au Kerititiano i te takinokino angaia e] akairo vai ua ïa te reira no [te aronga takinokino], kareka ia kotou, e akairo ora ïa, te ora no ko mai i te Atua ra. E mea orongaia mai oki ia kotou ia Iesu Mesia nei, to kotou mate iaia ra, auraka te akarongo anake ua ra.”​—Philipi 1:27-29.

14. Eaa tei tupu i Roma mei to Paulo tu mataku kore?

¹⁴ I te tataanga a Paulo ki te putuputuanga i Philipi, tei roto akaou aia i te are auri, teia taime i Roma. Noatu rai, kua tutu aere ua atu aia ma te mataku kore ki tetai ke. Eaa te tupuanga? Kua tata aia: “E kua kitea oki toku nei tapeka angaia i te Mesia nei e kako rava ake te are ariki, e te au ngai katoa nei; E manganui to te au taeake i te Atu nei, tupu akenei to ratou kite, ko au i tapekaia nei, kua maata atura to ratou maroiroi kia apii i te tuatua ma te mataku kore.”​—Philipi 1:13, 14.

15. Ka kitea e tatou kiea te au akaraanga meitaki o te akarongo te ka akaketaketa i to tatou tautaanga kia maroiroi?

¹⁵ Te akamaroiroi ra to Paulo akaraanga ia tatou. Pera katoa te au akaraanga meitaki tei akarukeia mai e te au Kerititiano o teia tuatau tei tamou marie i te takinokinoanga i roto i te au enua i raro ake i te tutaraanga e okotai akaaere me kare a te orometua. Kua ripotiia mai te au tua o teia e manganui i roto i te au makatini Punanga Tiaki e te Awake! e i roto i te Yearbooks of Jehovah’s Witnesses. Ia koe e tatau ra i taua au tua, e akamaara ko te aronga te akakiteia ra to ratou au tua e au tangata noa ua mei ia tatou rai; inara i te o anga atu ratou ki roto i te au turanga ngata, kua oronga atu a Iehova i te mana maata kia ratou e kua tamou marie ratou. Ka papu ia tatou e ka rave  akapera aia no tatou me tupu te au turanga mei te reira.

Akamareka e te Akangateitei ra to Tatou Maroiroi ia Iehova

16, 17. Akapeea tatou i teia tuatau i te akatupuanga i te tu maroiroi?

¹⁶ Me tu ngaueue kore tetai no te tuatua mou e te tuatua tika, e tu maroiroi tikai te reira. Me rave tetai noatu te manako mataku, e tu maroiroi maata atu te reira. E tikai, ka riro tetai ua atu Kerititiano e kia maroiroi me te inangaro tikai ra aia i te rave i to Iehova anoano, me aruaru aia i te vai tiratiratu, me irinaki tamou ua aia i te Atua, e me akamaara ua aia e kua akaketaketa ana a Iehova i mua ana i te au tangata tataki tai e manganui mei iaia rai. Pera katoa, me kite tatou e te akamareka ra e te akangateitei ra to tatou tu maroiroi ia Iehova, ka aruaru maata ua atu tatou kia kore e akaparuparuia. Ka papa ua tatou i te akono tamou marie i te aviri me kare i tei kino roa atu no te mea te inangaro oonu ra tatou iaia.​—1 Ioane 2:5; 4:18.

¹⁷ Auraka rava e ngaropoina me mamae tatou no to tatou akarongo, kare te aiteanga e kua rave tatou i tetai apinga tarevake. (1 Petero 3:17) Te mamae ra tatou no te turuanga i to Iehova mana ngateitei, no te raveanga i te meitaki, e no te kore i riro e ko tetai o teia ao. I roto i teia tu, te tuatua ra te apotetoro ko Petero: “Kia mate ra kotou ma te akono meitaki, ka akakoromaki ei kotou, e mea meitaki ïa i te Atua.” Kua tuatua katoa a Petero e: “Ko te aronga i mate i te inangaro o te Atua ra, ka tuku i to ratou au vaerua kiaia i te Atu mou, ma te rave i te tuatua mei taki.” (1 Petero 2:20; 4:19) Ae, te akamareka ra to tatou akarongo i to tatou Atua aroa ua, ko Iehova, e te akangateitei ra iaia. Mei teaa ra tetai tumu ririnui kia vai maroiroi!

Tuatuaanga ki te Au Mana Akaaere

18, 19. Me akono tatou i te tu akamaroiroi ki mua i te akava, eaa ta tatou tuatua, mei tera te tu, e akakite ra?

¹⁸ I te akakiteanga a Iesu ki tana au pipi e ka takinokinoia ratou, kua tuatua katoa aia: “Ka tuku oki [te tangata] ia kotou ki te sunederi, e pāpā oki ia kotou i roto i to ratou au sunago; E noku nei e taki naiaʼi kotou ki mua i te aroaro o te au tutara, e te ui ariki, ei kite no ratou, e no te au etene.” (Mataio 10:17, 18) Kia aere atu ki mua i tetai akava me kare tetai tutara no te au akaapaanga pikikaa te anoanoia ra te tu akamaroiroi. Noatu rai, me taangaanga mataku kore tatou i taua atianga i te akakite ki taua aronga tataki tai, te akariro ra tatou i tetai turanga ngata ei tuatau no te akatupuanga i tetai apinga puapinga maata. Tera te aiteanga, te akakite ra tatou ki tei akava mai ia tatou i te au tuatua a Iehova, tei rekotiia i roto ia Salamo rua: “E tenana, e te ui ariki ra, kia pakari kotou; e āriki i te ako, e te au akava o te enua nei. E akamori ia Iehova ma te mataku.” (Salamo 2:10, 11) E putuputu te taime, me akaapa pikikaaia te Au Kite o Iehova i roto i te ngai akavaanga, kua turu te au akava i te rangatira o te akamorianga, e te ariki meitaki ra tatou i te reira. Inara, kua akatika etai au akava ia ratou uaorai kia akakeuia e te aronga patoi. Ki taua aronga ra, te karanga ra te Tuatua Tapu: “E āriki i te ako.”

¹⁹ Ka tau te au akava kia kite e ko te ture teitei  roa atu ko ta te Atua ko Iehova. Ka tau ratou kia akamaara e e apainga ta te au tangata katoatoa, kapiti mai i te au akava, ki te Atua ko Iehova e Iesu Karaiti. (Roma 14:10) Ia tatou, me te rauka ra ia tatou te tuatua tau i nga rima o te au akava tangata me kare ra, e tumu ta tatou kia akamaroiroi no te mea te turu maira a Iehova ia tatou. Te karanga ra te Pipiria: “E ao to te aronga e irinaki iaia.”​—Salamo 2:12.

20. Eaa ra tatou ka mataora ei me tamou marie tatou i te takinokinoanga e te pikikaa?

²⁰ I te Tuatua i te Maunga, kua karanga a Iesu: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao ra: i pera oki ratou i te takinga-kino i te aronga peroveta, ko mua ïa ia kotou.” (Mataio 5:11, 12) E tika, kare e tau ana te takinokino, inara e tumuanga rekareka ia to tatou tu ngaueue kore anga noatu te takinokino, kapiti mai te au ripoti pikikaa i roto i te akakitekiteanga nuti. Tera te aiteanga te akamareka ra tatou ia Iehova e ka rauka te tutakianga. Te akaari katoa ra to tatou turanga maroiroi e e akarongo tikai to tatou e te akapapu maira kia tatou i to te Atua tu mareka. E tikai, te akaari maira e e irinaki pu tikai to tatou ia Iehova. E puapinga tikai taua tu irinaki no tetai Kerititiano, mei ta te atikara e aru mai nei e akaari maira.

Eaa Taau i Kite?

• Eaa te au turanga i teia tuatau te umuumuia ra no te tu akamaroiroi?

• Akapeea tatou me tatanu i te tu akamaroiroi?

• Koai ma etai au akaraanga meitaki o te tu akamaroiroi?

• Eaa ra tatou ka anoano ei kia rave ma te tu akamaroiroi?

[Au Uianga Apii]

[Au Tutu i te kapi 9]

Ko Simone Arnold (teianei ko Liebster) i Tiamani, Widdas Madona i Maraui, e Lydia raua ko Oleksii Kurdas i Ukarania kua akaari i te tu akamaroiroi e kua patoi atu i tei kino

[Au Tutu i te kapi 10]

Kare tatou e akama i te tuatua meitaki

[Tutu i te kapi 11]

Kua akamaata atu to Paulo tu akamaroiroi i roto i te are auri i te tuatua meitaki

[Tutu i te kapi 12]

Me akamarama maroiroi tatou i to tatou turanga i te pae Tuatua Tapu ki te akava, te akakite ra tatou i tetai tuatua puapinga