“Kua Kitea e Au te Au Mea Katoa Taku i Anoano Ra”
“Kua Kitea e Au te Au Mea Katoa Taku i Anoano Ra”
KO TE taitaia, kia tau ki tetai ripoti a te World Health Organization, tei tamanakoia i teianei te rokoia nei e tere atu i te 120 mirioni tangata i te ao katoa. I te au mataiti tataki tai, e tai mirioni tangata tei tamate ia ratou uaorai e i rotopu i te 10 e te 20 mirioni e tamata ana i te takore i to ratou oraanga. Eaa ra te tauturu e vaira no te aronga te mamae nei i te taitaia? Penei ka akaiti mai te rapakau anga maki i te mamae, e te turu anga i te pae manako ngakau e puapinga ia. Pera katoa, ko etai tei kite i taua au manako kua kite i tetai tauturu ke atu i roto i te au puka akatumuia ki runga i te Pipiria na te Au Kite o Iehova, mei ta te reta e aru mai nei no Varani e akaari maira.
“Kare i roa ake nei, kare au i kite ana i te tumu kia ora ua atu. Kua pure au ki te Atua kia tuku iaku kia mate. Mei te mea rai e kua mate a roto iaku. Te kimi anga i te arataki anga, kua pure akatenga au kia Iehova. Kua iki katoa au i te tatau i te 2002 Yearbook of Jehovah’s Witnesses e toru ra i oti ei te reira. Ka karanga au e kua akamaroiroi maata tikai te reira iaku e kua akaketaketa i toku akarongo.
“Kua rave au i tetai kimikimi anga i roto i te au makatini Punanga Tiaki e te Awake!, e kua poitirere tikai au! E tatau putuputu ana au i teia au makatini tere atu i te 15 mataiti, inara kare roa au i kite ana e mei teaa rai te akamaroiroi anga e te akaoraora anga tikai o te au atikara. Kua ki ratou i te aroa—e tu tei iti roa i teia tuatau. Kua kitea e au te au mea katoa taku i anoano ra.”
Te karanga ra te Pipiria e: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:18) Kare e ekoko anga, e ko te katoatoa tei “ngakau paruparu ra” me kore te “ngakau taitaia” ra ka kitea mai te akamaroiroianga e tetai manakonako anga i te tuatau ki mua i roto i te Pipiria. Te tua nei te Au Kite o Iehova i te au puka akatumuia ki runga i te Pipiria kia tauturu i te aronga tei anoano kia puapingaia mei taua tumu akauruia ra i te tu-Atua no te pumaana anga.